နိုင်ငံတော်အတွက်အားဖြစ်စေမည့် မျိုးဆက်သစ်ရေကြောင်းလူငယ်များ
လူငယ်ဆိုသည်မှာ တိုင်းပြည်ဖွံ့ဖြိုးတိုးတက်ဖို့ အလွန်အရေးကြီးသော လူသားအရင်းအမြစ်ဖြစ်သည်။ “ယနေ့လူငယ်၊ နောင်ဝယ်လူကြီး” ဆိုသကဲ့သို့ လူငယ်များ၏ အသိဉာဏ်ပညာ၊ စွမ်းရည်နှင့် နိုင်ငံ ချစ်စိတ်ကိုမြှင့်တင်ပေးခြင်းသည် အနာဂတ်နိုင်ငံတော်ကြီး ဖွံ့ဖြိုးတိုးတက်စေရန် မျိုးစေ့ချခြင်းပင် ဖြစ်သည်။ အနာဂတ်နိုင်ငံတော်အတွက် ထပ်လောင်းပေါင်းစည်းတိုးပွားမည့် လူသားအရင်းအမြစ် များလည်း ဖြစ်သည်။ မျက်မှောက်ခေတ် ကမ္ဘာ့နိုင်ငံအသီးသီးသည်လည်း သက်ဆိုင်ရာ နိုင်ငံအဓွန့်ရှည် စေရေးနှင့် ဖွံ့ဖြိုးတိုးတက်ရေးအတွက် လူငယ်များ အခန်းကဏ္ဍကို အလေးထားပြုစု ပျိုးထောင် ပေးလျက်ရှိသည်။ အလားတူ မိမိတို့နိုင်ငံတွင်လည်း နိုင်ငံတော်တည်ဆောက်ရေးအခန်းကဏ္ဍတွင် လူငယ်များ၏ စွမ်းဆောင်နိုင်မှုသည် အလွန်အဓိက ကျလွန်းလှသည်။ နိုင်ငံတော် ကာကွယ် စောင့်ရှောက်ရန် အင်အားနှင့် စွမ်းရည်မရှိပါက နိုင်ငံတော်ဖွံ့ဖြိုးတိုးတက်မှုသည် ရေရှည်မတည်တံ့ နိုင်သောကြောင့် နိုင်ငံတော် ဖွံ့ဖြိုးတိုးတက်ရေးသာမက နိုင်ငံတော်လုံခြုံရေးနှင့် ကာကွယ်ရေး အခန်း ကဏ္ဍများတွင် လူငယ်များ၏ တက်ကြွစွာ ပူးပေါင်းဆောင်ရွက်မှုများ မရှိမဖြစ်လိုအပ် ပေသည်။ ယနေ့ကမ္ဘာကြီးသည် သိပ္ပံနှင့်နည်းပညာဆိုင်ရာ တစ်ဟုန်ထိုး ပြောင်းလဲတိုးတက်လျက်ရှိရာ ခေတ်နှင့် လိုက်လျောညီထွေစွာ မိမိတို့အပေါ် ကျရောက်လာမည့် နိုင်ငံတော်တာဝန်များကို ကျေပွန်စွာ ထမ်းဆောင်နိုင်ရန်အတွက် ယခုကတည်းက ပြင်ဆင်ကြိုးစားသွားကြရန်လိုသည်။ ထို့ကြောင့် မျိုးဆက်သစ် လူငယ်များ နွေရာသီကျောင်းပိတ်ရက်အတွင်း အသိဉာဏ်ပညာဖွံ့ဖြိုးတိုးတက်စေရန်၊ အားလပ်ရက်များကို အကျိုးရှိစေရန်၊ နိုင်ငံတော်အတွက် ရေကြောင်းဆိုင်ရာအသိပညာရှင်၊ အတတ် ပညာရှင် အနာဂတ်မျိုးဆက်သစ်များ ပေါ်ထွန်းလာစေရန်နှင့် လူငယ်များ စိတ်ဓာတ်စည်းကမ်း ကောင်းမွန်ပြီး ကျန်းမာကြံ့ခိုင်လာစေရန်ရည်ရွယ်၍ နိုင်ငံတော်အနေဖြင့် ရေကြောင်းလူငယ် သင်တန်း များကို ဖွင့်လှစ်ခြင်းဖြစ်ပေသည်။
