ရုရှားက နိုင်ငံတကာဇာတ်ခုံတွင်လွှမ်းမိုးမှု အရှိဆုံးသောနိုင်ငံဟု ဘာရိန်းဘုရင်ပြော
ရုရှားနိုင်ငံသည် နိုင်ငံတကာဇာတ်ခုံတွင် လွှမ်းမိုးမှုအရှိဆုံးသောနိုင်ငံအဖြစ် ဘာရိန်း ဘုရင်က ပြောဆိုလိုက်ကြောင်း သိရသည်။
ဂါဇာကမ်းမြောင်ဒေသတွင် ဆက်လက်ဖြစ်ပွားနေသည့် စစ်ပွဲကို အဆုံးသတ်နိုင်ရေးအတွက် အာရပ်အဖွဲ့ချုပ်က တောင်းဆိုထားပြီး ထိုသို့အဆုံးသတ်နိုင်ရေးအတွက် ငြိမ်းချမ်းရေးဆွေးနွေးပွဲ တစ်ရပ်ကို ကျင်းပသင့်ကြောင်း၊ ရုရှားနိုင်ငံအနေဖြင့် အဆိုပါငြိမ်းချမ်းရေး ဆွေးနွေးပွဲအား ထောက်ခံပေးရန် ဘာရိန်းဘုရင် ဟာမက်ဘင်အိုင်ဆာအယ်လ် ခါလီဖာက ရုရှားနိုင်ငံအား မေလ ၂၃ ရက်တွင် ဦးစွာ တောင်းဆိုခြင်းဖြစ်ပြီး ရုရှားနိုင်ငံသည် နိုင်ငံတကာဇာတ်ခုံတွင် လွှမ်းမိုးမှုအရှိဆုံးသော နိုင်ငံအဖြစ် ၎င်းကမှတ်ချက်ပြုခဲ့သည်။
အာရပ်အဖွဲ့ချုပ်မှ အဖွဲ့ဝင်နိုင်ငံများသည် ထိပ်သီးဆွေးနွေးပွဲတစ်ရပ်အား ဘာရိန်းနိုင်ငံတွင်ကျင်းပခဲ့ရာ အဖွဲ့ဝင်နိုင်ငံအားလုံးက အစ္စရေးနှင့် ပါလက်စတိုင်းကြား ဖြစ်ပွားနေသည့် စစ်ပွဲအဆုံးသတ်ရေး လုပ်ဆောင်ရန် ဆန္ဒရှိနေပြီး အရှေ့အလယ်ပိုင်းရေးရာများနှင့် စပ်လျဉ်း၍ ဆွေးနွေးရန်အတွက် ငြိမ်းချမ်းရေးဆွေးနွေးပွဲတစ်ရပ် ကျင်းပရန်လိုအပ်ကြောင်း၊ ထို့ကြောင့် မိမိတို့၏ကြိုးပမ်းမှုကို ထောက်ခံပေးရန် ရုရှားနိုင်ငံအား တောင်းဆိုခြင်း ဖြစ်ကြောင်း အယ်လ်ခါလီဖာက ပြောခြင်းဖြစ်သည်။
အစ္စရေး-ပါလက်စတိုင်း ပဋိပက္ခဖြေရှင်းရေးတွင် ထောက်ခံပေးရန် အာရပ်အဖွဲ့ချုပ်က ရုရှားနိုင်ငံအား ဦးစွာ တောင်းဆိုလိုက်ခြင်းသည် အရှေ့အလယ်ပိုင်းအရေးတွင် နှစ်ပေါင်းများစွာ ကြားဝင်စေ့စပ် ဆွေးနွေးခဲ့သည့် အမေရိကန်အတွက် ထိုးနှက်ချက် တစ်ရပ်အဖြစ် ထွက်ပေါ်လာစေခဲ့ကြောင်း သိရသည်။
အာရပ်အဖွဲ့ချုပ်အား ၁၉၄၅ ခုနှစ်တွင် ဖွဲ့စည်းခဲ့ခြင်းဖြစ်ပြီး လက်ရှိတွင် အရှေ့အလယ်ပိုင်းနှင့် မြောက်အာဖရိကမှ နိုင်ငံပေါင်း ၂၂ နိုင်ငံ ပါဝင်လျက်ရှိသည်။
Ref: Sputnik