ပဲခူးတိုင်းဒေသကြီး ပြည်ခရိုင်အတွင်းရှိ ဘုရားစေတီများမှ ဘဏ္ဍာတော်ထိန်းဂေါပက အဖွဲ့ဝင်များ မာရဝိဇယဗုဒ္ဓရုပ်ပွားတော်မြတ်ကြီးအား ဖူးမြော်ကြည်ညို
နေပြည်တော်၊ ၂၀၂၄ ခုနှစ်၊ ဇန်နဝါရီ-၂၀
ပဲခူးတိုင်းဒေသကြီး၊ ပြည်ခရိုင်အတွင်းရှိ ဘုရားစေတီများမှ ဘဏ္ဍာတော်ထိန်း ဂေါပက အဖွဲ့ဝင် ၉၁ ဦး၊ အုပ်ချုပ်သူ ၅ ဦး စုစုပေါင်း ၉၆ ဦး တို့သည် ယနေ့နံနက်ပိုင်းတွင် ပြည်ထောင်စုနယ်မြေ နေပြည်တော် ဒက္ခိဏသီရိမြို့နယ်ရှိ ဗုဒ္ဓဥယျာဉ် ဝတ္ထုကံတော်တွင် တည်ထားပူဇော်သည့် ကမ္ဘာပေါ်ရှိထိုင်တော်မူ ကျောက်ဆစ် ဗုဒ္ဓရုပ်ပွားတော်များအနက် ဉာဏ်တော်အမြင့်ဆုံးဖြစ်သည့် မာရဝိဇယ ဗုဒ္ဓရုပ်ပွားတော်မြတ်ကြီးအား လာရောက် ဖူးမြော်ကြည်ညိုကြသည်။
ဦးစွာ ရှင်းလင်းဆောင်၌ မာရဝိဇယဗုဒ္ဓရုပ်ပွားတော်မြတ်ကြီး ဂေါပက အဖွဲ့နှင့် ဗုဒ္ဓရုပ်ပွားတော်မြတ်ကြီး တည်ဆောက်ပူဇော်ခြင်းနှင့် ထိန်းသိမ်းခြင်း လုပ်ငန်းများတွင် ပါဝင်ဆောင်ရွက်ခဲ့ကြသည့် ကျွမ်းကျင်ပညာရှင်များက မာရဝိဇယဘုရားကြီးတည်ထား ကိုးကွယ်ပူဇော်ရခြင်း ရည်ရွယ်ချက်၊ ရုပ်ပွားတော်မြတ်ကြီးအား လုပ်ငန်းစဉ် အဆင့်ဆင့်ဖြင့် အောင်မြင်စွာ တည်ထား ပူဇော်နိုင်ခဲ့မှု၊ လက်ရှိထိန်းသိမ်းဆောင်ရွက်နေမှု၊ ခေတ်မီစက် ကိရိယာများ အသုံးပြု၍ ကျောက်စာရုံစေတီတော်များ တည်ထား ဆောင်ရွက်ခဲ့မှုနှင့် သာသနာရေးဆိုင်ရာ အခမ်းအနားကြီးများ စည်ကားသိုက်မြိုက်စွာ ကျင်းပနိုင်ခဲ့မှုအ ခြေအနေတို့ကို ရှင်းလင်းပြောကြားကြပြီး မာရဝိဇယဗုဒ္ဓရုပ်ပွား တော်မြတ်ကြီး အောင်မြင်စွာ တည်ထားပူဇော်နိုင်ရန်အဆင့်ဆင့် ဆောင်ရွက်ခဲ့မှုဗီဒီယို မှတ်တမ်းကိုပြသသည်။
