တပ်မတော်ပင်လယ်သွား ဆေးရုံရေယာဉ်(သံလွင်) ရခိုင်ပြည်နယ်၊ မြေပုံမြို့နယ်အတွင်းရှိ ဒေသခံပြည်သူများအား ကျန်းမာရေးစောင့်ရှောက်မှုလုပ်ငန်းများ ဆက်လက်ဆောင်ရွက်
နေပြည်တော်၊ မတ် - ၁၆
ရခိုင်ပြည်နယ်အတွင်းရှိ ကမ်းရိုးတန်းဒေသတစ်လျှောက်မှ ဒေသခံပြည်သူ များအား ကျန်းမာရေး စောင့်ရှောက်မှုလုပ်ငန်းများ ဆောင်ရွက်ပေးရန် တပ်မတော် ပင်လယ်သွားဆေးရုံရေယာဉ်(သံလွင်)ဖြင့် ရောက်ရှိနေသော တပ်မတော်နှင့် ကျန်းမာရေး ဝန်ကြီးဌာနတို့မှ အထူးကုဆေးအဖွဲ့များမှ ပါရဂူများ၊ ဆေးမှူးများနှင့် သူနာပြုများ သည် ယနေ့တွင် မြေပုံမြို့နှင့် ပတ်ဝန်းကျင်ကျေးရွာများမှ ခွဲစိတ်ကုသပြီးသော မျက်စိခွဲစိတ်လူနာ ၁၃ ဦးအား ဆေးရုံရေယာဉ်ပေါ်၌ ကျန်းမာရေး စောင့်ရှောက်မှု လုပ်ငန်းများ ဆက်လက်ဆောင်ရွက်ပေးသည်။
ယင်းသို့ ဆောင်ရွက်ပေးနေမှုများကို တာဝန်ရှိသူများက လိုက်လံကြည့်ရှု အားပေး၍ မျက်စိခွဲစိတ်လူနာများအား မျက်မှန်များ တပ်ဆင်ပေးပြီး အာဟာရဖြည့် စားသောက်ဖွယ်ရာများနှင့် လက်ဆောင်ပစ္စည်းများ ထောက်ပံ့ပေးအပ်ကြသည်။ ထို့ နောက် အဆိုပါလူနာများအား မြေပုံမြို့ ဆိပ်ခံတံတားသို့ ပြန်လည်ပို့ဆောင်ပေးသည်။
ထို့အတူ နယ်လှည့်အထူးကုဆေးအဖွဲ့သည် မြေပုံမြို့နှင့် ပတ်ဝန်းကျင်ကျေးရွာ များမှ ဒေသခံပြည်သူ ၁၄၆၉ ဦးအား မြေပုံမြို့၊ ပညာ့ဗိမာန်ရိပ်သာ ပရိယတ္တိစာသင် တိုက်၌ အခြေပြု၍ ကျန်းမာရေး စောင့်ရှောက်မှုလုပ်ငန်းများ ဆက်လက်ဆောင်ရွက် ပေးကြသည်။
ထိုသို့ ဆောင်ရွက်ပေးရာ ယနေ့တွင် ဆေးကုသမှုဆိုင်ရာ ရောဂါ ၅၀၁ ဦး၊ ခွဲစိတ်ရောဂါ ၅၅ ဦး၊ သားဖွား/ မီးယပ်ရောဂါ ၅၃ ဦး၊ ကလေးရောဂါ ၈၄ ဦး၊ အရိုးရောဂါ ၂၉၄ ဦး၊ နား/ နှာခေါင်း/ လည်ချောင်းရောဂါ ၇၅ ဦး၊ မျက်စိရောဂါ ၂၄၄ ဦးနှင့် သွားနှင့်ခံတွင်းရောဂါ ၁၆၃ ဦးတို့ကို လိုအပ်သည့် ဆေးဝါးကုသမှုများ ဆောင်ရွက် ပေးသည်။ ထို့အပြင် အထွေထွေခွဲစိတ်လူနာ ၆ ဦး၊ မျက်စိခွဲစိတ်လူနာ ၆ ဦး၊ ဓာတ်မှန်ရိုက်လူနာ ၃ ဦး၊ အာထရာဆောင်းဖြင့်စမ်းသပ် စစ်ဆေးလူနာ ၁၂၇ ဦး၊ ECG ဖြင့် နှလုံးစမ်းသပ်လူနာ ၁၀၁ ဦးနှင့် ဓာတ်ခွဲစမ်းသပ်လူနာ ၂၄ ဦးတို့ကို ရောဂါရှာဖွေစမ်းသပ် ကုသပေးခြင်းများ ဆောင်ရွက်ပေးပြီး ဆေးရုံတက်ရောက်ကုသရန်လိုအပ်သူ ၄ ဦးတို့ကို နီးစပ်ရာတပ်မတော်ဆေးရုံနှင့် ပြည်သူ့ဆေးရုံများသို့ တက်ရောက်ကုသနိုင်ရေး စီစဉ် ဆောင်ရွက်ပေးသည်။
ထိုသို့ ဆောင်ရွက်ပေးနေမှုများကို တာဝန်ရှိသူများက လိုက်လံကြည့်ရှုအားပေးပြီး လိုအပ်သည်များ ညှိနှိုင်းဆောင်ရွက်ပေးသည်။
ကျန်းမာရေးဆောင်ရွက်ပေးမှုအပေါ် ဒေသခံပြည်သူများ၏ စကားသံများကို ယခုလိုပဲကြားသိခဲ့ရပါတယ်-
“ကျွန်တော်တို့ မြေပုံမြို့က အ.ထ.က ကျောင်းသူ၊ ကျောင်းသားဟောင်းများ ဆိုပြီး ဒီမှာလာရောက် ကူညီပေးတာပါ။ ကျွန်တော် တို့အဖွဲ့တွေရယ်၊ နောက်ရပ်မိရပ်ဖ အဖွဲ့တွေရယ်၊ ဌာနဆိုင်ရာလူကြီးတွေရယ် အကုန်လုံးကဝိုင်းပြီးတော့ လိုအပ်တာလေးတွေကို ဆောင်ရွက်ပေးနေတာပါ။ ဒီမှာက ရောဂါအမျိုးမျိုးဖြစ်ကြတယ်လေ။ ဒီလိုအခမဲ့ လာရောက်ကုသပေးတော့ ဒီနယ်မှာရှိနေတဲ့ လူတွေအားလုံး ဝမ်းသာကြပါတယ်။ နောက်နှစ်တွေမှာလည်း ဒီလိုမျိုး လာရောက် ကုသပေးစေချင်ပါတယ်။ လာရောက်ကုသကြတဲ့ ပါရဂူအဖွဲ့တွေနဲ့ တပ်မတော်သားတွေ အားလုံးကိုလည်း ကျေးဇူးတင်ပါတယ်”ဟု ပြောသည်။
“ဒီနေ့မှာ ကျွန်မတို့က လူနာတွေကို Pressure တွေတိုင်းပေးတယ်။ လိုအပ်တဲ့ နေရာတွေမှာ ဝင်ပြီးကူညီပေးတယ်။ ဒီမှာ ဆေးရုံတော့ရှိတယ်။ ဒါပေမဲ့ ပြည့်ပြည့်စုံစုံတော့မရှိဘူးပေါ့။ Dental တွေ၊ Eyes တွေပေါ့။ အဲ့ဒါတွေဆိုရင် တကယ်လိုအပ်ပါတယ်။ တစ်နှစ်တစ်ကြိမ်လောက်ဆိုရင်တော့ ပိုပြီးတော့ အဆင်ပြေတာပေါ့။ တချို့ကလည်း ငွေကြေးအခက်အခဲတွေကြောင့် အခကြေးငွေပေးရတဲ့ ဆေးရုံတွေကို မသွားနိုင်ကြဘူးလေ။ Dental တွေဆိုပိုဆိုးပါတယ်။ သွားပိုးစားတဲ့ ကလေးတွေဆိုရင် ဒီမှာနုတ်ရတာက အကုန်အဆင်ပြေကြပါတယ်။ မိဘတွေအနေနဲ့လည်း ငွေကြေးကုန်ကျမှုတွေ သက်သာတာပေါ့။ ကျေးဇူးတင်ပါတယ်”ဟုပြောသည်။