ခါးနာခြင်းဝေဒနာ
ခါးနာရတဲ့အကြောင်းရင်းထဲမှာ လေ့ကျင့်ခန်းမလုပ်တာ၊ ကိုယ်ဟန်အနေအထားမမှန်တာ၊ အလေးအပင်ပစ္စည်းသယ်မတာနဲ့ နည်းလမ်းမမှန်တာဆိုတဲ့ အချက်တွေကြောင့် ခါးနာတတ်လို့ အဲဒီအချက်တွေကို အမြဲတမ်း သတိထားသင့်ပါတယ်။ ဒီအချက်တွေထဲက နာတာရှည်ခါးနာဝေဒနာမခံစားရအောင် လိုက်နာသင့်ပါတယ်။
လေ့ကျင့်ခန်းပြုလုပ်သင့်ပါတယ်။ လေ့ကျင့်ခန်းလုပ်ရာမှာ နေ့စဉ် နာရီဝက်မှ တစ်နာရီကြာ အပြေး၊ လမ်းလျှောက်၊ ရွရွပြေး၊ စက်ဘီးစီး၊ ရေကူး ပြုလုပ်သင့်ပါတယ်။ လူတို့ရဲ့နေထိုင်မှုပုံစံ ပြောင်းလဲလာတာနဲ့အမျှ အထိုင်အလုပ်တွေများလာပြီး အလုပ်အကိုင် တည်မြဲရေး၊ ပုံမှန်ဝင်ငွေရရှိရေးတို့အတွက် စိတ်ဖိစီးမှုများလာကြပါတယ်။ နေ့စဉ်လေ့ကျင့်ခန်းပြုလုပ်တာက ပိုလျှံနေတဲ့ ကယ်လိုရီ တွေကို ချွေးအဖြစ် စွန့်ထုတ်ပစ်လိုက်တဲ့အတွက် အဆီအဖြစ် မစုဆောင်းနိုင်ဘဲ အဝလွန်ခြင်း၊ ဆီးချိုသွေးချို၊ သွေးတိုးနဲ့ နှလုံးသွေး ကြောရောဂါဖြစ်ခြင်းတို့မှ ကာကွယ်နိုင်ပါတယ်။
ကိုယ်အလေးချိန်လျှော့ချသင့်ပါတယ်။ ကိုယ်အလေးချိန်အချိုးအစားက သာမန် ၁၈ ဒသမ ၉-၂၄ ဒသမ ၉ အတွင်းရှိသင့်ပါတယ်။ ဘီအမ်အိုင်ဆိုတာ အလေးချိန်(ကီလိုဂရမ်)ကို အရပ်အမြင့်မီတာနှစ်ထပ်ကိန်းနဲ့ စားလို့ရတဲ့ရလဒ်ဖြစ်လို့ ကိုယ်အလေးချိန် ထိန်းသင့် ပါတယ်။
ဆေးလိပ်ဖြတ်သင့်ပါတယ်။ ဆေးလိပ်သောက်သုံးသူတွေက အလုပ်ဒဏ်ကြောင့် ခါးနောက်ကျောနာကျင်မှုဝေဒနာကို ပိုမိုခံစား ရတယ်လို့ မြောက်ပိုင်းကာရိုလိုင်းနားမှ သုတေသီတို့က တွေ့ရှိခဲ့ပါတယ်။ ခါးနောက်ကျောနေရာမှာ အောက်ဆီဂျင်ရရှိမှု နည်းတာ ကြောင့်ဒါမှမဟုတ် ဆေးလိပ်ကြောင့် ချောင်းဆိုးတာဖြစ်ပြီး ခါးနောက်ကျောပေါ် ဒဏ်ပိတဲ့အတွက် ဆေးလိပ်ဖြတ်သင့်တယ်။ ဆေးလိပ်ဖြတ်ရင်လည်း အီးစီးကရက်နဲ့မဖြတ်သင့်ဘူး။ အီးစီးကရက်က နီကိုတင်းအခြေခံပြီး လိုချင်တဲ့ရနံ့ထည့်ထားလို့ ဆေးလိပ် သောက်သလိုပဲ ဆိုးကျိုးရရှိစေပါတယ်။ သကြားလုံး၊ ချိုချဉ် စတာတွေကို ငုံပေးခြင်းက ဆေးလိပ်ဖြတ်နိုင်ပါတယ်။
