သမဝါယမနှင့်ကျေးလက် ဖွံ့ဖြိုးရေး ဝန်ကြီးဌာန ဝန်ထမ်းမိသားစုများ၏ တတိယအကြိမ် စုပေါင်းရဟန်းခံရှင်ပြု သီလရှင်ဝတ် အလှူတော် မင်္ဂလာကျင်းပ
နေပြည်တော် မေ ၄
သမဝါယမနှင့် ကျေးလက် ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုးအား အမှူးထား၍ ဝန်ထမ်းမိသားစုများ၏ တတိယအကြိမ် စုပေါင်းရဟန်းခံ၊ ရှင်ပြု၊ သီလရှင်ဝတ် အလှူတော်မင်္ဂလာ အခမ်းအနားကို မေလ ၃ ရက်နှင့် ၄ ရက်တွင် ကျင်းပသည်။
အခမ်းအနားပထမနေ့ နံနက်ပိုင်း၌ ရှင်လောင်းလှည့်ခြင်းကို ဆောင်ရွက်ရာ မောင်ရင်လောင်းများကို မြန်မာ့ရိုးရာ ယဉ်ကျေးမှုထုံးဓလေ့နှင့် အညီ သဒ္ဓမ္မဝေပုလ္လကျောင်းတိုက် ပရိဝုဏ်အတွင်းရှိ နတ်ကွန်း တွင် နတ်ပြခြင်းဆောင်ရွက်၍ ထိုမှတစ်ဆင့် မာရဝိဇယဗုဒ္ဓ ရုပ်ပွားတော်မြတ်ကြီးသို့ သွားရောက်ဖူးမြော်၍ လက်ယာရစ် လှည့်လည်ဦးခိုက် ပူဇော်ကြသည်။
ထို့နောက် ပြည်ထောင်စုဝန်ကြီး ဦးလှမိုးက မာရဝိဇယ ရုပ်ပွားတော်မြတ်ကြီးအတွက် အလှူငွေကျပ်သိန်း ၃၀ ပေးအပ်လှူဒါန်းရာ ဂေါပကအဖွဲ့ တာဝန်ရှိသူများက လက်ခံရယူ၍ ဂုဏ်ပြုမှတ်တမ်းလွှာ ပြန်လည်ပေးအပ်သည်။
ထိုနေ့ မွန်းလွဲပိုင်းတွင် ရဟန်းလောင်းများ၊ မောင်ရှင်လောင်းများနှင့် သီလရှင်များအား မင်္ဂလာဘိသိက်သွန်းခြင်းကို ရုံးအမှတ် (၁၆) ၌ ဆက်လက်ကျင်းပရာ ပြည်ထောင်စုဝန်ကြီး၊ ဝန်ကြီးဌာန အကြီးအကဲများနှင့် ဧည့်ပရိသတ်များ တက်ရောက်ခဲ့ကြပြီး သာသနာရေးနှင့် ယဉ်ကျေးမှုဝန်ကြီးဌာန အနုပညာဦးစီးဌာနမှ လက်ထောက်ညွှန်ကြားရေးမှူး ဦးဉာဏ်ဝင်း ဦးဆောင်သော ယဉ်ကျေးမှုမင်္ဂလာ ဘိသိက်အဖွဲ့က ဘိသိက်သွန်းလောင်းပေးပြီး ညနေပိုင်းတွင် ဆံချမင်္ဂလာပြုလုပ်သည်။
ယင်းနောက် ဥပဇ္ဈာယ်ဆရာတော် ဦးဂန္ဓမာလာက ရှင်ပြုခြင်း အစီအစဉ် ဆောင်ရွက်ပေးပြီး ရဟန်းလောင်းများက ဆရာတော်ထံ သင်္ကန်းပေးခြင်း၊ ဆရာတော်ထံမှ သင်္ကန်းတောင်းခြင်း၊ သင်္ကန်းဝတ်ဆင်ခြင်း၊ ရှင်အဖြစ်တောင်းခံခြင်း၊ သရဏဂုံဆောက်တည် ရှင်ပြုခြင်းနှင့် ဥပဇ္ဈာယ်ယူခြင်းများ ဆောင်ရွက်ကြသည်။
အခမ်းအနားဒုတိယနေ့တွင် သီရိဂန္ဓမာသပြေအေး မိုးကုတ်ဝိပဿနာ ကျောင်းတိုက်၌ ဥပသမ္ပဒကံဆောင်၍ ရဟန်းခံမင်္ဂလာပြုခြင်း၊ သိမ်ဝင်ခြင်းနှင့် သိမ်ဆင်းလောင်းခြင်းများ ဆောင်ရွက်ရာ ဥပဇ္ဈာယ်ဆရာတော် ဦးဂန္ဓမာလာ ဦးဆောင်သော ရဟန်းများအား နိုင်ငံတော်ကောင်စီဝင်များ၊ ပြည်ထောင်စုဝန်ကြီးများနှင့် ဧည့်ပရိသတ် အပေါင်းတို့က လှူဖွယ်ဝတ္ထု အစုစုတို့ကို ဆက်ကပ်လှူဒါန်းကြသည်။
ထို့နောက် သီရိဂန္ဓမာသပြေအေး မိုးကုတ်ဝိပဿနာကျောင်းတိုက် ဆရာတော် ဦးဂန္ဓမာလာထံမှ ငါးပါးသီလ ခံယူဆောက်တည်ကြပြီး သံဃာတော အရှင်သူမြတ်တို့က ရွတ်ပွားသရဇ္ဈာယ်သော မေတ္တသုတ်ပရိတ် တရားတော်များကို နာယူကြည်ညိုကြပြီး နိုင်ငံတော်ကောင်စီဝင်များ၊ ပြည်ထောင်စုဝန်ကြီးများ၊ ဒုတိယဝန်ကြီးများနှင့် ပရိသတ်များက ဆရာတော်အရှင်သူမြတ်များအား လှူဖွယ်ဝတ္ထုအစုစု ဆက်ကပ်လှူဒါန်းကြရာလှူဒါန်းမှုအစုစုတို့ အတွက် ရေစက်သွန်းချ အမျှပေးဝေကြသည်။
ယင်းနောက် ဆရာတော်အရှင်သူမြတ်တို့အား နေ့ဆွမ်းနှင့်လှူဖွယ်ဝတ္ထု အစုစုတို့ကို ဆက်ကပ်လှူဒါန်းခဲ့ပြီး ဧည့်ပရိသတ်များကို နေ့လယ်စာဖြင့် ဧည့်ခံကျွေးမွေးကြသည်။
သမဝါယမနှင့် ကျေးလက်ဖွံ့ဖြိုးရေး ဝန်ကြီးဌာနအနေဖြင့် တတိယအကြိမ် ဝန်ထမ်းမိသားစုများ စုပေါင်းရဟန်းခံရှင်ပြု အလှူတော်မင်္ဂလာတွင် ဒုလ္လဘရဟန်း ၇၄ ပါး၊ ရှင်သာမဏေ ၂၂ ပါးနှင့် သီလရှင် အပါး ၃၀ စုစုပေါင်း ၁၂၆ ပါးတို့ကို သာသနာ့ဘောင်သို့ သွတ်သွင်းခဲ့ကြောင်း သိရသည်။