ရေကြောင်း လူငယ်သင်တန်းများအား ၁၉၅၉ ခုနှစ်ဖေဖော်ဝါရီလ ၁၃ ရက်မှစတင်ပြီး လူငယ် (ရေကြောင်း) သင်တန်း၊ ကန်တော်ကြီးစခန်းအမည်ဖြင့် ကျောင်းသား၊ ကျောင်းသူလူငယ်လူရွယ်များကို ရေကြောင်းပညာနှင့် ရေကြောင်းလုပ်ငန်းများတွင် စိတ်ပါဝင်စားလာစေရေးနှင့် မြေတောင်မြှောက် ပေးနိုင်ရေးရည်ရွယ်ကာ နိုင်ငံတော်မှ ချမှတ်ထားသောမူဝါဒနှင့်အညီ စတင်ဖွင့်လှစ် သင်ကြားခဲ့သည်။ ထို့နောက် ၁၉၆၄ ခုနှစ်ဇွန်လတွင် ကန်တော်ကြီးစခန်း၌ပင် လူငယ်(ရေကြောင်း)သင်တန်းမှ ရှေ့ဆောင် လူငယ်(ရေကြောင်း) သင်တန်းအဖြစ် အမည်ပြောင်းလဲ၍ ဆက်လက်ဖွင့်လှစ်ခဲ့သည်။ ရှေ့ဆောင် လူငယ် (ရေကြောင်း)သင်တန်းအား ၁၉၆၅ ခုနှစ်မှ ၁၉၈၈ ခုနှစ်အထိ ကန်တော်ကြီးစခန်းအပြင် အင်းယားလေး၊ မော်လမြိုင်၊ စစ်တွေ၊ ပုသိမ်၊ မိတ္ထီလာ၊ မန္တလေး၊ မအူပင်၊ ရန်ကုန်၊ မြိတ်နှင့် ဘားအံ စသည့်စခန်းများအဖြစ် တိုးချဲ့ဖွင့်လှစ်ခဲ့သည်။ ရှေ့ဆောင်လူငယ်(ရေကြောင်း) သင်တန်းအား၁၉၉၅ ခုနှစ်မှ ၂၀၀၄ ခုနှစ်အထိ တပ်မတော်(ရေ)ရဲညွန့်လောင်း (ရေကြောင်းမျိုးဆက်သစ်)သင်တန်းအဖြစ် ပြောင်းလဲဖွင့်လှစ်ခဲ့သည်။ ၂၀၀၄ ခုနှစ် နောက်ပိုင်းတွင် သင်တန်းဖွင့်လှစ်မှုအား ခေတ္တရပ်နားခဲ့ပြီး ၂၀၁၄ ခုနှစ်မှ ၂၀၁၉ ခုနှစ်အထိ ရေကြောင်း လူငယ်အခြေခံနှင့် တန်းမြင့်သင်တန်းဟုပြောင်းလဲ၍ ခြောက်နှစ် ဆက်တိုက် ဖွင့်လှစ်ခဲ့သော်လည်း ၂၀၂၀ ပြည့်နှစ်တွင် တစ်ကမ္ဘာလုံး ကူးစက်ပြန့်ပွားလာသော ကိုဗစ်-၁၉ ရောဂါကြောင့် ၂၀၂၃ ခုနှစ်မှသာပြန်လည်ဖွင့်လှစ်နိုင်ခဲ့သည်။
