ကာတာစော်ဘွား အယ်သနီက မန်ယူအသင်းကို ဂလေဇာမိသားစု တောင်းဆိုထားသည့် တန်ကြေးဖြင့် ဝယ်ယူရန်ဆွေးနွေး
ကာတာတော်ဝင်မိသားစုဝင် တစ်ဦးဖြစ်သည့် ကာတာစော်ဘွား အယ်သနီက မန်ယူအသင်းကို လက်ရှိအသင်းပိုင်ရှင် ဂလေဇာမိသားစု တောင်းဆိုထားသည့် စတာလင်ပေါင် ၆ ဘီလီယံခန့်ဖြင့်ဝယ်ယူ ရန် ဆွေးနွေးမှုများ ပြုလုပ်နေပြီး မကြာမီ အပြီးသတ် ဝယ်ယူရန်ကြိုးပမ်းလျက်ရှိကြောင်း မန်ချက်စတာ ညနေခင်းသတင်းဌာနက ဖော်ပြခဲ့သည်။
မန်ယူအသင်းပိုင်ရှင် ဂလေဇာမိသားစုဝင်များက ၂၀၂၂ ခုနှစ် ဒီဇင်ဘာလကအသင်းကို ရောင်းချမည်ဟု အတည်ပြု ကြေညာခဲ့ပြီးနောက် လက်ရှိတွင် ကာတာစော်ဘွား အယ်သနီနှင့် ဗြိတိန်ဘီလျံနာ ရက်ဒ်ကလစ်တို့က ဝယ်ယူရန်ဆွေးနွေးမှုများ ပြုလုပ်လျက်ရှိသည်။
လက်ရှိတွင် မန်ယူအသင်း၏ ဈေးကွက်တန်ကြေး မှာ စတာလင်ပေါင် ၄ ဘီလီယံဝန်းကျင်သာရှိ သော်လည်း အသင်းပိုင်ရှင် ဂလေဇာမိသားစုက စတာလင်ပေါင် ၆ ဘီလီယံခန့် တောင်းဆိုထားခြင်း ဖြစ်သည်။
မန်ယူအသင်းကိုဝယ်ယူရန် ကာတာစော်ဘွား အယ်သနီဦးဆောင်သည့် ကိုယ်စားလှယ်အဖွဲ့သည် ပြီးခဲ့သည့်ရက်ပိုင်းက မန်ချက်စတာမြို့သို့ လာရောက် ကာ မန်ယူအသင်းမှ တာဝန်ရှိသူများနှင့်တွေ့ဆုံခဲ့ ပြီးနောက် မန်ယူအသင်းပိုင်ရှင်တောင်းဆိုသည့် စတာလင်ပေါင် ၆ ဘီလီယံခန့်ကိုလည်း ပေးချေရန် အသင့်ရှိနေခြင်း ဖြစ်သည်။
အယ်သနီနှင့် ရက်ဒ်ကလစ်တို့သည် မန်ယူအသင်းကို ပထမအကြိမ် စတာလင်ပေါင် ၅ ဘီလီယံခန့်ဖြင့် ကမ်းလှမ်းမှု ပြုလုပ်ခဲ့သော်လည်း သဘောတူညီမှုမရရှိသေးသည့်အတွက် ယခုအခါ အယ် သနီက မန်ယူ အသင်းပိုင်ရှင် တောင်းဆိုထားသည့် စတာလင်ပေါင် ၆ ဘီလီယံခန့်ဖြင့် ဝယ်ယူရန် ကမ်းလှမ်းမှု ပြုလုပ်ထားသည့်အပြင် ရက်ဒ်ကလစ်ကလည်း မန်ယူအသင်းထံလာရောက်ပြီး ကမ်းလှမ်းမှု ပြုလုပ်ထားကြောင်း သိရသည်။
Ref;Sky Sports