တရုတ်နိုင်ငံ၏ AI နည်းပညာတိုးတက်မှုကိုဖော်ပြခဲ့သည့် လူသားဆန်သောစက်ရုပ်

တရုတ်နိုင်ငံ၏ AI နည်းပညာတိုးတက်မှုကိုဖော်ပြခဲ့သည့် လူသားဆန်သောစက်ရုပ်

မှတ်ဉာဏ်တုနည်းပညာသည် လျင်မြန်စွာတိုးတက်လာသည့် နည်းပညာ၏အစိတ်အပိုင်းတစ်ခုဖြစ်ပြီး   အလိုအလျောက်ဆောင်ရွက်နိုင်စေရန် ပရိုဂရမ်ရေးဆွဲထားသော နည်းပညာတစ်မျိုးလည်းဖြစ်သည်။ ကမ္ဘာ့နိုင်ငံများသည် ယခုအခါ မှတ်ဉာဏ်တုနည်းပညာကို ကျန်းမာရေး၊ ဝန်ဆောင်မှု၊ စိုက်ပျိုးရေးနှင့် စစ်ဘက်ဆိုင်ရာ နယ်ပယ်များတွင် အသုံးပြုနိုင်ရန်အတွက် ရင်းနှီးမြှုပ်နှံမှုများ ပြုလုပ်လျက်ရှိပြီး မှတ်ဉာဏ်တု (Artificial Intelligence-AI) နည်းပညာကို အသုံးပြုထားသည့် လက်နက် စနစ်များကိုပါ အပြိုင်အဆိုင်ထုတ်လုပ်ရန် ကြိုးပမ်းလျက်ရှိသည်။

လက်ရှိတွင် မှတ်ဉာဏ်တုနည်းပညာကို ကမ္ဘာ့နည်းပညာ ကုမ္ပဏီကြီးများဖြစ်သည့် Microsoft နှင့် Apple အပါအဝင် အခြား တရုတ်နည်းပညာကုမ္ပဏီကြီးများက  ခေတ်မီဆော့ဝဲများ နှင့်ဝန်ဆောင်မှုပေး သည့်လုပ်ငန်းများတွင် အသုံးပြုလျက်ရှိသည်။ တရုတ်နိုင်ငံ၏နည်းပညာသည် များစွာတိုးတက်လာခဲ့ပြီး နည်းပညာခေတ်ကို ပြောင်းလဲပေးနိုင်သည့် လူသားဆန်သော စက်ရုပ်တစ်ရုပ်ကို ထုတ်ဖော်ပြသပေး နိုင်ခဲ့ပြီ ဖြစ်သည်။

အဆိုပါ လူသားဆန်သောစက်ရုပ်တစ်ရုပ်သည် မြင့်မားသော AI မှတ်ဉာဏ်ကို ပိုင်ဆိုင်ထားပြီး ခက်ခဲ ရှုပ်ထွေးသော ဆောင်ရွက်ချက်များကို လုပ်ဆောင်နိုင်သည့်အပြင် ၎င်း၏ပတ်ဝန်းကျင်နှင့် လိုက်လျော ညီထွေဖြစ်အောင် နေထိုင်နိုင်မည် ဖြစ်သည်။

တရုတ်နိုင်ငံက နောက်ဆုံးဖော်ပြခဲ့သည့် လူသားဆန်သော စက်ရုပ်နှင့်စပ်လျဉ်း၍ အသေးစိတ် အချက်အလက်များကို တရုတ်အစိုးရက ဖော်ပြထားခြင်းမရှိသော်လည်း ယင်းလူသားစက်ရုပ်ကို ကုန်ထုတ်လုပ်မှု၊ ကျန်းမာရေးဝန်ဆောင်မှုများ၊ ထောက်ပံ့ပို့ဆောင်ရေးနှင့် စားသုံးသူများအား ဝန်ဆောင်မှု ပေးရေးကဏ္ဍများတွင် ကနဦးအနေဖြင့် အသုံးချနိုင်မည့် အလားအလာရှိကြောင်း ကျွမ်းကျင်သူများက မျှော်မှန်းထားသည်။ အဆိုပါစက်ရုပ်၏ ပုံသဏ္ဌာန်မှာ လူသားနှင့်ဆင်တူပြီး လူသားများကဲ့သို့ လမ်းလျှောက်နိုင်စေရန်နှင့် အနီးအနား ပတ်ဝန်းကျင်တွင် သွားလာနိုင်စေရန် ထုတ်လုပ် ဖန်တီးထားခြင်းဖြစ်ကြောင်း သိရသည်။