အဆိုပါ ရေကြောင်းလူငယ်အခြေခံနှင့် တန်းမြင့်သင်တန်းများ စတင်ဖွင့်လှစ်ခဲ့သော ၂၀၁၄ ခုနှစ်တွင် သင်တန်းစခန်းခြောက်ခု၌ သင်တန်းသား၊ သင်တန်းသူ ၁၈၀ ဦး၊ ၂၀၁၅ ခုနှစ်တွင် သင်တန်းစခန်း ခြောက်ခု၌ သင်တန်းသား၊ သင်တန်းသူ ၃၅၀ ဦး၊ ၂၀၁၆ ခုနှစ်တွင် သင်တန်းစခန်းခုနစ်ခု၌ သင်တန်းသား၊ သင်တန်းသူ ၃၉၀ ဦး၊ ၂၀၁၇ ခုနှစ်တွင် သင်တန်းစခန်းရှစ်ခု၌ သင်တန်းသား၊ သင်တန်းသူ ၄၇၀ ဦး၊ ၂၀၁၈ ခုနှစ်တွင် သင်တန်းစခန်းရှစ်ခု၌ သင်တန်းသား၊ သင်တန်းသူ ၅၈၀ ဦး၊ ၂၀၁၉ ခုနှစ်တွင် သင်တန်းစခန်း ၁၂ ခု၌သင်တန်းသား၊ သင်တန်းသူ ၆၂၀ ဦး၊ ၂၀၂၃ ခုနှစ်တွင် သင်တန်းစခန်း ၁၁ ခု၌ သင်တန်းသား၊ သင်တန်းသူ ၇၁၂ ဦး လေ့ကျင့်သင်ကြားပေးနိုင်ခဲ့သည့်အတွက် ရေကြောင်းလူငယ်မောင်မယ် သင်တန်း သား၊ သင်တန်းသူ စုစုပေါင်း ၃၃၀၂ ဦးကို မွေးထုတ်ပေးနိုင်ခဲ့ပြီဖြစ်သည်။ ယခုနှစ်တွင်ဖွင့်လှစ်သော ရေကြောင်းလူငယ်အခြေခံနှင့် တန်းမြင့်သင်တန်းအား စခန်းပေါင်း ၁၀ နေရာတွင် အခြေခံ သင်တန်း သား၊ သင်တန်းသူ ၆၁၆ ဦးနှင့် တန်းမြင့်သင်တန်းသား၊ သင်တန်းသူ ၂၀၂ဦး စုစုပေါင်း သင်တန်း သား၊ သင်တန်းသူ ၈၁၈ ဦးဖြင့် ဖွင့်လှစ်သွားမည်ဖြစ်ကြောင်း သိရသည်။
သင်တန်းကာလမှာ ရက်သတ္တလေးပတ် ကြာမြင့်မည်ဖြစ်ပြီး သင်ကြားပေးမည့် ဘာသာရပ်များမှာ စစ်ရေးပြဘာသာရပ်၊ ရေတပ်သားဘာသာရပ်၊ ရေကြောင်း လမ်းညွှန်ဘာသာရပ်၊ နက္ခတ္တဗေဒ၊ GPS အပါအဝင် ရေကြောင်းသွားလာရေး၊ ရေတပ်သားအချက်ပြ ဆက်သွယ်ရေးဘာသာရပ်၊ ရေကူးဘာသာ ရပ်နှင့် လှေလှော်/ရွက်တိုက် ဘာသာရပ်တို့အား သင်ကြားပေးသွားမည်ဖြစ်သည်။ ယင်းဘာသာရပ် များမှာ နိုင်ငံတော်ဖွံ့ဖြိုးတိုးတက်ရေးအတွက်သာမက နိုင်ငံတော်ကာကွယ်ရေးအတွက်လည်း များစွာ အထောက်အကူပြုသော ဘာသာရပ်များ ဖြစ်ပေသည်။
ရေကြောင်းလူငယ်သင်တန်းတွင် သင်ကြားလေ့ကျင့်ပေးသော ဘာသာရပ်များသည် မျိုးဆက်သစ် လူငယ်များအတွက် နိုင်ငံတော်ဖွံ့ဖြိုးတိုးတက်စေရေးနှင့်ကာကွယ်ရေးတွင် အထောက်အကူပြုစေသော ရေကြောင်းဆိုင်ရာ အသိပညာဗဟုသုတများရရှိစေပြီး အမိန့်နာခံမှုကောင်းစေခြင်း၊ လူငယ်များ အချင်းချင်း ပူးပေါင်းဆောင်ရွက်တတ်စေခြင်း၊ စည်းကမ်းကောင်းမွန်စေခြင်း၊ ကျန်းမာကြံ့ခိုင်စေခြင်း စသည်တို့အပြင် စစ်ရေယာဉ်များ၏ စွမ်းရည်၊ တာဝန်ထမ်းဆောင်ပုံနှင့် ရေတပ်ဆိုင်ရာ အခေါ်အဝေါ် များကို နားလည်သဘောပေါက်စေသည့် အကျိုးကျေးဇူးများ ရရှိစေမည် ဖြစ်သည်။
