ပရီးမီးယားလိဂ်ပွဲစဉ်(၂၅) စပိန်လာလီဂါပွဲစဉ်(၂၅)နှင့် ပြင်သစ်လီဂူးဝမ်းပွဲစဉ်(၂၂)ပွဲကြိုသုံးသပ်ချက်
လူတန် VS မန်ယူ
ကစားမည့်ရက်/အချိန်
(၁၈-၂-၂၀၂၄ ည ၁၁း၀၀ နာရီ)
နောက်ဆုံးသုံးပွဲတွေ့ဆုံမှုရလဒ်
မန်ယူ ၁ - ဝ လူတန်
လူတန် ဝ - ၃ မန်ယူ
မန်ယူ ၁ - ၁ လူတန်
နောက်ဆုံးသုံးပွဲအနိုင်၊ အရှုံးအခြေအနေ
လူတန် အိမ်(နိုင်) ဝေး(သရေ) အိမ်(ရှုံး)
မန်ယူ ဝေး(နိုင်) အိမ်(နိုင်) ဝေး(နိုင်)
တန်းဆင်းဇုန်ဖိအားရှိနေတဲ့ လူတန်အသင်းက ရမှတ်လိုအပ်ချက်ရှိနေတယ်ဆိုပေမယ့် မန်ယူအသင်း နဲ့ တွေ့ဆုံတိုင်း ရုန်းကန်နေရလို့ အခုပွဲစဉ်မှာလည်း ရုန်းကန်ရပါလိမ့်မယ်။ လူတန်အသင်းက ဖလား ပွဲစဉ်တွေမှာသာ ရလဒ်ကောင်းတွေ ရရှိနေတယ်ဆိုပေမယ့် ပရီးမီးယားလိဂ်ပွဲစဉ်တွေမှာတော့ ရလဒ်ပိုင်း မတည်မငြိမ် ဖြစ်နေပြီး နောက်ဆုံးကစားတဲ့နှစ်ပွဲမှာလည်း နယူးကာဆယ်အသင်းကို သရေရလဒ်ရရှိ အောင်ကစားနိုင်တယ်ဆိုပေမယ့် ရှက်ဖီးလ်ယူနိုက် တက်အသင်းကိုတော့ အိမ်ကွင်းမှာ ရှုံးပွဲတွေ့ကြုံထား ပါတယ်။ လူတန်အသင်းက ဒီနှစ်ဘောလုံးရာသီ အိမ်ကွင်းပွဲစဉ် ၁၂ ပွဲကစားပြီးချိန်မှာ နိုင်ပွဲသုံးပွဲသာ ရရှိခဲ့ပြီး နှစ်ပွဲသရေရလဒ်နဲ့ ခုနစ်ပွဲအထိရှုံးနိမ့်ထားလို့ တန်းဆင်းဇုန်ထဲရောက်နေတဲ့ ဘန်လေအသင်းနဲ့ ရှက်ဖီးလ်ယူနိုက်တက်အသင်းတို့ပြီးရင် အိမ်ကွင်း စွမ်းဆောင်ရည်ပိုင်းအညံ့ဆုံးအသင်းအဖြစ် ရပ်တည် နေပါတယ်။ လူတန်အသင်းက အိမ်ကွင်းပွဲစဉ်တွေ မှာ ၂၁ ဂိုးအထိပေးထားရလို့ ဒီနှစ် ဘောလုံးရာသီ အိမ်ကွင်းခံစစ်ပိုင်း စွမ်းဆောင်ရည်ညံ့တဲ့ အသင်းတွေထဲမှာလည်း ပါဝင်နေပါတယ်။ ဒါ့ပြင် မန်ယူအသင်းနဲ့ တွေ့ဆုံတိုင်း အသင်းတိုက်စစ်ပိုင်းက သွင်းဂိုးရယူနိုင်ခြင်း မရှိပါဘူး။
