စီမံကိန်းလုပ်ငန်းများ ဆောင်ရွက်ရာတွင် ပရဟိတစိတ်မွေးကြရန်နှင့် ခေါင်းဆောင် အင်္ဂါရပ်များနှင့်အညီ ဆောင်ရွက်ကြရန် ပြည်ထောင်စုဝန်ကြီး ဦးလှမိုး တိုက်တွန်း ပြောကြား
နေပြည်တော် ဇူလိုင် ၁၀
အသေးစားကုန်ထုတ် လုပ်ငန်းများ ဖန်တီးပေးနိုင်ရေးနှင့် ကျေးလက်နေ မိသားစုဝင်ငွေ တိုးရေး ဆောင်ရွက်မည့် စီမံကိန်းလုပ်ငန်းများ အတွက် စွမ်းဆောင်ရည်မြှင့်တင်ရေးဆိုင်ရာ သင်တန်းဖွင့်ပွဲ အခမ်းအနားကို ယနေ့နံနက်ပိုင်းတွင် သမဝါယမနှင့်ကျေးလက် ဖွံ့ဖြိုးရေး ဝန်ကြီးဌာန စုပေါင်းအစည်းအဝေး ခန်းမ၌ ကျင်းပသည်။
အခမ်းအနားသို့ သမဝါယမနှင့် ကျေးလက်ဖွံ့ဖြိုးရေး ဝန်ကြီးဌာန ပြည်ထောင်စုဝန်ကြီး ဦးလှမိုး၊ ဒုတိယဝန်ကြီး ဦးမြင့်စိုး၊ အမြဲတမ်းအတွင်းဝန်၊ ညွှန်ကြား ရေးမှူးချုပ်များ၊ ဒုတိယညွှန်ကြားရေးမှူးချုပ်များ၊ သက်ဆိုင်ရာဌာနများမှ တာဝန်ရှိသူများနှင့် သင်တန်းနည်းပြများ၊ တိုင်းဒေသကြီး/ ပြည်နယ်များမှ စီမံကိန်းဆောင်ရွက်မည့် ဝန်ထမ်းများ၊ ကျေးရွာ အဖွဲ့ခေါင်းဆောင်များ တက်ရောက်ကြသည်။
ဦးစွာ ပြည်ထောင်စုဝန်ကြီးက သမဝါယမနှင့် ကျေးလက်ဖွံ့ဖြိုးရေး ဝန်ကြီးဌာနအနေဖြင့် သင်တန်းများ ဖွင့်လှစ်ရာတွင် အမှန်တကယ် လုပ်ငန်း ထူထောင်မည့်သူများကိုသာ စုစည်းပြီး သင်တန်းဖွင့်လှစ် ဆောင်ရွက်ပေးရန်နှင့် သင်တန်းဆင်းများကို လုပ်ငန်းထူထောင်နိုင်သည်အထိ လိုအပ်သော စက်ပစ္စည်းများနှင့် ကုန်ကြမ်းပစ္စည်းများကို ရင်းနှီးပံ့ပိုး ကူညီပေးရမည်ဆိုသည့် မူဝါဒချမှတ်ပေးခဲ့ပါကြောင်း၊ စက်ပစ္စည်းများ သုံးစွဲခွင့်ပေးရာတွင် ၎င်းတို့ အမှန်တကယ်လိုအပ်သော၊ ဝယ်ယူလိုသော စက်ပစ္စည်းများကို ၎င်းတို့၏ဆန္ဒ သဘောထားနှင့်အညီ ဝယ်ယူသုံးစွဲခွင့်ပေးကြရန် အဓိကထား မှာကြားလိုပါကြောင်း။
စီမံကိန်းလုပ်ငန်းများ အောင်မြင်စွာ အကောင်အထည်ဖော် ဆောင်ရွက်နိုင်ရေးအတွက် စီမံကိန်းလုပ်ငန်းများကို ဦးဆောင်ပြီး ဆောင်ရွက်ကြမည့်ဌာနမှ စီမံကိန်းတာဝန်ခံများနှင့် ကျေးရွာ ၂၂၁ ရွာမှ ရွေးချယ်ထားသည့် ကျေးရွာအဖွဲ့ခေါင်းဆောင်များကို ခေါ်ယူပြီး စီမံကိန်းလုပ်ငန်း ဆိုင်ရာစွမ်းဆောင်ရည် မြှင့်တင်ရေးသင်တန်းကို ဖွင့်လှစ်ဆောင်ရွက်ပေးခြင်းဖြစ်ကြောင်း၊ ယခုသင်တန်းကို တက်ရောက်လာကြသည့် စီမံကိန်းဝန်ထမ်းများနှင့် ကျေးရွာအဖွဲ့ ခေါင်းဆောင်များကလည်း သင်တန်းမှ သင်ကြားပေးခဲ့သည်များကို မိမိတို့၏ ကျေးရွာများတွင် ကျန်ရှိခဲ့သည့် ကော်မတီ ဝင်များကို ဆင့်ပွားသင်တန်းများ ပြန်လည်ပို့ချပေးရမည်ဖြစ်ပါကြောင်း၊ စီမံကိန်းလုပ်ငန်း