တရုတ်နိုင်ငံ၏ အဆိုပါစက်ရုပ်နည်းပညာ တိုးတက်မှုသည် နိုင်ငံ၏ AI နည်းပညာဖွံ့ဖြိုးတိုးတက်မှုတွင်  သိသာထင်ရှားသော ဖြစ်ရပ်တစ်ခုဖြစ်လာခဲ့ပြီး တရုတ်နိုင်ငံအတွင်း လုပ်ငန်းလည်ပတ်နေသည့် စက်မှုလုပ်ငန်းများ အပါအဝင် ကဏ္ဍအသီးသီးကို ပြောင်းလဲပစ်နိုင်မည့် အလားအလာရှိသည်။

ထို့ပြင် တရုတ်နိုင်ငံ၏ AI နည်းပညာဖွံ့ဖြိုးတိုးတက်မှုသည် ဆက်လက်ဖြစ်ပေါ်နေမည်ဖြစ်ပြီး လူသား များ၏ သက်ရှင်လှုပ်ရှားမှုအပေါ် များစွာသက်ရောက်စေနိုင်ဖွယ်ရှိသည်။

တရုတ်နိုင်ငံ၏ အကြီးဆုံးနည်းပညာ ကုမ္ပဏီကြီးတစ်ခုဖြစ်သည့် Baidu ကုမ္ပဏီ သည် တရုတ်နိုင်ငံကို AI ဉာဏ်ရည်တု နည်းပညာနယ်ပယ်တွင် ကမ္ဘာ့ထိပ်တန်း နေရာတွင် ရပ်တည်နိုင်စေရန် ရည်ရွယ်၍ နိုင်ငံတော် အဆင့် China Brain Project ကို တရုတ်အစိုးရသို့ ၂၀၁၅ ခုနှစ်က တင်သွင်း ခဲ့သည်။

ယင်းနောက်ပိုင်းတွင် တရုတ်နိုင်ငံသည် AI နည်းပညာတွင် ကမ္ဘာ့ထိပ်တန်းဦးဆောင် နိုင်ငံတစ်နိုင်ငံ ဖြစ်လာစေရန် တစ်နည်းအားဖြင့် အမေရိကန်နှင့် ယှဉ်ပြိုင်နိုင်ရန်အတွက် ၂၀၁၇ ခုနှစ်မှစ၍ Next Generation Artificial Intelligence Development Plan ကို ချမှတ် ဆောင်ရွက်ခဲ့သည်။ ထိုသို့ ဆောင်ရွက်ခဲ့မှုများ၏ အကျိုးရလဒ်ကို  လက်ရှိတွင် တွေ့မြင်နေရပြီဖြစ်သည်။

ယနေ့မျက်မှောက်ခေတ်တွင် ကမ္ဘာ့နိုင်ငံများရှိ မီဒီယာနှင့် ဖျော်ဖြေရေးလုပ်ငန်းများသည် ပြိုင်ဆိုင်မှုများ၊ မရေရာသည့် ဈေးကွက်များနှင့်ရင်ဆိုင်နေရပြီး ငွေကြေးဆုံးရှုံးမှုများ ဖြစ်ပေါ်နေကြသည်။ ထို့ကြောင့် တရုတ်အပါအဝင် နည်းပညာတိုးတက်သည့် အနောက်နိုင်ငံကြီးများသည် ယင်းပြဿနာများကို ဖြေရှင်း နိုင်ရန်အတွက် မီဒီယာနှင့် ဖျော်ဖြေရေးလုပ်ငန်းများတွင် AI နည်းပညာကို ထည့်သွင်း အသုံးပြုလာ ခဲ့ကြသည်။

ထို့ပြင် AI နည်းပညာကိုအသုံးပြု၍ ဖန်တီးတည်ဆောက်ထားသည့် လူသားပုံစံ စက်ရုပ်များအား အသုံးပြုခြင်းဖြင့် လူသားများအတွက် အန္တရာယ်ဖြစ်စေမည့် လုပ်ငန်းများတွင် ၎င်းစက်ရုပ်များကို အစားထိုးအသုံးပြုလာကြပြီဖြစ်သည်။

