ပြည်ထောင်စုသမ္မတမြန်မာနိုင်ငံတော်အစိုးရအလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန
အမိန့်ကြော်ငြာစာအမှတ်(၁၉၆/၂၀၂၀)
၁၃၈၂ ခုနှစ်၊ တော်သလင်းလဆန်း ၈ ရက်
၂၀၂၀ ပြည့်နှစ်၊ စက်တင်ဘာလ ၂၄ ရက်
၁။ ရန်ကုန်တိုင်းဒေသကြီးအတွင်း Coronavirus Disease 2019(COVID-19) ရောဂါ ကူးစက်ပျံ့နှံ့မှုကို ပိုမိုထိရောက်စွာ ကာကွယ်ထိန်းချုပ်နိုင်ရေးအတွက် ကျန်းမာရေးနှင့်အားကစားဝန်ကြီးဌာနမှ ၂၀-၉-၂၀၂၀ ရက်နေ့တွင် အမိန့်အမှတ်(၁၀၇/၂၀၂၀) နှင့် ၂၂-၉-၂၀၂၀ ရက်နေ့တွင် အမိန့်အမှတ်(၁၀၈/၂၀၂၀)တို့ကို ထုတ်ပြန်ခဲ့ပါသည်။ အဆိုပါ အမိန့်စာများပါ မဖြစ်မနေဖွင့်လှစ်ရမည့် လုပ်ငန်းအမျိုးအစားများမှလွဲ၍ ရန်ကုန်တိုင်းဒေသကြီးအတွင်းရှိ မြို့နယ် အသီးသီးမှ ပြည်သူများကို လုပ်ငန်းခွင်သို့ သွားရောက်ခွင့်မပြုဘဲ မိမိနေအိမ်အတွင်းနေထိုင်ရန်(Stay at Home)အဖြစ် သတ်မှတ်ကြေညာထားပါသည်။
၂။ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ လူမှုဖူလုံရေးအဖွဲ့သည် အဆိုပါ ထုတ်ပြန်ချက်များအရ လူမှုဖူလုံရေးအဖွဲ့တွင် အကျုံးဝင်မှတ်ပုံတင်ထားသော ပုဂ္ဂလိကပိုင်စက်ရုံ၊ အလုပ်ရုံ၊ လုပ်ငန်းဌာနများရှိ အာမခံအလုပ်သမားများအနက် Stay at Home အစီအစဉ်တွင် အကျုံးဝင်သောပုဂ္ဂလိကပိုင်စက်ရုံ၊ အလုပ်ရုံ၊ လုပ်ငန်းဌာနများရှိ အာမခံအလုပ်သမားများအတွက် ၂၀၁၂ ခုနှစ်၊ လူမှုဖူလုံရေးဥပဒေပုဒ်မ ၁၀၀ ပါ လုပ်ပိုင်ခွင့်များကို ကျင့်သုံး၍ ဥပဒေပုဒ်မ ၃၁ (ခ)(၂)နှင့် နည်းဥပဒေ ၁၃၆ (ခ)တို့အရ ၆/၂၀၂၀ လမတိုင်မီ ထည့်ဝင်ကြေးငွေ အနည်းဆုံး ၃၆ လ ပေးသွင်းထားခြင်း မရှိစေကာမူ ၆/၂၀၂၀ လအတွက် ထည့်ဝင်ကြေးပေးသွင်း ထားပြီး ၂၃-၉-၂၀၂၀ ရက်နေ့အထိ အလုပ်လုပ်ကိုင်နေသည့် ပုဂ္ဂလိကပိုင်စက်ရုံ၊ အလုပ်ရုံ၊ လုပ်ငန်းဌာနများရှိ အာမခံအလုပ်သမားများအား ၆/၂၀၂၀ လအတွက် ပေးသွင်းထားသော လုပ်ခလစာ၏ ၄၀ ရာခိုင်နှုန်းကို အာမခံအလုပ်သမားနှင့် မိသားစုအတွက် ငွေကြေးထောက်ပံ့မှုခံစားခွင့်အဖြစ် ခွင့်ပြုထုတ်ပေးသွားမည် ဖြစ်ပါသည်။
၃။ သို့ဖြစ်ပါ၍ အထက်အပိုဒ် ၂ ပါ အချက်များနှင့် ကိုက်ညီသော လူမှုဖူလုံရေးအဖွဲ့တွင် အကျုံးဝင် မှတ်ပုံတင်ထားသည့် ပုဂ္ဂလိကပိုင်စက်ရုံ၊ အလုပ်ရုံ၊ လုပ်ငန်းဌာနများရှိ အလုပ်ရှင် သို့မဟုတ် အလုပ်ရှင်ကိုယ်စား တာဝန်ရှိသူများသည် ၎င်းတို့၏ အလုပ်သမားများအတွက် လူမှုဖူလုံရေးထောက်ပံ့ငွေ ရရှိနိုင်ရေး သက်ဆိုင်ရာမြို့နယ် လူမှုဖူလုံရေး ရုံးများသို့ဖြစ်စေ၊ Webportal-https://ssbmyanmar.org မှဖြစ်စေ၊ Website-https:// ssb. gov.mm မှဖြစ်စေ ဤအမိန့်ကြော်ငြာစာထုတ်ပြန်သည့်နေ့မှစ၍ လျှောက်ထားနိုင်ပါသည်။
၄။ အထက်ပါပြဋ္ဌာန်းချက်များသည် ဤအမိန့်ကြော်ငြာစာပါ ထုတ်ပြန်သည့်နေ့မှ စတင်အာဏာတည်သည်ဟု သတ်မှတ်လိုက်သည်။
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန