​​​​​​​ပဉ္စမအကြိမ် အမျိုးသားအားကစားပွဲတော်ကြီးကျင်းပမည်

 

ပဉ္စမအကြိမ် အမျိုးသားအားကစားပွဲတော်ကြီးကျင်းပမည်

မြန်မာ့အားကစားလောက   ရေရှည်တိုးတက်အောင်မြင်လိုပါက  အမြဲတမ်းလိုက်နာဆောင်ရွက် ရမည့်လုပ်ငန်းစဉ်များမှာ “လူထုအားကစားလှုပ်ရှားမှုများအား တစ်နိုင်ငံလုံးအတိုင်းအတာဖြင့် ကျယ်ကျယ်ပြန့်ပြန့်လှုပ်ရှားဆောင်ရွက်လာစေရေးစီမံဆောင်ရွက်ရမည်”၊ “လူငယ်/လူရွယ်မျိုးဆက် သစ်များ အမြောက်အမြားတစုတဝေးတည်းရှိနေသည့် အခြေခံပညာကျောင်းများနှင့်    တက္ကသိုလ်/ ကောလိပ်များတွင် အားကစားနှင့်ပညာရေး ထိထိမိမိပေါင်းစပ်နိုင်ရေး စီမံဆောင်ရွက်ရမည်”၊ “အားကစားနည်းအလိုက် ထူးချွန်မျိုးဆက်သစ်များ စဉ်ဆက်မပြတ်ပေါ်ထွက်စေရေးအတွက်    နယ်ပယ်ဒေသကဏ္ဍအစုံတွင် အားကစားပြိုင်ပွဲများ ပုံမှန်ကျင်းပပြုလုပ်ရမည်”၊ “အားကစားပြိုင်ပွဲ မျိုးစုံကျင်းပနိုင်ရေးအတွက်လိုအပ်သည့် အားကစားကွင်း/အားကစားရုံများနှင့် အားကစား အထောက်အကူပစ္စည်းများ  ပြည့်စုံစွာ ဖန်တီးပေးရမည်”၊    “ကျင်းပသည့်ပြိုင်ပွဲများသို့ အဆင့်မီမီ ဝင်ရောက်ယှဉ်ပြိုင်နိုင်ရေး၊   အဆင့်ဆင့်သောပြိုင်ပွဲများပြုလုပ်ပြီး လူရွေးချယ်ခြင်း၊ အဆင့်မီ နည်းပြများဖြင့် လုံလောက်သည့်အချိန်အတိုင်းအတာတစ်ခုအထိ ကြိုတင်ပြင်ဆင်စခန်း သွင်း လေ့ကျင့်ခြင်းများပြုလုပ်ပြီးမှသာ    ပြိုင်ပွဲသို့ဝင်ရောက်ယှဉ်ပြိုင်ရမည်”၊ “ကျင်းပမည့်ပြိုင်ပွဲတိုင်း ပြိုင်ပွဲအဆင့်အတန်းမြင့်မားပြီး   ပြိုင်ဆိုင်မှုပြင်းထန်အောင်  တာဝန်ရှိသူများမှ ကြီးကြပ်စီမံ ဆောင်ရွက်ရမည်”၊ “ခေတ်နှင့်အညီတိုးတက်လာသည့်  အားကစားသိပ္ပံနှင့်အားကစား လေ့ကျင့်ရေး သဘောတရားများအား မျက်ခြည်မပြတ် လိုက်ပါဆောင်ရွက်နိုင်ရမည်”၊   “အားကစားနည်းအလိုက် အရည်အသွေးပြည့်မီသည့်  နည်းပြများ၊ ဒိုင်/ဂျူရီများ စဉ်ဆက်မပြတ်ပေါ်ထွက်ရေးနှင့် နိုင်ငံတကာ ပြိုင်ပွဲများအထိ ထိုးဖောက်တာဝန်ထမ်းဆောင်နိုင်ရေး စီမံဆောင်ရွက်ရမည်”၊  “သက်တမ်းလိုက် ပြိုင်ပွဲများမှ ပေါ်ထွက်လာသည့် အားကစားနည်းအလိုက် ထူးချွန်မျိုးဆက်သစ်များကိုသာ အားကစားသိပ္ပံများနှင့် အားကစားအကယ်ဒမီကျောင်းများတွင် ကျစ်လျစ်  သိပ်သည်းသော အင်အားဖြင့်  ရေရှည်စခန်းသွင်း လေ့ကျင့်ပြုစုပျိုးထောင်ရမည်”၊   “အားကစားအသိပညာပေး လုပ်ငန်းများအား    ကျယ်ကျယ်ပြန့်ပြန့် တိုးမြှင့်ဆောင်ရွက်ရမည်” ဖြစ်သည်။

