အာဆီယံတက္ကသိုလ်များ အားကစားပြိုင်ပွဲ ပိုက်ကျော်ခြင်းပြိုင်ပွဲ နှစ်ယောက်တွဲ ပြိုင်ပွဲတွင် မြန်မာအသင်း ရွှေတံဆိပ်ဆွတ်ခူး
ရန်ကုန် ဇူလိုင် ၄
အင်ဒိုနီးရှားနိုင်ငံက အိမ်ရှင်အဖြစ် လက်ခံကျင်းပလျက်ရှိသည့် (၂၁) ကြိမ်မြောက် အာဆီယံတက္ကသိုလ်များ အားကစားပြိုင်ပွဲ ပိုက်ကျော်ခြင်းပြိုင်ပွဲ နှစ်ယောက်တွဲပြိုင်ပွဲ ဗိုလ်လုပွဲစဉ်တွင် မြန်မာအသင်းက အိမ်ရှင်အင်ဒိုနီးရှား အသင်းကို အနိုင်ရရှိခဲ့ပြီး ရွှေတံဆိပ်ဆွတ်ခူးနိုင်ခဲ့ကြောင်း သိရသည်။
မြန်မာအသင်းသည် (၂၁)ကြိမ်မြောက် အာဆီယံတက္ကသိုလ်များ အားကစားပြိုင်ပွဲ ပိုက်ကျော်ခြင်းပြိုင်ပွဲ ဆီမီးဖိုင်နယ်အဆင့်တွင် ထိုင်းအသင်းနှင့် ကစားခဲ့ရာ နှစ်ပွဲပြတ်ဖြင့် အနိုင်ရရှိခဲ့ပြီး ဗိုလ်လုပွဲအဆင့်သို့ တက်ရောက်နိုင်ခဲ့ခြင်းဖြစ်သည်။
(၂၁)ကြိမ်မြောက် အာဆီယံတက္ကသိုလ်များ အားကစားပြိုင်ပွဲ ပိုက်ကျော်ခြင်းပြိုင်ပွဲ နှစ်ယောက်တွဲပြိုင်ပွဲ ဗိုလ်လုပွဲစဉ်အဖြစ် မြန်မာအသင်းနှင့် အင်ဒိုနီးရှားအသင်းတို့ ကစားခဲ့ရာ အကြိတ်အနယ်ရှိခဲ့ပြီး ပထမပွဲစဉ်တွင် အင်ဒိုနီးရှားအသင်းက ၁၅ မှတ် ၅ မှတ်ဖြင့် အပြတ်အသတ် အသာစီးရရှိပြီး အနိုင်ရရှိခဲ့သည်။
ထို့နောက် ဒုတိယပွဲစဉ်တွင် မြန်မာအသင်းက အကောင်းဆုံး ဖိအားပေးကစားနိုင်ခဲ့ကာ ၁၅ မှတ် ၁၃ မှတ်ဖြင့် ပြန်လည်အနိုင် ရရှိခဲ့ပြီး နောက်ဆုံး တတိယပွဲစဉ်တွင်လည်း မြန်မာအသင်းက အကောင်းဆုံး ဖိအားပေးကစားနိုင်ခဲ့ကာ ၁၇ မှတ် ၁၆ မှတ်ဖြင့် ထပ်မံအနိုင်ရရှိခဲ့ပြီး ရွှေတံဆိပ် ဆွတ်ခူးနိုင်ခဲ့သည်။
အလားတူ မြန်မာအသင်းသည် (၂၁)ကြိမ်မြောက် အာဆီယံတက္ကသိုလ်များ အားကစားပြိုင်ပွဲ ပိုက်ကျော်ခြင်းပြိုင်ပွဲ လေးယောက်တွဲပြိုင်ပွဲတွင်လည်း ဒုတိယမြောက် ငွေတံဆိပ်ဆွတ်ခူးထားကြောင်း သိရသည်။