လည်ပင်းကျီးပေါင်းရောဂါ

လည်ပင်းကျီးပေါင်းရောဂါ

လည်ပင်းကျီးပေါင်းက အသက်ရလာတာနဲ့အမျှ လူတိုင်းနီးပါးဖြစ်တတ်တယ်။ အသက်ကြီးတဲ့သူတွေမှာ အရိုးရဲ့ခိုင်မာတဲ့ ဓာတ်တွေ လျော့နည်းသွားတဲ့အတွက်ဖြစ်ရပါတယ်။ ဦးခေါင်းကနေပြီး တင်ပါးအထိတစ်လျှောက်လုံးမှာ ရှိတဲ့အရိုးတွေမှာ ဖြစ်နိုင်ခြေရှိတယ်။ အသက်ကြီးလို့ဖြစ်တဲ့ ရောဂါဖြစ်တဲ့အတွက် အရိုးတွေပြန်ပြီး အားကိုးတာ အစားထိုးတာမျိုးဖြစ်မှသာ အရိုးကျီးပေါင်းမှ ပျောက်နိုင် ပါတယ်။ လည်ပင်းလေ့ကျင့်ခန်း လုပ်ပေးရင် သက်သာပျောက်ကင်းနိုင်ပါတယ်။ မှန်ကန်တဲ့မတ်မတ်ထိုင်တာ၊ မတ်မတ်လမ်း လျှောက်သင့်ပါတယ်။

လည်ပင်းကျီးပေါင်း ရောဂါဖြစ်ရတဲ့ အဓိကအကြောင်းရင်းက အသက်အရွယ်ကြီးရင့်လို့နဲ့ အနေအထားမမှန်လို့ဖြစ်တယ်။ ဦးခေါင်းမှာ အလေးအပင်ထမ်းရသူတွေ၊ လည်ပင်းကို သက်သောင့်သက်သာမဖြစ်တဲ့ အနေအထားနဲ့ ကြာရှည်အောင်နေသူတွေ၊ ဖုန်း၊ ကွန်ပျူတာ အသုံးများသူတွေ၊ ဆေးလိပ်သောက်သူတွေ၊ ကိုယ်လက်လှုပ်ရှားမှုနည်းသူတွေမှာ ပိုပြီးအဖြစ်များတယ်။ လည်ပင်းကျီးပေါင်း မျိုးရိုးဖြစ်နေ သူတွေမှာလည်း ပိုပြီးဖြစ်နိုင်ခြေများပါတယ်။

အခုခေတ်မှာ ဖုန်းတွေ၊ ကွန်ပျူတာတွေအသုံးများလာလို့ ဖုန်း၊ ကွန်ပျူတာကြည့်ပြီး စာစီစာရိုက်အလုပ်များတဲ့သူတွေ၊ စက်ချုပ်တဲ့ သူတွေ၊ ချည်ထိုးတာမျိုးတွေ၊ အာရုံစိုက်ပြီး တစိုက်မတ်မတ် လုပ်နေရတဲ့သူတွေမှာ လည်ပင်းကျီးပေါင်းရောဂါ ဖြစ်နိုင်ခြေများတယ်။ အသက်ကြီးတဲ့သူ အတော်များများ လက္ခဏာမပြဘဲ လည်ပင်းကျီးပေါင်း ရောဂါရှိနေတတ်ပါတယ်။ အသက် ၅၀ ကျော်တာနဲ့ အမျှဖြစ်လေ့ဖြစ်ထရှိတဲ့ ရောဂါလည်းဖြစ်ပါတယ်။

လည်ပင်းကျီးပေါင်း ရောဂါတွေက လည်ပင်းမှာမက နောက်စေ့၊ ပခုံး၊ကျောနဲ့လက်တွေကိုပါပျံ့နှံ့သွားတယ်။ လည်ပင်းကျီးပေါင်းကို အလွယ်တကူ သိနိုင်မယ့် ရောဂါလက္ခဏာတွေက ပခုံးကြောတွေ တင်းလာပြီးနာကျင်နေမယ်။ ခေါင်းကိုဘယ်ညာလှည့်တဲ့အခါ အသံမြည်နေမယ်။ လက်ပြင်အောင့်သလို တင်းပြီးနာကျင်နေတယ်။ လက်ချောင်း၊ လက်မောင်းတွေလှုပ်တဲ့အခါနာကျင်နေမယ်။  ပခုံးထိ ခေါင်းဘယ်၊ ညာလှည့်ကြည့်မရဖြစ်တယ်။ ပခုံးကနေလက်ချောင်းတွေထိ တဆစ်ဆစ်ထုံကျဉ်တာမျိုး ဖြစ်နေမယ်။ အချိန် ကြာကြာအာရုံစိုက်မရတာတွေခေါင်းမူးတာတွေဖြစ်နိုင်ပါတယ်။