အဓိက ကစားသမားတွေ ဒဏ်ရာကပြန်လည် သက်သာလာပြီးနောက်ပိုင်း မန်ယူအသင်းခြေစွမ်း ပိုင်းက သိသိသာသာ တိုးတက်ခဲ့ပါတယ်။ နောက်ဆုံးကစားတဲ့ အက်စ်တွန်ဗီလာအသင်းနဲ့ ပွဲစဉ်မှာ အနိုင်ရရှိပြီးနောက် မန်ယူအသင်းက ချန်ပီယံလိဂ်ဝင်ခွင့် အတွက် မျှော်လင့်ချက်အားကောင်းလာလို့ အခုလို ပွဲစဉ်တွေမှာ ရမှတ်ပြည့်ရယူပြီး အမှတ်ပေးဇယား ထိပ်ပိုင်းက အသင်းတွေကို ဖိအားပေးဖို့အကောင်းဆုံး ပြင်ဆင်လာမှာပါ။ မန်ယူအသင်းက အဓိကကစားသမားတွေ ဒဏ်ရာကနေပြန်လည်ကောင်းမွန်လာပြီး နောက်ပိုင်း ရလဒ်တွေ ဆက်တိုက်ကောင်းမွန်နေပြီး နောက်ဆုံးကစားတဲ့ ငါးပွဲမှာ လေးပွဲအထိနိုင်ပွဲရယူနိုင်ခဲ့ပြီး စပါးအသင်းနဲ့ တစ်ပွဲတည်းသာ သရေရလဒ်ရရှိခဲ့တဲ့အထိ ရလဒ်ပိုင်းက ပြန်လည်တည်ငြိမ်နေပါတယ်။ မန်ယူအသင်း တိုက်စစ်ပိုင်းကလည်း နောက်ပိုင်းပွဲစဉ်တွေမှာ အဓိကတိုက်စစ်မှူး ဟိုက်လန်းရဲ့ ဂိုးသွင်းအားကောင်းမှုနဲ့အတူ အကောင်းဆုံးပုံစံမှာရှိနေပါတယ်။
ဒီနှစ်သင်းနောက်ဆုံးနှစ်ကြိမ် တွေ့ဆုံမှုအပိုင်းမှာ မန်ယူအသင်းက နှစ်ကြိမ်စလုံးအနိုင်ရရှိထားသလို တစ်ဂိုးမှ မပေးထားရတဲ့အထိ အသာစီးမှာရှိနေပါတယ်။ ချန်ပီယံလိဂ်ဝင်ခွင့်အတွက်လည်း မန်ယူအသင်းက ရမှတ်လိုအပ်နေလို့ လက်ရှိခြေစွမ်းပိုင်းနဲ့ ထိပ်တိုက်တွေ့ဆုံမှုအပိုင်းတွေမှာ အသာစီးရရှိနေတဲ့ မန်ယူအသင်းက အနိုင်သုံးမှတ် ရယူသွားပါလိမ့်မယ်။
ခန့်မှန်းရလဒ် - လူတန် ၁ - ၃ မန်ယူ
ဘတ်တစ် Vs အလာဗက်
ကစားမည့်ရက်/အချိန်
(၁၉-၂-၂၀၂၄ နံနက် ၀၂း၃၀ နာရီ)
နောက်ဆုံးသုံးပွဲတွေ့ဆုံမှုရလဒ်
အလာဗက် ၁ - ဝ ဘတ်တစ်
အလာဗက် ၁ - ၁ ဘတ်တစ်
ဘတ်တစ် ၄ - ဝ အလာဗက်
နောက်ဆုံးသုံးပွဲအနိုင်၊ အရှုံးအခြေအနေ
ဘတ်တစ် အိမ်(သရေ) ဝေး(နိုင်) အိမ်(ရှုံး)
အလာဗက် ဝေး(နိုင်) အိမ်(ရှုံး) အိမ်(သရေ)
