အသက် ၅၀ ကျော်အရွယ်ကျန်းမာရေး
အသက် ၅၀ ကျော်အရွယ်က ကြွက်သားတွေလျော့နည်းလာပြီး စွမ်းအင်တွေ လျော့နည်းကျဆင်း လာတာကြောင့် ပုံမှန်အတိုင်းပြုမူနေထိုင်နိုင်အောင် အစီအစဉ်တွေ ချမှတ်လုပ်ဆောင်ဖို့ လိုအပ်ပါတယ်။
သက်လုံကောင်းမှသာ စွမ်းအင်ပြည့်ဝပြီး ကျန်းမာသန်စွမ်းမှာဖြစ်ပါတယ်။ သက်လုံကောင်းဖို့က စက်ဘီး နင်းတာမျိုး တက်ကြွတဲ့ လုပ်ဆောင်မှုတွေလုပ်ဖို့လိုပါတယ်။ ဒီလိုလေ့ကျင့်မှုမျိုးက ခန္ဓာကိုယ် တစ်ခုလုံး ကျန်းမာရေးကောင်းမွန်စေပါတယ်။ အသက်အရွယ်ကြောင့်ဖြစ်လာနိုင်တဲ့ စိတ်ပိုင်းဆိုင်ရာ၊ ရုပ်ပိုင်းဆိုင်ရာပြဿနာတွေမဖြစ်အောင်ကာကွယ်နိုင်ပါတယ်။ အသက် ၅၀ ကျော်လာသူတွေ သက်လုံ ကောင်းဖို့ လိုက်နာရမယ့်အချက်တွေရှိပါတယ်။
ပုံမှန်လေ့ကျင့်ခန်းပြုလုပ်သင့်ပါတယ်။ လူတိုင်းနေ့စဉ် အပြေး၊ ရွရွ ပြေး၊ လမ်းလျှောက်၊ စက်ဘီးစီး၊ ရေကူးပြုလုပ်သင့်ပါတယ်။ လေ့ကျင့်ခန်းပြုလုပ်တာက အဆုတ်နဲ့နှလုံးကို သန်မာစေတယ်လို့ အမေရိကန် အဆုတ်ရောဂါအဖွဲ့က ဆိုပါတယ်။ လေ့ကျင့်ခန်းပြုလုပ်ခြင်းက သွေးလည်ပတ်မှုကို ကောင်းမွန်စေပြီး သက်လုံကောင်းဖို့ အထောက်အကူဖြစ်စေပါတယ်။ ကိုယ်လက်လှုပ်ရှားမှုတွေ ပြုလုပ် တာက နှလုံးနဲ့သွေးကြောတွေရဲ့ လုပ်ဆောင်မှုတွေကို ပုံမှန်ဖြစ်စေပါတယ်။
ဆွဲဆန့်လေ့ကျင့်ခန်း လုပ်သင့်ပါတယ်။ ကြွက်သားတွေသန်မာဖို့ လိုအပ်ပါတယ်။ အဲဒီလို ကြွက်သားတွေ သန်မာနေဖို့က ဆွဲဆန့်လေ့ကျင့် ခန်းတွေ မဖြစ်မနေလုပ်ဆောင်ဖို့လိုအပ်ပါတယ်။ ဆွဲဆန့်လေ့ကျင့်ခန်း လုပ်ဆောင်တာက ကြွက်သားကို သန်မာစေပြီး လေ့ကျင့်ခန်းတွေလုပ် ဆောင်ရာမှာ ပိုမိုအဆင်ပြေ စေပါတယ်။
လေ့ကျင့်မှုတွေ မြှင့်တင်သင့်ပါတယ်။ ပုံမှန်လေ့ကျင့်ခန်းတွေ လုပ်ဆောင်ရင်းကနေ တဖြည်းဖြည်း အရှိန်မြှင့်တင်ပြီး လုပ်ဆောင်ဖို့လည်း လိုအပ်ပါတယ်။ စစချင်းမှာ ပြင်းထန်တဲ့ လေ့ကျင့်ခန်းတွေ လုပ်ဆောင်တာထက် ဖြည်းဖြည်းချင်း အရှိန်မြှင့်တင်ပြီးလုပ်ဆောင်တာက လေ့ကျင့်ခန်းကြောင့် ခန္ဓာကိုယ် ထိခိုက်မှုတွေကိုလည်း ရှောင်ရှားနိုင်မှာ ဖြစ်ပါတယ်။