မတ်တတ်ရပ်သင့်ပါတယ်။ ကိုယ်ဟန်အနေအထား မှန်ကန်တာက ကိုယ့်ကိုငယ်ရွယ်နုပျိုစေပြီး ပိန်တယ်လို့ထင်စေရုံသာမက ခန္ဓာကိုယ်တွင်း အင်္ဂါတွေလည်း အလုပ်ကောင်းကောင်းလုပ်နိုင်ပါတယ်။ အရိုး၊ ကြွက်သားနဲ့ အရွတ်တွေကိုလည်း သန်မာစေလို့ ခါးရိုးအတွက် အထောက်အကူပြုစေပါတယ်။
မိမိရဲ့ဝမ်းဗိုက်ကြွက်သားတွေက ခါးနောက်ကျော ရိုးကိုထောက်ပံ့ပေးပါတယ်။ ဒါကြောင့် ဝမ်းဗိုက်ကြွက် သားတွေသန်မာအောင် လေ့ကျင့်ပေးသင့်တယ်။ မတ်တတ်ရပ်ပြီး ဝမ်းဗိုက်ကြွက်သားတွေကို ခန္ဓာကိုယ်တွင်း ဆွဲထားသင့်တယ်။ စိတ်ထဲမှာ တစ်ကနေ ၁၀ အထိ ရေတွက်သင့်ပြီးတော့ ဝမ်းဗိုက်ကြွက်သားတွေကို လျှော့ချတာကို ၄၅ ကြိမ်ပြုလုပ်ပေးခြင်းကနေ ဝမ်းဗိုက်ကြွက်သား ချပ်နိုင်သလို ခါးနောက်ကျောရိုးလည်း သန်မာလာနိုင်ပါတယ်။
ထိုင်နေစဉ်မှာလည်း ကိုယ်ဟန်အနေအထား မှန်ကန်ဖို့လိုတယ်။ ပက်လက်ကုလားထိုင်မှာ ထိုင်တာ ဒါမှမဟုတ် ဆိုဖာပေါ်မှာ ခန္ဓာကိုယ်လျော့ပြီးထိုင်တာ ကလည်း ခါးနောက်ကျောရိုးကို ဒဏ်ပိစေပါတယ်။ ခါးကိုမတ်မတ်ထားပြီး ထိုင်သင့်တယ်။ ခါးနောက် ကျောရိုးက နာကျင်စပြုလာရင် ခြေထောက်တင်တဲ့ ခွေးခြေပုပေါ်မှာ ခြေထောက်တစ်ဖက် ဒါမှမဟုတ် နှစ်ဖက်စလုံး တင်ထား သင့်ပါတယ်။ ထိုင်တဲ့အခါမှာ လည်း ခါးနောက်ကျောမှာ ခေါင်းအုံးသေးတစ်ခုခုထား တာက အထောက်အပံ့ရနိုင်ပါတယ်။
ခါးကိုဂရုစိုက်သင့်ပါတယ်။ ခြံထဲဆင်းပြီး ဥယျာဉ် စိုက်တာ၊ အိမ်ကိုကြမ်းတိုက်တာတွေပြုလုပ်ရင် ခါးကို ဂရုစိုက်သင့်ပါတယ်။ ခါးကုန်းတာနဲ့ ခါးလှည့်တာကို တစ်ပြိုင်နက်တည်း မပြုလုပ်သင့်ပါဘူး။ တတ်နိုင်သမျှ ခါးမတ်မတ်ထားပြီး ခြေထောက်နဲ့လက်ကို ဖြည်းဖြည်း ချင်းလှည့်သင့်ပါတယ်။ ခါးမကုန်းရအောင် လက်ကိုင် ရှည်တဲ့တုတ်ကို အသုံးပြုသင့်တယ်။ အမြင့်ပေါ်က ပစ္စည်းတွေ ယူမယ်ဆိုရင်လည်း ခြေထောက်တစ်ဖက်ကို တခြားခြေထောက်ရှေ့မှာထားပြီး ခြေဖျားထောက်ယူ သင့်တယ်။ ခါးကို ကသိ ကအောက်ဖြစ်အောင် မဆွဲဆန့် သင့်ပါဘူး။ အမြင့်မှာရှိတဲ့ပစ္စည်းမမီရင် ခုံတစ်ခုပေါ်တက်ပြီးယူသင့်ပါတယ်။ ပခုံးထက်မြင့်တဲ့ နေရာမှာ အလေးအပင် ပစ္စည်းသယ်မခြင်းမပြုသင့်ပါ။
