မအူပင်မြို့ရှိ အခြေခံပညာကျောင်းများနှင့် မအူပင်တက္ကသိုလ်သို့သွားရောက်၍ ကျောင်းသား၊ ကျောင်းသူများ အေးချမ်းစွာပညာသင်ကြားနေမှုကို ပြည်ထောင်စုဝန်ကြီး ဒေါက်တာညွန့်ဖေ လှည့်လည် ကြည့်ရှုအားပေး
ရန်ကုန် ဇွန် ၇
ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာညွန့်ဖေသည် ဧရာဝတီတိုင်းဒေသကြီး အစိုးရ အဖွဲ့လူမှုရေးရာဝန်ကြီး ဦးခင်မောင်ကြည်၊ တာဝန်ရှိသူများနှင့်အတူ ယနေ့နံနက်ပိုင်းတွင် မအူပင်မြို့ အမှတ်(၁)အခြေခံပညာ အထက်တန်းကျောင်းနှင့် အမှတ်(၃) အခြေခံပညာ အထက်တန်းကျောင်း များသို့ ရောက်ရှိပြီး ကျောင်းသား၊ ကျောင်းသူများ အေးချမ်းစွာပညာသင်ကြားနေမှုကို လှည့်လည် ကြည့်ရှုပြီး အားပေးစကားပြောကြားသည်။
ထိုသို့ကြည့်ရှုစဉ် ပြည်ထောင်စုဝန်ကြီးက ကျောင်းသား၊ ကျောင်းသူများအနေဖြင့် ပညာသင်ကြားရမည့် အရွယ်တွင် ပညာကိုအမြဲမပြတ် ကြိုးစားသင်ယူကြရန်နှင့် မိမိတို့၏ရည်မှန်းချက်များ အောင်မြင်စေရေး အတွက် စာသင်နှစ်စကတည်းက ပညာကိုကြိုးစားသင်ယူကြစေလိုကြောင်း၊ မိမိတို့သင်ယူနေသည့် ဘာသာရပ်များကို တန်ဖိုးထားပြီး ထူးချွန်စေရန် ကြိုးစားသင်ယူလေ့လာကြစေလိုကြောင်း ပြောကြားပြီး ကျောင်းဝင်းအတွင်းရှိ စာသင်ခန်းများ၊ စာသင်ဆောင်များ ဥပဓိရုပ်ကောင်းမွန်ရေးဆောင်ရွက်ထားရှိမှု၊ ကျောင်းနှင့် ကျောင်းဝန်းကျင် သန့်ရှင်းသာယာရေး ဆောင်ရွက်ထားရှိမှုများကို လှည့်လည်ကြည့်ရှု စစ်ဆေး၍ လိုအပ်သည်များကို ဖြည့်ဆည်းဆောင်ရွက် ပေးသည်။
မွန်းလွဲပိုင်းတွင် ပြည်ထောင်စုဝန်ကြီးနှင့် တာဝန်ရှိသူများသည် မအူပင်တက္ကသိုလ်သို့ ရောက်ရှိပြီး မိုးလုံလေလုံအားကစားခန်းမ၌ ပါမောက္ခချုပ်၊ ဒုတိယပါမောက္ခချုပ်များ၊ ပါမောက္ခများ၊ တွဲဖက်ပါမောက္ခ များ၊ ဆရာ၊ ဆရာမများ၊ အရာထမ်းများ၊ အမှုထမ်းများနှင့် တွေ့ဆုံသည်။
တွေ့ဆုံစဉ် ပြည်ထောင်စုဝန်ကြီးက ဆရာ၊ ဆရာမများအနေဖြင့် ကျောင်းသား၊ ကျောင်းသူများအား စေတနာ အပြည့်အဝဖြင့် အမှန်တကယ် ကျွမ်းကျင်တတ်မြောက်သူများဖြစ်အောင် သင်ကြားပို့ချပေး ကြစေလိုပါကြောင်း၊ ကျောင်းသား၊ ကျောင်းသူများကို သင်ကြားရာတွင် မိမိတို့၏ ဘာသာရပ်ဆိုင်ရာ ကျွမ်းကျင်မှုများသာမက ဆက်စပ်ဘာသာရပ်များကိုပါ ကျွမ်းကျင်မှုရှိစေရန်အတွက် စာကြည့်တိုက်များ ကို အသုံးပြု၍ စာအုပ်စာပေများကို အမြဲမပြတ် ဖတ်ရှုလေ့လာနေကြရန်လိုအပ်ပါကြောင်း၊ ဆရာ၊ ဆရာမများသည် စဉ်ဆက်မပြတ်လေ့လာနေမှသာလျှင် ကိုယ်ရည်ကိုယ်သွေးမြင့်မားလာပြီး မိမိတို့၏ တပည့်များကို မိမိတို့ထက် ပိုမိုထူးချွန်ကာ အရည်အချင်းရှိသောကျောင်းသား၊ ကျောင်းသူများကို မွေးထုတ်ပေးနိုင်မည်ဖြစ်ပါကြောင်း ပြောကြားပြီး ဌာနအလိုက် ဆရာ၊ ဆရာမများ၏ တင်ပြချက်များနှင့် စပ်လျဉ်း၍ လိုအပ်သည်များကို ဖြည့်ဆည်းဆောင်ရွက်ပေးသည်။
ဆက်လက်၍ ပြည်ထောင်စုဝန်ကြီးသည် ညောင်တုန်းခရိုင် ဆားမလောက်ကျေးရွာ အခြေခံပညာ အထက်တန်းကျောင်းသို့ ရောက်ရှိပြီး ကျောင်းသား၊ ကျောင်းသူများ အေးချမ်းစွာ တက်ရောက် ပညာ သင်ကြားနေမှုများကို လှည့်လည်ကြည့်ရှုပြီး အားပေးစကားပြောကြားသည်။
ညနေပိုင်းတွင် ပြည်ထောင်စုဝန်ကြီးသည် ရန်ကုန်တိုင်းဒေသကြီးရှိ ရန်ကုန် အနောက်ပိုင်း တက္ကသိုလ် သို့ ရောက်ရှိကာ တက္ကသိုလ်၏ ဥပဓိရုပ်ကောင်းမွန်ရေး၊ တက္ကသိုလ်ပရိဝုဏ်အတွင်း စိမ်းလန်း စိုပြည်ရေးနှင့် သန့်ရှင်းသာယာရေး ဆောင်ရွက်ထားမှုများကို ကြည့်ရှုစစ်ဆေးပြီး ပါမောက္ခချုပ်၊ ဒုတိယ ပါမောက္ခချုပ်များ၊ ပါမောက္ခများ၊ တွဲဖက်ပါမောက္ခများနှင့်တွေ့ဆုံ၍ လိုအပ်သည်များ မှာကြားဖြည့် ဆည်း ဆောင်ရွက်ပေးခဲ့ကြောင်း သိရသည်။
(သတင်းစဉ်)