အထက်ပါလုပ်ငန်းစဉ်များ    စဉ်ဆက်မပြတ်ပြည့်ပြည့်၀၀ အကောင်အထည်ဖော်ဆောင်ရွက်နိုင် မှသာလျှင်     မြန်မာ့အားကစားအဆင့်အတန်း တိုးတက်လာမည်ဖြစ်၍   နိုင်ငံတော်မှခိုင်မာသည့် မူဝါဒများချမှတ်ပေးရေးနှင့်     လုံလောက်သည့် ဘတ်ဂျက်ရန်ပုံငွေများ ဖြည့်ဆည်းပေးရေးမှာလည်း လွန်စွာအရေးပါလှသည်။

အားကစားလှုပ်ရှားဆောင်ရွက်မှုများသည် နိုင်ငံအတွင်းရှိ ပြည်သူတစ်ရပ်လုံး ကျန်းမာကြံ့ခိုင်ရေးအား များစွာအထောက်အကူပြုနေသည့်အပြင် အားကစားနည်းအလိုက်     မျိုးဆက်သစ်များပေါ်ထွက်ရေး

အတွက်လည်း   တိုက်ရိုက်အထောက်အကူပြုလျက်ရှိသည်။ သို့ဖြစ်၍လည်း အားကစားနှင့် လူငယ်ရေးရာဝန်ကြီးဌာနအနေဖြင့် ပြည်သူတစ်ရပ်လုံး ကျန်းမာကြံ့ခိုင်ရေးနှင့် အလားအလာရှိသော  မျိုးဆက်သစ်အားကစားသမားများ စဉ်ဆက်မပြတ်ပေါ်ထွက်ရေးအတွက် နယ်ပယ်ဒေသကဏ္ဍ အစုံတွင် အားကစားစုပေါင်းလှုပ်ရှားမှုများနှင့်  အားကစားပြိုင်ပွဲများအား စဉ်ဆက်မပြတ် ကျင်းပပေးလျက်ရှိသည့်အပြင် နိုင်ငံတကာ အားကစားပြိုင်ပွဲများသို့လည်း စဉ်ဆက်မပြတ် စေလွှတ် ယှဉ်ပြိုင်စေလျက်ရှိသည်။

ယခုအခါ အိမ်ရှင်အဖြစ်  လက်ခံကျင်းပခဲ့သည့် အရှေ့တောင်အာရှ   အားကစားပြိုင်ပွဲကြီးပြီးလျှင် အကြီးမားဆုံးပြိုင်ပွဲတစ်ခုအဖြစ် ပဉ္စမအကြိမ် အမျိုးသားအားကစားပွဲတော်ကြီးအား   နိုင်ငံတော်စီမံ အုပ်ချုပ်ရေးကောင်စီ၏ လမ်းညွှန်မှုဖြင့်  ၂၀၂၄ ခုနှစ် ဒီဇင်ဘာလအတွင်းကျင်းပရန် စီစဉ်ဆောင်ရွက် လျက်ရှိကြောင်း သိရှိရသဖြင့် နိုင်ငံသားတစ်ယောက်အနေဖြင့်သော်လည်းကောင်း၊ အားကစား ဝါသနာရှင်တစ်ယောက်အနေဖြင့်သော်လည်းကောင်း၊ မြန်မာ့အားကစားတိုးတက်ရေးအတွက် များစွာ အထောက်အကူပြုမည့် မျိုးဆက်သစ်များပေါ်ထွက်ရေး ရည်ရွယ် ကျင်းပသည့် ပြိုင်ပွဲကြီးကို   ဝမ်းမြောက်စွာကြိုဆိုမိပါသည်။

အောင်မြင်မှုမြင့်မားခဲ့သည့် မြန်မာ့အားကစား

မြန်မာ့အားကစားသမိုင်းကြောင်းအား  ပြန်ကြည့်လျှင် ၁၉၆၀ ပြည့်လွန်နှစ်များမှသည် ၁၉၇၀ ပြည့်လွန်နှစ်များအထိ    အရှေ့တောင်အာရှအဆင့်တွင် ထိပ်တန်းကရပ်တည်နိုင်ခဲ့ပြီး      အာရှအဆင့် သို့ ထိုးဖောက်၊ ကမ္ဘာ့အဆင့်အထိ တက်လှမ်းနိုင်ခဲ့သည့် သာဓကများရှိခဲ့သည်။ အရှေ့တောင်အာရှ ကျွန်းဆွယ်အားကစားပြိုင်ပွဲ (SEAP Games) ပြိုင်ပွဲ များတွင် အိမ်ရှင်အဖြစ်ကျင်းပခဲ့သည့် ၁၉၆၁ ခုနှစ် ဒုတိယအကြိမ်    အရှေ့တောင်အာရှကျွန်းဆွယ် အားကစားပြိုင်ပွဲနှင့်  ၁၉၆၉ ခုနှစ်  ပဉ္စမအကြိမ် အရှေ့တောင်အာရှ ကျွန်းဆွယ်အားကစားပြိုင်ပွဲများ

