ကိုယ်နှင့်သက်ကို နှင်းဆက်အပ်မည်

ကိုယ်နှင့်သက်ကို နှင်းဆက်အပ်မည်

အမှတ်စဉ်(၁၂)

 

ထမင်းစားရမည့် စားပွဲနှင့် ခုံတန်းရှည်များကို တောင်နှင့်မြောက်အတန်းလိုက်စီကာ ထမင်းစားရုံအပြင်တွင် ခင်းကျင်းထားသည်။ တောင်ဘက်ထိပ်တွင် စားပွဲတစ်လုံးကန့်လန့်ချထားသည်။ ထမင်းစားရုံအပြင်ဘက် နေပူထဲတွင် ထမင်းစားမည်ဖြစ်၍ အထူးအစီအစဉ်လားဟု ထင်မိသော်လည်း မဟုတ်ပါ။   ထမင်းစားရုံ သန့်ရှင်းရေးလုပ်၊ ရေဆေး၊ လှည်းကျင်းနေ၍ အပြင်တွင် စားရခြင်း ဖြစ်ပါသည်။

ရဲဘော်သစ်များ ထမင်းစားပွဲသို့ထိုင်မိသည်နှင့် ဆာလောင်မွတ်သိပ်နေသော ရဲဘော်များစားပွဲပေါ်တွင် အသင့်ပြင်ထားသော ထမင်းပန်းကန်ဆီသို့လက်များရောက်သွားစဉ်-

မစားနဲ့ဦး၊ တာဝန်မှူးအမိန့်ရမှ စား၊ဒီနေ့ ရဲဘော်တို့စားတဲ့ထမင်းဟာ တိုင်းပြည်က ပထမဆုံးကျွေးတဲ့ထမင်း၊ အခုရဲဘော်တို့စားရမယ့် ထမင်းစားပွဲပေါ်မှာ အဆင်သင့်ရှိတယ်၊ နောက်ဆိုရင် တန်းစီပြီးကိုယ်တိုင်ယူစားရမယ်၊ တိုင်းပြည်အတွက်လုပ်မယ့် ရဲဘော်တွေကို တိုင်းပြည်က ထမင်းကျွေးသွားမယ်၊ ဒါ့ကြောင့် တိုင်းပြည်ကကျွေးတဲ့ ထမင်းကို အလေးပြုပြီးမှစားရမယ် စားပွဲထိပ်မှ တာဝန်ကျတပ်ကြပ်က ထမင်းစားရမည့် စည်းကမ်းနှင့် မိတ်ဆက်စကားကို စစ်မိန့်ပေးသလို အော်ဟစ်ပြောကြားလိုက်ရာ ငတ်ငတ်နှင့်တအားလွေးလိုက်ရန် ထမင်းပန်းကန်ကို လှမ်းနေသောရဲဘော်များသည် လက်များကို ဆတ်ခနဲရုပ်လိုက်ကြရပါတော့သည်။

မကြာမီ တာဝန်မှူးရောက်ရှိလာရာတာဝန်ကျတပ်ကြပ်က သတိဟု အမိန့်ပေးလိုက်သဖြင့် ရဲဘော်များ ဝုန်းခနဲထကာ သတိဆွဲလိုက်ကြပါသည်။    တာဝန်ကျတပ်ကြပ်က တာဝန်မှူးအား သတင်းပို့ပြီးနောက် တာဝန်မှူး၏ အမိန့်သံထွက်လာပါသည်။

သတိ

အဖနိုင်ငံက ကျွေးတဲ့ထမင်းကို အလေးပြု

နေမြဲ

ထိုင်

စား

ရဲဘော်သစ်များ တာဝန်မှူး၏ အမိန့်သံအတိုင်း တစ်ခုချင်းလှုပ်ရှားကြရသည်။

စား ဟူသော အမိန့်သံမကြားရမချင်း မလှုပ်မယှက်ထိုင်နေကြရသည်။ စား

ဟူသောအမိန့်သံကြားသည်နှင့် ရဲဘော်များ မိမိရှေ့တွင်ရှိနေသော သံပန်းကန်ကိုဆွဲယူပြီး စားကြပါသည်။ သံပန်းကန်တွင် ထမင်းကိုပြည့်မောက်အောင်ထည့်ထားပါသည်။ ထမင်းမှာ ဆန်ကြမ်းကြမ်း၊ ဆန်ကွဲများများပါသည်။ ချိုးတူးနံ့သင်းနေသည်။ ရေနံဆီနံ့လည်းရသည်။ ထမင်းပေါ်တွင် ခရမ်းသီးနှင့် အမဲသားရောချက်ထားသောဟင်းကို ပုံပေးထားသည်။ ဟင်းရည်များအလျှံပယ်ဆမ်းထားသဖြင့် ထမင်းတစ်ပန်း ကန်လုံး            ခရမ်းရင့်ရင့်အရောင်ဖြင့် ဖုံးလွှမ်းနေသည်။

