ကျန်းမာရေးဝန်ကြီးဌာန အထူးကုဆေးကုသရေးအဖွဲ့ ဧရာဝတီတိုင်းဒေသကြီး ဟင်္သာတမြို့သို့ ဒုတိယအကြိမ် ကွင်းဆင်း ဆေးကုသမှုများ ဆောင်ရွက်
နေပြည်တော် မတ် ၃
အထူးကုသမှုများ (Super Speciality) လိုအပ်သော ပြည်သူများ အနေဖြင့် သက်ဆိုင်ရာ ပါမောက္ခ၊ အထူးကုဆရာဝန်ကြီးများနှင့် တွေ့ဆုံကာ ရောဂါရှာဖွေ စမ်းသပ်မှုများနှင့် ကုသမှုများကို မိမိတို့ဒေသ၌ပင် လက်လှမ်းမီ ရရှိခြင်းဖြင့် ပြည်သူများ စိုက်ထုတ်ကုန်ကျရသော ဆေးကုသမှု စရိတ်လျော့နည်း ကျဆင်းစေရန်နှင့် ရောဂါများကို စောစီးစွာသိရှိပြီး လိုအပ်သော ကုသမှုများကို အချိန်မီရရှိခြင်းဖြင့် သက်ရှည် ကျန်းမာစေနိုင်ရေးအတွက် ကျန်းမာရေး ဝန်ကြီးဌာနသည် ရန်ကုန်၊ မန္တလေး၊ နေပြည်တော်တို့မှ ပါမောက္ခ၊ အထူးကုဆရာဝန်ကြီးများ ပါဝင်သော အထူးကုဆေးကုသရေး အဖွဲ့များ၏ ကွင်းဆင်းကုသမှု အစီအစဉ်များ ဆောင်ရွက်လျက်ရှိသည်။
၂၀၂၄ ခုနှစ် မတ် ၂ ရက်နှင့် ၃ ရက်တို့တွင် ရန်ကုန်ပြည်သူ့ဆေးရုံကြီး ရန်ကုန် အထွေထွေရောဂါကု ဆေးရုံသစ်ကြီး၊ ကလေးဆေးရုံကြီး-ရန်ကုန်၊ အထူးကုဆေးရုံကြီး (ခုတင်-၅၀၀)- ရန်ကုန်နှင့် မျက်စိရောဂါအထူးကုဆေးရုံကြီး-ရန်ကုန် တို့မှ ပါမောက္ခ၊ အထူးကုဆရာဝန်ကြီးများ ပါဝင်သည့် အထူးကုဆေးကုသရေး အဖွဲ့သည် ကျန်းမာရေးဝန်ကြီးဌာန အစီအစဉ်ဖြင့် ဧရာဝတီတိုင်းဒေသကြီး ဟင်္သာတမြို့သို့ ဒုတိယအကြိမ် သွားရောက်၍ ပြည်သူ့ဆေးရုံကြီး ဟင်္သာတမြို့မှ အထူးကုဆရာဝန်ကြီးများ၊ ကျန်းမာရေး ဝန်ထမ်းများနှင့်အတူ ဒေသခံပြည်သူများအား ဆေးကုသမှုများ ဆောင်ရွက်ပေးခဲ့သည်။
အဆိုပါအထူးကု ဆေးကုသရေးအစီအစဉ်တွင် ဟင်္သာတမြို့သာမက ဧရာဝတီတိုင်းဒေသကြီး အတွင်းရှိ မြို့နယ်ပေါင်း (၁၀)မြို့နယ်နှင့် ရန်ကုန်တိုင်းဒေသကြီးနှင့် ပဲခူးတိုင်းဒေသကြီးရှိ မြို့နယ် ၂ မြို့နယ်တို့မှ မြို့ပေါ်နှင့် ကျေးလက်နေပြည်သူများ လာရောက်ပြသခဲ့ပြီး နှလုံးရောဂါဆိုင်ရာ လူနာ ၆၉ ဦး၊ အစာအိမ်နှင့်အူလမ်းကြောင်းဆိုင်ရာ လူနာ၄၇ဦး၊ ရင်ခေါင်းဆေး ကုသမှုဆိုင်ရာ လူနာ ၂၀ ၊ ဆီးနှင့်ကျောက်ကပ် ဆေးကုသမှုဆိုင်ရာ လူနာ ၆၁ ဦး၊ ဆီးချိုနှင့် ဟော်မုန်းဆိုင်ရာ လူနာ ၈၃ ဦး၊ ဦးနှောက်နှင့် အာရုံကြောဆေးကုသမှုဆိုင်ရာ လူနာ ၄၆ ဦး၊ ဦးနှောက်နှင့် အာရုံကြောခွဲစိတ်ကုသမှု ဆိုင်ရာလူနာ ၁၃ ဦး၊ အထွေထွေရောဂါဆေးပညာ လူနာ ၁၃၂ ဦး၊အထွေထွေခွဲစိတ် ရောဂါလူနာ ၅၄ ဦး၊ ကလေးရောဂါလူနာ ၈၈ ဦး၊ ကလေးကျောက်ကပ်ရောဂါဆိုင်ရာ လူနာ ၁၁ ဦး၊မျက်စိရော ဂါလူနာ ၃၄၇ ဦး၊ အရိုးရောဂါလူနာ ၉၇ ဦး၊ နား၊ နှာခေါင်း၊ လည်ချောင်းရောဂါဆိုင်ရာလူနာ ၄၄ ဦး၊ သားဖွားမီးယပ်ရောဂါလူနာ ၅၁ ဦး၊ သွားနှင်ခံတွင်းလူနာ ၅၅ ဦး၊ ကင်ဆာရောဂါဆိုင်ရာ လူနာ ၇ ဦး၊ ကိုယ်အင်္ဂါပြန်လည် သန်စွမ်းရေးရောဂါ ဆိုင်ရာလူနာ ၅၉ ဦးစုစုပေါင်း လူနာ ၁၂၈၄ ဦး တို့ကို ကြည့်ရှုကုသမှုပေးခဲ့သည်။
အဆိုပါလူနာများအနက် နှလုံးပုံရိပ်ဖော်စက်ဖြင့် ကြည့်ရှုခြင်း (Echocardiography) ၃၅ ဦး၊ အစာအိမ်နှင့်အူလမ်းကြောင်း မှန်ပြောင်းကြည့်ရှုခြင်း (OGDS) ၇ ဦး၊ အစာအိမ်သွေးကြောထုံး ကုသခြင်း (Rubber band ligation)) ၁ ဦး၊ ကွန်ပျူတာဓာတ်မှန်ဖြင့် စစ်ဆေးခြင်း (CT scan)) ၁၄ ဦး၊ ဓာတ်မှန်ဖြင့်ရောဂါရှာဖွေခြင်း ၇၄ ဦး၊ ဓာတ်ခွဲစမ်းသပ်သူ ၉၆ ဦး၊ သွေးချိုဓာတ်(HbA1C) တိုင်းတာခြင်း ၂၇ ဦး ၊ Ultrasound ရိုက်ကူးခြင်း ၅၀ ဦး၊ နှလုံးစက်ဖြင့်စစ်ဆေးခြင်း(ECG) ၇၆ ဦး စမ်းသပ် စစ်ဆေးပေးနိုင်ခဲ့ပြီး မျက်စိခွဲစိတ်ကုသမှု ၄၁ ဦးနှင့်အထွေထွေ ခွဲစိတ်ကုသမှု ၁၈ ဦးတို့ကို ဆောင်ရွက်နိုင်ခဲ့သည်။
