နှစ်ပေါင်း ၂၈၂ နှစ် သက်တမ်းကြာမြင့်ပြီဖြစ်သည့် အုံတုံပင်(မနောရမ္မာ) ရွှေကျောင်းတော်ကြီး အား ရှေးမူမပျက် ပြန်လည်ပြုပြင် ထိန်းသိမ်းခြင်းများ ပြုလုပ်

နေပြည်တော်၊ နိုဝင်ဘာ - ၂၀

မကွေးတိုင်းဒေသကြီး၊ ပခုက္ကူခရိုင်၊ မြိုင်မြို့နယ်၊ သနပ်ပင်အုပ်စု၊ ဗိမ္မာန်မကျေးရွာရှိ မြန်မာနှစ် ၁၁၀၀ ပြည့်(ခရစ်နှစ် ၁၇၃၈)တွင် ဆောက်လုပ်ခဲ့ပြီး ယခုအချိန်အထိ ၂၈၂ နှစ် သက်တမ်းကြာမြင့်ပြီဖြစ်သည့် အုံတုံပင်(မနောရမ္မာ) ရွှေကျောင်းတော်ကြီးသည် နှစ်ကာလ ကြာမြင့်လာသည်နှင့်အမျှ ပျက်စီးယိုယွင်းလာပြီး ပြန်လည်ပြုပြင် ထိန်းသိမ်းရန် လိုအပ်နေသည့်အတွက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ လမ်းညွန် မှာကြားချက်နှင့်အညီ အနောက်မြောက်တိုင်း စစ်ဌာနချုပ်မှ တာဝန်ရှိသူများက ပြန်လည်ပြုပြင် ထိန်းသိမ်းရေး လုပ်ငန်းများဆောင်ရွက်ခဲ့သည်။

ထိုသို့ ဆောင်ရွက်ရာတွင် တိုင်းစစ်ဌာနချုပ်မှ တာဝန်ရှိသူများ၊ ရှေးဟောင်းသုတေ သနနှင့်အမျိုးသားပြတိုက်ဦးစီးဌာန(ပခန်းကြီး)မှ တာဝန်ရှိသူများက အဆိုပါ အုံတုံပင် (မနောရမ္မာ) ရွှေကျောင်းတော်ကြီး၌ သတင်းသုံးလျက်ရှိသည့် ကျောင်းတိုက်ဆရာတော် ဘဒ္ဒန္တဇဋိလ ထံသို့ စက်တင်ဘာ ၂၂ ရက်တွင် သွားရောက်၍ ကျောင်းဆောင်အား ရှေးမူမပျက် ပြုပြင်နိုင်ရေး လျှောက်ထားခဲ့ရာ ဆရာတော်က သဘောတူခဲ့ပြီး လိုအပ်သလိုပြုပြင် ဆောင်ရွက်ရန် မိန့်ကြားခဲ့သဖြင့် တိုင်းစစ်ဌာနချုပ်မှ တာဝန်ရှိသူများနှင့် နယ်မြေခံ ဆောက်လုပ်ရေး အင်ဂျင်နီယာတပ်မှ တာဝန်ရှိသူများက အောက်တိုဘာ ၆ ရက်မှစ၍ ပြန်လည်ပြုပြင်ထိန်းသိမ်းရေး လုပ်ငန်းများ စတင်ဆောင်ရွက်ခဲ့သည်။

ပြန်လည်ပြုပြင်ထိန်းသိမ်းရေး လုပ်ငန်းများအနေဖြင့် ရွှေကျောင်းတော်ကြီး၌ ခင်းထားသော ၁ ဒသမ ၅ လက်မထုရှိ ကျွန်းကြမ်းခင်းများ ပျက်စီးဆွေးမြေ့မှုများကို  ပြန်လည် ပြုပြင်ခြင်းနှင့် အသစ်လဲလှယ်ပေးခြင်း၊ ပျက်စီးဆွေးမြေ့ ကွဲအက်နေသည့် ထုတ်ယောက် များ၊ အမိုးဒိုင်းမြှားများ၊ တိုင်များနှင့် ကြမ်းခင်းနေရာများ၊ တိုင်ခွာ/တိုင်ကလပ်များကို အသစ် ပြန်လည်လဲလှယ် တပ်ဆင်ပေးခြင်း၊ သစ်သားအမိုးပြားများနှင့် နီညိုရောင်သွပ် အမိုးပြားများ အား အသစ်ပြန်လည်အုပ်မိုးပေးခြင်း၊ ဆွေးမြေ့ပျက်စီးလျက်ရှိသည့် သစ်သားနံရံများ၊ တံခါး ပေါက်များနှင့် တံခါးရွက်များအား ပြန်လည်လဲလှယ် တပ်ဆင်ပေးခြင်း၊ ရွှေကျောင်းတော်ကြီး အတွင်း ရှေးဟောင်းအသုံးအဆောင် ပစ္စည်းများထားရှိရန် ရှေးဟောင်းပစ္စည်းတင်စင်များ ပြုလုပ်ပေးခြင်းနှင့် အလင်းရောင်ရရှိစေရန် မီးဆလိုက်များ တပ်ဆင်ပေးခြင်း၊ ရွှေကျောင်း တော်ကြီး၏ ယာယီလှေကားနေရာအား အုတ်စီ၊ မြန်မာမှုလက်ရမ်း လှေကား ပြုလုပ်ပေးခြင်း၊ ကျောင်းဆောင်အား ရေနံချေးများ ပြန်လည်သုတ်ပေးခြင်းနှင့် အထွေထွေပြုပြင်ခြင်းများကို ရှေးမူမပျက် ပြန်လည်ပြုပြင်ထိန်းသိမ်းပေးခြင်းများ ဆောင်ရွက်ပေးခဲ့သည်။

 ထိုသို့ ပြန်လည်ပြုပြင် ထိန်းသိမ်းပေးခြင်းများ ဆောင်ရွက်ပေးခဲ့ရာ နိုဝင်ဘာ ၅ ရက်တွင် လုပ်ငန်းအားလုံး ရာနှုန်းပြည့်ပြီးစီးခဲ့ကြောင်း သိရှိရသည်။

အဆိုပါ မနောရမ္မာရွှေကျောင်းတော်ကြီးသည် မကွေးတိုင်းဒေသကြီး၊ ပခုက္ကူခရိုင်၊ မြိုင်မြို့နယ်အတွင်းရှိ ပခုက္ကူမှ မြိုင်သို့သွားရာကားလမ်း၏ လက်ယာဘက်အတွင်း ၁ မိုင်ခန့် အကွာ ဗိမ္မာန်မရွာတွင် တည်ရှိပြီး ကျောင်းဒကာများမှာ ထိုစဉ်က ဗိမ္မာန်မရွာနှင့်ကပ်လျက် စိန့်ကန်(စဉ့်ကန်)ဟု အမည်ရှိခဲ့သော ရွာမှဖြစ်သည်။ မနောရမ္မာ(စိတ်နှလုံးပျော်မွေ့ဖွယ်ရာ ကျောင်း)၊ ဒေသအခေါ် အုံတုံကျောင်းကို ညောင်ရမ်းမင်းဆက်၏ နောက်ဆုံးမင်းဖြစ်သော မဟာဓမ္မရာဇာဓိပတိလက်ထက်တွင် ဆောက်လုပ် လှူဒါန်းခဲ့ခြင်းဖြစ်ပြီး ကျောင်းဆောက်လုပ်စဉ်က အဆောင်ပေါင်း ၁၂ ဆောင်ရှိပြီး အရှေ့အနောက်အခန်း ၁၇ ခန်းနှင့် တောင်မြောက် သည် ၁၃ ခန်းရှိခဲ့ကြောင်း၊ အခန်းများသည် လေးတောင်ခန်းများဖြစ်ပြီး ယခုအခါ အရှေ့ အနောက် ၆ ခန်းနှင့် တောင်မြောက် ၅ ခန်းသာကျန်ရှိတော့ကြောင်း သိရှိရသည်။ ကျောင်းကြီး ၏ အမိုးမျက်နှာကြက်နံရံများ၊ တိုင်များ၊ စာတိုက်သတ္တာများ၊ ကျောင်းအမိုး ပျဉ်ချပ်များမှာ ရွှေများကို အသုံးပြုထားပြီး အချို့နေရာများ၌ မသမာသူများ၏ ခိုးယူမှုကြောင့် ပျောက်ဆုံးမှု များရှိခဲ့ကြောင်း၊ မြန်မာတို့၏ ရွှေဇဝါရေး၊ ပန်းပုနှင့် သရိုးပန်းချီအနုပညာ လက်ရာတို့ကို ကျောင်းအတွင်း လေ့လာနိုင်ပြီး သံဃာတော်များ ဖျားနာသည့်အခါ ချွေးထုတ်သည့် ချွေးဇရုန်း အိမ်လည်း ပါရှိကြောင်း သိရသည်။

 အဆိုပါကျောင်းတော်ကြီးကို တပ်မတော်(ကြည်း၊ ရေ၊ လေ)မိသားစုများက ငွေကျပ် သိန်းပေါင်း ၃၇၀ ကျော် အကုန်အကျခံ၍ ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ပခန်းကြီး)မှ တာဝန်ရှိသူများနှင့်အတူ ရှေးမူမပျက်ပြန်လည် ထိန်းသိမ်းပြုပြင်ခဲ့ခြင်းဖြစ်ပြီး ကျောင်းတော်ကြီးရှိ ရှေးဟောင်းမြန်မာ့ အနုပညာလက်ရာများကို အများပြည်သူများ သွားရောက်လေ့လာ နိုင်ပြီဖြစ်ကြောင်း သတင်းရရှိသည်။