ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး AML/CFT ဆိုင်ရာ ကိစ္စရပ်များနှင့် စပ်လျဉ်းသည့် ညှိနှိုင်းအစည်းအဝေးကျင်းပ

ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး AML/CFT ဆိုင်ရာ ကိစ္စရပ်များနှင့် စပ်လျဉ်းသည့် ညှိနှိုင်းအစည်းအဝေးကျင်းပ

နေပြည်တော်  ဇွန်  ၆

AML/CFT ဆိုင်ရာ ကိစ္စရပ်များနှင့်စပ်လျဉ်းသည့် ညှိနှိုင်းအစည်းအဝေးကို ယနေ့ နံနက်ပိုင်းတွင် နေပြည်တော်ရှိ မြန်မာနိုင်ငံတော်ဗဟိုဘဏ်၌ ကျင်းပသည်။

အစည်းအဝေးတွင် မြန်မာနိုင်ငံတော်ဗဟိုဘဏ်ဒုတိယဥက္ကဋ္ဌ ဒေါက်တာလင်းအောင်က   ငွေရေးကြေး ရေးအဖွဲ့အစည်းများရှိ Chief Compliance Officer များသည် ငွေကြေးခဝါချမှု တိုက်ဖျက်ရေး ဥပဒေ ပုဒ်မ ၂၈(ခ)အရ အကြီးတန်းစီမံခန့်ခွဲမှုအဆင့်ရှိသည့် အရာထမ်းများဖြစ်ရန်လိုအပ်ပြီး ငွေကြေး ခဝါချမှု နှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေး (AML/CFT) လုပ်ငန်းများ ဆောင်ရွက်ရန် အတွက် မိမိ၏ Compliance Team ကို ကျွမ်းကျင်သူများဖြင့်  စနစ်တကျ ဖွဲ့စည်းထားရန် လိုအပ်ကြောင်း၊ လက်ရှိကာလတွင် နည်းပညာတိုးတက်မှုကို အလွဲသုံးစားပြုနေသော အွန်လိုင်းမှ တစ်ဆင့် လိမ်လည်မှုများ၊ မူးယစ် ဆေးဝါးနှင့် အဂတိဆိုင်ရာမှုခင်းများ၊ အကြမ်းဖက်မှုနှင့် ငွေကြေး ထောက်ပံ့မှုများကို တားဆီး တိုက်ဖျက်သွားရန်လိုအပ်ကြောင်း၊ ဘဏ်များအနေဖြင့် AML/CFT တာဝန် များကို အချိန်နှင့်တစ်ပြေးညီ ဆောင်ရွက်နိုင်ရန်အတွက် စီစဉ်ပေးထားရန်လိုအပ်ပြီး သတင်းအချက် အလက် လုံခြုံရေးအတွက်လည်း အထူးဂရုပြုရန်လိုအပ်ကြောင်း၊ ထို့ပြင် မိုဘိုင်းငွေရေးကြေးရေး ဝန်ဆောင်မှုပေးသူများအနေဖြင့်လည်း လာရောက်ဆက်သွယ်သူများကို CDD စိစစ်ခြင်းကို တိကျစွာ လိုက်နာဆောင်ရွက်ရန်နှင့် Level 2 အဆင့် သတ်မှတ်ချက်အတိုင်း အချက်အလက်များ ပြည့်စုံစွာ ထိန်းသိမ်းထားရန်လိုအပ်ကြောင်း ပြောကြားသည်။