လည်ပင်းကျီးပေါင်းရောဂါက သာမန်ထုံတာ၊ နာကျင်တာလောက်ကနေစပြီး လုံးဝလှုပ်ရှားလို့ မရနိုင်တဲ့ထိ ဖြစ်နိုင်ခြေရှိပါတယ်။ ဖုန်း ၊ကွန်ပျူတာတွေကို အားစိုက်ပြီးကြည့်တာတွေ၊ အလေးအပင်သယ်တာတွေ လည်ပင်းကနေအားစိုက်ရတဲ့ အလုပ်တွေကို သတိ ထားပြီး ရှောင်မယ်ဆိုရင် ရောဂါသက်သာမှာ ဖြစ်တယ်။

အမျိုးသမီးတွေအနေနဲ့ အသက် ၄၀ ကျော်၊ အမျိုးသားတွေအနေနဲ့အသက် ၅၀ ကျော်မှစပြီးအဖြစ်များလို့ သတိထားရမှာဖြစ်တယ်။ အစပိုင်းအခြေအနေတွေပေါ့ဆမိလို့ အခြေအနေတွေဆိုးရွားလာခဲ့ရင် ပစ္စည်းတွေကို ထိတွေ့ကိုင်တွယ်ဖို့ ခဲယဉ်းလာမယ်။ ခြေ၊  လက်တွေ ထုံကျဉ်ပြီး  အားမရှိသလို ဖြစ်ခါလမ်းလျှောက်ရခက်လာမယ်။ ဆီး၊ ဝမ်းမထိန်းနိုင်တာဖြစ်နိုင်တယ်။ လမ်းလျှောက်တဲ့အခါ  ခန္ဓာကိုယ်က ဟန်ချက်မညီတာဖြစ်စေနိုင်ပြီး အချို့ဆိုးရွားတဲ့အခြေအနေကြောင့် အဆစ်လဲလှယ်ရတဲ့ ခွဲစိတ်တာတွေ လုပ်ရပါတယ်။

လည်ပင်းကျီးပေါင်းမဖြစ်စေဖို့ ဦးခေါင်းနဲ့ရွက်ပြီး အလေးအပင်သယ်တာမျိုး ရှောင်သင့်ပါတယ်။ ကွန်ပျူတာ အသုံးပြုရတာများ တဲ့သူတွေအနေနဲ့ ကွန်ပျူတာနဲ့မျက်နှာကို ဦးခေါင်းနဲ့တစ်တန်းတည်း ထားသင့်တယ်။ အလုပ်လုပ်နေတဲ့အချိန် တစ်နာရီတစ်ကြိမ် လောက် ဦးခေါင်းလှုပ်ရှားတာ၊ အညောင်းအညာဖြေတာ၊ လေ့ကျင့်ခန်းလုပ်တာတွေကို ပုံမှန်လုပ်ပေးရမှာဖြစ်တယ်။  ထိုင်နေချိန်နှင့် လမ်းလျှောက်ချိန် ကိုယ်ကို တည့်တည့်မတ်မတ်ထားသင့်တယ်။ ဆီကြော်မုန့်တွေ၊ အဆီတွေလျှော့စားရမှာဖြစ်တယ်။   လတ်ဆတ်တဲ့ အသီးအရွက်တွေကို များများစားပေးရမှာဖြစ်တယ်။ အိပ်ရေး၀၀အိပ်ပေးသင့်ပါတယ်။ ကိုယ်အလေးချိန်များတဲ့သူတွေအနေနဲ့   ကိုယ် အလေးချိန်လျှော့သင့်တယ်။ ဆေးလိပ်၊ ကွမ်းစားသောက်သူတွေအနေနဲ့ ဆေးလိပ်၊ ကွမ်းဖြတ်သင့်တယ်။ အရက်စွဲတဲ့သူ အရက်ဖြတ် သင့်ပါတယ်။