ထို့ပြင် အထွေထွေခွဲစိတ်ရောဂါ လူနာ၉ ဦး၊ နှလုံးရောဂါဆိုင်ရာလူနာ ၁ ဦး၊ ဦးနှောက်နှင့် အာရုံကြောဆေးကုသမှုဆိုင်ရာ လူနာ ၁ ဦးနှင့် ဦးနှောက်နှင့် အာရုံကြော ခွဲစိတ်ကုသမှုဆိုင်ရာလူနာ ၁ ဦးတို့အား လိုအပ်သော စစ်ဆေးကုသမှုများ ဆက်လက်ဆောင်ရွက်နိုင်ရန် ရန်ကုန်မြို့ရှိ သက်ဆိုင်ရာ ပြည်သူ့ဆေးရုံကြီးများသို့ လွှဲပြောင်းကုသမှု ဆောင်ရွက်ပေးနိုင်ခဲ့သည့်အပြင် မျက်စိအတွင်းတိမ် ခွဲစိတ်ကုသမှုကို ဖြည့်ဆောင်ရွက်ရန်အတွက် စေလွှတ်ထားသည့် မျက်စိအထူးကု ကွင်းဆင်းဆေးအဖွဲ့သည် မတ်လ ၁၁ ရက်အထိ ပြည်သူ့ဆေးရုံကြီး-ဟင်္သာတမြို့၌ မျက်စိရောဂါလူနာများ ကြည့်ရှုကုသခြင်းနှင့် မျက်စိခွဲစိတ်ကုသမှုများ ဆက်လက်ဆောင်ရွက်မည် ဖြစ်သည်။
အဆိုပါအစီအစဉ်နှင့်အတူ ဟင်္သာတမြို့နယ် ပြည်သူ့ကျန်းမာရေး ဦးစီးဌာနမှ ဏ်ငဖနမ ကိုဗစ်-၁၉ ရောဂါကာကွယ်ဆေး ထိုးနှံခြင်းနှင့် ကာကွယ်ဆေးအကြိမ်ပြည့် မရရှိသေးသော အသက် ၁ နှစ်မှ ၅ နှစ် အရွယ်ကလေးများကို အမီလိုက်(Catchup)နည်းလမ်းဖြင့် ကာကွယ်ဆေးထိုးနှံခြင်းတို့ကို ဆောင်ရွက်ခဲ့ရာ စုစုပေါင်း ၆၅ ဦးတို့ကိုကာကွယ်ဆေး ထိုးနှံပေးနိုင်ခဲ့သည်။
ယမန်နေ့က ဟင်္သာတခရိုင်နှင့် မြို့နယ်စီမံအုပ်ချုပ်ရေးအဖွဲ့မှ တာဝန်ရှိသူများသည် အထူးကုဆေးကုသရေး အစီအစဉ်ဆောင်ရွက်ရာနေရာသို့ လာရောက်ပြသ ကုသမှုခံယူကြသော လူနာများအား ကြည့်ရှုအားပေးခဲ့ပြီး ပါမောက္ခ၊ အထူးကုဆရာဝန်ကြီးများကို ကျေးဇူးတင်စကား ပြောကြားကာ ဒေသထွက် အမှတ်တရလက်ဆောင်များ ပေးအပ်ကြသည်။
ရန်ကုန်၊ မန္တလေး၊ နေပြည်တော်မှ အထူးကုသမှုဆိုင်ရာ (Super speciality)) ပါမောက္ခ၊ အထူးကုဆရာဝန်ကြီးများ၏ အထူးကုကွင်းဆင်း ကုသရေးခရီးစဉ်များကို ၂၀၂၄ ခုနှစ် နှစ်ဆန်းမှ စတင်၍ အပတ်စဉ် စနေ၊ တနင်္ဂနွေနေ့များ၌ ဆောင်ရွက်လျက်ရှိရာ တောင်ကြီးမြို့၊ ပြည်မြို့၊ သံတွဲမြို့၊ ပုသိမ်မြို့၊ မော်လမြိုင်မြို့၊ မကွေးမြို့၊ မြိတ်မြို့၊ ညောင်ဦးမြို့၊ မြစ်ကြီးနားမြို့နှင့် ယခု ဟင်္သာတမြို့များသို့ သွားရောက်ပြီးဖြစ်ကြောင်း သိရှိရသည်။