နေပြည်တော်၊ မတ်လ ၁၈
လုံခြုံရေးတပ်ဖွဲ့ဝင်များသည် နိုင်ငံတော်အတွင်း တည်ငြိမ်ရေး၊ လုံခြုံရေးနှင့် ရပ်ရွာအေးချမ်း သာယာရေး လုပ်ငန်းများအပြင် ဆူပူအကြမ်းဖက်ဆန္ဒပြသူများမှ လမ်းမကြီးများအား အသုံးပြု၍ မရအောင် ပိတ်ဆို့ထားရှိသည့် အတားအဆီးများအား ဖယ်ရှား၍ လမ်းများပြန်လည် အသုံးပြုနိုင်ရေး အတွက် စည်ပင်သာယာရေး ဝန်ထမ်းများ၊ ဆူပူအကြမ်းဖက် ဆန္ဒပြမှုများအား မလိုလားသည့် တာဝန်သိ ပြည်သူများနှင့်အတူ ယာဉ်/ယန္တရားများ အသုံးပြု၍ ဖယ်ရှားရှင်းလင်းခြင်းတို့အား မြို့၊ ရွာ၊ ရပ်ကွက် အများအပြားတွင် ဆောင်ရွက်လျက်ရှိပါသည်။
၂၀၂၁ ခုနှစ်၊ မတ်လ ၁၈ ရက်နေ့ နံနက် ၇ နာရီ ၄၀ မိနစ် ခန့်တွင် လုံခြုံရေးတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ပဲခူးမြို့၊ ဥဿာမြို့သစ် (၇) လမ်းမှစတင်၍ ရွှေမောဓေါဘုရား တောင်ဘက်မုဒ်အထိ ဆူပူအကြမ်းဖက် ဆန္ဒပြသူများမှ ပိတ်ဆို့ထားရှိသော အတားအဆီးများအား ဖယ်ရှားရှင်းလင်းခဲ့ပါသည်။
ထိုသို့ဖယ်ရှားရှင်းလင်းစဉ် ကျိုက်ပွန်ဘုရားမုဒ်ဦးအပေါက်ဝအရှေ့ ရန်ကုန်-မန္တလေးကား လမ်းမကြီး၊ လမ်းလယ်ကျွန်း၌ Sting အချိုရည်ပုလင်းခွံနှင့် Tiger ဘီယာပုလင်းခွံတို့ထဲတွင် ဓာတ်ဆီနှင့် အင်ဂျင်ဝိုင်ရော၍ ဆူပူအကြမ်းဖက် လုပ်ရပ်များတွင် အသုံးပြုရန် ရည်ရွယ်ပြုလုပ်ထားသည့် လက်လုပ်မီးပုလင်းများအား ရှာဖွေတွေ့ရှိခဲ့သဖြင့် ဘေးလွတ်ရာသို့ယူဆောင်ကာ ဖျက်ဆီးခဲ့ရကြောင်း သတင်းရရှိပါသည်။