လည်ပင်းကျီးပေါင်းအတွက် အနားယူတာက အကောင်းဆုံးပဲဖြစ်တယ်။ အရောင်ကျဆေး၊ ရောင်ရမ်းတာကိုသက်သာစေတဲ့ နီကိုတင်းမပါဝင်တဲ့ ဆေးတွေသောက်သုံးပေးတာ၊ အပူကုထုံး၊ အအေးကုထုံးခံယူတာ၊ နာတာရှည်ရောင်ရမ်းနာကျင်တာတွေကို   ကုသတဲ့ ကုထုံးတွေကိုအသုံးပြုတာ၊  လည်ပင်းအရိုးလှုပ်ရှားတာကို  ထိန်းညှိပေးနိုင်စေဖို့ ကျီးပေါင်းသမားတွေဝတ်ရတဲ့ လည်ပင်း ဝတ်ကို ဝတ်ဆင်ပေးတာ၊ အဆစ်ထဲကို ဆေးထိုးတာတွေ လုပ်ဆောင်လို့ရပါတယ်။ တကယ်လို့ အချိန်ကြာကြာဖြစ်နေပြီဆိုရင်  လိုအပ်တဲ့အခါမျိုး ခွဲစိတ်ကုသတာလုပ်ဆောင်သင့်တယ်။

လည်ပင်းကျီးပေါင်းအိမ်တွင်း ကုထုံးတွေက ရောဂါပြင်းပြင်းထန်ထန် မဟုတ်ဘူးဆိုရင် ကြွက်သားနာကျင်တာ၊ ကျီးပေါင်းကြောင့် နာကျင်တာတွေ သက်သာစေဖို့ နာကျင်ကိုက်ခဲတဲ့နေရာတွေကို ရေနွေးအိတ်ကပ်တာ၊ ရေခဲဝတ်တင်တာ လုပ်ဆောင်ပေးနိုင်ပါတယ်။ လေ့ကျင့်ခန်းတွေ နေ့စဉ်ပုံမှန်လုပ်ပေးနိုင်တယ်။ ပခုံး၊ လည်ပင်းလေ့ကျင့်ခန်းတွေ ပုံမှန်လုပ်သင့်ပါတယ်။ လည်ပင်းကို အောက်ကို ငုံ့ပြီး အားစိုက်လုပ်ရတဲ့ အလုပ်တွေကိုလည်း တတ်နိုင်သလောက်ရှောင်သင့်ပါတယ်။

ဗီတာမင်ဒီ အားနည်းလို့ဖြစ်နိုင်ပါတယ်။ လူကြီးလူငယ်မရွေးစားသုတ်သုတ်၊ သွားသုတ်သုတ်ဖြစ်နေကြရတဲ့ ခေတ်ကြီးမှာ နေရောင် ခြည်လုံလောက်စွာမရလို့ ဗီတာမင်ဒီအားနည်းတာဖြစ်နိုင်တယ်။ အဝလွန်တာ၊ နို့နဲ့နို့ထွက်ပစ္စည်း မတည့်တာတွေဟာ နို့မှာပါတဲ့ လက်စတို့အင်ဇိုင်းနဲ့မတည့်တာ၊ အသည်း၊ အစာအိမ်နဲ့အူလမ်းကြောင်းမှာ ရောဂါတစ်ခုခုခံစားရတာ စတဲ့အကြောင်း အချက်တွေ ရှိခဲ့မယ်ဆိုရင် ဗီတာမင်ဒီချို့တဲ့နိုင်တယ်။ ခန္ဓာကိုယ်မှာလိုအပ်တဲ့ ဗီတာမင်ဒီပမာဏချို့တဲ့နေတဲ့အခါ အရိုးအားနည်းတာ၊ လည်ပင်း ကျီးပေါင်း တက်တာမျိုးအဖြစ် များလာပါတယ်။

