MYANCOPHARM ကိုဗစ်-၁၉ရောဂါ ကာကွယ်ဆေးအား အောင်မြင်စွာ ထုတ်လုပ်နိုင်မှုသည် မြန်မာ့ဆေးလောက၏ သမိုင်းတွင်ကျန်ရစ်မည့် ရွှေရောင်လွှမ်းသော ကမ္ပည်းမော်ကွန်း တစ်ခုအဖြစ် ပေါ်ထွန်းလာခဲ့
နေပြည်တော် မတ် ၂၄
နိုင်ငံတော်စီမံ အုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ၂၀၂၁ ခုနှစ် အောက်တိုဘာ ၈ ရက်တွင် ရန်ကုန်တိုင်းဒေသကြီး လှည်းကူးမြို့နယ်ရှိ ဆေးဝါးစက်ရုံခွဲ(ရွာသာကြီး)သို့ လာရောက်သည့်ခရီးစဉ်တွင် “ ကိုဗစ်-၁၉ရောဂါကာကွယ်ဆေးများကို ပြည်တွင်း၌ ထုတ်လုပ်နိုင်ရေးအတွက် သုတေသန ဆောင်ရွက်နိုင်ခြင်းနှင့် ထုတ်လုပ်ရေးကိစ္စများကို ရေတိုရေရှည် စီမံချက်များရေးဆွဲပြီး စက်မှုဝန်ကြီးဌာန၊ ကျန်းမာရေးဝန်ကြီးဌာနနှင့် ကာကွယ်ရေးဝန်ကြီးဌာနတို့ ပူးပေါင်းဆောင်ရွက်ရန် ” လမ်းညွှန်မှုအပေါ် မတ် ၂၃ ရက်တွင် ကိုဗစ်-၁၉ ရောဂါကာကွယ်ဆေး ပုလင်းသွင်းဖြည့်တင်းနိုင်မှု၏ အောင်မြင်မှု အသီးအပွင့်အဖြစ် ကာကွယ်ဆေး စတင်ထုတ်လုပ်မှုနှင့် မိတ်ဆက်ခြင်း အခမ်းအနားအား မင်္ဂလာရှိစွာ ကျင်းပနိုင်ခဲ့ပြီဖြစ်သည်။
Sinopharm ကာကွယ်ဆေးအား ပုလင်းသွင်း ဖြည့်တင်းခြင်း(Sinopharm)အား ကမ္ဘာပေါ်တွင် လေးနိုင်ငံတည်း လုပ်ဆောင်နိုင်ခဲ့ပြီး အာဆီယံနိုင်ငံများတွင် မြန်မာနိုင်ငံ အပါအဝင် နိုင်ငံပေါင်း ငါးနိုင်ငံမှ ထုတ်လုပ်နိုင်ခဲ့ရာ မြန်မာနိုင်ငံအနေဖြင့် စက်မှုဝန်ကြီးဌာန၊ ကျန်းမာရေးဝန်ကြီးဌာနနှင့် ကာကွယ်ရေးဝန်ကြီးဌာနတို့၏ တစ်သွေးတစ်သားတည်း ပူးပေါင်းဆောင်ရွက်မှုဖြင့် MYANCOPHARM ကိုဗစ်-၁၉ ရောဂါကာကွယ်ဆေးအား စတင်ထုတ်လုပ်နိုင်မှုသည် သမိုင်းမှတ်တိုင်တစ်ခုအဖြစ် ပေါ်ထွန်းခဲ့ပြီးဖြစ်ရာ မြန်မာ့ဆေးလောက၏ ရွှေရောင်လွှမ်းသော နေ့တစ်နေ့အဖြစ် ကမ္ပည်းတင် ကျန်ရစ်ခဲ့ပြီဖြစ်သည်။