ထို့နောက် ငွေကြေးဆိုင်ရာ စုံစမ်းထောက်လှမ်းရေး အဖွဲ့တပ်ဖွဲ့မှူးက TTR/STR များ ပေးပို့ ရာတွင် အမှားအယွင်းမရှိစေရေးနှင့် အချိန်နှင့်တစ်ပြေးညီ သေချာစွာစိစစ်ဆောင်ရွက်ရန်နှင့် မိမိအဖွဲ့ အစည်းရှိ Compliance Officer များနှင့် Front Line Officer များကို စနစ်တကျ ကြပ်မတ် ဆောင်ရွက်သွားရန် ကိစ္စရပ်များကိုလည်းကောင်း၊ မြန်မာနိုင်ငံတော်ဗဟိုဘဏ်၊ ဘဏ်လုပ်ငန်း စည်းမျဉ်းနှင့် ကြီးကြပ် စစ်ဆေးရေးဌာနကြီး၊  နိုင်ငံခြားသုံးငွေ စီမံခန့်ခွဲမှုဌာနကြီးနှင့်  ငွေကြေးစျေးကွက်၊ ငွေပေးချေမှုနှင့် စာရင်းရှင်းလင်းမှု ဌာနကြီးတို့မှ  ညွှန်ကြားရေးမှူးချုပ်များ၊ ဒုတိယညွှန်ကြားရေးမှူး ချုပ်များနှင့် ဘဏ်နှင့် မိုဘိုင်းငွေရေးကြေးရေး ဝန်ဆောင်မှုပေးသူများမှ တာဝန်ရှိသူများက သက်ဆိုင်ရာ ကဏ္ဍအလိုက် ဘဏ်များနှင့် မိုဘိုင်းငွေရေးကြေးရေးဝန်ဆောင်မှုပေးသူများ လိုက်နာဆောင်ရွက်ရန် အချက်များကိုလည်းကောင်း ရှင်းလင်းဆွေးနွေးကြပြီး တက်ရောက်လာသည့် ဘဏ်များနှင့် မိုဘိုင်း ငွေရေးကြေးရေးဝန်ဆောင်မှုပေးသူများက ပြန်လည်ဆွေးနွေးကြသည်။

ယင်းနောက် မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌက မြန်မာနိုင်ငံတွင် အစိုးရဌာန ဆိုင်ရာ အသီးသီးနှင့် ဘဏ်များ၊ ငွေရေးကြေးရေးအဖွဲ့အစည်းများ၊ ဘဏ်မဟုတ်သော စီးပွားရေးအဖွဲ့အစည်းနှင့်   လုပ်ငန်းများအားလုံးသည် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှု တိုက်ဖျက်ရေးကို အရှိန်အဟုန်ဖြင့် ပူးပေါင်းဆောင်ရွက်လျက်ရှိရာ တိုးတက်မှုများရရှိနေပြီဖြစ်ကြောင်း၊ အာရှ-ပစိဖိတ် ဒေသ ငွေကြေးခဝါချမှုတိုက်ဖျက်ရေးအဖွဲ့ (Asia/ Pacific Group on Money Laundering - APG) သို့ တစ်နှစ်လျှင်တစ်ကြိမ် တင်ပြလျက်ရှိသည့် စဉ်ဆက်မပြတ်အစီရင်ခံစာ (Follow-up Report) တွင်    အကြံပြုချက်အမှတ် ၂၆ “ငွေရေးကြေးရေး အဖွဲ့အစည်းများအား ကြပ်မတ်ကွပ်ကဲခြင်းနှင့် ကြီးကြပ် စစ်ဆေးခြင်း” သည် တစ်စိတ်တစ်ပိုင်း လိုက်နာဆောင်ရွက်ခြင်း အဆင့်မှ ကြီးမားစွာလိုက်နာ ဆောင်ရွက်ခြင်း အဆင့်သို့ တိုးမြှင့်ပေးခဲ့ကြောင်း စသည့်စံနှုန်း သတ်မှတ်ချက်အဆင့် တိုးမြှင့်ပေးခြင်း များ   ဆောင်ရွက်လျက်ရှိကြောင်း ဆွေးနွေးပြောကြားသည်။

အဆိုပါ အစည်းအဝေးသို့ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ၊ ငွေကြေးဆိုင်ရာ စုံစမ်းထောက် လှမ်းရေး အဖွဲ့ခေါင်းဆောင်နှင့်တာဝန်ရှိသူများ၊ မြန်မာနိုင်ငံတော်ဗဟိုဘဏ်မှအရာရှိကြီးများ၊ နိုင်ငံပိုင် ဘဏ်များ၊ ပုဂ္ဂလိကဘဏ်များနှင့် မိုဘိုင်းငွေရေးကြေးရေး ဝန်ဆောင်မှုပေးသူများ တက်ရောက်ကြ ကြောင်း သတင်းရရှိသည်။

(သတင်းစဉ်)

Dates: 
Wednesday, July 17, 2024 - 10:43