ကလောမြို့နယ် ဘော်နင်းခေတ်မီစံပြကျေးရွာ (Smart Village) ကို ဒုတိယဝန်ကြီး ဦးမြင့်စိုး ကြည့်ရှုစစ်ဆေး

ကလောမြို့နယ် ဘော်နင်းခေတ်မီစံပြကျေးရွာ (Smart Village) ကို ဒုတိယဝန်ကြီး ဦးမြင့်စိုး  ကြည့်ရှုစစ်ဆေး

နေပြည်တော် မေ ၁၉

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးမြင့်စိုးသည် ယနေ့ နံနက်ပိုင်းတွင် ရှမ်းပြည်နယ်အစိုးရအဖွဲ့ လမ်းပန်းဆက်သွယ်ရေးဝန်ကြီး ဦးနေဝင်းအောင်၊ ကျေးလက်ဒေသ ဖွံ့ဖြိုး တိုးတက်ရေးဦးစီးဌာန ညွှန်ကြားရေးမှူးချုပ် ဦးသိန်းလွင်နှင့်အတူ ဟိုပုံးမြို့နယ် လွယ်အွန့်ကျေးရွာသို့ သွားရောက်ပြီး ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ကျေးလက်စီးပွားမြင့်မားရေး RBF ရန်ပုံငွေဖြင့် ဝက်မွေးမြူရေးလုပ်ငန်းဆောင်ရွက်နေမှုကို ကြည့်ရှုစစ်ဆေးကာ အစုအဖွဲ့ဖြင့် ဆောင်ရွက် သောလုပ်ငန်းဖြစ်၍ မိသားစုဝင်ငွေတိုးရေး၊ ဒေသ၏ အသားငါးဖူလုံရေးတွင် အထောက်အကူဖြစ်စေ ရေး ကြိုးပမ်းဆောင်ရွက်ရန်မှာကြားကာ  လိုအပ်သည်များ  ညှိနှိုင်းပေါင်းစပ် ဆောင်ရွက်ပေးသည်။

ယင်းနောက် ဒုတိယဝန်ကြီးနှင့်အဖွဲ့သည် ဟိုပုံးမြို့နယ်  ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန ရုံးသို့ သွားရောက်ပြီး ဆီဆိုင်ဒေသမှ ယာယီတွဲဖက်ထားသော ဝန်ထမ်းများ၊ ဝန်ကြီးဌာန ဝန်ထမ်းများနှင့် တွေ့ဆုံကာ ဆီဆိုင်ဒေသတွင် တာဝန်ထမ်းဆောင်နေသော ဝန်ထမ်းမိသားစုဝင်များ၏ အခက်အခဲ များကို ဝိုင်းဝန်းကူညီဖြေရှင်းပေးရန် မှာကြားပြီး ပြည်နယ်လမ်းပန်းဆက်သွယ်ရေးဝန်ကြီးက အားပေး စကား ပြောကြားသည်။ ထို့နောက် ဝန်ထမ်းများအတွက် ထောက်ပံ့ငွေများပေးအပ်ကာ လိုအပ်သည်များ ပေါင်းစပ်ဖြည့်ဆည်း ဆောင်ရွက်ပေးပြီး ဟိုပုံးခရိုင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန၏ RC နှစ်ထပ်ရုံး သစ်တည်ဆောက်မည့် မြေနေရာကိုကြည့်ရှုစစ်ဆေးသည်။

ထိုမှတစ်ဆင့် ဒုတိယဝန်ကြီးနှင့်အဖွဲ့သည် တောင်ကြီးမြို့ အသေးစားစက်မှုလက်မှုလုပ်ငန်းဦးစီးဌာန၏ ရက်ကန်းနှင့်အသက်မွေး ပညာသင်တန်းကျောင်းသို့ သွားရောက်၍ လက်ရက်ကန်း ခြောက်လ သင်တန်း တက်ရောက်နေသော သင်တန်းသူများ၏လက်တွေ့သင်ယူနေမှုကို  ကြည့်ရှုအားပေးသည်။ ယင်းနောက် အသေးစားစက်မှု လက်မှုလုပ်ငန်းဦးစီးဌာနမှ ဝန်ထမ်းများနှင့်တွေ့ဆုံကာ နိုင်ငံတော်အစိုးရအနေဖြင့် ဝါစိုက်ပျိုးရေးနှင့် ချည်မျှင်ထုတ်လုပ်ရေးလုပ်ငန်းကို အားပေးဆောင်ရွက်လျက်ရှိရာ ရက်ကန်း သင်တန်း ကျောင်းများအနေဖြင့် ချည်ထည် ရက်လုပ်ခြင်းနှင့် ဆိုးဆေးလုပ်ငန်းတို့တွင် သုတေသန တီထွင် စမ်းသပ်ထုတ်လုပ်မှုများ အောင်မြင်စေရေး  ဆောင်ရွက်ကြရန် တိုက်တွန်းမှာကြားပြီး ကယားပြည်နယ် မှယာယီတွဲဖက်ထားသော  ဝန်ထမ်းများ၊ ပအိုဝ်းကိုယ်ပိုင်အုပ်ချုပ်ခွင့်ရဒေသနှင့်  ဓနုကိုယ်ပိုင်အုပ်ချုပ်ခွင့် ရဒေသတို့မှ ဝန်ထမ်းများကို ထောက်ပံ့ငွေများ ပေးအပ်သည်။

ဆက်လက်၍ ဒုတိယဝန်ကြီးနှင့်အဖွဲ့သည် ကလောမြို့နယ် ဘော်နင်းခေတ်မီစံပြကျေးရွာသို့ သွား ရောက်၍ ကျေးရွာသူ၊ ကျေးရွာသားများနှင့်တွေ့ဆုံကာ စိုက်ပျိုး ရေးကို အခြေခံသော စံပြကျေးရွာအဖြစ် ပတ်ဝန်းကျင်ကျေးရွာများက အတုယူအားကျလောက်အောင် ကြိုးပမ်းဆောင်ရွက်ရန်၊ IT ခန်းမနှင့် တွဲ၍ ကျေးရွာစာကြည့်တိုက် ဖွင့်လှစ်ရန် တိုက်တွန်းမှာကြားပြီး စာအုပ် စာစောင်များ ရရှိရေးအတွက် ကူညီဆောင် ရွက်ပေးမည်ဖြစ်ကြောင်း ပြောကြားသည်။

ယင်းနောက် ဒုတိယဝန်ကြီးနှင့်အဖွဲ့သည် အသေးစားစက်မှု လက်မှုလုပ်ငန်းဦးစီးဌာနက ဖွင့်လှစ်ပေးခဲ့ သော မော်တော်ဆိုင်ကယ်ပြုပြင်နည်းသင်တန်း တက်ရောက်အောင်မြင်ပြီးသူများက ဖွင့်လှစ်နေသော မိုးသောက်ကြယ် ဆိုင်ကယ်ပြုပြင်ရေးနှင့် Shan Star ဆိုင်ကယ်ပြုပြင်ရေးလုပ်ငန်းတို့ကို သွားရောက် အားပေးကြည့်ရှုသည်။ အဆိုပါ လုပ်ငန်းရှင်လူငယ်များသည် ရာသီသီးနှံများ စိုက်ပျိုးခြင်း အပြင်  ဆိုင်ကယ်ပြင်လုပ်ငန်းမှလည်း လစဉ်အပိုဝင်ငွေကျပ်တစ်သိန်းခွဲ ခန့်ရရှိကြောင်း သိရသည်။ 

(သတင်းစဉ်)