အိမ်ကွင်းဆိုရင် အသင်းလိုက်ကစားပုံ မာကျောမှုရှိတဲ့ ဘတ်တစ်အသင်းက အလာဗက်အသင်းကို ခြေစွမ်းပိုင်း အသာနဲ့ ဖိအားပေးကစားနိုင်မှာပါ။ ဘတ်တစ်အသင်းက နောက်ဆုံးကစားတဲ့ ငါးပွဲမှာ ဘာစီလိုနာအသင်းကို ရှုံးနိမ့်ပြီး ဂီတာဖေးလ်အသင်းနဲ့ သာ သရေရလဒ်ထွက်ပေါ်ခဲ့ပေမယ့် ကျန်တဲ့ သုံးပွဲ ကိုတော့ အနိုင်ရရှိအောင် စွမ်းဆောင်ထားနိုင်ပါတယ်။ ဘတ်တစ်အသင်းက ဒီနှစ်ဘောလုံးရာသီ စပိန်လာလီဂါပြိုင်ပွဲမှာ ၁၂ ပွဲကစားပြီးချိန် ခြောက်ပွဲအထိ အနိုင်ရရှိခဲ့ပြီး ငါးပွဲသရေရလဒ်နဲ့ ဘာစီလိုနာ အသင်းတစ်သင်းတည်းကိုသာ အိမ်ကွင်းမှာ ရှုံးနိမ့်ထားလို့ အိမ်ကွင်းဆိုရင် အသင်းလိုက် စွမ်းဆောင်ရည် ကောင်းမွန်တဲ့ အသင်းတစ်သင်းပါ။ ဘတ်တစ်အသင်းက ဥရောပပြိုင်ပွဲတွေမှာ ဝင်ခွင့်တစ်နေရာအတွက်လည်း မျှော်လင့်ချက်ရှိနေဆဲဖြစ်လို့ အိမ်ကွင်းမှာ ရမှတ်ပြည့်ရရှိဖို့အတွက် အမှားခံမှာမဟုတ်ပါဘူး။ ဘတ်တစ်အသင်းခံစစ်ပိုင်းကလည်း အိမ်ကွင်းဆိုရင် ပုံစံကောင်းပြသနေပြီး ၁၂ ပွဲမှာ ပေးဂိုးကိုးဂိုးသာပေးထားရလို့ အိမ်ကွင်း ခံစစ်ပိုင်းကောင်းမွန်တဲ့ အသင်းတစ်သင်းအဖြစ် ရပ်တည်နေပါတယ်။
အလာဗက်အသင်းကတော့ နောက်ဆုံးကစားတဲ့ ငါးပွဲမှာ နှစ်ပွဲအနိုင်ရရှိပြီး နှစ်ပွဲရှုံးနိမ့်ကာ တစ်ပွဲ သရေရလဒ်ရရှိထားလို့ ခြေစွမ်းပိုင်းက အတက်အကျ မြန်နေပါတယ်။ အလာဗက်အသင်းက အိမ်ကွင်းဆိုရင်သာ အသင်းလိုက်ကစားပုံ မာကျောမှုရှိပေမယ့် အဝေးကွင်းခြေစွမ်းပိုင်းကတော့ စိတ်ချလို့ရတဲ့ အနေအထားမှာ မရှိပါဘူး။ အလာဗက်အသင်းက ဒီနှစ်ဘောလုံးရာသီ အဝေးကွင်းပွဲစဉ် ၁၂ ပွဲမှာ နှစ်ပွဲသာ အနိုင်ရရှိခဲ့ပြီး လေးပွဲသရေရလဒ်နဲ့ ခြောက်ပွဲအထိရှုံးနိမ့်ထားလို့ အဝေးကွင်း စွမ်းဆောင်ရည်ပိုင်းကတော့ အားရစရာမရှိဘဲ ရုန်းကန်နေရပါတယ်။
ဒါ့ပြင် အလာဗက်အသင်းတိုက်စစ်ပိုင်းက အဝေးကွင်း ပွဲစဉ်တွေမှာ ၁၁ ဂိုးသာရရှိထားပြီး ရုန်းကန်နေရသလို ခံစစ်ပိုင်းကလည်း ၁၆ ဂိုးအထိပေးထားရလို့ ဘတ်တစ် အသင်းတိုက်စစ်ပိုင်းကို ပွဲချိန်ပြည့်ထိန်းချုပ်နိုင်ဖို့ အတွက် ခက်ခဲနေမှာပါ။
