လူကုန်ကူးခံရသူများအား ပြန်လည်လက်ခံရေး၊ ပြန်လည်ဝင်ဆံ့ ပေါင်းစည်းရေးနှင့် ပြန်လည်ထူထောင်ရေးဆိုင်ရာ လုပ်ငန်းကော်မတီ၏ လုပ်ငန်းညှိနှိုင်း အစည်းအဝေး (၁/၂၀၂၄)ကျင်းပ
နေပြည်တော် ဇွန် ၂၆
လူကုန်ကူးခံရသူများအား ပြန်လည်လက်ခံရေး၊ ပြန်လည်ဝင်ဆံ့ ပေါင်းစည်းရေးနှင့် ပြန်လည်ထူထောင်ရေးဆိုင်ရာ လုပ်ငန်းကော်မတီ၏ လုပ်ငန်းညှိနှိုင်း အစည်းအဝေး (၁^၂၀၂၄) ကို ယနေ့မွန်းလွဲပိုင်းတွင် ပြန်လည်ထူထောင်ရေး ဦးစီးဌာန အစည်းအဝေးခန်းမ၌ ကျင်းပသည်။
အစည်းအဝေးသို့ လုပ်ငန်းကော်မတီ ဥက္ကဋ္ဌ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ဒုတိယဝန်ကြီး ဦးစိုးကြည်၊ လုပ်ငန်းကော်မတီ အဖွဲ့ဝင်များဖြစ်သည့် သက်ဆိုင်ရာဌာနများ၊ မြန်မာနိုင်ငံ အမျိုးသမီးရေးရာ အဖွဲ့ချုပ်နှင့် မြန်မာနိုင်ငံမိခင်နှင့်ကလေး စောင့်ရှောက်ရေး အသင်းတို့မှ ကိုယ်စားလှယ်များ တက်ရောက်ကြသည်။
အစည်းအဝေးတွင် ဒုတိယဝန်ကြီးက လူကုန်ကူးခံရသူများကို လက်ခံစောင့်ရှောက်ရေး ဂေဟာများ၏ ဝန်ဆောင်မှုများသည် နိုင်ငံတကာ စံနှုန်းများနှင့်အညီ ဖြစ်ရန်လိုအပ် သောကြောင့် ၎င်းစံနှုန်းများကို အခြေခံ၍ မိမိနိုင်ငံနှင့်ကိုက်ညီသည့် ဝန်ဆောင်မှုများဖြစ်ရေး ပြန်လည်သုံးသပ်ရန် လိုအပ်ကြောင်း၊ လူကုန်ကူးခံရသူများကို ပြန်လည်ထူထောင်ရေး ဆောင်ရွက်ရာတွင် ၎င်းတို့လိုအပ်ချက်နှင့်ကိုက်ညီပြီး ရေရှည်တည်တံ့နိုင်သော ထောက်ပံ့မှုများပေးရန် လိုအပ်ကြောင်း၊ ထို့ပြင် ရပ်ရွာအတွင်း အောင်မြင်သော ပြန်လည်ဝင်ဆံ့ပေါင်းစည်းခြင်း ဖြစ်ရန်အတွက် ခွဲခြားဆက်ဆံမှု မရှိစေရေး အားလုံးဝိုင်းဝန်း ဆောင်ရွက်ရန် လိုအပ်ကြောင်း။
အစည်းအဝေးသို့ တက်ရောက်လာသည့် လုပ်ငန်းကော်မတီဝင်များ အနေဖြင့် ပြန်လည်လက်ခံရေး၊ ပြန်လည်ဝင်ဆံ့ ပေါင်းစည်းရေးနှင့် ပြန်လည်ထူထောင်ရေး လုပ်ငန်းများ အပြင် ပြောင်းလဲဖြစ်ပေါ်နေသော လူကုန်ကူးမှု ပုံစံသစ်များနှင့် လမ်းကြောင်းများကို သိရှိပြီး ထိရောက်သည့် တားဆီးကာကွယ်မှုများ ဆောင်ရွက်နိုင်ရန် အကြံပြုဆွေးနွေးပေးစေလိုကြောင်း၊ မိမိတို့လုပ်ငန်းကော်မတီမှ ဆက်လက် အကောင်အထည်ဖော်ရမည့် ၂၀၂၄ ခုနှစ် လုပ်ငန်းစီမံချက်ပါ လုပ်ငန်းများကို ကျန်ရှိသည့် ခြောက်လတာ ကာလအတွင်း ရာနှုန်းပြည့်အောင်မြင်အောင် ပူးပေါင်းဆောင်ရွက်ကြစေလိုကြောင်း ပြောကြားသည်။
ထို့နောက် တက်ရောက်လာသူများက သက်ဆိုင်ရာဌာနအလိုက် ဆောင်ရွက်ချက်၊ အကြံပြုချက်၊ အားသာချက်၊ အားနည်းချက်များကို ဆွေးနွေးကြပြီး အစည်းအဝေး ဆုံးဖြတ်ချက် ၁၄ ချက် ချမှတ်ခဲ့ကြောင်း သိရသည်။