ဥပဒေရေးရာဝန်ကြီးဌာနမှ သင်တန်းသား၊ သင်တန်းသူများ မာရဝိဇယ ဗုဒ္ဓရုပ်ပွားတော်မြတ်ကြီးအား ဖူးမြော်ကြည်ညို
နေပြည်တော်၊ ၂၀၂၄ မတ် ၃
ဥပဒေရေးရာဝန်ကြီးဌာနမှ ဥပဒေအရာရှိအဆင့်-၄(အစမ်းခန့်)များ လုပ်ငန်းခွင်ဝင် သင်တန်း အမှတ်စဉ် ၁/၂၀၂၄သင်တန်းသားမှအုပ်ချူပ် သူ(၇)ဦး၊ သင်တန်းသား၊သင်တန်းသူ (၆၀)ဦး၊ စုစုပေါင်း (၆၇)ဦးတို့သည် ယနေ့တွင် ပြည်ထောင်စုနယ်မြေ နေပြည်တော် ဒက္ခိဏသီရိမြို့နယ်ရှိ ဗုဒ္ဓဥယျာဉ် ဝတ္ထုကံတော်တွင် တည်ထားပူဇော်သည့် ကမ္ဘာပေါ်ရှိ ထိုင်တော်မူ ကျောက်ဆစ်ဗုဒ္ဓရုပ်ပွားတော်များအနက် ဉာဏ်တော်အမြင့်ဆုံးဖြစ်သည့် မာရဝိဇယ ဗုဒ္ဓရုပ်ပွားတော်မြတ်ကြီးအား လာရောက်ဖူးမြော်ကြည်ညိုကြသည်။
ဦးစွာ ရှင်းလင်းဆောင်၌ မာရဝိဇယဗုဒ္ဓရုပ်ပွားတော်မြတ်ကြီး ဂေါပကအဖွဲ့နှင့် ဗုဒ္ဓရုပ်ပွားတော်မြတ်ကြီး တည်ဆောက်ပူဇော်ခြင်းနှင့် ထိန်းသိမ်းခြင်း လုပ်ငန်းများတွင် ပါဝင်ဆောင်ရွက်ခဲ့ကြသည့် ကျွမ်းကျင်ပညာရှင်များက မာရဝိဇယဘုရားကြီးတည်ထား ကိုးကွယ်ပူဇော်ရခြင်း ရည်ရွယ်ချက်၊ ရုပ်ပွားတော်မြတ်ကြီးအား လုပ်ငန်းစဉ် အဆင့်ဆင့်ဖြင့် အောင်မြင်စွာတည်ထား ပူဇော်နိုင်ခဲ့မှု၊ လက်ရှိထိန်းသိမ်းဆောင်ရွက်နေမှု၊ခေတ်မီစက် ကိရိ ယာများအသုံးပြု၍ ကျောက်စာရုံစေတီတော်များ တည်ထားဆောင်ရွက်ခဲ့မှုနှင့် သာသနာ ရေးဆိုင်ရာ အခမ်းအနားကြီးများ စည်ကားသိုက်မြိုက်စွာ ကျင်းပနိုင်ခဲ့မှုအခြေအနေတို့ကို ရှင်းလင်းပြောကြားကြပြီး မာရဝိဇယဗုဒ္ဓရုပ်ပွားတော်မြတ်ကြီး အောင်မြင်စွာတည်ထား ပူဇော် နိုင်ရန် အဆင့်ဆင့်ဆောင်ရွက်ခဲ့မှုဗီဒီယိုမှတ်တမ်းကိုပြသသည်။
ထို့နောက် ဘုရားဖူးလာဥပဒေရေးရာဝန်ကြီးဌာနမှ သင်တန်းသား၊ သင်တန်းသူများ က ယခုကဲ့သို့ ရုပ်ပွားတော်မြတ်ကြီးအား အဆင်ပြေချောမွေ့စွာလာရောက်ဖူးမြော်နိုင်ရေး အတွက် စီစဉ်ဆောင်ရွက်ပေးမှုများနှင့် ရုပ်ပွားတော်မြတ်ကြီးတည် ဆောက်ပူဇော်ခဲ့မှု လုပ်ငန်းစဉ် အဆင့်ဆင့်ကို အသေးစိတ်ရှင်းလင်းပြောကြားပေးမှုများအပေါ် ကျေးဇူးတင် စကားများပြောကြားကြသည်။
ထို့ပြင် ဘုရားဖူးလာဥပဒေရေးရာဝန်ကြီးဌာနမှ သင်တန်းသားများက ရုပ်ပွားတော် မြတ်ကြီး အောင်မြင်စွာတည်ထားပူဇော်နိုင်ခဲ့မှု အခြေအနေနှင့်စပ်လျဉ်း၍ သိရှိလိုသည်များ ကို မေးမြန်းကြရာ တာဝန်ရှိသူများက အသေးစိတ် ပြန်လည်ရှင်းလင်း ဖြေကြားသည်။