အလေးအပင်ပစ္စည်းသယ်မမယ်ဆိုရင် ကြမ်းပြင်ပေါ်ထိုင်ချလိုက်ပြီး ဒါမှမဟုတ် ဆောင့်ကြောင့်ထိုင်ပြီးမှမသင့်ပါတယ်။ ခါးကုန်းပြီး မမသင့်ပါ။ ပစ္စည်း မဖို့ ခါးကိုအသုံးပြုမယ့်အစား ခြေထောက်ကို အသုံးပြု သင့်ပါတယ်။
ခါးရိုးကိုထောက်ထားတဲ့ ခါးပတ်ဝတ်သင့်ပါတယ်။ ကိုယ်က အလုပ် ဒါမှမဟုတ် အိမ်မှာ အလေးအပင်ပစ္စည်းတွေသယ်မမယ်ဆိုရင် ခါးကို ထောက်ပံ့ပေးမယ့် သားရေခါးပတ်အပြားကြီး ဝတ်ထားသင့်ပါတယ်။ စိတ်ဖိစီးမှုလျှော့ချသင့်ပါတယ်။ ခါးနောက်ကျော နာကျင်မှုဖြစ်လာရင် ကိုယ့်ရဲ့စိတ်ဖိစီးမှုကြောင့် ဖြစ်လာနိုင်တယ်ဆိုတာ ယုံကြည်သင့်ပါတယ်။ ဇက်ကြော တက်တာ၊ ပခုံးတောင့်တာ၊ ခါးနောက်ကျောအောက် ပိုင်းနာတာ၊ တင်ပါး၊ လက် ဒါမှမဟုတ် ခြေထောက် နာတာတွေက စိတ်ဖိစီးမှုကြောင့် ဖြစ်တတ်တယ်။ စိတ်ဖိစီးမှုကိုဖြေလျှော့နိုင်ရင် ခါးနာတာသက်သာသွား နိုင်ပါတယ်။
ကျောရိုးအဆစ်ကြားရှိ ချပ်ဝိုင်းကျွံဝင်တဲ့ပြဿနာ ရှိနိုင်ပါတယ်။ ဒီလိုရောဂါရှိတိုင်း ခွဲစိတ်ဖို့မလိုပါဘူး။ ပထမဆုံးအနေနဲ့ ရေများများ သောက်သင့်ပါတယ်။ ခါးရိုးအပါအဝင် ခန္ဓာကိုယ်က အဆစ်အားလုံးအတွက် ရေကကူရှင်လိုလုပ်ဆောင်ပေးနိုင်ပါတယ်။ လေ့ကျင့်ခန်း လုပ်တာကြောင့်လည်း ဝေဒနာသက်သာ နိုင်ပါတယ်။ ခါးရိုးတစ်ခုခုမှာ ဒဏ်ရာရခဲ့ရင် ရေဓာတ်ဆုံးရှုံးသွားပါတယ်။ လေ့ကျင့်ခန်း လုပ်တာကြောင့် နှလုံးကနေ သွေးတွေများများညှစ်ထုတ်ရတဲ့အတွက် ခါးရိုးပြားဆီ သွေးတွေများများရောက်ရှိသွားပါတယ်။ ပြီးရင် ပြန်ပြီးဆက်လက် လှုပ်ရှားသင့်ပါတယ်။ လေ့ကျင့်ခန်းလုပ်တာကြောင့် ခါးရိုးသန်မာပြီး ဆွဲဆန့်လိုက်လို့ ကျွံတဲ့ခါးရိုး နေရာတကျ ပြန်ရှိသွားပြီး ဆေးရုံတောင် သွားစရာမလိုတော့ပါဘူး။