အရိုးတွေသန်မာစေဖို့ ဗီတာမင်ဒီမရှိမဖြစ်လိုအပ်သလို အာရုံကြောတွေထိခိုက်တာလည်း ဗီတာမင်ဒီအားနည်းတာကြောင့် နေရောင်နဲ့ ထိတွေ့မှုမရှိတာကြောင့်ဖြစ်တယ်။ ဗီတာမင်ဒီချို့တဲ့သူတွေဟာ ခန္ဓာကိုယ်က အလိုအလျောက် တန်ပြန်တိုက်ခိုက်တာ ကြောင့် အာရုံကြောတွေ ထိခိုက်ပျက်စီး တတ်တာတွေရှိခဲ့ပါတယ်။  နောက်ထပ်လေ့လာမှုတစ်ခုအရ မျိုးရိုးဗီဇအရ ခန္ဓာကိုယ်က ဗီတာမင်ဒီချို့တဲ့စေပြီး အာရုံကြောတွေ ထိခိုက်ပျက်စီးနိုင်ခြေများနေသူတွေလည်း ရှိတာတွေ့ရတယ်။ ဗီတာမင်ဒီနဲ့ အာရုံကြော အပေါ်ယံလွှာကို ဖုံးအုပ်ထားတဲ့ အမြှေးပါးတွေ ပျက်စီးတဲ့နေရာနဲ့ ဆက်စပ်မှုရှိတယ်ဆိုပေမယ့် ပညာရှင်တွေရဲ့ အတည်ပြုချက် မရှိသေးဘူး။

ဗီတာမင်ဒီက တန်ဆေးလွန်ဘေးဖြစ်တယ်။ အရွယ်ရောက်ပြီးကျန်းမာသူအနေနဲ့ တစ်နေ့ကို ဗီတာမင်ဒီ(၆၀၀) အိုင်ယူထက်ရှိနေတာ က ကျန်းမာရေးအတွက် အန္တရာယ်ရှိတယ်လို့ဆိုတယ်။ သွေးတွင်းမှာ ဗီတာမင်ဒီများနေတာက သွေးတွင်းကယ်စီယမ် ပမာဏကို မြင့်တက်စေပြီး သွေးကြောတွေ၊ နှလုံးနဲ့ကျောက်ကပ်တွေကို ပျက်စီးစေပါတယ်။ နေရောင်ခြည်နဲ့ ထိတွေ့မှုများတာကြောင့် သွေးတွင်း ဗီတာမင်ဒီ ပမာဏမများတတ်ပါဘူး။ ဗီတာမင်ဒီရရှိစေဖို့ နေရောင်ကာ ခရင်မ်မလိမ်းဘဲ နေရောင်ခြည်နဲ့ ထိတွေ့မှု များတာက ကိုယ့်ကိုကောင်းကျိုးထက် ဆိုးကျိုးသာရှိစေပါတယ်။ နေရောင်ခြည်နဲ့ထိတွေ့မှုများရင် အရေပြားကင်ဆာ၊ မျက်လုံး တိမ်စွဲ ရောဂါရနိုင်ပါတယ်။

လည်ပင်းကျီးပေါင်းမတက်ရအောင် မတ်တတ်ရပ်တာ၊ ထိုင်တာတွေအနေအထား မှန်မှန်ကန်ကန်နေထိုင်ဖို့လိုတယ်။ မှန်ကန်တဲ့ အနေအထားက လည်ပင်းကနေဒူးခေါင်းထိ အဆစ်တွေထိခိုက် နာကျင်မှုမဖြစ်အောင် ကာကွယ်ပေးတယ်။ ခန္ဓာကိုယ်အနေအထား မှန်ကန်ဖို့ဆိုရင် ရေကူးတာ၊ လမ်းလျှောက်တာ၊ ရွရွပြေးတာ၊ စက်ဘီးစီးတာလုပ်ဆောင်ဖို့လိုတယ်။ အသက်အရွယ်ကြီးတဲ့သူတွေ၊ ဖုန်း၊ ကွန်ပျူတာ၊ ဖေ့ဘွတ်၊ တက်ဘလက်အသုံးများသူတွေ၊ စာစီစာရိုက်လုပ်သူတွေအနေနဲ့ ခေါင်းကို အရှေ့အနောက်ဝိုက်တဲ့ နည်းတွေ၊ ဘယ်ညာဆွဲချတဲ့နည်းတွေ၊ ပခုံးကိုတွန်းတင်တွန်းချနည်းတွေ စတဲ့လေ့ကျင့်ခန်းမျိုးတွေ လုပ်ပေးသင့်ပါတယ်။ လက်လွန် သွားလို့ အုံးလွဲခြင်းမျိုးလည်း ကြုံရတတ်လို့ မနာမကျင်ဘဲ လည်ပင်းခေါင်းမော့၊ ခေါင်းငုံ့၊ ဘယ်လှည့်၊ ညာလှည့်လေ့ကျင့်ခန်းတွေ အမှတ်စဉ်နဲ့ သာမန်ပြုလုပ်သင့်ပါတယ်။ ။

ဒေါက်တာလွင်သန့်