AI နည်းပညာကို အသုံးပြုထားသည့် စက်ရုပ်များချွတ်ယွင်းပါက လွယ်ကူစွာ ပြင်ဆင်နိုင်ခြင်းကြောင့် စက်ရုပ်များသည် အချို့ကဏ္ဍများတွင် လူသားအလုပ်သမားများထက် ပိုမိုတိကျပြီး လုပ်ငန်း တာဝန်များ ကို လျင်မြန်စွာဆောင်ရွက်နိုင်သဖြင့်ထုတ်ကုန်များ ပိုမိုထွက်ရှိနိုင်သောကြောင့် စီးပွားရေးကို ပိုမို တိုးတက် လာစေနိုင်ကြောင်း ကျွမ်းကျင်သူများက ခန့်မှန်းထားသည်။

အလားတူပင်  AI  နည်းပညာနှင့်ပတ်သက်၍ အလိုအလျောက်မောင်းနှင် နိုင်သည့်ကားများ၊ ဒရုန်းများနှင့် စက်ရုပ်များအကြောင်းကို မကြာခဏတွေ့မြင်ခဲ့ရသော်လည်း ယခုအခါ တိရစ္ဆာန်မွေးမြူရေးနှင့် ပတ်သက်ပြီး AI နည်းပညာများကို အသုံးပြုလာခဲ့ကြပြီ ဖြစ်သည်။ တိရစ္ဆာန်မွေးမြူရေးလုပ်ငန်းများတွင်   AI နည်းပညာကို အသုံးပြုခြင်းအားဖြင့် မျိုးပွားနှုန်းများ၊ ကြီးထွားနှုန်းများနှင့် အသားထွက်နှုန်းများ တိုးတက်စေရန် အထောက်အကူပြုနိုင်သည်။ ထို့ပြင်တိရစ္ဆာန်များ၏ အစာကျွေးသည့် ပုံစံများကို တွက်ချက်ပြီး ကျွေးနိုင်မည်ဆိုပါက နို့နှင့်အသားများ အထွက်တိုးစေနိုင်မည်ဖြစ်သည်ဟု ဆိုသည်။

ယခုအခါ AI နည်းပညာဖြင့် ထုတ်လုပ်ထားသည့် စစ်မြေပြင်သုံးစက်ရုပ်သည် အသက်စွန့်ဆောင်ရွက် ရသည့် စွန့်စားမှုများကို လုပ်ဆောင်ရန်မလိုဘဲ စစ်မြေပြင်တွင် ဒဏ်ရာရစစ်သည်များအား သယ်ဆောင် နိုင်ရေးတွင် အသုံးပြုနိုင်ပြီဖြစ်သည်။ ၎င်းတို့အား လူသားများအပါအဝင် အခြားလေးလံသော အရာဝတ္ထု များကို ရှည်လျားသော အကွာအဝေးသို့ သယ်ဆောင်ရာတွင်လည်း အသုံးပြုနိုင်သည်။

ထို့ပြင် AI စနစ်သုံးမောင်းသူမဲ့ရေငုပ်သင်္ဘောများသည် ပင်လယ်ပြင်အခြေအနေလေ့လာခြင်း၊ လက်နက် ခဲယမ်းများကို မိမိတပ်များထံ သယ်ယူပို့ဆောင်ခြင်းတို့တွင်လည်း အသုံးပြုနိုင်ပြီဖြစ်သည်။ လက်ရှိ ကာလတွင် တရုတ်နိုင်ငံသည် ၎င်းတို့၏ မိုဘိုင်းဖုန်းများ၊ ကွန်ပျူတာနှင့်ဆက်စပ် ပစ္စည်းများအပြင် ကာကွယ်ရေးပစ္စည်းများတွင်လည်း အလိုအလျောက်စနစ်ပါရှိသည့် Smart ဒရုန်းများ၊ ပဲ့ထိန်း ဒုံးကျည် နည်းပညာများနှင့် စက်ရုပ်နည်းပညာများတွင် မှန်းဆ၍မရအောင် တိုးတက်လာပြီဖြစ်ကြောင်း  ရေးသား တင်ပြလိုက်ရပါသည်။

Ref: GFG, MSN

မောင်ယုယ