ထို့နောက် ဘုရားဖူးလာ ဂေါပကအဖွဲ့ဝင်များက ယခုကဲ့သို့ ရုပ်ပွားတော်မြတ်ကြီးအား အဆင်ပြေချောမွေ့စွာလာရောက်ဖူးမြော်နိုင်ရေးအတွက် စီစဉ် ဆောင်ရွက် ပေးမှုများနှင့် ရုပ်ပွားတော်မြတ်ကြီး တည်ဆောက်ပူဇော်ခဲ့မှု လုပ်ငန်းစဉ် အဆင့်ဆင့်ကို အသေးစိတ် ရှင်းလင်းပြောကြားပေးမှုများအပေါ် ကျေးဇူးတင်စကားများ ပြောကြားကြသည်။ ယင်းနောက် ဘုရားဖူးလာဂေါပကအဖွဲ့ဝင်များက ရုပ်ပွားတော်မြတ်ကြီး အောင်မြင်စွာတည် ထားပူဇော်နိုင်ခဲ့မှု အခြေအနေနှင့် စပ်လျဉ်း၍ သိရှိလိုသည်များကိုမေး မြန်းကြရာ တာဝန်ရှိသူများက အသေးစိတ် ပြန်လည်ရှင်းလင်း ဖြေကြားသည်။
ယင်းနောက် ဂေါပကအဖွဲ့ဝင်များသည် မာရဝိဇယဗုဒ္ဓ ရုပ်ပွားတော်မြတ်ကြီး ဘက်စုံပြုပြင်မွမ်းမံရန်အတွက် အလှူငွေများပေးအပ်လှူဒါန်းကြသည်။ ဆက်လက်၍ ဘုရားဖူးလာဂေါပကအဖွဲ့ဝင်များသည် မာရဝိဇယဗုဒ္ဓရုပ်ပွား တော်မြတ်ကြီးအား သွားရောက်ဖူးမြော် ကြည်ညိုကြပြီး ဘုရားရင်ပြင်တော် ပတ်လည်၌ စကျင်ကျောက်များ အသုံးပြု၍ တည်ဆောက်ထားသည့် ဂန္ဓကုဋိ၊ မော်ကွန်းတိုက်၌ မာရဝိဇယ ဗုဒ္ဓရုပ်ပွားတော်မြတ်ကြီးနှင့် ဗုဒ္ဓဥယျာဉ်တော်ပုံစံငယ်ပြသ ထားမှု၊ မှတ်တမ်းဓာတ်ပုံများ၊ အဂ္ဂါဓိပတိသာသနာ့ဗိမာန်တော်ကြီး၊ ကျောက်စာရုံစေတီတော်များနှင့် အခြားသာသနိက အဆောက်အအုံများကို ဖူးမြော် လေ့လာကြည်ညိုခဲ့ကြသည်။
ထို့အတူ မာရဝိဇယဗုဒ္ဓ ရုပ်ပွားတော်မြတ်ကြီးအား အနယ်နယ်အရပ်ရပ်မှ ရဟန်းရှင်လူ ဘုရားဖူးပြည်သူများ လာရောက်ဖူးမြော်ကြည်ညိုလျက်ရှိသည်။
ယနေ့တွင် မာရဝိဇယဗုဒ္ဓရုပ်ပွားတော်မြတ်ကြီးအား လာရောက်ဖူးမြော်ခဲ့ကြသည့် ဂေါပကအဖွဲ့ဝင်များ၏ ရင်တွင်းစကားသံများအား ယခုလို ကြားသိခဲ့ရပါတယ် -
ဦးမြဝင်း (ပြည်ရွှေဆံတော်)
နိုင်ငံတော်အကြီးအကဲကနေပြီး ခက်ခဲပင်ပန်းစွာ တည်ဆောက်ထားတဲ့ မာရဝိဇယ ဘုရားကြီးကို လာရောက်ဖူးမြော်ချင်နေတဲ့ ဆန္ဒရှိတာ ကြာပါပြီ၊ ဆန္ဒကို ဖြည့်စည်းသွားအောင်လို့ တိုင်းဒေသကြီး ဝန်ကြီးချူပ်နှင့် တာဝန်ရှိသူများက ပံပို့ကူညီပေးတဲ့အတွက်ကြောင့် အခုလို ဖူးမြော်ရခြင်းဖြစ်ပါတယ်၊ အခုလို လာရောက်ဖူးမြော်ရတဲ့အခါမှာ ပြည်ခရိုင် ၄ မြို့နယ်ရှိ ဘုရား ၁၂ ဆူမှ ဂေါပက ၉၁ ယောက်ကို နိုင်ငံတော်အစီအစဉ်နဲ့ လာရောက်ဖူးမြော်ရတဲ့အတွက်ကြောင့် ဂေါပကလူကြီးတွေက မပင်မပန်းပဲ မာရဝိဇယ ဘုရားကြီးကို လာရောက်ဖူးမြော်ရတာ အထူးပင် ကျေးဇူးတင်ပါတယ်၊ ဒီလို ဖူးမြော်ရတဲ့အတွက် ကမ္ဘာ့အလယ်မှာ တင်တယ်စွာနဲ့ မြင်တွေရတဲ့အတွက် ပိုမိုဝမ်းသာ ဂုဏ်ယူမိပါတယ်၊ ဒီလို ဘုရားကြီးဖြစ်ပေါ်လာဖို့အတွက် နိုင်ငံတော် အကြီးအကဲတွေက အခက်အခဲများစွာနှင့် စိန်ခေါ်မူများစွာကို ရင်ဆိုင်ပြီး အများပြည်သူများကနေ အလွန်ပင် ဖူးမြော်ကြည်ညိုချင်တဲ့ စိတ်တွေ ဖြစ်ပေါ်လာပါတယ်၊ အခုလို တည်ဆောက်ပေးတဲ့ နိုင်ငံတော်အကြီးအကဲများကိုလည်း အထူးပင် ကျေးဇူးတင်ပါကြောင်း ပြောကြားလိုပါတယ်၊
ဦးလှသိန်း ပေါက်ခေါင်း လေးမျက်နှာစေတီ
မာရဝီဇယဗုဒ္ဓ ရုပ်ပွားတော်ကြီးကို အင်ဂျင်နီယာအစွမ်း အနုပညာအစွမ်းနှင့် လက်မူပညာအစွမ်းတွေနဲ့ တည်ဆောက်ထားတာဖြစ်တဲ့အတွက် ဖူးမြော်ရတာ အလွန် ဝမ်းသာကြည်နူမိပါတယ်၊ ကမ္ဘာမှာ ဉာဏ်တော်အမြင့်ဆုံး ထိုင်တော်မူ ရုပ်ပွားတော်ကြီးကို လာရောက်ဖူးမြော်ကြည်ညိုရတဲ့အတွက် အတိုင်းမသိဖြစ်ရပါတယ်၊ မြန်မာနိုင်ငံအရပ်ရပ်မှာရှိတဲ့ ဂေါပကအဖွဲ့တွေကို လာရောက်ဖူးမြော်အောင် စီစဉ်ဆောင်ရွက်ပေးတဲ့ တိုင်းဒေသကြီးမှ တာဝန်ရှိသူတွေနှင့် နိုင်ငံတော်အကြီးအကဲတွေကို အထူး ကျေးဇူးတင်ရှိပါတယ်၊
ဦးစိုးကျော် ရွှေပလ္လင်မှော်စေတီ
တိုင်းဒေသကြီးမှ လမ်းညွန့်မူနဲ့ လာရောက်ရတဲ့အတွက် အင်မတန်မှလည်း ဝမ်းသာကြည်နူးစရာ တစ်ခုဖြစ်ပါတယ်၊ ဒီကိုလာရောက်တော့ တိုးတက်မူတွေ မြင်ရတဲ့အတွက် အင်မတန်မှ ဝမ်းသာပီတိဖြစ်မိပါတယ်၊ နောက်လဲ ကျွန်တော်တို့ကို ဘာသာရေးလုပ်နေတဲ့ ဂေါပကအဖွဲ့တွေကို နိုင်ငံတော် အကြီးအကဲတွေက ဘုရားဖူးတွေကို ထပ်မံပို့ဆောင်ပေးပါရန် မေတ္တာရပ်ခံတောင်းဆိုအပ်ပါတယ်၊ အခုလိုစီစဉ်ပေးတဲ့ တာဝန်ရှိသူတွေနှင့် လာရောက် ဘုရားဖူးရာတွင်လည်း လိုက်လံရှင်းလင်းပြသပေး သူတွေကြိုဆိုသူတွေအားလုံးကိုလည်း အထူးကျေးဇူးတင် ဝမ်းသာပီတိဖြစ်ရပါတယ်။