ပထမဆုံး ကျွေးသောထမင်းဖြစ်၍ အမဲသားတုံးကြီးများ လက်သီးဆုပ်လောက်ကြီးပါသည်။ ထည့်ပေးထားသော ထမင်းမဝသေးလျှင် ကိုယ်တိုင်ထယူနိုင်ပါသည်။

ထမင်းကို ကြိုက်သလောက်ထည့်နိုင်သော်လည်း ဟင်းကို တာဝန်ကျရဲဘော်က ထည့်ပေးသည်။ လိုက်ပွဲဟင်းကို ဟင်းရည်နှင့် အမဲရိုးလောက်တော့ ရနိုင်ပါသည်။ ရဲဘော်သစ်သုံးရာကျော်အတွက် စောစောကကြိုတင် ပြင်ဆင်ထားသော ထမင်းများမှာ နေပူလှန်းပြီးဖြစ်နေသဖြင့်  အပေါ်ပိုင်းမှာ မာခြောက်နေသည်။ သို့သော် ကျွန်တော်တို့ရဲဘော်များ နှစ်ပန်းကန်မောက်မောက်ကို အသာကလေးစားနိုင်ကြသည်။

တောင်ဘက်ထိပ်စားပွဲတွင် တာဝန်မှူးနှင့် အရာရှိအချို့ ရဲဘော်များဘက်သို့ မျက်နှာမူ၍ စားနေကြသည်။ ရဲဘော်အသစ်များကဲ့သို့ပင် သံပန်းကန်တစ်ချပ်စီဖြင့် ရဲဘော်များစားသော ထမင်းဟင်းများကိုပဲ စားကြသည်။ မရှိအတူ၊ ရှိအတူ လက်ရည်တစ်ပြင်တည်းစားကြခြင်းဖြစ်ပေသည်။

နောက်တွင် ထမင်းကိုမစားမီ အလေးပြုရမည်။  ထမင်းစားနေစဉ်စည်းကမ်းရှိရမည်။ စကားမပြောရ။ ပန်းကန်သံ၊ ခွက်သံ၊ ဇွန်းသံ လုံးဝမကြားစေရ။ ထည့်ထားသော ထမင်းကို ကုန်အောင်စားရမည်။ လောဘတကြီးများများထည့်ပြီးမကုန်နိုင်၍ သွန်ပစ်ခြင်းမရှိရ။ စားပွဲပေါ်တွင် ထမင်းလုံးများ ဖိတ်စဉ်ခြင်း မရှိစေရ။ အရိုးအရင်းများကို အမှိုက်ပုံးတွင် စွန့်ပစ်ရမည်။ ထမင်းစားပြီးလျှင် စားပွဲပေါ်တွင် အကြွင်းအကျန်အမှိုက်သရိုက်များ လုံးဝမရှိဘဲသန့်ရှင်းနေရမည်။

တာဝန်မှူးက စားမိန့်မပေးမီ မစားရဟု မိန့်ကြားခဲ့သည်။

တိုင်းပြည်က ကျွေးသောထမင်းကိုစားရမှ ထမင်း၏တန်ဖိုးကို သိလာရပါသည်။

ထမင်းတစ်လုတ်ကို လွယ်လွယ်နှင့်စားရခြင်းမဟုတ်ကြောင်း သိလာသည်။ မိဘကျွေးသောထမင်းကို စားနေရစဉ်က ထမင်း၏တန်ဖိုးကိုမသိခဲ့ပါ။ မိဘကျွေး၍ လူတစ်လုံးသူတစ်လုံးဖြစ်လာရသည်ကို သတိမထားမိခဲ့၊ မိဘကျေးဇူးကိုလည်းမသိခဲ့ပါ။

လေးလေးနက်နက်လည်းမတွေးခေါ်ခဲ့ဖူးပါ။  

ထမင်းသည် အိုးထဲကရသည်ဟု ပေါ့ပေါ့တန်တန် သဘောထားခဲ့ပါသည်။ မိဘတို့သည် ကျေးဇူးတင်ခံလို၍ အကျိုးတစ်ခုကိုမျှော်ကိုး၍ သားသမီးများကိုကျွေးခဲ့ခြင်း မဟုတ်ပါ။ သိတတ်သော သားသမီးများက ထမင်းကျွေးသော မိဘများကို ကျေးဇူးဆပ်ကြရမည်။

ဆက်လက်ဖော်ပြပါမည်။