ဓာတ်အားခွဲရုံ တည်ဆောက်ရေးလုပ်ငန်းနှင့် ပစ္စည်းစီမံရေးဌာနကို ပြည်ထောင်စုဝန်ကြီး ဦးဉာဏ်ထွန်း ကြည့်ရှုစစ်ဆေး

ဓာတ်အားခွဲရုံ တည်ဆောက်ရေးလုပ်ငန်းနှင့် ပစ္စည်းစီမံရေးဌာနကို ပြည်ထောင်စုဝန်ကြီး ဦးဉာဏ်ထွန်း ကြည့်ရှုစစ်ဆေး

နေပြည်တော်  မတ် ၉

လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးဉာဏ်ထွန်းသည် ဒုတိယဝန်ကြီး ဦးအေးကျော်၊ ဌာနဆိုင်ရာ တာဝန်ရှိသူများနှင့်အတူ ယနေ့နံနက်ပိုင်းတွင် ရန်ကုန်-မန္တလေး အမြန်လမ်းမကြီး မိုင်တိုင်အမှတ်(၂၀၀)အနီး၌ ဓာတ်အားခွဲရုံတည်ဆောက်ရေးလုပ်ငန်း ဆောင်ရွက်နေမှုကို သွားရောက်ကြည့်ရှုစစ်ဆေးပြီး တည်ဆောက်ရေး လုပ်ငန်းများ သတ်မှတ်ကာလအတွင်း  အချိန်မီပြီးစီးရေး၊ အရည်အသွေးစံချိန်စံညွှန်းပြည့်မီရေးနှင့် လုပ်ငန်းခွင်ဘေးအန္တရာယ် ကင်းရှင်းရေးဂရုပြုဆောင်ရွက်ရန် မှာကြားသည်။

ထို့နောက် ပြည်ထောင်စုဝန်ကြီးနှင့် တာဝန်ရှိသူများသည် ဒက္ခိဏသီရိမြို့နယ်ရှိ လျှပ်စစ်ဓာတ်အား ဖြန့်ဖြူးရေးလုပ်ငန်း၊ မီတာစမ်းသပ်စစ်ဆေး ဆောင်ရွက်ရန် ပြင်ဆင်ဆောင်ရွက်နေသည့် နေရာသို့ သွားရောက် ကြည့်ရှုစစ်ဆေးပြီး ယခုအခါတွင် မီးသုံးစွဲသူများပြားလာသည့်အတွက် မြန်မာပြည် အထက်ပိုင်းနှင့် အလယ်ပိုင်းတွင် အသုံးပြုရန် လိုအပ်သောမီတာများကို    စမ်းသပ်စစ်ဆေးပြီး အချိန်နှင့်တစ်ပြေးညီ ဖြန့်ဖြူးပေးနိုင်ရန်နှင့်  ဖြည့်ဆည်းဆောင်ရွက်ပေးနိုင်ရန် အတွက် ရန်ကုန်မြို့တွင်သာမက နေပြည်တော်တွင်လည်း ဖွင့်လှစ်ဆောင်ရွက်ရခြင်းဖြစ်ကြောင်း၊ မီတာများအတွက် မီတာစမ်းသပ်မှုများ ပြုလုပ်ရန် စမ်းသပ်ကိရိယာများ ရောက်ရှိနေပြီဖြစ်၍ ၎င်းလုပ်ငန်းစဉ်များအတိုင်း အကောင်အထည်ဖော် ဆောင်ရွက်နိုင်ရေးပစ္စည်းလိုအပ်ချက်၊ လူလိုအပ်ချက်များကို နှစ်လအတွင်း စတင်ဆောင်ရွက်နိုင်ရန်အတွက် လိုအပ်သည်များကို ဖြည့်ဆည်း၍ အမြန်ဆုံး အကောင်အထည်ဖော်ဆောင်ရွက်ရန် လိုအပ်ကြောင်း၊ ဆောင်ရွက်ရာတွင်လည်း မီတာများ၏ သတ်မှတ်အရည်အသွေးနှင့် လုံခြုံမှုရှိစေရန်စနစ်တကျ ဆောင်ရွက်သွားရန်လိုအပ်ကြောင်း မှာကြားကာ မီတာများ စမ်းသပ်စစ်ဆေးနိုင်ရန်အတွက် စက်ကိရိယာများ တပ်ဆင်ထားမှု အခြေအနေကို လှည့်လည်ကြည့်ရှု စစ်ဆေးသည်။