ညီညွတ်မျှတစွာ စားသုံးသင့်ပါတယ်။ လေ့ကျင့်ခန်းတွေလုပ်နေရုံနဲ့ လုံလောက်မှုမရှိသေးပါဘူး။ စားသုံးတဲ့ အစာအာဟာရဓာတ်တွေလည်း ခန္ဓာကိုယ်အတွက် ညီညွတ်မျှတမှုရှိဖို့ လိုအပ်ပါတယ်။ ကျန်းမာရေးနဲ့ ညီညွတ်တဲ့ အစားအစာကနေ ပြည့်စုံကြွယ်ဝတဲ့ အာဟာရဓာတ်တွေကို ရရှိနိုင်မှာ ဖြစ်ပါတယ်။ ကာဗိုဟိုက်ဒရိုတ်(ကစီဓာတ်)၊ အသားဓာတ်၊ အဆီဓာတ် စတာတွေက လေ့ကျင့်ခန်း လုပ်ရာမှာ အားအင်ပြည့်ဝစေပါတယ်။
လေ့ကျင့်ခန်းကို အနားပေးလုပ်ဆောင်သင့်ပါတယ်။ အသက် ၅၀ ကျော်အရွယ်တွေအနေနဲ့ အသက် အရွယ်အရ ငယ်ရွယ်သူတွေ မဟုတ်တော့တာကြောင့် လေ့ကျင့်ခန်းတွေ ဆက်တိုက်လုပ်တာမျိုး ရှောင်ကြဉ် သင့်ပါတယ်။ လေ့ကျင့်ခန်းတစ်မျိုးကနေ တစ်မျိုးပြောင်းတဲ့အခါ ခဏလောက် အနားပေး သင့်ပါတယ်။ ဒီလိုအနားပေးပြီး လုပ်ဆောင်တာကြောင့် နှလုံးနဲ့သွေးကြောတွေရဲ့ ကြံ့ခိုင်မှုကို ပိုမိုအား ကောင်းစေပြီး သက်လုံကောင်းမွန်စေပါတယ်။
ရေဓာတ်ပြည့်ဝအောင် ရေအလုံအလောက်သောက်သင့်ပါတယ်။ တစ်နေ့တာလုံး ရေဓာတ်ပြည့်ဝနေဖို့ အရေးကြီးပါတယ်။ ရေဓာတ်မလုံ လောက်ဘူးဆိုရင် လေ့ကျင့်ခန်းလုပ်ရာမှာလည်း ရလဒ်ကောင်းတွေ မရနိုင်ပါဘူး။ ဒါကြောင့် လေ့ကျင့်ခန်းမလုပ်ခင်နဲ့ လေ့ကျင့်ခန်းလုပ်ပြီးချိန်မှာ ရေဓာတ်ပြန်ဖြည့်ပေးဖို့ လိုအပ်ပါတယ်။ ရေဓာတ်မလုံလောက်တဲ့အခါ မောပန်းတာ၊ သက်လုံမကောင်းတာတွေ ဖြစ်လာနိုင်ပါ တယ်။
သွေးပူလေ့ကျင့်ခန်း ပြုလုပ်သင့်ပါတယ်။ လေ့ကျင့်ခန်းတွေမလုပ်ခင်မှာ သွေးပူလေ့ကျင့်ခန်းလုပ်တာ ကြောင့် သွေးလည်ပတ်စီးဆင်းမှု ကောင်းမွန်စေပြီး ကြွက်သားတွေရဲ့လုပ်ဆောင်မှုတွေ ကောင်းမွန်စေပါ တယ်။ ဒါ့ပြင် လေ့ကျင့်ခန်းပြုလုပ်တာကြောင့် ကြွက်သားနာကျင်ထိခိုက် မှုမရှိအောင် ကာကွယ်နိုင် ပါတယ်။ လေ့ကျင့်ခန်း လုပ်ဆောင်မှုတွေမှာလည်း ပိုမိုအားကောင်းစေတဲ့ အကျိုးကျေးဇူးတွေ ရရှိစေပါ တယ်။
လေ့ကျင့်ခန်းလုပ်ပြီးတဲ့အခါ သွေးအေးသွားအောင် ပြုလုပ်သင့်ပါတယ်။ လေ့ကျင့်ခန်းလုပ်ပြီးတဲ့အခါ လေ့ကျင့်ခန်းလုပ်တဲ့ အရှိန်ကိုလျှော့ချပြီး ခန္ဓာကိုယ်ကို အေးသွားတဲ့အထိ လွယ်ကူတဲ့ လေ့ကျင့်ခန်းလေး တွေ ၁၀ မိနစ်လောက် လုပ်ဆောင်ပေးသင့်ပါတယ်။ ဒါမှ ကြွက်သား တွေပြန်လည်ကောင်းမွန်စေပြီး လေ့ကျင့်ခန်းလုပ်ပြီး မောပန်းရမှုကိုလည်း လျော့နည်းစေပါတယ်။