ဆက်လက်၍ ဘုရားဖူးလာဥပဒေရေးရာဝန်ကြီးဌာနမှ သင်တန်းသား၊ သင်တန်းသူ များသည် မာရဝိဇယဗုဒ္ဓရုပ်ပွားတော်မြတ်ကြီးအား သွားရောက်ဖူးမြော်ကြည်ညိုကြပြီး ဘုရားရင်ပြင်တော်ပတ်လည်၌ စကျင်ကျောက်များအသုံးပြု၍ တည်ဆောက်ထားသည့် ဂန္ဓကုဋိတိုက်များအတွင်း၌ လေ့လာကြည့်ရှုကြပြီး မာရဝိဇယဗုဒ္ဓရုပ်ပွားတော်မြတ်ကြီး ဘက်စုံပြုပြင်မွမ်းမံရန်အတွက်အလှူငွေများပေးအပ်လှူဒါန်းကြသည်။
ထို့နောက် ဘုရားဖူးလာ ဥပဒေရေးရာဝန်ကြီးဌာနမှ သင်တန်းသား၊သင်တန်းသူများ သည် ဗုဒ္ဓဥယျာဉ်တော်အတွင်း တည်ဆောက်ထားရှိသည့် မော်ကွန်းတိုက်၌ မာရဝိဇယ ဗုဒ္ဓရုပ်ပွားတော်မြတ်ကြီးနှင့် ဗုဒ္ဓဥယျာဉ်တော်ပုံစံငယ်ပြသထားမှု၊ ဗုဒ္ဓဥယျာဉ်တော်အတွင်း ကျင်းပခဲ့သည့် မဟာမင်္ဂလာအခမ်းအနားများတွင် အသုံးပြုခဲ့သည့် ပစ္စည်းများ၊ ဘုရားရှင် ဓာတ်တော်၊ ရဟန္တာဓာတ်တော်များ ထည့်သွင်းပူဇော်ခဲ့သည့် ရွှေဖလားများ၊ မာရဝိဇယ ဆင်းတုတော်ကြီးအား အစိတ်အပိုင်းလေးပိုင်းခွဲ၍တည်ဆောက်ထားသော ဆင်းတုတော်ကြီး ပုံစံငယ်များ၊ မြန်မာ့ရိုးရာပန်းဆယ်မျိုးလက်ရာပုံစံငယ်များ၊ ရုပ်ပွားတော်မြတ်ကြီး တည်ထားပူဇော်မှု မှတ် တမ်းဓာတ်ပုံများ၊ ဗိသုကာလက်ရာများဖြင့် ခမ်းနားထည်ဝါစွာ တည် ထားပူဇော်ထားသည့် အဂ္ဂါဓိပတိသာသနာ့ဗိမာန်တော်ကြီး၊ ကျောက်စာရုံစေတီတော်များ၊ မုစလိန္ဒအိုင်နှင့် အခြားသာသနိက အဆောက်အဦများကို ဆက်လက်ဖူးမြော် လေ့လာ ကြည်ညိုခဲ့ကြသည်။
အလားတူ မာရဝိဇယဗုဒ္ဓရုပ်ပွားတော်မြတ်ကြီးအား အနယ်နယ်အရပ်ရပ်မှ ရဟန်းရှင် လူဘုရားဖူးပြည်သူများ လာရောက်ဖူးမြော်ကြည်ညိုလျက်ရှိကြောင်း သိရသည်။
ယနေ့တွင် မာရဝိဇယဗုဒ္ဓ ရုပ်ပွားတော်မြတ်ကြီးအား လာရောက် ဖူးမြော်ခဲ့ကြသည့် ဘုရားဖူးလာဥပဒေရေးရာ ဝန်ကြီးဌာနမှ သင်တန်းသား၊ သင်တန်းသူ၏ ရင်တွင်းစကားသံများအား ယခုလိုကြားသိခဲ့ရပါတယ်-
“ယနေ့လာရောက်တဲ့ ခရီးစဉ်ကတော့ ကျွန်တော်တို့ဌာနမှာ ဖွင့်လှစ်နေတဲ့ ဥပဒေ အရာရှိအဆင့်-၄ (အစမ်းခန့်)များ လုပ်ငန်းခွင် ဝင်သင်တန်းအမှတ်စဉ် (၁/၂၀၂၄)မှာတက်ရောက်နေတဲ့ သင်တန်းသား ၃၀ ဦး၊ သင်တန်းသူ ၃၀ ဦး စုစုပေါင်း ၆၀ ဦးကို မာရဝိဇယဗုဒ္ဓ ရုပ်ပွားတော်မြတ်ကြီး ဖူးမြော်ကြည်ညိုဖို့အတွက် လာရောက်ပို့ဆောင်တာပဲဖြစ်ပါတယ်။ ဒီလိုဗုဒ္ဓရုပ်ပွားတော်မြတ်ကြီးကို ဖူးမြော်ကြည်ညိုနိုင်ဖို့အတွက် ပြည်ထောင်စုဝန်ကြီး