လူငယ်ဟူသည် စူးစမ်းလိုစိတ်ရှိခြင်း၊ ဖျတ်လတ်တက်ကြွခြင်း၊ အရာရာကိုတီထွင်ဖန်တီးလိုစိတ်ရှိခြင်း၊ အမှန်တရားကိုမြတ်နိုးခြင်း စသောဂုဏ်သတ္တိများရှိသည်။ ထို့ပြင် လူငယ်တိုင်းတွင် မှန်ကန်သော အတွေးအခေါ်ရှိစေရန်နှင့် တိုင်းပြည်နှင့်လူမျိုးအပေါ် ချစ်မြတ်နိုးတတ်စေရန်လည်း လိုအပ်သည်။ ယနေ့ ကမ္ဘာကြီးတွင် နိုင်ငံတစ်နိုင်ငံအား ဖျက်ဆီးလိုပါကသို့မဟုတ် Fail State နိုင်ငံဖြစ်စေလိုပါက ကိုလိုနီ ခေတ်ကကဲ့သို့ လက်နက်ဖြင့် ကျွန်ပြုခြင်းမပြုလုပ်တော့ဘဲ ၎င်းနိုင်ငံအတွင်းရှိ နိုင်ငံသူ၊ နိုင်ငံသားတို့၏ အချက်အလက်များ၊ ကဏ္ဍပေါင်းစုံမှ အချက်အလက်များအပေါ်မူတည်၍ မဟာဗျူဟာ ချမှတ်ကာ ခေတ်သစ်ကိုလိုနီနိုင်ငံဖြစ်အောင် စီမံချက်ရေးဆွဲ အကောင်အထည်ဖော်နေကြပြီ ဖြစ်သည်။ ထို့ကြောင့် မိမိတို့နိုင်ငံအတွင်းရှိ လူငယ်များ၏ကိုယ်ခံအား (တစ်နည်း) မိမိတိုင်းပြည်နှင့်လူမျိုးအပေါ် ချစ်မြတ်နိုးသည့်စိတ် (မျိုးချစ်စိတ်ဓာတ် ရှင်သန်ထက်မြက်ရေး) သည်လည်း အရေးကြီးသော အခန်း ကဏ္ဍမှပါဝင် လျက်ရှိသည်။ ထို့ပြင် ခေတ်မီဖွံ့ဖြိုးတိုးတက်သော နိုင်ငံတော်သစ်တည်ဆောက်ရေးတွင် အရေးပါသည့် ပြည်တွင်း၊ ပြည်ပ ရေကြောင်းသယ်ယူပို့ဆောင်ရေး၊ ပင်လယ်ပြင်သယံဇာတများ ရှာဖွေ ဖော်ထုတ်အသုံးချရေး၊ ပင်လယ်ပြင်ဂေဟစနစ်များ ပျက်စီးမှုမရှိစေရန် ထိန်းသိမ်းစောင့်ရှောက်ရေး၊ ပင်လယ်ပြင် ရေလမ်းကြောင်းများ စနစ်တကျ အသုံးပြုရေးလုပ်ငန်းများကို အကောင်အထည်ဖော် ဆောင်ရွက်နိုင်ရန် ယနေ့လူငယ် များသည် အနာဂတ်ရေကြောင်းဆိုင်ရာ အသိပညာရှင်၊ အတတ် ပညာရှင်အင်အားစုများအဖြစ် ကျရာအခန်း ကဏ္ဍအသီးသီးမှ ပခုံးပြောင်း တာဝန်ယူထမ်းဆောင် နိုင်ရမည်ဖြစ်သည်။ ထို့ကြောင့် လူငယ်များအနေဖြင့် ပင်လယ်ရေကြောင်းဆိုင်ရာ ယုံကြည်ချက်၊ ခံယူချက်များ ကောင်းမွန်ပြီး ရေကြောင်းဆိုင်ရာ အသိပညာဗဟုသုတများ ပြည့်စုံကြွယ်ဝနေရန် လိုအပ်သည့်အတွက် နိုင်ငံတော်အကြီးအကဲ၏ လမ်းညွှန်ချက်အရ အနာဂတ်နိုင်ငံတော်အတွက် အရေးပါသော လူသားအရင်းအမြစ်ဖြစ်သည့် လူငယ်များကို ကြီးမားသော ရည်ရွယ်ချက်များဖြင့် ရေကြောင်း လူငယ်သင်တန်းများ ဖွင့်လှစ်ကာ ပင်လယ်ပြင်နှင့် ထိတွေ့ခွင့်ပေးခြင်း ဖြစ်သည်။ ရေကြောင်း လူငယ်သင်တန်းကာလအတွင်း လေ့လာရေးခရီးစဉ်များလည်း ပါဝင်သည်။
၂၀၂၃ ခုနှစ်တွင် ဖွင့်လှစ်ခဲ့သော ရေကြောင်းလူငယ်အခြေခံနှင့် တန်းမြင့်သင်တန်းများတွင် ရေကြောင်း လူငယ်မောင်မယ်များ စစ်ရေယာဉ်များအား လေ့လာစေခြင်း၊ ရေယာဉ်တည်ဆောက်ရေး လုပ်ငန်းများ တွင် လေ့လာစေခြင်း၊ တပ်မတော်(ရေ) သမိုင်းအား လေ့လာစေခြင်း၊ ရေကြောင်းပြခန်း၊ တပ်မတော် (ရေ) ဗဟိုစာကြည့်တိုက်၊ စိတ်ဓာတ်မြှင့်တင်ရေးခန်းမ၊ နက္ခတ်တာရာပြခန်း၊ ရေတပ်သုံး Simulator များ၊ သမိုင်းဝင်စစ်ရေယာဉ်(မေယု) စသည့်နေရာများအား လေ့လာခြင်းများ ဆောင်ရွက် စေခဲ့သည်။ ထို့ပြင် စစ်ရေယာဉ်များဖြင့် ရန်ကုန်မြစ်တစ်လျှောက်မှ ပင်လယ်ဝသို့ ရန်ကုန်မြစ်ကြောင်း လေ့လာရေး ခရီးစဉ်များ ဆောင်ရွက်ပေးခဲ့သည်။ ရေကြောင်းလူငယ် သင်တန်းနှင့်အတူ လေကြောင်း လူငယ် သင်တန်းများလည်း တစ်ပြိုင်နက်ဖွင့်လှစ်လျက်ရှိရာ တပ်မတော်(လေ)သို့ အပြန်အလှန် သွားရောက် လေ့လာခြင်း၊ လှိုင်မြို့နယ်အတွင်းရှိ နျူကလီးယားနည်းပညာ သတင်းအချက်အလက် စင်တာသို့ လေ့လာခြင်းများ ပြုလုပ်ခဲ့သည်။ နေပြည်တော်သို့ရောက်ရှိစဉ် ကာလတွင်လည်း တပ်မတော် စစ်သမိုင်းပြတိုက်၊ သူရဲကောင်းဗိမာန်၊ ဥပ္ပါတသန္တိစေတီတော်၊ မာရဝိဇယ ဗုဒ္ဓရုပ်ပွားတော် မြတ်ကြီးနှင့် အထင်ကရနေရာများသို့ လေ့လာရေးခရီးအဖြစ် သွားရောက် လေ့လာခဲ့ခြင်းများ ပြုလုပ်ခဲ့သည်။
