ရန်ကုန်တိုင်းဒေသကြီး၊ လှိုင်သာယာမြို့နယ်ရှိ ပဲသန့်စင်စက်နှင့် ဆိပ်ကမ်းများမှကုန်ပစ္စည်းများ သင်္ဘောတင်ဆောင်မှုကို ပြည်ထောင်စုဝန်ကြီး ဦးထွန်းအုံကြည့်ရှုစစ်ဆေး

ရန်ကုန်တိုင်းဒေသကြီး၊ လှိုင်သာယာမြို့နယ်ရှိ ပဲသန့်စင်စက်နှင့် ဆိပ်ကမ်းများမှကုန်ပစ္စည်းများ သင်္ဘောတင်ဆောင်မှုကို ပြည်ထောင်စုဝန်ကြီး ဦးထွန်းအုံကြည့်ရှုစစ်ဆေး

နေပြည်တော်  ဧပြီ  ၂၈

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးထွန်းအုံသည် ယနေ့ နံနက်ပိုင်းတွင် ရန်ကုန်တိုင်းဒေသကြီး လှိုင်သာယာမြို့ စက်မှုဇုန်-၄ ရှိ ပြည်ဖြိုးအောင်ကုမ္ပဏီ၏ ပဲသန့်စင်စက်ရုံနှင့် နှမ်းလှော်စက်သို့ရောက်ရှိပြီး ရှင်းလင်းဆောင်တွင် တာဝန်ရှိသူတစ်ဦးက ပဲသန့်စင် ထုတ်လုပ်နိုင်မှု၊ ပြည်တွင်း၌ သိုလှောင်ဖြန့်ဖြူးပေးနေမှု၊ ပြည်ပသို့တင်ပို့နိုင်မှုတို့ကို ရှင်းလင်းတင်ပြရာ ပြည်ထောင်စုဝန်ကြီးက ပြည်ပသို့ တိုးမြှင့်တင်ပို့နိုင်ရေး ဆောင်ရွက်ရန်မှာကြားပြီး စက်ရုံအတွင်း ကြည့််ရှုစစ်ဆေးကာ လိုအပ်သည်များကို ပေါင်းစပ်ဆောင်ရွက်ပေးသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ရန်ကုန်တိုင်းဒေသကြီး ထန်းတပင်မြို့နယ် ရွှေပြည်သာ တံတားအနီးရှိ မင်းထက်မင်းဆိပ်ကမ်း၊ ရွှေပြည်သာမြို့ရှိ ရွှေမဲဆိပ်ကမ်းနှင့် မုတ္တမ ဆိပ်ကမ်းတွင် ပြည်ပသို့ ကုန်ပစ္စည်းများတင်ပို့ရန် သင်္ဘောတင်နေမှု အခြေအနေများကို သွားရောက် ကြည့်ရှုစစ်ဆေးကာ တာဝန်ရှိသူများ၏ ရှင်းလင်း တင်ပြမှုအပေါ် ပြည်ထောင်စုဝန်ကြီးက ပို့ကုန် လုပ်ငန်းဆိုင်ရာ သတ်မှတ်စည်းကမ်းချက်များနှင့်  ကိုက်ညီမှုရှိစေရေးအတွက် ဌာနဆိုင်ရာ One Stop Service (OSS) အဖွဲ့များက စနစ်တကျ စစ်ဆေးဆောင်ရွက်ရန်၊ ကုန်ပစ္စည်းများကို အချိန် ကြန့်ကြာမှုမရှိစေဘဲ သင်္ဘောတင်နိုင်ရေးဆောင်ရွက်ရန်၊ ပို့ကုန်ပစ္စည်း အရည်အသွေး ထိခိုက်ပျက်စီးမှု မဖြစ်စေရေး အလေးထားဆောင်ရွက်ရန်၊ ကုန်သွယ်မှု လျင်မြန်ချောမွေ့စေရေးနှင့် ကုန်ပစ္စည်း အမျိုးအစားနှင့် အရေအတွက်မှန်ကန်စေ ရေးဆောင်ရွက်ရန်၊ ပို့ကုန်လုပ်ထုံးလုပ်နည်း ဥပဒေနှင့်အညီ  တင်ပို့နိုင်ရေးနှင့် လုပ်ငန်းခွင်ဘေးအန္တရာယ်  ကင်းရှင်းစေရေးတို့ကို အလေးထားဆောင်ရွက်ရန် မှာကြား သည်။

ရန်ကုန်တိုင်းဒေသကြီး ရွှေပြည်သာမြို့နယ်၌ တည်ဆောက်ထားသော ရွှေမဲဆိပ်ကမ်းနှင့် မုတ္တမ ဆိပ်ကမ်းတို့ကို အိမ်နီးချင်းနိုင်ငံများသို့ ပို့ကုန်တင်ပို့နိုင်သည့် အပြည်ပြည်ဆိုင်ရာ ကုန်တင်ကုန်ချ ဆိပ်ကမ်းအဖြစ် အကောက်ခွန်ဦးစီးဌာနမှ ၂၀၂၄ ခုနှစ် ဧပြီလ ၂၄ ရက်မှစတင်ခွင့်ပြုခဲ့ပြီး အဆိုပါ ဆိပ်ကမ်းများမှ အိမ်နီးချင်းနိုင်ငံများသို့ Border Trade ပို့ကုန်လုပ်ငန်းများ ဆောင်ရွက်နိုင်ရေးအတွက် အကောက်ခွန် ဦးစီးဌာနအပါအဝင် ဌာနဆိုင်ရာပူးပေါင်းအဖွဲ့ (One Stop Service -OSS) များက ဧပြီလ ၂၄ ရက်မှစ၍ တာဝန်ချထား စစ်ဆေးဆောင်ရွက်ပေးလျက်ရှိသည်။ ရန်ကုန်တိုင်းဒေသကြီး ထန်းတပင် မြို့နယ်ရှိ မင်းထက်မင်းဆိပ်ကမ်းမှာ ၂၀၂၄ ခုနှစ် ဇန်နဝါရီလ ၁ ရက်က အပြည်ပြည်ဆိုင်ရာ ကုန်တင် ကုန်ချ ဆိပ်ကမ်းအဖြစ် ခွင့်ပြုဆောင်ရွက်ပေးခဲ့ကြောင်း သိရသည်။     

 (သတင်းစဉ်)