နောင်ချိုမြို့ကို TNLA အကြမ်းဖက်သမားများ လာရောက်တိုက်ခိုက်စဉ် တပ်မတော်က အဆိပ်ငွေ့ဗုံးများ အသုံးပြုတိုက်ခိုက်ခဲ့ကြောင်း သတင်းတု၊ သတင်းအမှားများ လုပ်ကြံ ရေးသားဖြန့်ဝေ

နေပြည်တော်၊ ဇူလိုင် ၅

ရှမ်းပြည်နယ်မြောက်ပိုင်း၊ နောင်ချိုမြို့နယ်ကို TNLA အကြမ်းဖက်သမားများမှ ဇူလိုင်လ ၄ ရက်နေ့က လာရောက်တိုက်ခိုက်စဉ် တပ်မတော်မှ အဆိပ်ငွေ့ဗုံး ၃ လုံး အသုံးပြုတိုက်ခိုက်ခဲ့ကြောင်း၊ အဆိုပါတိုက်ခိုက်မှုကြောင့် TNLA အကြမ်းဖက်အဖွဲ့ဝင် ၈ ဦး အဆိပ်ငွေ့သင့်ပြီး ဆေးကုသမှုခံယူရကြောင်း သတင်းတု၊ သတင်းအမှားများကို တရားမဝင်ပြည်ဖျက်မီဒီယာများက လုပ်ကြံရေးသားဖြန့်ဝေနေသည်ကို တွေ့ရှိရသည်။

အဆိုပါ သတင်းနှင့်ပတ်သက်၍ လုံခြုံရေးတာဝန်ရှိသူတစ်ဦး၏‌ ပြောကြားချက် အရ        တပ်မတော်အနေဖြင့် အဆိပ်ငွေ့ဗုံးများ အသုံးပြုတိုက်ခိုက်ခြင်း မရှိခဲ့ကြောင်း သိရှိရပြီး၊ တပ်မတော်၏လေကြောင်းတိုက်ခိုက်မှုနှင့် မြေပြင်မှလက်နက်ကြီးများ၏ ထိရောက်သော ပစ်ကူပေးတိုက်ခိုက်မှုများကြောင့် အကြမ်းဖက်သမားများ ထိခိုက် သေဆုံးမှုများခဲ့သည့် ယခင်တိုက်ပွဲများတွင်လည်း တပ်မတော်မှ အဆိပ်ငွေ့ဗုံးများဖြင့် ဗုံးကြဲတိုက်ခိုက်ခဲ့ကြောင်း တရားမဝင်ပြည်ဖျက်မီဒီယာများက သတင်းတု၊ သတင်း အမှားများ ရေးသားဖြန့်ဝေခဲ့သည်ကို ပြည်သူများအနေဖြင့်လည်း သိရှိပြီးဖြစ်ပါသည်။

ယခုတိုက်ခိုက်မှုတွင်လည်း TNLA အကြမ်းဖက်သမားများ ထိခိုက်သေဆုံးမှု များပြားခဲ့သည့်အတွက် တပ်မတော်မှ အဆိပ်ငွေ့ဗုံးများ အသုံးပြုတိုက်ခိုက်ခဲ့သည်ဟု တရားမဝင်ပြည်ဖျက်မီဒီယာများမှတစ်ဆင့် သတင်းတု၊ သတင်းအမှားများ လုပ်ကြံ ရေးသားပြီး ဝါဒဖြန့်ဝေနေခြင်းသာဖြစ်ကြောင်း သတင်းရရှိသည်။