တွင် နိုင်ငံအလိုက် အဆင့်(၁)နေရာတွင်  ရပ်တည်နိုင်ခဲ့ပြီး ၁၉၆၅၊ ၁၉၆၇၊ ၁၉၆၉၊ ၁၉၇၁၊ ၁၉၇၃ ခုနှစ်

တို့၌ ကျင်းပခဲ့သည့်   ကျွန်းဆွယ်အားကစားပြိုင်ပွဲများတွင် မြန်မာဘောလုံးအသင်းအနေဖြင့် (၅)ကြိမ် ဆက်တိုက် ချန်ပီယံဖြစ်ခဲ့သည်။

၎င်းပြင်  အဆိုပါကာလများအတွင်း  ၁၉၆၄၊၁၉၆၇၊ ၁၉၇၁ ခုနှစ်တို့တွင်ကျင်းပခဲ့သည့် ဒေသတွင်း ဖိတ်ခေါ်ဘောလုံးပြိုင်ပွဲများဖြစ်သည့်  မာဒေးကားချန်ပီယံ (၃)ကြိမ်၊ ၁၉၇၁၊ ၁၉၇၂၊ ၁၉၇၃ ခုနှစ်တို့တွင် ပတ်ချုံဟီးဖလားချန်ပီယံ  (၃)  ကြိမ်၊  ၁၉၇၁၊ ၁၉၇၃၊ ၁၉၇၄၊ ၁၉၇၅ ခုနှစ်တို့တွင် ဂျာကာတာဖလားချန်ပီယံ (၄) ကြိမ်၊ ၁၉၇၇၊ ၁၉၇၈၊ ၁၉၇၉ ခုနှစ် တို့တွင်  မာရာဟာလင်ဖလားချန်ပီယံ (၃) ကြိမ်၊ ၁၉၆၁၊ ၁၉၆၃၊ ၁၉၆၄၊ ၁၉၆၆၊ ၁၉၆၈၊ ၁၉၆၉၊ ၁၉၇၀၊ ၁၉၇၇ ခုနှစ်တို့တွင်  အာရှလူငယ်ချန်ပီယံ (၈) ကြိမ်ဖြစ်ခဲ့သည်။ ၁၉၆၆ ခုနှစ်နှင့် ၁၉၇၀ ပြည့်နှစ်တို့တွင် ကျင်းပခဲ့သည့် အာရှအားကစားပြိုင်ပွဲတွင် မြန်မာ့ဘောလုံးအသင်းအနေဖြင့် နှစ်ကြိမ်ဆက်တိုက် အာရှချန်ပီယံဖြစ်ခဲ့သည်။

မြန်မာနိုင်ငံအနေဖြင့် အရှေ့တောင်အာရှနိုင်ငံများတွင် အာရှချန်ပီယံ  နှစ်ကြိမ်ဆက်တိုက်ရရှိခဲ့သည့် နိုင်ငံအဖြစ်လည်း မှတ်တမ်းဝင်ခဲ့သည်။ ၁၉၇၂ ခုနှစ်တွင်  ကျင်းပခဲ့သည့်    မြူးနစ်ကမ္ဘာ့အိုလံပစ် ပြိုင်ပွဲတွင် မြန်မာဘောလုံးအသင်းအနေဖြင့် အသန့်ရှင်းဆုံးဆုဖလားကို ထိုက်ထိုက်တန်တန် ရရှိခဲ့သည်။