တကယ်လို့ ခွဲစိတ်ကုသမှုခံယူရမယ်ဆိုရင်လည်း အခုနောက်ပိုင်းမှာ ခွဲစိတ်ဒဏ်ရာ တစ်လက်မသေးသေးနဲ့ ခွဲစိတ်လို့ရနေပါပြီ။ ခွဲစိတ် ဒဏ်ရာငယ်ကြောင့် နောက်ဆက်တွဲ ဆိုးကျိုးတွေနည်းသွားနိုင်ပြီး အနာမြန်မြန်ကျက်တာကြောင့် ပုံမှန်အလုပ်တွေကို ရက် အနည်းငယ် အတွင်း ပြန်လုပ်နိုင်ပါတယ်။
ခါးနာသက်သာစေတဲ့ နည်းလမ်းတွေ ရှိပါတယ်။ ခါးတကယ်နာရင်တော့ ပျဉ်ခင်းပေါ်မှာ သင်ဖြူးဖျာတစ်ချပ်ခင်း ဆန့်ဆန့် အနေအထားနဲ့ ပက်လက်လှန်ပြီးနေသင့်ပါတယ်။ ဒန်းလော့မွေ့ရာမသုံးရပါ။အမြဲလဲလျောင်းမနေသင့်ပါဘူး။ ခါးနာတာကာကွယ်ဖို့ အမြဲလဲလျောင်းနေတာမျိုး၊ အိပ်စက်နေတာမျိုး ရှောင်သင့်ပါတယ်။ အမြဲလဲလျောင်းနေသူက လှုပ်လှုပ်ရှားရှားနေသူတွေထက် နေ့စဉ်လုပ်ငန်း တာဝန်ထမ်းဆောင်ရာမှာ ခက်ခဲတတ်တယ်။
လေ့ကျင့်ခန်း နေ့စဉ် နာရီဝက်မှ တစ်နာရီကြာအပြေး၊ လမ်းလျှောက်၊ ရွရွပြေး၊ စက်ဘီးစီး၊ ရေကူးပြုလုပ်သင့်ပါတယ်။ အဓိက လုပ်ငန်းတွေ မလုပ်ခင်မှာ သွေးပူလေ့ကျင့်ခန်း၊ အသက်ရှူလေ့ကျင့်ခန်းတွေ အရင်လုပ်ပြီးမှ စသင့်ပါတယ်။
အနေအထားမှန်သင့်ပါတယ်။ နိစ္စဓူဝလုပ်ငန်းဆောင်တာတွေ လုပ်ဆောင်တဲ့အခါ အနေအထားမမှန်တာကြောင့် ခါးနာဝေဒနာ ခံစားကြရပါတယ်။ မှားယွင်းတဲ့အနေအထားတွေက ကျောရိုးနဲ့အာရုံကြောတွေပေါ်ကို ဖိအားသက်ရောက်မှုဖြစ်စေပြီး ခေါင်းအပေါ် ဒဏ်ရာ သက်ရောက်မှုဖြစ်စေပါတယ်။
ရေခဲ ဒါမှမဟုတ် ရေနွေးတစ်လှည့်စီကပ်ပေးသင့်ပါတယ်။ ခါးနာတဲ့ကျောရိုးတစ်လျှောက် ရေခဲကပ်ပေးတာနဲ့ ရေနွေးအိတ် တစ်လှည့်စီ ကပ်ပေးတာက အာရုံကြောသက်သာပြီး နာကျင်မှုကို ခဏသက်သာစေနိုင်ပါတယ်။ ရေနွေးနဲ့ မိနစ် ၂၀ ရေချိုးသင့် ပါတယ်။ ကိုယ်ဝန်သည်ဆိုရင်လည်း ရေနွေးနဲ့ ရေချိုးသင့်တယ်။
ခါးနာရောဂါမပျောက်ရင် မိသားစုဆရာဝန်နဲ့ပြသသင့်ပါတယ်။ အကိုက်အခဲပျောက်ဆေး၊ လိမ်းဆေးတွေပေးနိုင်တယ်။ အကိုက်အခဲ ပျောက်ဆေးထိုးပေးနိုင်တယ်။ ဆရာဝန်ရဲ့ ညွှန်ကြားမှုအတိုင်း ကုသမှု၊ နေထိုင်မှုပြုလုပ်သင့်ပါတယ်။
ဒေါက်တာလွင်သန့်