ထိုသို့လေ့လာစေခဲ့ခြင်းဖြင့် ရေကြောင်းလူငယ် မောင်မယ်များအချင်းချင်း ပိုမိုရင်းနှီးခင်မင်စေခြင်း၊ အသိဉာဏ် ဗဟုသုတများ ပိုမိုရရှိစေခြင်း၊ တပ်မတော်(ရေ)၏ နေ့စဉ်လုပ်ငန်းတာဝန်များကို သိရှိစေ ခြင်း၊ တပ်မတော်နှင့် တပ်မတော်(ရေ)သမိုင်းကို လေ့လာသိရှိစေခြင်း စသောအကျိုး ကျေးဇူးများကို လူငယ်များ ရရှိနိုင်မည် ဖြစ်သည်။ ယခုနှစ်ဖွင့်လှစ်မည့် ရေကြောင်းလူငယ်အခြေခံနှင့် တန်းမြင့် သင်တန်းများကိုလည်း ယခင်နှစ်ကဲ့သို့ ဒေသန္တရ ဗဟုသုတရရှိရေးအတွက် လေ့လာရေးခရီးစဉ်များ ထည့်သွင်း ဆောင်ရွက်ပေးသွားမည် ဖြစ်သည်။
နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် အနာဂတ်နိုင်ငံတော်ဖွံ့ဖြိုးတိုးတက်ရေးအတွက် လူငယ်များသည် အလွန်အရေးကြီးကြောင်း လူငယ်များ ကိုယ်တိုင်ခံစားသိရှိ နားလည်စေရန် တွေ့ဆုံအားပေးစကား ပြောကြားခြင်း၊ လမ်းညွှန်မှာကြားမှုများအား ပြုလုပ်ပေးခြင်းဖြင့် လူငယ်များအပေါ် အလေးအနက်ထား သည်ကို သိသာထင်ရှားစေသည်။ ထိုသို့ နိုင်ငံတော်အကြီးအကဲကိုယ်တိုင် အားပေးချီးမြှင့် လမ်းညွှန်မှု ကြောင့် သင်ထောက်ကူပစ္စည်းစုံလင်စွာ ဘာသာရပ်များကို သက်ဆိုင်ရာ ဘာသာရပ်ကျွမ်းကျင်သူ အရာရှိ/နည်းပြများမှ စနစ်တကျ သင်ကြားပြသပေးသွားမည်ဖြစ်ပြီး နေထိုင်စားသောက်ရေးနှင့် ဆေး အကာအကွယ်ပေးရေးကအစ လိုအပ်ချက်မရှိအောင် စနစ်တကျဆောင်ရွက် ပေးထားသည်ကို ကြည့်ခြင်းဖြင့် ရေကြောင်း လူငယ်မောင်မယ်များအပေါ် နိုင်ငံတော်အကြီးအကဲအနေဖြင့် မည်မျှ အလေးအနက် ထားသည်ကို သိရှိနိုင်သည်။
ထို့ပြင် ရေကြောင်းလူငယ်မောင်မယ်များ သင်တန်းကာလနှင့် လေ့လာရေးခရီးစဉ်များ အတွင်း အခက် အခဲမရှိစေရေး၊ အဆင်ပြေချောမွေ့စေရေးအတွက် အကြိုညှိနှိုင်း အစည်းအဝေးများ ပြုလုပ်ခြင်း၊ ကဏ္ဍအလိုက် ဆပ်ကော်မတီများ ဖွဲ့စည်းဆောင်ရွက်ခြင်း၊ လိုအပ်သည်များ ပေါင်းစပ်ညှိနှိုင်း အကောင် အထည်ဖော်ခြင်းများ ဆောင်ရွက်ထားရှိသည်။
