အမျိုးသမီး ချန်ပီယံလိဂ်ပြိုင်ပွဲတွင် ချယ်လ်ဆီးအမျိုးသမီး အသင်းကို အနိုင်ရရှိပြီး ဘာစီလိုနာ အမျိုးသမီးအသင်း လေးကြိမ်ဆက် ဗိုလ်လုပွဲ တက်ရောက်
၂၀၂၃-၂၀၂၄ ဘောလုံးရာသီ အမျိုးသမီးချန်ပီယံ လိဂ်ပြိုင်ပွဲ ဆီမီးဖိုင်နယ်အဆင့် ဒုတိယအကျော့ပွဲစဉ် အဖြစ် ချယ်လ်ဆီး အမျိုးသမီးအသင်းနှင့် ဘာစီလိုနာ အမျိုးသမီးအသင်းတို့ ပွဲစဉ်တွင် ဘာစီလိုနာ အမျိုးသမီးအသင်းက ၂ ဂိုး-ဂိုးမရှိဖြင့် အနိုင်ရရှိပြီး လေးကြိမ်ဆက် ဗိုလ်လုပွဲ တက်ရောက်နိုင်ခဲ့ကြောင်း သိရသည်။
ချယ်လ်ဆီး အမျိုးသမီးအသင်းနှင့် ဘာစီလိုနာ အမျိုးသမီးအသင်းတို့သည် ပထမအကျော့တွင် ချယ်လ်ဆီး အမျိုးသမီးအသင်းက ၁ ဂိုး-ဂိုးမရှိဖြင့် အနိုင်ရရှိပြီး ဒုတိယအကျော့တွင် ဘာစီလိုနာ အမျိုးသမီးအသင်းက ၂ ဂိုး-ဂိုးမရှိဖြင့်အနိုင်ရရှိကာ နှစ်ကျော့ပေါင်းရလဒ် ၂ ဂိုး-၁ ဂိုးဖြင့် ဘာစီလိုနာ အမျိုးသမီးအသင်းက အနိုင်ရရှိခဲ့ခြင်းဖြစ်သည်။
ဘာစီလိုနာ အမျိုးသမီးအသင်းသည် အမျိုးသမီး ချန်ပီယံလိဂ်ပြိုင်ပွဲ၌ ၂၀၂၀-၂၀၂၁ ဘောလုံးရာသီက ချန်ပီယံဆု ဆွတ်ခူးနိုင်ခဲ့ပြီး ၂၀၂၁-၂၀၂၂ ဘောလုံးရာသီက ဗိုလ်လုပွဲ တက်ရောက်နိုင်ခဲ့သော်လည်း လိုင်ယွန်အမျိုးသမီး အသင်းကိုရှုံးနိမ့်သည့်အတွက် ဒုတိယဆုဖြင့်သာ ကျေနပ်ခဲ့ရကာ ၂၀၂၂-၂၀၂၃ ဘောလုံးရာသီက ဝုဖ်ဘတ်အမျိုးသမီး အသင်းကိုအနိုင်ရရှိပြီး ချန်ပီယံဆု ဆွတ်ခူးနိုင်ခဲ့ခြင်းဖြစ်သည်။
ဘာစီလိုနာအမျိုးသမီးအသင်းသည် ဗိုလ်လုပွဲစဉ် တွင် လိုင်ယွန်အသင်းနှင့် ပီအက်စ်ဂျီအသင်းတို့မှ အနိုင်ရရှိမည့် အသင်းနှင့် မေလ ၂၅ ရက်တွင် ယှဉ်ပြိုင် ကစားရမည် ဖြစ်ကြောင်း သိရသည်။