MYANCOPHARM ကိုဗစ်-၁၉ရောဂါ ကာကွယ်ဆေးအား ပြည်တွင်း၌ အောင်မြင်စွာ ထုတ်လုပ်နိုင်မှုသည် ကာကွယ်ဆေး ထုတ်လုပ်မှုနည်းစဉ်များ တွေ့ရှိခဲ့သည်သာမက ကာကွယ်ဆေးဝယ်ယူမှု၊ နိုင်ငံခြားငွေ သုံးစွဲမှုကိုလည်း လျှော့ချနိုင်ခဲ့ပြီဖြစ်သည်။ မြန်မာနိုင်ငံနှင့် တရုတ်ပြည်သူ့ သမ္မတနိုင်ငံတို့၏ တရုတ်-မြန်မာ ဆွေမျိုးပေါက်ဖော် ချစ်ကြည်ရေးနှင့် မေတ္တာသံယောဇဉ် ပိုမိုလေးနက်မှုအား ဖော်ဆောင်မှုကိုပြသနိုင်ခဲ့ခြင်း ဖြစ်သည်။ MYANCOPHARM ကိုဗစ်-၁၉ ရောဂါကာကွယ်ဆေး ထုတ်လုပ်နိုင်ရေး လုပ်ငန်းစီမံချက်အား အဆင့်(၁၂)ဆင့်ဖြင့် အသေးစိတ်လုပ်ငန်း အစီအစဉ်များချမှတ်၍ စနစ်တကျ အကောင်အထည်ဖော် ဆောင်ရွက်မှုဖြင့် ဆေးဝါးစက်ရုံ(အင်းစိန်) ၏ကြီးကြပ်မှုအောက်ရှိ ဆေးဝါးစက်ရုံခွဲ (ရွာသာကြီး)တွင် ထုတ်လုပ်နိုင်ခဲ့ပြီဖြစ်ရာ ထိုသို့ထုတ်လုပ်နိုင်ရန် ကြိုးပမ်းဆောင်ရွက် ခဲ့ကြသော ဝန်ထမ်းများ၏ ကိုယ်စား ဆေးဝါးစက်ရုံခွဲ(ရွာသာကြီး)မှ တာဝန်ခံတို့၏ စကားသံများကို ယခုလိုကြားသိ ခဲ့ရပါသည်-
ဒေါ်အိအိဝင်း (ကုန်ထုတ်ဌာန- ဌာနမှူး)
“ဆေးဝါးစက်ရုံ(ရွာသာကြီး)မှာဆိုရင် ကိုဗစ်-၁၉ ရောဂါကာကွယ်ဆေး စတင်ထုတ်လုပ်ဖို့အတွက် Sinopharm China National Biotec Group က ပညာရှင်များရောက်ရှိပြီး ကာကွယ်ဆေး ထုတ်လုပ်နိုင်သည့် အခြေအနေ ရှိ/မရှိကို လေ့လာခဲ့ပါတယ်။ ထုတ်လုပ်နိုင်တဲ့ အခြေအနေရှိတဲ့အတွက် ပထမဦးဆုံးအနေနဲ့ လိုအပ်တဲ့ Media Fill ဆောင်ရွက်ချက်များ လုပ်ဆောင်တဲ့အခါမှာ သုံးပတ်ကြာပြီး အောင်မြင်ခဲ့တဲ့အတွက် ဆက်လက်ပြီး လုပ်ငန်းများကို ဆောင်ရွက်နိုင်ခဲ့ပြီးတော့ မတ်လမှာ ကာကွယ်ဆေးကို ထုတ်လုပ်နိုင်ခဲ့တာကြောင့် ကျွန်မတို့ ကုန်ထုတ်ဌာနအနေနဲ့ ကိုဗစ်-၁၉ ရောဂါ ကာကွယ်ဆေးကို Ready to Fill Bulk အနေဖြင့်ဝယ်ယူပြီး ထုတ်လုပ်နေတာဖြစ်ပါတယ်။
တရုတ်ပြည်သူ့သမ္မတနိုင်ငံ Sinopharm CNBGမှ ဆေးရည်ဖျော်စပ်ပြီးသားကို ဆေးရည်ဖြည့်တင်းခြင်း လုပ်ငန်း ဆက်လက် ဆောင်ရွက်တာဖြစ်ပါတယ်။ အဲ့ဒီလိုဆောင်ရွက်တဲ့အခါမှာ ပထမဆုံး ဆေးရည်ဖြည့်တင်းမယ့် ပစ္စည်းများကို Ultrafonic Machineနဲ့ ဆေးရပါတယ်။ ဆေးကြောပြီးတဲ့အခါမှာ အပူချိန်(310º C) နဲ့ Depyrodenacion ပိုးသတ်ခြင်း လုပ်ငန်းကို ဆောင်ရွက်ရပါတယ်။ ပိုးသတ်သန့်စင်ပြီးသား ဆေးပုလင်းများကို အပူချိန်ပြန်ချပြီးတဲ့ အခါမှာ ဆေးရည်ဖြည့်တင်းခြင်း လုပ်ငန်းကို ဆက်လက်ဆောင်ရွက် ရပါတယ်။ အဲ့ဒီလို လုပ်ဆောင်တဲ့အခါမှာ အရည်အသွေး အာမခံ ထိန်းသိမ်းခြင်းဌာနက ဆေးရည်ဖြည့်တင်း ထုတ်လုပ်ခြင်းလုပ်ငန်းကို In-Processတစ်လျှောက်လုံးမှာ စစ်ဆေးပါတယ်။ ဆေးရည်ဖြည့်ပြီးသား ဆေးပုလင်းများကို In-Process ဖြင့်ဖုံးအုပ်ခြင်း၊ Aluminium Cap ပြုလုပ်ခြင်း၊ Inscection Machine နဲ့ ဆေးပုလင်းများကို စစ်ဆေးခြင်းလုပ်ငန်း ဆောင်ရွက်ပါတယ်။ ဆေးပုလင်းတွေမှာ အမှုန့်ပါခြင်းရှိ/မရှိနဲ့ အခြားစစ်ဆေးမှုများ ပြုလုပ်ပြီးတဲ့အခါမှာ အရည်အသွေး ထိန်းသိမ်းရေးဌာနကို ပေးပို့စစ်ဆေးရပါတယ်။ ထိုဌာနက စစ်ဆေးချက်များ အောင်မြင်ပြီဆိုမှသာ ကျွန်မတို့ တံဆိပ်ကပ်ခြင်း လုပ်ငန်းနဲ့ ထုပ်ပိုးခြင်းလုပ်ငန်းကို ဆောင်ရွက်ရပါတယ်။
ဆေးပုလင်းအားလုံးကို အပူချိန် (2-8º C)အတွင်း အအေးထဲမှာ သိမ်းဆည်းထားတာဖြစ်ပါတယ်။
ဆေးပုလင်းတစ်လုံးကို လူငါးဦး (5 Doses) ထိုးနှံနိုင်ပါတယ်။ လစဉ်ကာကွယ်ဆေး Doses တစ်သန်းနှုန်းနဲ့ ၂၀၂၂-၂၀၂၃ ဘဏ္ဍာနှစ်မှာ ကာကွယ်ဆေး Doses ၁၀ သန်း ထုတ်လုပ်ဖို့ရှိပါတယ်။ ကာကွယ်ဆေးမထိုးနှံရသေးတဲ့ ပြည်သူတွေနဲ့ Booster Dose ထိုးနှံဖို့ရှိတဲ့သူတွေအတွက် ကျန်းမာရေး ဝန်ကြီးဌာနရဲ့ Program အတိုင်းသွားမှာပါ။ ကာကွယ်ဆေးဟာ ပြည်သူတွေ လိုအပ်နေတာဖြစ်တဲ့အတွက် ထုတ်လုပ်ခွင့်ရတဲ့အပေါ် ဝန်ထမ်းအားလုံး ဝမ်းသာ ဂုဏ်ယူနေကြပါတယ်။ ကာကွယ်ဆေး ထုတ်လုပ်တဲ့အခါမှာ Sinopharm ပညာရှင်များက စဉ်ဆက်မပြတ် စစ်ဆေးမှုတွေ ပြုလုပ်ခဲ့တာဖြစ်ပြီး စစ်ဆေးချက်တိုင်းမှာ အဆင့်တိုင်း အောင်မြင်ပြီးမှသာ ဆေးဝါးထုတ်လုပ်ခြင်း လုပ်ငန်းကိုဆောင်ရွက်ရတာ ဖြစ်ပါတယ်။ ဒီလိုဆေးဝါးထုတ်လုပ်တဲ့ အခါမှာလည်း စက်မှုဝန်ကြီးဌာနတစ်ခုတည်း မဟုတ်ဘဲ ကျန်းမာရေးဝန်ကြီးဌာန လက်အောက်မှာရှိတဲ့ အစားအသောက်နှင့် ဆေးဝါးကွပ်ကဲရေးဌာန(FDA)ကို ပေးပို့စစ်ဆေးတာဖြစ်ပါတယ်။ ပြီးတော့ ဝန်ကြီးဌာနပေါင်းစုံမှာ အထက်အကြီးအကဲများက လိုအပ်ချက်များကို ပံ့ပိုးကူညီခဲ့တာဖြစ်တဲ့ အတွက် Sinopharm ပညာရှင်များနဲ့ ပူးပေါင်းကူညီကြသူ အားလုံးကို အထူးပဲကျေးဇူးတင်ပါတယ်။”
ဒေါ်ငြိမ်းငြိမ်း(အရည်အသွေးအာမခံဌာန- ဌာနမှူး)
“ကိုဗစ်-၁၉ ကာကွယ်ဆေး ထုတ်လုပ်တဲ့ အခါမှာ အရည်အသွေး အာမခံဌာန Quality Assurance Department နဲ့ အရည်အသွေး ထိန်းသိမ်းရေးဌာန Quality Control Department တို့ဟာ ထုတ်လုပ်မှု လုပ်ငန်းစဉ် တစ်လျှောက်လုံး(In Process Control ) မှာ Environmental Monitoring စစ်ဆေးမှုများကို စဉ်ဆက်မပြတ် လုပ်ဆောင်ရပါတယ်။
ကာကွယ်ဆေးထုတ်လုပ်တဲ့အခန်းအတွင်း သန့်စင်မှုရှိ/မရှိကို ဌာနနှစ်ခုက စဉ်ဆက်မပြတ် စစ်ဆေးမှုပြုလုပ်ရပါတယ်။ စစ်ဆေးမှု ရလဒ်ကောင်းမှသာ ဆေးဖြည့်သွင်းခြင်း လုပ်ငန်းကို ဆက်လက် လုပ်ဆောင်ရပါတယ်။
ထုတ်လုပ်ရေးဌာနက ထွက်ရှိလာတဲ့ ကာကွယ်ဆေးများကို QC အရည်အသွေး ထိန်းသိမ်းရေးဌာနက ဆေးဝါးမှာ ပါဝင်တဲ့ နှုန်းထားပြည့်ဝမှု၊ သန့်စင်မှု(Purity)၊ အန္တရာယ်ကင်းရှင်းမှု(Safety)၊ အရည်အသွေးကောင်းမွန်မှု(Quality) စတဲ့ ကာကွယ်ဆေးရဲ့ အာနိသင် ရှိ/မရှိကို စစ်ဆေးမှုပြုလုပ်ရပါတယ်။ စစ်ဆေးမှု ရလဒ်ကောင်းများ ရရှိပြီးလျှင် QA ဌာနက ကျန်းမာရေးဝန်ကြီး ဌာနအောက်မှာရှိတဲ့ အစားအသောက်နဲ့ ဆေးဝါးကွပ်ကဲရေး ဌာနကို ဆေးဝါးရဲ့ အရည်အသွေးဆိုင်ရာ အချက်အလက်များ တင်ပြရပါတယ်။ ကိုဗစ်-၁၉ Ready to Fill (RTF) Bulk စတင်ရောက်ရှိတဲ့အချိန်ကစပြီး Cold Change Temperature စစ်ဆေးမှုနဲ့ သိုလှောင် သိမ်းဆည်းထားတဲ့ Cold Room အတွင်းက Temperature များကို နေ့စဉ်ကြည့်ရှုစစ်ဆေးပြီး မှတ်တမ်းများ ထားရှိရပါတယ်။
ကိုဗစ်-၁၉ ရောဂါကာကွယ်ဆေး ထုတ်လုပ်ရာမှာ နိုင်ငံတော်ဝန်ကြီးချုပ်၏ လမ်းညွှန်မှုနဲ့ ဝန်ကြီးဌာနများအားလုံး ပူးပေါင်းဆောင်ရွက်မှု၊ အကြီးအကဲများရဲ့ ပံ့ပိုးမှုများနဲ့ ဝန်ထမ်းများ စည်းလုံးညီညွတ်စွာ စွမ်းဆောင်နိုင်မှုဟာ အားရစရာကောင်းလှပါတယ်။ Sinopharm ရဲ့ ပညာရှင်များကလည်း ကာကွယ်ဆေး ထုတ်လုပ်ရာမှာ သန့်စင်မှုနဲ့ အန္တရာယ်ကင်းရှင်းမှုကို အထူးဂရုပြု ဆောင်ရွက်စေတာကြောင့် ပြည်သူတို့အတွက် ကာကွယ်ဆေး ထုတ်လုပ်နိုင်မှုအပေါ် ကျွန်မတို့ဝန်ထမ်း အားလုံး လုပ်ဆောင်နိုင်ခဲ့မှုအပေါ် အားရကျေနပ်မိပါတယ်။
