လီသီယံဘက်ထရီများထက် စွမ်းဆောင်ရည်နှစ်ဆပိုမြင့်မယ့် ရေဘက်ထရီ

လီသီယံဘက်ထရီများထက် စွမ်းဆောင်ရည်နှစ်ဆပိုမြင့်မယ့် ရေဘက်ထရီ

    လက်ရှိဈေးကွက်ထဲမှာ တွင်ကျယ်စွာ အသုံးပြုနေတဲ့ လျှပ်စစ်ပစ္စည်းများ အတွက် ဘက်ထရီက    လီသီယံ အမျိုးအစား ဘက်ထရီပါ။

    သူက  စွမ်းဆောင်ရည်ပိုင်းမှာ အားရကျေနပ်မှုပေးနိုင်ပေမယ့် ဘေးကင်းစိတ်ချရမှု အပိုင်းမှာတော့ အားနည်းနေသေးတာကို တွေ့ရပါတယ်။ ဒါကလည်း တစ်ဖက်ကကောင်းတာရှိရင် တခြားတစ်ဖက်က ဆိုးတာရှိတဲ့သဘောပေါ့။

ဒါပေမဲ့ တရုတ်နိုင်ငံမှ သိပ္ပံပညာရှင်များက အဲဒီလိုစွမ်းဆောင်ရည်မြင့်တဲ့ လီသီယံဘက်ထရီတွေထက် စွမ်းဆောင်ရည် နှစ်ဆပိုမြင့်မယ့်အပြင် ဘေးကင်းစိတ်ချရမှုလည်းရှိတဲ့ ဘက်ထရီတစ်မျိုးကို စမ်းသပ် ဖန်တီးလိုက်ပါတယ်။

အဲဒီဘက်ထရီက ရေကိုအခြေခံအဖြစ် အသုံးပြုထားတဲ့ ရေဘက်ထရီပါ။ ရေဘက်ထရီက စွမ်းအင်သိုလှောင်နိုင်မှု ပမာဏမှာလည်း လီသီယံတွေထက် နှစ်ဆပိုမြင့်မယ်ဆိုတဲ့ အတွက် လျှပ်စစ်ကားလုပ်ငန်းမှာတော့  တကယ့်ကို  ပြောင်းလဲမှုကြီး တစ်ခုဖြစ်လာနိုင်ပါတယ်။

ဒါ့အပြင် ရေဘက်ထရီက လျှပ်ကူးမှုအတွက် ရေကိုသာအဓိက အသုံးပြုထားတာကြောင့် ဘေးကင်းစိတ်ချရမှုမှာလည်း လီသီယံများထက် ပိုသာပါတယ်လို့ ဆိုပါတယ်။

တရုတ်သိပ္ပံအကယ်ဒမီရဲ့ ဓာတုရူပဌာနမှ ပါမောက္ခလီရှန်းဖန်းနဲ့ ပါမောက္ခဖူကျန်းတို့က   ဘရိုမိုင်းနဲ့အိုင်အိုဒင်းကို အခြေခံပြီး အီလက်ထရွန်များစွာ ကူးပြောင်းစေနိုင်တဲ့ လျှပ်စစ်ဓာတ်အား အမငုတ်ကို ဖန်တီးလိုက်ပါတယ်။

အဲဒီလျှပ်စစ်အမငုတ်က   စွမ်းအင်ပမာဏကို 1200 Wh/L အထိသိုလှောင် သိမ်းဆည်းနိုင်စွမ်း ရှိတာကိုတွေ့ရတယ်လို့ သုတေသီများက ဆိုပါတယ်။

ပညာရှင်များက ရေဘက်ထရီများရဲ့ စွမ်းအင်သိပ်သည်းဆများကို    ပိုမိုတိုးမြင့်စေဖို့အတွက် အိုင်အိုဒိုက်အိုင်းယွန်းနဲ့ ဘရိုမိုက်အိုင်းယွန်းတို့ ပေါင်းစပ်ထားတဲ့အရည်ကို လျှပ်လိုက်ရည်အဖြစ် အသုံးပြုလိုက်ပါတယ်။

အလားတူ   သိပ္ပံပညာရှင်များဟာ ဘက်ထရီကို စမ်းသပ်မှုများ လုပ်ဆောင်လိုက်တဲ့အခါ ဘက်ထရီရဲ့ သက်တမ်းက လည်း လီသီယံဘက်ထရီတွေထက် အားသွင်းနိုင်မှု အကြိမ်ရေ ၁၀၀၀ ပိုသာတယ်လို့ ဆိုပါတယ်။

ဒီလိုမျိုးဘက်ထရီတွေကို ဓာတ်ခွဲခန်းထဲမှာသာ ထုတ်လုပ်နိုင်တာ မဟုတ်ဘဲနဲ့ စက်မှုလုပ်ငန်းသုံးအဖြစ်နဲ့လည်း ထုတ် လုပ်နိုင်စွမ်းရှိတယ်လို့ သိပ္ပံပညာရှင်များက ပြောထားပါတယ်။  

Ref: IE