လက်စတာအသင်းက ဝါရင့် တိုက်စစ်ကစားသမား ဂျေမီဗာဒီကို သက်တမ်းတိုး စာချုပ်ချုပ်ဆိုရန် ဆွေးနွေးမှုများပြုလုပ်

 

လက်စတာအသင်းက ဝါရင့် တိုက်စစ်ကစားသမား ဂျေမီဗာဒီကို သက်တမ်းတိုး စာချုပ်ချုပ်ဆိုရန် ဆွေးနွေးမှုများပြုလုပ်

 

    လက်စတာအသင်းက  ဝါရင့်တိုက်စစ်ကစားသမား ဂျေမီဗာဒီကို သက်တမ်းတိုး စာချုပ်ချုပ်ဆိုရန် ဆွေးနွေးမှုများ ပြုလုပ်နေကြောင်း သိရသည်။

အသက် ၃၇ နှစ်အရွယ် ဂျေမီဗာဒီသည် ၂၀၁၂ ခုနှစ်က ဖလက်ဝုဒ်အသင်းမှ လက်စတာအသင်းသို့ ပြောင်းရွှေ့ကစားခဲ့ကာ အသင်းနှင့်အတူ ဆယ်စုနှစ် တစ်ခုကျော်ကြာ ကစားခဲ့ပြီး လက်ရှိအချိန်ထိ အဓိက ကစားသမားအဖြစ် ပါဝင်နေသူဖြစ်သည်။

ဂျေမီဗာဒီသည် ၂၀၁၃-၂၀၁၄ ဘောလုံးရာသီက  လက်စတာအသင်း   ပရီးမီးယားလိဂ်ပြိုင်ပွဲသို့ တန်းတက်ခဲ့ရာတွင် အဓိက ကစားသမားအဖြစ် ပါဝင်ခဲ့သကဲ့သို့ ၂၀၁၅-၂၀၁၆ ဘောလုံးရာသီက လက်စတာအသင်း ပရီးမီးယားလိဂ်ချန်ပီယံဆု ဆွတ်ခူးနိုင်ခဲ့ရာတွင်လည်း အဓိက ကစားသမားအဖြစ် ပါဝင်ခဲ့သူဖြစ်သည်။

ဂျေမီဗာဒီသည်   ပြီးခဲ့သည့်ဘောလုံးရာသီက လက်စတာအသင်း ပရီးမီးယားလိဂ်ပြိုင်ပွဲမှ အင်္ဂလန်ချန်ပီယံရှစ်ပြိုင်ပွဲသို့ တန်းဆင်းခဲ့ရာတွင် ကစားသမားတချို့ အသင်းနှင့် လမ်းခွဲခဲ့သော်လည်း ၎င်းက အသင်းနှင့် ဆက်လက်လက်တွဲခဲ့ပြီး ယခုဘောလုံးရာသီတွင် လက်စတာအသင်း    အင်္ဂလန်ချန်ပီယံရှစ် ဆုဖလားဆွတ်ခူးရာ၌ အဓိကအခန်းကဏ္ဍမှ ပါဝင်ခဲ့သူဖြစ်သည်။

ဂျေမီဗာဒီနှင့် လက်စတာအသင်းတို့ စာချုပ်သက်တမ်းမှာ ယခုဘောလုံးရာသီအကုန်တွင် ကုန်ဆုံးမည်ဖြစ်သည့်အတွက်  လက်စတာအသင်းက  တစ်နှစ်သက်တမ်းတိုး စာချုပ်ချုပ်ဆိုရန် ဆွေးနွေးမှုများ ပြုလုပ်နေကြောင်း သိရသည်။