ပြေး၊ ခုန်၊ ပစ်အားကစားနည်း၏    အောင်မြင်မှုအကျဉ်းချုပ်အားဖော်ပြရလျှင် ၁၉၅၉ ခုနှစ် ပထမ အကြိမ် အရှေ့တောင်အာရှကျွန်းဆွယ်ပြိုင်ပွဲမှစ၍ ကျင်းပပြီးစီးခဲ့သည့် (၃၂) ကြိမ်မြောက် အရှေ့တောင်အာရှအားကစားပြိုင်ပွဲအထိ ပြေး၊ ခုန်၊ ပစ်အားကစားနည်းတစ်ခုတည်းမှ  ရွှေတံဆိပ် ၁၇၆ ခု၊ ငွေတံဆိပ်၁၈၃ ခု၊ ကြေးတံဆိပ် ၁၄၄ ခု စုစုပေါင်း ဆုတံဆိပ် ၅၀၃ ခုအထိ ရယူပေးနိုင်ခဲ့သည်။   နိုင်ငံအတွက် ရွှေတံဆိပ်များစွာရယူပေးနိုင်ခဲ့သည့် အားကစားသမား များစွာရှိသည့်အနက်  အားကစားသမားအချို့အား ကောက်နုတ်ဖော်ပြရလျှင် ဒေါ်ဂျနီဖာတင်လေး တစ်ဦးတည်းမှ  သံလုံး၊ သံပြား၊ ဘော်လီဘောအားကစားနည်းများဖြင့် ရွှေတံဆိပ် ၁၅ ခု၊ ဒေါ်ခင်ခင်ထွေးတစ်ဦးတည်းမှ  မီတာ(၈၀၀/၁၅၀၀/၃၀၀၀/၅၀၀၀/၁၀၀၀၀) ပြိုင်ပွဲများမှ  ရွှေတံဆိပ် ၁၂ ခု၊ ဂျင်မီကရင်တန် တစ်ဦးတည်းမှပင်  မီတာ(၈၀၀/၁၅၀၀/၅၀၀၀)ပြိုင်ပွဲများမှ ရွှေတံဆိပ်  ၁၂  ခု၊ ဒေါ်သန်းသန်း တစ်ဦးတည်းမှ  မီတာ(၂၀၀/၄၀၀/၈၀၀)နှင့် လက်ဆင့်ကမ်းပြိုင်ပွဲများမှ     ရွှေတံဆိပ် ၁၂ ခု၊ ဒေါ်မာမာမင်းတစ်ဦးတည်းမှ မီတာ(၈၀၀/၁၅၀၀/၃၀၀၀/၁၀၀၀၀)   မာရသွန်ပြိုင်ပွဲများနှင့် မီတာ(၄၀၀) လက်ဆင့်ကမ်းပြိုင်ပွဲများမှ ရွှေတံဆိပ် ၉ ခု၊ ဦးသန့်ဇင်မှ ရွှေတံဆိပ် ၆ ခု၊ ရှင်ဗွေဂန်းနှင့် ဦးကိုကိုတို့မှ ရွှေတံဆိပ် ၅ ခုစီ၊  မခင်ပု၊  ဦးအောင်သန်း၊ဒေါ်အေးရွှေ၊ ဦးမောင်လှ၊ ဦးခင်စိုး၊ ဒေါ်နုနုရီတို့မှရွှေတံဆိပ် ၄ ခုစီ၊ အာဖူး၊ စန်းစန်းအေး၊ နိုင်လင်းချစ်၊ ထွန်းတင်၊ မကျင်လွမ်တို့က ရွှေတံဆိပ် ၃ ခုစီ ရယူပေးနိုင်ခဲ့ကြပြီး ကျန်အားကစားသမားများမှလည်း နိုင်ငံတော်အတွက် ရွှေတံဆိပ်များစွာ ရယူပေးနိုင်ခဲ့ကြသည်။

အလားတူ မြန်မာဘော်လီဘောအမျိုးသားအသင်းအနေဖြင့်လည်း  ၁၉၆၁၊ ၁၉၆၉၊ ၁၉၇၅၊ ၁၉၇၇၊ ၁၉၈၃၊ ၁၉၈၉ ခုနှစ်တို့တွင်    နိုင်ငံတော်အတွက် ရွှေတံဆိပ် ၆ ခု ရယူပေးနိုင်ခဲ့သည်။

၎င်းအပြင် လက်ဝှေ့အားကစားနည်းအနေဖြင့်လည်း ပထမအကြိမ် ကျွန်းဆွယ်အားကစားပြိုင်ပွဲမှ (၁၂) ကြိမ်မြောက်  အရှေ့တောင်အာရှအားကစားပြိုင်ပွဲအထိ အောင်ထွန်း၊ စတန်လေမဂျစ်၊ လှရွှေ၊ လှညွန့်၊ ရဲတင့်၊ မောင်ညွန့်၊ တင်မောင်၊ ခင်မောင်ဝင်း၊ ကူဖာရိုင်း၊  နီနီ၊ တင်ထွန်း၊ ဒေါ်လာ၊ ဝင်းမောင်၊ မောင်သိန်း၊ သိန်းလွင်၊ ကြူဟန်၊ သက်ဦးလေး၊ စန်းမြင့်၊ ဟာရာခမ်း၊ အောင်မြင့်၊ ညိုဝင်း၊ ဇော်လတ်တို့က နိုင်ငံတော်အတွက်  ရွှေတံဆိပ် ၂၅  ခုနှင့်  ငွေ၊ ကြေး ဆုတံဆိပ်များ ရယူပေးနိုင်ခဲ့သည့် မှတ်တမ်း များလည်း အခိုင်အမာရှိခဲ့သည်။