ကာကွယ်ဆေးများကို တစ်ပတ်(၃)ကြိမ် အပူချိန်တိုင်းတာမှုအပြင် နေ့စဉ်စစ်ဆေး စမ်းသပ်မှု လုပ်ဆောင်ရပါတယ်။ ကာကွယ်ဆေး သက်တမ်းကို တစ်နှစ်သတ်မှတ်ထားပါတယ်။ ဒီစက်ရုံမှာ တာဝန်ထမ်းဆောင်နေတာ နှစ် ၃၀ နီးပါးရှိတဲ့အတွက် အခုလို နိုင်ငံတော်ဝန်ကြီးချုပ်ရဲ့လမ်းညွှန်မှုနဲ့ ကိုဗစ်-၁၉ ရောဂါကာကွယ်ဆေး ထုတ်လုပ်နိုင်မှုမှာ တစ်တပ်တစ်အား ပါဝင်နိုင်မှုဟာ ဝန်ထမ်းအားလုံးအတွက်လည်း ဂုဏ်ယူစရာဖြစ်ပါတယ်။ ပြည်သူအားလုံးအတွက် ယုံကြည်စိတ်ချစွာနဲ့ အန္တရာယ်ကင်းစွာထိုးနှံနိုင်တဲ့ MYANCOPHARM ကာကွယ်ဆေး ရရှိမှုအပေါ် အားရကျေနပ်ဝမ်းသာ ပီတိဖြစ်ရပါတယ်။”
ကိုဗစ်-၁၉ ရောဂါကာကွယ်ဆေးကို ၂၀၂၂ ခုနှစ် မတ် ၁၀ ရက်တွင် စတင်ထုတ်လုပ်ခဲ့ပြီး ထပ်မံဝယ်ယူထားသော RTF Bulk (၁၂၂၀ လီတာ)မှာ၂၀၂၂ ခုနှစ် ဧပြီလကုန်တွင် မြန်မာနိုင်ငံသို့ရောက်ရှိလာမည်ဖြစ်သည်။ ဆေးသက်တမ်းမှာ တစ်နှစ်ဖြစ်ပြီး လစဉ်ကာကွယ်ဆေး Doses ၁၀ သန်းအား ၂၀၂၂-၂၀၂၃ ခုနှစ် ဘဏ္ဍာတစ်နှစ်အတွင်း ထုတ်လုပ်သွားမည်ဖြစ်သည်။ MYANCOPHARM ဟုအမည်ပေးထားသော မြန်မာနိုင်ငံမှ ထုတ်လုပ်သည့် ကိုဗစ်-၁၉ ရောဂါကာကွယ်ဆေးသည် ကမ္ဘာ့ကပ်ရောဂါကြီး မည်သည့်အချိန်တွင် ပျောက်ကွယ်သွားမည်ကို မသိနိုင်သော ကာလတွင် နိုင်ငံ၏ပြည်သူတို့ ကျန်းမာရေး ကဏ္ဍအတွက် အထောက်အပံ့ကောင်း များစွာရရှိစေလျက်ရှိသည်။ ထိုသို့စွမ်းဆောင်နိုင်မှုသည် နိုင်ငံတော်ဝန်ကြီးချုပ်၏ လမ်းညွှန်မှုနှင့်အညီ စက်မှုဝန်ကြီးဌာန၊ ကျန်းမာရေးဝန်ကြီးဌာနနှင့် ကာကွယ်ရေးဝန်ကြီးဌာနတို့၏ ဟန်ချက်ညီစွာ လက်တွဲပူးပေါင်း ဆောင်ရွက်နိုင်မှုဖြင့် နိုင်ငံ၏ အလင်းရောင်အား ထွန်းလင်းတောက်ပစေလျက်ရှိသည်။ MYANCOPHARM ကိုဗစ်-၁၉ ရောဂါကာကွယ်ဆေးအား အောင်မြင်စွာ ထုတ်လုပ်နိုင်မှုသည် ကြိုးပမ်းဆောင်ရွက်ခဲ့ကြသော ဝန်ကြီးဌာနများသာမက မြန်မာ့ဆေးလောက၏ သမိုင်းတွင် ကျန်ရစ်စေမည့် ရွှေရောင်လွှမ်းသော ကမ္ပည်းမော်ကွန်းတစ်ခုအဖြစ် ပေါ်ထွန်းခဲ့ပြီ ဖြစ်ပါသည်။