တာဝန်ခံများ အနေဖြင့် စီမံကိန်းလုပ်ငန်းများ ဆောင်ရွက်ရာတွင် အောင်မြင်မှု ရှိ/မရှိ၊ မြေပြင်တွင် ဖြစ်ပေါ်နေသော အခက်အခဲများကို ဖြေရှင်းဆောင်ရွက်ပေးရန်နှင့် စဉ်ဆက်မပြတ်ဖွံ့ဖြိုးတိုးတက်ရေး အတွက် စီမံကိန်းစောင့်ကြည့်လေ့လာခြင်းနှင့် ဆန်းစစ်သုံးသပ်ခြင်း ( M & E) ကို ဆောင်ရွက်သွားကြရန် လိုအပ်ကြောင်း၊ တက်ရောက်လာကြသူများအနေဖြင့် မိမိတို့ကျေးရွာ၏ စီမံကိန်းခေါင်းဆောင်များဖြစ်ကြ၍ ပရဟိတစိတ် မွေးကြရန်၊ ခေါင်းဆောင်အင်္ဂါရပ်များနှင့် အညီ ဦးဆောင်ကြရန်၊ စီမံကိန်းလုပ်ငန်းများ ဆောင်ရွက်ရာတွင် အခက်အခဲများရှိပါက သက်ဆိုင်ရာ အဖွဲ့အစည်းအဆင့်ဆင့် ဖွဲ့စည်းထားပြီးဖြစ်၍ ပူးပေါင်းဖြေရှင်း ဆောင်ရွက်ကြရန်နှင့် မိမိတို့ဝန်ကြီးဌာန အနေဖြင့်လည်း လိုအပ်သည်များကို ညှိနှိုင်းဖြေရှင်း ဆောင်ရွက်ပေးသွားမည်ဖြစ်ကြောင်း ပြောကြားသည်။
ထို့နောက် ပြည်ထောင်စုဝန်ကြီးသည် တိုင်းဒေသကြီး/ပြည်နယ်များမှ စီမံကိန်းဆောင်ရွက်မည့် ဝန်ထမ်းများနှင့် ကျေးရွာအဖွဲ့ ခေါင်းဆောင်များကို ရင်းရင်းနှီးနှီး လိုက်လံနှုတ်ဆက်ပြီး လိုအပ်သည်များ ပေါင်းစပ်ဖြည့်ဆည်း ဆောင်ရွက်ပေးသည်။
ယခုသင်တန်းတွင် ဘဏ္ဍာရေးဆိုင်ရာ စာရင်းရေးဆွဲနည်းနှင့် ထိန်းသိမ်းနည်း ဘာသာရပ်၊ စျေးကွက်ရှာဖွေရေးဆိုင်ရာ ဘာသာရပ်၊ စီမံကိန်းလုပ်ငန်းများနှင့် စပ်လျဉ်း၍ အသိပညာပေးခြင်း၊ အစားအသောက် ဘေးအန္တရာယ်ကင်းရှင်းရေးဆိုင်ရာ အသိပညာပေးခြင်း၊ ကုန်အမှတ်တံဆိပ် မူပိုင်ခွင့်နှင့် ကုန်ထုတ်လုပ်ငန်းများ၏ ဝင်ငွေခွန်ဆိုင်ရာ အသိပညာပေးခြင်း၊ စားသောက်ကုန်၊ လူသုံးကုန်၊ စက်မှု၊ လက်မှု၊ အပ်ချုပ်၊ ရက်ကန်းစသည့် ကုန်ထုတ်လုပ်ငန်း အမျိုးအစားအလိုက် အသိပညာပေးခြင်းတို့ကို စာတွေ့၊ လက်တွေ့သင်ကြား ပို့ချသွားမည်ဖြစ်သည်။
အသေးစားစက်မှုလက်မှု လုပ်ငန်းဦးစီး ဌာနအနေဖြင့် အသေးစား ကုန်ထုတ်လုပ်ငန်းများ ဖန်တီးပေးနိုင်ရေးနှင့် ကျေးလက်နေ မိသားစုဝင်ငွေတိုးရေး စီမံကိန်းလုပ်ငန်းများကို ၂၀၂၃-၂၀၂၄ ဘဏ္ဍာနှစ်မှစတင်၍ ရုံးချုပ်၊ ပြည်ထောင်စုနယ်မြေ အပါအဝင် တိုင်းဒေသကြီး/ပြည်နယ် ၁၅ ခုရှိ ကျေးရွာ ၁၅၁ ရွာတွင်ဆောင်ရွက်ခဲ့ပြီး ကျေးရွာတစ်ရွာလျှင် လုပ်ငန်းထူထောင်လိုသူ ငါးဦးကို ရွေးချယ်ကာ အသေးစားကုန်ထုတ် လုပ်ငန်းရှင် ၇၅၅ ဦးကို လုပ်ငန်းထူထောင်ပေးနိုင်ခဲ့ကြောင်း၊ ယခုဘဏ္ဍာနှစ်တွင်လည်း ကျေးရွာ ၂၂၁ ရွာ၌ ဆောင်ရွက်သွားမည် ဖြစ်ကာ အသေးစားကုန်ထုတ် လုပ်ငန်းရှင် ၁၁၀၅ ဦးကို လုပ်ငန်း ထူထောင်ပေးနိုင်မည် ဖြစ်ကြောင်း သတင်းရရှိသည်။