ဘတ်တစ်အသင်းနဲ့ အလာဗက်အသင်းအနေနဲ့ စုစုပေါင်း ၁၆ ကြိမ်တွေ့ဆုံခဲ့ဖူးပြီး ဘတ်တစ်အသင်း က ခုနစ်ကြိမ်အနိုင်ရရှိခဲ့ကာ အလာဗက်အသင်းက ငါးကြိမ်ပြန်လည်အနိုင်ရရှိခဲ့ပြီး လေးကြိမ်မှာ သရေရလဒ်ထွက်ပေါ်ထားလို့ ဘတ်တစ်အသင်းက တွေ့ဆုံမှုပိုင်းမှာ အနည်းငယ်အသာစီးမှာရှိနေပါတယ်။ လက်ရှိ အသင်းလိုက် စွမ်းဆောင်ရည်ပိုင်းမှာလည်း ဘတ်တစ်အသင်းက အနည်းငယ်အသာစီးမှာ ရှိနေပါတယ်။ ဒီနှစ်သင်းနောက်ဆုံးတွေ့ဆုံခဲ့တဲ့ နှစ်ကြိမ်မှာတော့ သွင်းဂိုးတွေနည်းပါးခဲ့လို့ အခုပွဲစဉ်မှာလည်း
သွင်းဂိုးနည်းနိုင်ပေမယ့် အိမ်ကွင်းဆိုရင် အသင်းလိုက်ကစားပုံကောင်းမွန်တဲ့ ဘတ်တစ်အသင်းက ရလဒ် ကောင်းမွန်ပါလိမ့်မယ်။
ခန့်မှန်းရလဒ်-ဘတ်တစ် ၁ - ၀ အလာဗက်
မိုနာကို VS တူးလော့စ်
ကစားမည့်ရက်/အချိန်
(၁၈-၂-၂၀၂၄ ည ၈:၃၀ နာရီ)
နောက်ဆုံးသုံးပွဲတွေ့ဆုံမှုရလဒ်
တူးလော့စ် ၁ - ၂ မိုနာကို
မိုနာကို ၁ - ၂ တူးလော့စ်
တူးလော့စ် ဝ - ၂ မိုနာကို
နောက်ဆုံးသုံးပွဲအနိုင်၊ အရှုံးအခြေအနေ
မိုနာကို အိမ်(သရေ) ဝေး(သရေ) ဝေး(နိုင်)
တူးလော့စ် အိမ်(ရှုံး) ဝေး(နိုင်) အိမ်(ရှုံး)
ချန်ပီယံလိဂ်ဝင်ခွင့်အတွက် နိုက်စ်အသင်း၊ ဘရက် အသင်း၊ လိုင်လီအသင်း၊ လန်းအသင်းတို့နဲ့ အားပြိုင် နေရတဲ့ မိုနာကိုအသင်းက အိမ်ကွင်းမှာ ရမှတ်ပြည့် ရရှိဖို့အတွက် အကောင်းဆုံးပြင်ဆင်လာမှာပါ။ မိုနာ ကိုအသင်းက ပြီးခဲ့တဲ့ပွဲစဉ်မှာ နိုက်စ်အသင်းကိုအနိုင် ရရှိပြီး သုံးပွဲဆက်နိုင်ပွဲပျောက်ဆုံးနေမှုကို အဆုံး သတ်ထားနိုင်ခဲ့ပါတယ်။ မိုနာကိုအသင်းက အခုပွဲစဉ်မှာ အနိုင်ရရှိမယ်ဆိုရင် အဆင့်(၂)နေရာအထိ တက်ရောက်နိုင်ဖို့ အခွင့်အရေး ရှိနေပါတယ်။ မိုနာကိုအသင်းက ဒီနှစ်ဘောလုံးရာသီ အိမ်ကွင်းပွဲစဉ် ၁၀ ပွဲကစားပြီးချိန်မှာ ခြောက်ပွဲအနိုင်ရရှိထားပြီး တစ်ပွဲသရေရလဒ်နဲ့ သုံးပွဲရှုံးနိမ့်ထားလို့ အိမ်ကွင်းဆိုရင် စွမ်းဆောင်ရည်ပိုင်း ကောင်းမွန်တဲ့ အသင်းတစ်သင်းပါ။
