ပုဂံရှေးဟောင်း ယဉ်ကျေးမှုဇုန်သို့ တစ်ရက်လျှင် ဘုရားဖူးသူ ဦးရေ ၇၀၀ မှ ၁၀၀၀ ခန့်အထိ လာရောက်လျက်ရှိ
မန္တလေးတိုင်းဒေသကြီး ညောင်ဦးမြို့နယ် ပုဂံရှေးဟောင်း ယဉ်ကျေးမှုဇုန်သို့ ယခုတစ်ပတ်အတွင်း မြန်မာပြည်အရပ်ရပ်မှ ဘုရားဖူး လာရောက်သူများပြားလျက် ရှိကြောင်း ဟိုတယ်နှင့်ခရီးသွား ညွှန်ကြားမှု ဦးစီးဌာန(ပုဂံရုံးခွဲ)မှသိရသည်။
ပုဂံရှေးဟောင်း ယဉ်ကျေးမှုဇုန်သို့ ဘုရားဖူးမြော်ခွင့်ကို ကိုဗစ်-၁၉ ရောဂါ မြန်မာပြည်၌ ကူးစက်ဖြစ်ပွားချိန်မှ စတင်ပြီး ပိတ်ထားခဲ့ကြောင်း၊ ထိုသို့ပိတ်ထားရာမှ၂၀၂၁ ခုနှစ် ဖေဖော်ဝါရီ ၈ ရက်မှ စတင်၍ ပုဂံရှေးဟောင်း ယဉ်ကျေးမှုဇုန်ရှိ ဂေါပက အဖွဲ့ထားရှိသည့် ဘုရား ၁၉ ဆူအပါအဝင် ပုဂံရှေးဟောင်း ယဉ်ကျေးမှုဇုန်ရှိဘုရား၊ စေတီ ၊ ပုထိုး၊ သာသနိကအဆောက်အအုံများအား ကိုဗစ်-၁၉ရောဂါ စည်းကမ်းချက်များနှင့်အညီ ပြန်လည်ဖူးမြော်ခွင့်ပြု ခဲ့ခြင်းဖြစ်ကြောင်း ညောင်ဦးမြို့နယ်စီမံအုပ်ချုပ်ရေး အဖွဲ့မှ တာဝန်ရှိသူတစ်ဦးက ပြောသည်။
ယခုရက်ပိုင်းအတွင်း ဟဲဟိုး၊ တကောင်း၊ တောင်ကြီး၊ ဟိုပုံး၊ နတ်မောက်၊ မကွေး၊ ပဲခူး၊ ပခုက္ကူ၊ ကျောက်ပန်းတောင်း၊ ရန်ကုန်၊ မန္တလေး၊ နေပြည်တော် စသည့်မြို့များမှပြည်သူများ ပုဂံ-ညောင်ဦးသို့ လာရောက်ဘုရားဖူးရင်း ကျောက်ပန်းတောင်းမြို့နယ်ရှိ ပုပ္ပားတောင်ကလပ်သို့လည်း ဝင်ရောက်လေ့လာကြကြောင်း၊ ပုဂံဒေသရှိ သမိုင်းဝင် အထင်ကရဘုရားများ ဖြစ်သော တုရင်တောင်စွယ်တော်မြတ်စေတီ၊ ဓမ္မရံကြီး၊ စူဠာမဏိ၊ ရွှေဆံတော်၊ ထီးလိုမင်းလို၊ ရွှေစည်းခုံ၊ မနူဟာ၊ အာနန္ဒာ ၊ ဗူးဘုရား၊ အလိုတော်ပြည့်၊ ကျောက်ဂူဥမင်၊ ပြဿဒ်ကြီးဘုရား၊ သဗ္ဗညုဘုရားနှင့် ကန်တော့ပလ္လင်ဘုရားတို့သို့ လာရောက်ဖူးမြော်သူ ဦးရေ ၇၀၀မှ ၁၀၀၀အထိရှိလာပြီး စနေ၊ တနင်္ဂနွေရက်များတွင် ဘုရားဖူးသူဦးရေ ၁၀၀၀ ကျော် လာရောက် လေ့လာဖူးမြော်ကြကြောင်း သိရသည်။