ယင်းနောက် ပြည်ထောင်စုဝန်ကြီးသည် လယ်ဝေးမြို့နယ်ရှိ နေပြည်တော်တိုင်းလျှပ်စစ်အင်ဂျင်နီယာရုံး၏ ပစ္စည်းစီမံရေးဌာန(စတို)သို့ ရောက်ရှိပြီး  စတိုတွင်းထားသိုမှုများကိုလည်း သတ်မှတ်ထားမှုအတိုင်း ဆောင်ရွက်ရန်၊  စာရင်းရေးသွင်းမှုကို အမြဲတမ်း့စိအေန ဖြစ်နေရန်၊ နှစ်ကြာနေသည့်ပစ္စည်းများကို ဘုတ်အဖွဲ့ဖွဲ့၍ ၎င်းင်းတို့မှ ဆယ်တင်ပစ္စည်းနှင့်   ဖျက်ဆီးသင့်သည့် ပစ္စည်းများကိုခွဲ၍ လုပ်ထုံးလုပ်နည်းနှင့်အညီ ဆက်လက်ဆောင်ရွက်သွားရန် မှာကြားပြီး စတိုအတွင်း ထိန်းသိမ်းထားရှိသည့် စီမံကိန်းလုပ်ငန်းများအတွက် အသုံးပြုရန် စီမံကိန်း လုပ်ငန်းသုံးပစ္စည်းများ ဖြန့်ခွဲနေရာချထားမှုကို လှည့်လည်ကြည့်ရှုစစ်ဆေးသည်။

ဆက်လက်၍ ပြည်ထောင်စုဝန်ကြီးသည် ပြည်ထောင်စုနယ်မြေ (နေပြည်တော်)လျှပ်စစ်ဓာတ်အား ဖြန့်ဖြူးရေး လုပ်ငန်းရှိ တာဝန်ထမ်းဆောင်နေသော ဝန်ထမ်းများနှင့်တွေ့ဆုံပြီး လက်ရှိဓာတ်အားထုတ်လုပ်နေမှုကို တိုးတက်မထုတ်လုပ်နိုင်သေးမီကာလတွင် မြို့နယ်များ၌ ဓာတ်အားပျောက်ဆုံးမှုလျော့နည်းကျဆင်းရေး ရည်မှန်းချက်ထားဆောင်ရွက်ရန်၊ ဓာတ်အားကြွေးကျန်များ လျော့နည်းစေရေးနှင့် ဓာတ်အားခများ မှန်ကန်စွာ ကောက်ခံရရှိရေး ဝန်ထမ်းများ အားလုံးကြိုးပမ်းဆောင်ရွက်ရန်၊ မိမိတို့ဌာနအနေဖြင့်  အများပြည်သူနှင့် ဆက်ဆံ၍ ဝန်ဆောင်မှုပေးနေရသည့် ဌာနဖြစ်သဖြင့် ယဉ်ကျေးပျူငှာစွာ ဆက်ဆံပြီး တာဝန်ကို ပြီးမြောက်အောင်  ဆောင်ရွက်သွားရန် မှာကြားပြီး ဝန်ထမ်းများ၏ တင်ပြချက်များအပေါ် လိုအပ်သည်များ ဖြည့်ဆည်းဆောင်ရွက်ပေးခဲ့ကြောင်း သတင်းရရှိသည်။