ရမည်းသင်း၊ ဒေါပုံနှင့်ကျိုင်းတုံမြို့နယ်တို့တွင် မူးယစ်ဆေးဝါးများ ဖမ်းဆီးရမိ
နေပြည်တော် မတ် ၂၉
လုံခြုံရေးတပ်ဖွဲ့ဝင်များ ပါဝင်သော ပူးပေါင်း အဖွဲ့သည် မတ်လ ၂၆ ရက် ၆ နာရီခွဲတွင် ရမည်းသင်းမြို့နယ်၊ နမ့်အင်းကျေးရွာအုပ်စု၊ နန်းခွဲကျေးရွာအနီးတွင် မောင်ကြီး နှင့် ဦးပီးတို့ကို မော်တော်ဆိုင်ကယ် ၂ စီးနှင့်အတူ မသင်္ကာဖွယ်တွေ့ရှိသဖြင့် ဘိန်းစိမ်း ၇၈ ဒသမ ၄ ကီလို၊ မြန်မာငွေကျပ် ၆ ဒသမ ၄ သိန်းကို လည်းကောင်း။
မတ်လ ၂၈ ရက် မွန်းလွဲ ၁ နာရီ ၁၅ မိနစ်တွင် ဒေါပုံမြို့နယ်၊ ဗိုလ်ထွန်းဇံရပ်ကွက်၊ မေတ္တာလမ်းရှိ မခင်ခင်စု၏ နေအိမ်ကို ဝင်ရောက်ရှာဖွေရာ စိတ်ကြွရူးသွပ်ဆေးပြား ၃၂၄၀၀ ကို လည်းကောင်း၊ ထိုနေ့ ည ၆ နာရီ မိနစ် ၅၀ တွင် ကျိုင်းတုံမြို့နယ်၊ မိုင်းဇင်းကျေးရွာအုပ်စု၊ ဟိုခိုကျေးရွာရှိ အိုက်ဆိုင်၏ နေအိမ်ကို ဝင်ရောက်ရှာဖွေရာ စိတ်ကြွရူးသွပ်ဆေးပြား ၇၀၀၀ သိမ်းဆည်း ရမိခဲ့သဖြင့် ၎င်းတို့အား မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။