ဧရာဝတီတိုင်း ဒေသကြီးအတွင်းရှိ ပြည်သူ့ဆေးရုံများ၊ တိုက်နယ်ဆေးရုံများနှင့် ကျေးလက် ကျန်းမာရေးဌာနများသို့ ဒုတိယဝန်ကြီး ပါမောက္ခဒေါက်တာအေးထွန်း ကွင်းဆင်းစစ်ဆေးကာ လိုအပ်ချက်များ ဖြည့်ဆည်းဆောင်ရွက်
နေပြည်တော် ဇူလိုင် ၁၀
ကျန်းမာရေးဝန်ကြီးဌာန ဒုတိယဝန်ကြီး ပါမောက္ခ ဒေါက်တာအေးထွန်းသည် ကုသရေးဦးစီးဌာန ဒုတိယညွှန်ကြားရေးမှူးချုပ်၊ ဧရာဝတီတိုင်းဒေသကြီး ကုသရေး ဦးစီးဌာနမှူးတို့နှင့်အတူ ဇူလိုင်လ ၇ ရက် နံနက်ပိုင်းက ဧရာဝတီတိုင်းဒေသကြီးရှိ ပြည်သူ့ဆေးရုံ-ပန်းတနော်မြို့သို့ ရောက်ရှိပြီး ပြည်သူလူထုအား ကျန်းမာရေးစောင့်ရှောက် ပေးနေမှုများနှင့် ဆေးရုံ အဆောက်အအုံများ၏ အခြေအနေကို ကြည့်ရှုစစ်ဆေးကာ လိုအပ်ချက်များကို ဆွေးနွေးမှာကြားသည်။
ထို့နောက် ဒုတိယဝန်ကြီးသည် ခုတင်-၁၀၀ ဆံ့ ပြည်သူ့ဆေးရုံ-ကျောင်းကုန်းမြို့သို့ ရောက်ရှိပြီး အရေးပေါ်လူနာဌာန၊ ဓာတ်ခွဲခန်း၊ ဓာတ်မှန်ခန်း၊ အတွင်းလူနာဆောင်များ၊ ခွဲစိတ်ခန်း၊ ဆေးသိုလှောင်ခန်း၊ ကာကွယ်ဆေးသိုလှောင်ခန်း တို့ကို ကြည့်ရှုစစ်ဆေးကာ လိုအပ်ချက်များကို ညှိနှိုင်းဖြည့်ဆည်းပေးသည်။
မွန်းလွဲပိုင်းတွင် ပြည်သူ့ဆေးရုံ-အိမ်မဲမြို့ နှစ်ထပ်ကုသဆောင်သစ်နှင့် မြို့နယ်ပြည်သူ့ ကျန်းမာရေးဦးစီး ဌာနမှူးရုံးဖွင့်ပွဲ အခမ်းအနားသို့ ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းနှင ့်အတူ တက်ရောက်၍ အဆောက်အအုံသစ်များကို ဖွင့်လှစ်ပေးပြီး ပြည်သူ့ဆေးရုံ-ဓနုဖြူမြို့သို့ သွားရောက်၍ ဆေးကုသဆောင်များ၊ ခွဲစိတ်ခန်းများ၊ ဝန်ထမ်းအိမ်ရာများကို ကြည့်ရှုစစ်ဆေးသည်။
ထို့ပြင် ဒုတိယဝန်ကြီးသည် ဇူလိုင်လ ၈ ရက်က ဓနုဖြူမြို့နယ် ကျောင်းစုတိုက်နယ်ဆေးရုံ၊ ကျောင်းစုကျေးလက် ကျန်းမာရေးဌာန၊ ငါးဘတ်အိုင်ကျေးလက် ကျန်းမာရေးဌာနခွဲ၊ ဇလွန်ပြည်သူ့ဆေးရုံ၊ ပြည်သူ့ဆေးရုံကြီး-ဟင်္သာတမြို့၊ ဟင်္သာတမြို့နယ် ရှားခဲတိုက်နယ်ဆေးရုံ၊ နိဗ္ဗာန်တိုက်နယ်ဆေးရုံ၊ ဒူးယားတိုက်နယ်ဆေးရုံနှင့် ပျဉ်းမကုန်းကျေးလက် ကျန်းမာရေးဌာနတို့သို့ သွားရောက်ကြည့်ရှုစစ်ဆေးပြီး ကျန်းမာရေးစောင့်ရှောက်မှု လုပ်ငန်းများစွမ်းအားပြည့် ဆောင်ရွက်နိုင်ရေး၊ လူနာဘေးကင်းလုံခြုံမှု အလေးထားဆောင်ရွက်ရေး၊ ဌာနအဆောက်အအုံများ ဥပဓိရုပ် ကောင်းမွန်စေရေး၊ ဆေးနှင့် ဆေးပစ္စည်းများ စနစ်တကျ စီမံခန့်ခွဲအသုံးပြုရေး ကိစ္စရပ်များကို ဆွေးနွေးမှာကြားကာ လိုအပ်ချက်များကို ညှိနှိုင်းဖြည့်ဆည်း ပေးခဲ့ကြောင်း သတင်းရရှိသည်။