အိပ်ရေး၀၀အိပ်သင့်ပါတယ်။ လေ့ကျင့်ခန်းလုပ်နေသူတစ်ဦးက အနားယူမယ်၊ အိပ်ရေး၀၀ အိပ်မယ်ဆို ရင် လေ့ကျင့်ခန်းကြောင့် ထိခိုက် ထားတဲ့ကြွက်သားတွေ အမြန်ပြန်ကောင်းအောင် လုပ်ဆောင်ပေးပါ တယ်။ ကြွက်သားတွေ နာကျင်မှုမရှိတဲ့အတွက် နောက်တစ်ရက် လေ့ကျင့်ခန်းလုပ်တဲ့အခါ ပိုပြီးထိထိ ရောက်ရောက် လုပ်ဆောင်နိုင်မှာ ဖြစ်ပါတယ်။ လူတစ်ယောက်က တစ်နေ့ကို အနည်းဆုံး ၆ - ၈ နာရီနှစ် နှစ်ခြိုက်ခြိုက်အိပ်စက်သင့်ပါတယ်။
စိတ်နဲ့ခန္ဓာကိုယ်ရဲ့ ဆက်နွှယ်မှုကို ဆက်သွယ်သင့်ပါတယ်။ စိတ်နဲ့ ကိုယ့်ရဲ့ခန္ဓာကိုယ်ကို ဆက်သွယ်ဖို့ အတွက်က အသက်ရှူလေ့ကျင့်ခန်း ပြုလုပ်တာ၊ တရားထိုင်တာတွေပြုလုပ်ဖို့ လိုအပ်ပါတယ်။ ဒါမှသာ စိတ်ဖိစီးမှု တွေကိုလျှော့ချနိုင်ပြီး အာရုံစူးစိုက်မှုတွေ ကောင်းလာမှာ ဖြစ်ပါတယ်။
ကျွမ်းကျင်သူတွေနဲ့အတူ လေ့ကျင့်သင့်ပါတယ်။ လေ့ကျင့်ခန်းလုပ်တဲ့အခါ ကျွမ်းကျင်တဲ့ဆရာနဲ့ သီးသန့် လေ့ကျင့်မယ်ဆိုရင် ပိုမိုထိရောက်မှုရရှိစေပါတယ်။ ဒါကြောင့် အသက် ၅၀ ကျော်အရွယ်တွေအနေနဲ့ ကိုယ့်ကိုယ်ကိုယ် ဘယ်လိုနည်းလမ်းတွေနဲ့ စိတ်ချမ်းသာအောင်၊ ကိုယ်ကျန်းမာအောင် စားသင့်လဲဆို တဲ့ နည်းလမ်းတွေသိထားသင့်ပါတယ်။ အိမ်ရာမဝင်ခင်မှာ ဖုန်းပိတ်ပြီးအိပ်သင့်ပါတယ်။ နေပူထဲ ထွက်ထွက်၊ မထွက်ထွက် Sun Cream လိမ်းသင့်ပါတယ်။ အပြင်ထွက်တဲ့အခါ လုံလောက်တဲ့ အဆောင်းအကာ ဝတ်ဆင်သွားသင့်ပါတယ်။ အစားအသောက်စားတိုင်းမှာ ဟင်းသီးဟင်းရွက်နဲ့ အသားကို မျှတအောင်စားသောက်သင့်ပါတယ်။ တစ်နေ့ကို ရေ ၆-၈ ဖန်ခွက် သို့မဟုတ် ရေသန့် ၂-၃ လီတာသောက်သင့်ပါတယ်။ သွားကျန်းမာရေးအတွက် နေ့စဉ်သွားပွတ်ကြိုးတစ်ကြိမ်သုံးသင့်ပါတယ်။ နေ့စဉ်နှစ်ကြိမ် သွားတိုက်သင့်ပါတယ်။
တရားထိုင်သင့်ပါတယ်။ မအိပ်ခင်နဲ့ အိပ်ရာကနိုးပြီးချိန်မှာ မျက်နှာသန့်စင်ပြီး တရားထိုင်သင့်ပါတယ်။ အသက် ၅၀ ကျော်အရွယ်တွေက ဘုရား၊ ကျောင်းကန်သွားတာ၊ တရားထိုင်တာတွေက ကျန်းမာရေးနဲ့ ညီညွတ်တဲ့အပြင် ဘဝနေနည်း ကောင်းလည်းဖြစ်လို့ လုပ်ဆောင်သင့်ပါကြောင်း ရေးသားလိုက်ရ ပါတယ်။ ။
ဒေါက်တာလွင်သန့်