မြန်မာနိုင်ငံသည် ပထဝီနိုင်ငံရေးအရ အရေးပါသော နေရာတွင်တည်ရှိခြင်း၊ သဘာဝသယံဇာတများ ပေါကြွယ်ဝခြင်း၊ ကမ္ဘာ့လူဦးရေအများဆုံး နှစ်နိုင်ငံအကြားတွင် တည်ရှိခြင်း စသော အချက်အလက် များရှိပြီး နိုင်ငံအကျယ်အဝန်းနှင့် အချိုးညီစွာ ကျယ်ပြောလှသော ပင်လယ်ပြင်ကြီးကိုလည်း ပိုင်ဆိုင် ထားသည်။
နိုင်ငံတော်ကာကွယ်ရေး တာဝန်များအပြင် မြန်မာ့ပင်လယ်ပြင်အတွင်းရှိ ရေပေါ်/ရေအောက် အဖိုးတန် သယံဇာတများကို ကာကွယ်စောင့်ရှောက်ရေးသည် တပ်မတော်(ရေ)၏ အဓိကတာဝန် တစ်ရပ်ပင် ဖြစ်သည်။ ခေတ်အဆက်ဆက် တပ်မတော်(ရေ)အား အဆင့်မြှင့်တင်တည်ဆောက်ခဲ့သည်မှာ ယခုအခါ စစ်ရေယာဉ်များကို ကိုယ်တိုင်တည်ဆောက် နိုင်ပြီဖြစ်သကဲ့သို့ သုံးဘက်မြင်စစ်ဆင်နိုင်စွမ်းရှိသော တိုက်ပွဲဝင် အသင့်ရေတပ်အဖြစ်သို့ တက်လှမ်းနိုင်ခဲ့ပြီဖြစ်သည်။
ဆက်လက်၍ ရေပြာရေတပ်အဆင့်သို့ တက်လှမ်းနိုင်ရန်လည်း ကြိုးပမ်းအကောင်အထည် ဖော်နေပြီ ဖြစ်သည်။ ရုပ်ဝတ္ထု (Infrastructure)များအား ခေတ်မီအောင် တည်ဆောက်နေသကဲ့သို့ လူ့စွမ်းအား အရင်းအမြစ် (Human Resource)များကိုလည်း စနစ်တကျ ဟန်ချက်ညီစွာ သင်ကြား လေ့ကျင့်ပေး လျက်ရှိသည်။
ရေကြောင်း လူငယ်မောင်မယ်များသည်လည်း အနာဂတ်တပ်မတော်(ရေ)အတွက် လူ့စွမ်းအား အရင်း အမြစ်များ ဖြစ်လာနိုင်သဖြင့် အမြော်အမြင်ကြီးစွာ လေ့ကျင့်ပျိုးထောင်နေခြင်းလည်း ဖြစ်သည်။
ကမ္ဘာတည်သရွေ့ တည်ရှိနေမည့် မြန်မာနိုင်ငံတော်ကြီးနှင့် မြန်မာ့ပင်လယ်ပြင်ကြီးကို ကာကွယ် စောင့်ရှောက်ရန် တပ်မတော်(ရေ)အနေဖြင့်လည်း မျိုးဆက်သစ်လူငယ်များအား လက်ဆင့်ကမ်း အမွေအဖြစ် ပခုံးပြောင်းတာဝန် လွှဲပြောင်းပေးရမည်ဖြစ်သည်။ ထို့ကြောင့် ယခုနှစ် ဖွင့်လှစ်မည့် ရေကြောင်း လူငယ်စခန်းများတွင် သင်တန်းတက်ရောက်ကြမည့် ရေကြောင်း လူငယ်မောင်မယ်များ သည် တပ်မတော်(ရေ)၏ မျိုးဆက်သစ်များအဖြစ်လည်းကောင်း၊ အနာဂတ်နိုင်ငံတော်ကို ထုဆစ် ပုံဖော်ကြမည့် အားတစ်ခုအဖြစ်တည်ရှိမည့် မောင်မယ်များဖြစ်ပါကြောင်း ဂုဏ်ပြုရေးသား လိုက်ရပါ သည်။ ။
ဝေယံဦး (တိုင်းတာရေး)