ပြည်ထောင်စုရှေ့နေချုပ်ရဲ့ လမ်းညွှန်ချက်နှင့်အညီ နိုင်ငံတော်စီမံအုပ်ချုပ်ရေး ကောင်စီရုံးသို့ ခွင့်ပြုမိန့်တင်ပြခဲ့ပြီး မာရဝိဇယဗုဒ္ဓ ရုပ်ပွားတော်မြတ်ကြီး ထိန်းသိမ်းစောင့်ရှောက်ရေး ဂေါပကအဖွဲ့နဲ့ ချိတ်ဆက်ပြီးတော့ လာရောက်ပို့ဆောင်တာဖြစ်ပါတယ်။ ကျွန်တော်တို့ ဒီသင်တန်းသား၊ သင်တန်းသူများအနေနဲ့ ဘုရားကြီးကို လာရောက်ဖူးမြော်ရတော့ ဒါအစုအဖွဲ့နဲ့ဆို ပထမဆုံးအကြိမ်ဖြစ်ပါတယ်။ အခုလိုမျိုး ထူးထူးခြားခြား တည်ထားကိုးကွယ်တဲ့ ဗုဒ္ဓရုပ်ပွားတော်မြတ်ကြီးကို ဖူးမြော်ကြည်ညိုခွင့်ရတဲ့ အတွက် ဌာနကိုယ်စားသော်လည်းကောင်း သင်တန်းသား၊ သင်တန်းသူများ အတွက်သော် လည်းကောင်း အများကြီး ဝမ်းမြောက်ဂုဏ်ယူပါတယ်။ ဗုဒ္ဓရုပ်ပွားတော်မြတ်ကြီး တည်ထားကိုးကွယ်တဲ့ ရည်ရွယ်ချက် (၄)ရပ်နဲ့အညီ ကမ္ဘာတည်သရွေ့ဗုဒ္ဓသာသနာ တည်စေရေး ရေရှည်တည်တံ့ ခိုင်မြဲပါစေလို့ ဌာနကိုယ်စား ဆုမွန်ကောင်းတောင်းအပ်ပါတယ်။ ဗုဒ္ဓဘာသာသာသနာ ရောင်ဝါနေသို့ ထွန်းလင်းပါစေလို့လည်း ဆုမွန်ကောင်း တောင်းအပ်ပါတယ်။ ဘုရားကြီးကို တည်ထားကိုးကွယ်တဲ့ အလှူ့ဒါယကာကြီးနှင့် တကွ အလှူရှင်များအားလုံး ကိုယ်စိတ်နှစ်ဖြာ ကျန်းမာချမ်းသာ ကြပါစေကြောင်းလည်း ဌာနအနေနဲ့ ဆုတောင်းအပ်ပါတယ်” ဟုပြောသည်။
“သမီးကတော့ ဌာနကနေပြီးတော့ လေ့လာရေးခရီး အနေနဲ့ မာရဝိဇယဘုရားကြီးကို ရောက်ရှိနေတာဖြစ်ပါတယ်။မာရဝိဇယဘုရားဟာဆိုလို့ရှိရင် ကမ္ဘာပေါ်မှာ ထိုင်တော်မူ ရုပ်ပွားတော်ကြီးဖြစ်ပါတယ်။ အခုဟာဆိုရင်တော့ညီမတို့ ဘုရားကိုလည်း ဖူးမြော်ပြီးဖြစ်ပါတယ်။ ဘုရားထဲမှာရှိတဲ့ ကျောက်စာရုံတွေကိုလည်း သွားရောက် ဖူးမြော်လေ့လာမှာဖြစ်တယ်။ ဘုရားကြီးက အလွန်တန်ခိုးကြီးမားပါတယ်။ ဒါကြောင့်မြန်မာနိုင်ငံမှာရှိတဲ့ မိဘပြည်သူ တွေအားလုံးကိုလည်း လာရောက်ဖူးမြော်ဖို့ ဖိတ်ခေါ်ပါတယ်ရှင်”ဟု ပြောသည်။
“ဒီရှင်းလင်းဆောင်မှာ ရှင်းပြသွားတဲ့ မာရဝိဇယဘုရား တာဝန်ရှိသူများရဲ့ မာရ ဝိဇယဘုရား ရုပ်ပွားတော်မြတ်ကြီး စတင် ထွင်းထုကတည်းက ပြောပြသွားတဲ့ ဒီအချက်တွေပေါ်မှာ ညီမတို့မသိသေးတာတွေ အများကြီးသိခဲ့ရတဲ့ အတွက် ကျေးဇူးတင်ပါတယ်။ ဒီလိုမျိုးဌာနက စီစဉ်ပေးလို့ အဖွဲ့အစည်းနဲ့ အတူတူ လာရောက်ဖူးမြော် ခွင့်ရတာအတိုင်းမသိ ဂုဏ်ယူမ်းမြောက်မိပါတယ်”ဟု ပြောသည်။