ပြည်သူ့စစ်အဖွဲ့များနှင့် နေပြည်တော်ကောင်စီဥက္ကဋ္ဌတွေ့ဆုံ၊ ဇေယျာသီရိမြို့နယ်နှင့် ပုဗ္ဗသီရိမြို့နယ်တို့သို့ မျိုးစေ့ချကိရိယာ(Seeder)များ ပေးအပ်
နေပြည်တော် ဇွန် ၁၂
ပြည်ထောင်စုနယ်မြေ နေပြည်တော် လယ်ဝေးခရိုင်အတွင်းရှိ ပြည်သူ့စစ်အဖွဲ့များ၊ ပြည်သူ့လုံခြုံရေးအဖွဲ့များနှင့် တွေ့ဆုံပွဲ အခမ်းအနားကို ယနေ့နံနက် ၉ နာရီတွင် ဒက္ခိဏသီရိမြို့နယ် အထွေထွေအုပ်ချုပ်ရေး ဦးစီးဌာနရုံး အစည်းအဝေးခန်းမ၌ ကျင်းပရာ နေပြည်တော်ကောင်စီဥက္ကဋ္ဌ ဦးသန်းထွန်းဦး၊ နေပြည်တော်ကောင်စီဝင်များ၊ ခရိုင်၊ မြို့နယ် စီမံအုပ်ချုပ်ရေးအဖွဲ့ဝင်များ ပြည်သူ့စစ်အဖွဲ့ဝင်များနှင့် ပြည်သူ့လုံခြုံရေးအဖွဲ့ဝင်များ၊ ရပ်ကွက်၊ ကျေးရွာအုပ်ချုပ်ရးမှူးများ တက်ရောက်ကြသည်။
ဦးစွာ နေပြည်တော်ကောင်စီဥက္ကဋ္ဌက ပြည်သူ့စစ်အဖွဲ့များနှင့် ပြည်သူ့လုံခြုံရေးအဖွဲ့ အနေဖြင့် လုံခြုံရေးဆိုင်ရာ လုပ်ငန်းများကို ဆောင်ရွက်ရာတွင် သက်ဆိုင်ရာအဖွဲ့အစည်းများနှင့် ပူးပေါင်းဆောင်ရွက်ရန် ပြောကြားပြီး လုံခြုံရေးအတွက် လုပ်ဆောင်ရန်လိုအပ်သည့် လုပ်ငန်းစဉ်များကို ရှင်းလင်းပြောကြားသည်။
ထို့နောက် နေပြည်တော်ကောင်စီဥက္ကဋ္ဌနှင့် နေပြည်တော်ကောင်စီဝင် ဗိုလ်မှူးကြီး ရဲမိုးတို့က ပြည်သူ့စစ် အဖွဲ့များနှင့် ပြည်သူ့လုံခြုံရေးအဖွဲ့များထံ စားသောက်ကုန်ပစ္စည်းများ ထောက်ပံ့ပေးအပ်ကြပြီး တက်ရောက် လာကြသူများ၏ တင်ပြချက်များကို နေပြည်တော်ကောင်စီဥက္ကဋ္ဌက ပေါင်းစပ်ညှိနှိုင်း ဆောင်ရွက်ပေးကာ ပြည်သူ့စစ်အဖွဲ့များနှင့် ပြည်သူ့လုံခြုံရေး အဖွဲ့များအား ရင်းရင်းနှီးနှီး နှုတ်ဆက်သည်။
ယင်းနောက် နေပြည်တော်ကောင်စီဥက္ကဋ္ဌနှင့်အဖွဲ့သည် ဒက္ခိဏသီရိမြို့နယ် အထွေထွေအုပ်ချုပ်ရေး ဦးစီးဌာနရုံး၌ ပြည်သူများ စာပေဖတ်ရှု လေ့လာနိုင်ရန်အတွက် စာအုပ်စာစောင်များ ထားရှိမှုကို ကြည့်ရှုအားပေးပြီး ပျဉ်းမနားမြို့နယ် သကြားစက်ကျေးရွာတွင် ကျေးရွာစာကြည့်တိုက် ဆောက်လုပ်မည့်မြေနေရာသို့ သွားရောက်ကြည့်ရှု၍ နေပြည်တော်ကောင်စီဥက္ကဋ္ဌက အဆောက်အဦ ဆောက်လုပ်ရာတွင် သတ်မှတ်အရည်အသွေးပြည့်မီစေရေး၊ ရေရှည်ခိုင်ခံ့စေရေး၊ စံချိန်စံညွှန်းပြည့်မီစေရေးနှင့် လိုအပ်သည်များကို မှာကြားသည်။
ဆက်လက်၍ နေပြည်တော်ကောင်စီဥက္ကဋ္ဌနှင့်အဖွဲ့သည် ဇေယျာသီရိမြို့နယ် အထွေထွေအုပ်ချုပ်ရေး ဦးစီးဌာနရုံး အစည်းအဝေးခန်းမ၌ ကျင်းပသည့် ဇေယျာသီရိမြို့နယ်နှင့် ပုဗ္ဗသီရိမြို့နယ်တို့သို့ မျိုးစေ့ချ ကိရိယာ(Seeder)များ ပေးအပ်ပွဲ အခမ်းအနားသို့ တက်ရာက်ကြသည်။
အခမ်းအနားတွင် နေပြည်တော်ကောင်စီဥက္ကဋ္ဌက မျိုးစေ့ချကိရိယာ (Seeder) ကို အသုံးပြုခြင်းဖြင့်ရရှိနိုင်သည့် အကျိုးကျေးဇူးများကို ရှင်းလင်းပြောကြားသည်။
ထို့နောက် နေပြည်တော်စိုက်ပျိုးရေးဦးစီးဌာန ညွှန်ကြားရေးမှူး ဦးစန်းလွင်က မျိုးစေ့ချကိရိယာ (Seeder) များလိုအပ်မှု၊ ရရှိမှုနှင့် မိုးစပါးစိုက်ပျိုးရာသီတွင် ဆက်လက် ဆောင်ရွက်မည့် အစီအမံများကို လည်းကောင်း၊ နေပြည်တော် စက်မှုလယ်ယာဦးစီးဌာန ညွှန်ကြားရေးမှူး ဦးနိုင်ဦးက Seeder ထုတ်လုပ်ပြီးစီးမှုနှင့် ရာသီချိန်အမီရရှိရေး ဆောင်ရွက်မည့် အစီအမံများကိုလည်းကောင်း ရှင်းလင်း တင်ပြကြသည်။
ယင်းနောက် နေပြည်တော်ကောင်စီဥက္ကဋ္ဌနှင့် နေပြည်တော်ကောင်စီဝင်များက ဒုတိယအကြိမ်အဖြစ် ဇေယျာသီရိမြို့နယ်နှင့် ပုဗ္ဗသီရိမြို့နယ်များမှ တောင်သူများထံ မျိုးစေ့ချကိရိယာများနှင့် နိုင်ငံ့စီးပွားမြှင့်တင်ရေး စီမံကိန်းမှ ဓာတ်မြေသြဇာများ ပေးအပ်ကြပြီး မျိုးစေ့ချကိရိယာများကို လှည့်လည်ကြည့်ရှု အားပေးခဲ့ကြကြောင်း သိရသည်။