ဤသည်ကား မြန်မာ့အားကစား ရွှေခေတ်ကာလ အောင်မြင်မှုများအနက်မှ တစ်စိတ်တစ်ဒေသ ကိုသာ ကောက်နုတ်ဖော်ပြခြင်းဖြစ်သည်။ မြန်မာ့အားကစား အောင်မြင်မှုမြင့်မားခဲ့သည့်     အဆိုပါ ကာလများအတွင်း အားကစားဝန်ကြီးဌာနဟူ၍ သီးခြားဖွဲ့စည်း ဆောင်ရွက်နိုင်ခြင်း မရှိစေကာမူ ပြည်သူလူထုတစ်ရပ်လုံး၏  အားပေးဆောင်ရွက်မှုများဖြင့်    လူထုအားကစားလှုပ်ရှားမှုများအား တစ်နိုင်ငံလုံးအတိုင်း အတာဖြင့် ကျယ်ကျယ်ပြန့်ပြန့် လှုပ်ရှားဆောင်ရွက်နိုင်ခဲ့မှုများကြောင့် ပေါ်ပေါက်လာသောအသီးအပွင့်များဖြစ်သည်။

ကျင်းပပြီးစီးခဲ့သည့်   အမျိုးသားအားကစားပွဲတော်များ၏ ဦးတည်ချက်များ မြန်မာ့အားကစား အဆင့်အတန်းတိုးတက်မြင့်မားရေးအတွက် အစိုးရအဆက်ဆက်    အမျိုးသားအားကစားပွဲတော်များ ကို ကျင်းပခဲ့ကြသည်။ ကျင်းပပြီးစီးခဲ့သည့်   ပထမအကြိမ်၊ ဒုတိယအကြိမ်နှင့် တတိယအကြိမ် အမျိုးသားအားကစားပွဲတော်များအား မြန်မာ့အားကစား ကမ္ဘာကိုလွှမ်းစေရမည်ဟူသော ရည်မှန်းချက်ကို     အမျိုးသားရေးလှုပ်ရှားမှုဖြင့်ဆောင်ရွက်ရန်၊ အားကစားမြှင့်တင်ခြင်းသည် နိုင်ငံ

တော်ကို ကာကွယ်စောင့်ရှောက်နေခြင်းဖြစ်သည်ဟု ခံယူတတ်လာစေရန်၊ အားကစားဆောင်ရွက်ရာ တွင် မျိုးချစ်စိတ်ဓာတ် ဇာတိသွေး၊ ဇာတိမာန် ရှင်သန်လာစေရေးအတွက် ဦးတည်လာစေရန်၊  ထူးချွန်ထက်မြက်သော အားကစားမျိုးဆက်သစ်များပေါ်ထွက်လာပြီး ကမ္ဘာ့အဆင့်အထိ တက်လှမ်း လာစေရန်၊    မြန်မာ့အားကစားအဆင့်အတန်းမြင့်မားစေရေးအတွက် တစ်နိုင်ငံလုံးမှ ပါဝင် လှုပ်ရှားပြီး  တက်ကြွစွာအားပေးချီးမြှောက်မှုများပြုလုပ်လာစေရန်၊ ခေတ်မီ တိုးတက်သော အားကစားနည်းစနစ်များဖြင့် လေ့ကျင့်ပျိုးထောင်ထားသော   အားကစားထူးချွန်သူများ ပေါ်ထွန်းရေး အတွက် တက်ကြွစွာပါဝင်ဆောင်ရွက်လာစေရန်နှင့်  အနယ်နယ်အရပ်ရပ်တွင်   ပျံ့နှံ့နေသည့် ထူးချွန်သောအားကစားသမားအချင်းချင်းပိုမိုရင်းနှီးမှုရရှိကာ ပြည်ထောင်စုစိတ်ဓာတ်ပြင်းထန် လာစေရန် စသည့်ဦးတည်ချက် (၇) ရပ်ဖြင့် ကျင်းပခဲ့ခြင်းဖြစ်သည်။

ဆက်လက်ဖော်ပြပါမည်။

ကိုဌေး(ကနောင်)