တူးလော့စ်အသင်းကတော့ နောက်ဆုံးကစားတဲ့ ငါးပွဲမှာ နှစ်ပွဲအနိုင်ရရှိပြီး နှစ်ပွဲရှုံးနိမ့်ခဲ့ကာ တစ်ပွဲ သရေရလဒ်ထွက်ပေါ်ထားလို့ ခြေစွမ်းပိုင်းကတည်ငြိမ် မှုမရှိပါဘူး။ တူးလော့စ်အသင်း ခံစစ်ပိုင်းကလည်း နောက်ပိုင်းပွဲစဉ်တွေမှာ အမှားအယွင်းတွေများနေပြီး နောက်ဆုံးကစားတဲ့ သုံးပွဲမှာ နှစ်ဂိုးစီပေးထား ရတဲ့အထိ ခံစစ်ပိုင်းစွမ်းဆောင်ရည်ကျဆင်းနေပါတယ်။ တူးလော့စ်အသင်းက ပြင်သစ်လီဂူးဝမ်းပြိုင်ပွဲ ၂၁ ပွဲကစားပြီးချိန်မှာ လေးပွဲသာ အနိုင်ရရှိထားပြီး ရှစ်ပွဲသရေရလဒ်နဲ့ ကိုးပွဲအထိရှုံးနိမ့်ခဲ့ကာ ရမှတ် ၂၀ နဲ့ အဆင့်(၁၄)နေရာမှာ ရပ်တည်နေပြီး တန်းဆင်းဇုန်က လိုရီယန့်အသင်းနဲ့ ရမှတ်တစ်မှတ်သာကွာဟနေပြီး တန်းဆင်းဇုန်ဖိအားရှိနေပါတယ်။ တူးလော့စ်အသင်းက တန်းဆင်းဇုန်ဖိအားတွေ ရှိနေတယ်ဆိုပေမယ့် အသင်းခြေစွမ်းပိုင်းက တိုးတက် လာခြင်းမရှိသေးဘဲ ရုန်းကန်နေရလို့ အခုပွဲစဉ်မှာလည်း မိုနာကိုအသင်းကို ပွဲချိန်ပြည့်တုံ့ပြန်ကစားနိုင်ဖို့အတွက် ခက်ခဲနေမှာပါ။ တူးလော့စ်အသင်းက ဒီနှစ်ဘောလုံးရာသီ အဝေးကွင်းပွဲစဉ်တွေမှာလည်း သုံးပွဲသာအနိုင်ရရှိခဲ့ပြီး အဝေးကွင်းခြေစွမ်းပိုင်းက ကျဆင်းနေပါတယ်။
ဒီနှစ်သင်းတွေ့ဆုံမှုအပိုင်းမှာတော့ မိုနာကိုအသင်း က ၁၀ ကြိမ်အထိနိုင်ပွဲရယူထားပြီး တူးလော့စ်အသင်း က သုံးကြိမ်သာပြန်လည်အနိုင်ရရှိခဲ့ကာ ငါးကြိမ် သရေရလဒ်ထွက်ပေါ်ထားလို့ မိုနာကိုအသင်းက အပြတ်အသတ်အသာစီးရရှိထားပါတယ်။ လက်ရှိ ခြေစွမ်းပိုင်းမှာလည်း အသာစီးမှာရှိနေတဲ့ မိုနာကို အသင်းပဲ နိုင်ပွဲရယူသွားပါလိမ့်မယ်။
ခန့်မှန်းရလဒ် - မိုနာကို ၂ - ၀ တူးလော့စ်
စပိန်လာလီဂါပွဲစဉ်(၂၅)
ဗယ်လ်ကာနို - ရီးယဲလ်မက်ဒရစ်
ဂရန်နာဒါ - အယ်မာရီယာ
မာယော့ကာ - ဆိုစီဒက်စ်
ပြင်သစ်လီဂူးဝမ်းပွဲစဉ်(၂၂)
မောင့်ပယ်လီယာ - မက်
ရင်းနက်စ် - ကလဲယားမောင့်
ရိမ်း - လန်း
ဘရက် - မာလ်ဆေး
စည်သူအောင်