အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်းများတွင် Grade-10, Grade-11သင်ကြားမည့် ဆရာ၊ ဆရာမများအတွက် စိုက်ပျိုးရေးနှင့်မွေးမြူရေး အထူးပြုပညာရပ်ဆိုင်ရာ ကျွမ်းကျင်မှု စွမ်းရည်မြှင့်တင်ရေး သင်တန်းဖွင့်လှစ်
နေပြည်တော် ဧပြီ ၃၀
အခြေခံပညာနှင့် စက်မှု၊ စိုက်ပျိုး၊ မွေးမြူရေး အထက်တန်းကျောင်းများတွင် Grade-10, Grade-11 သင်ကြားမည့် ဆရာ၊ ဆရာမများအတွက် စိုက်ပျိုးရေးနှင့်မွေးမြူရေး အထူးပြုပညာရပ်ဆိုင်ရာ ကျွမ်းကျင်မှု စွမ်းရည်မြှင့်တင်ရေးသင်တန်း ဖွင့်ပွဲအခမ်းအနားကို ယမန်နေ့နံနက်ပိုင်းက နေပြည်တော် ရေဆင်းစိုက်ပျိုးရေး တက္ကသိုလ်၌ ကျင်းပရာ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီး၊ ဒေါက်တာတင်ထွဋ်နှင့် ဦးဗိုလ်ဗိုလ်ကျော်၊ ညွှန်ကြားရေးမှူးချုပ်များ၊ ပါမောက္ခချုပ်များ၊ ပါမောက္ခဌာနမှူးများ၊ သင်တန်းပို့ချမည့် ဆရာ၊ ဆရာမများ၊ တိုင်းဒေသကြီး/ပြည်နယ် အသီးသီးမှ သင်တန်းတက်ရောက်လာကြသော သင်တန်းကြီးကြပ်များနှင့် သင်တန်းသား၊ သင်တန်းသူ ဆရာ၊ ဆရာမများ တက်ရောက်ကြသည်။
ဦးစွာ ဒုတိယဝန်ကြီး ဒေါက်တာတင်ထွဋ်က နိုင်ငံ၏စိုက်ပျိုး၊ မွေးမြူရေးကဏ္ဍဖွံ့ဖြိုးတိုးတက်ရေးအတွက် အခြေခံပညာအဆင့်မှ စတင်ကာ စိုက်ပျိုးရေးအခြေခံ အသက်မွေးဝမ်းကျောင်းပညာရပ်သင်ယူမှုလမ်းကြောင်း ကို ရွေးချယ်လျှောက်လှမ်းလာကြသော တက်ကြွသည့် ကျောင်းသားအရွယ်လူငယ်များ၏ ဝါသနာကို ထပ်လောင်းအရောင်သွေး ပေးကြမည့် ဆရာ၊ ဆရာမများ၏ အခန်းကဏ္ဍသည် အလွန်အရေးကြီးပါကြောင်း။
အဆင့်မီ အရည်အချင်းပြည့်ဝသည့် လူ့စွမ်းအားအရင်းအမြစ်များ မွေးထုတ်ပေးရန်အတွက် အရေးပါသည့် သင်ကြားရေးတာဝန် ထမ်းဆောင်ကြမည့် ဆရာ၊ ဆရာမများအတွက် ယခုကဲ့သို့ စွမ်းရည်မြှင့်သင်တန်းများ ဖွင့်လှစ်ပို့ချခြင်းဖြစ်၍ ကြိုးစားလေ့လာ သွားကြစေလိုကြောင်း၊ လစဉ်အစီရင်ခံစာ ရေးသားပေးပို့ခြင်း နည်းလမ်းများ၊ မေးခွန်းပြုစုနည်း၊ စာမေးပွဲဆိုင်ရာ လုပ်ထုံးလုပ်နည်းများအပြင် ယခုနှစ်မှစတင်၍ သိပ္ပံနှင့်နည်း ပညာဝန်ကြီးဌာနနှင့် ပူးပေါင်းပြီး နည်းပညာ၊ သက်မွေးပညာနှင့် လေ့ကျင့်ရေးဦးစီးဌာန ဆရာအတတ်သင် ကောလိပ်မှ ဆရာ၊ ဆရာမများကိုပါဖိတ်ခေါ်၍ သင်ကြားနည်းစနစ် (Teaching Methodology) များနှင့် ပတ်သက်သည့် အကြောင်းအရာများကိုပါ သင်တန်းပို့ချပေးသွားမည်ဖြစ်ပါကြောင်း ပြောကြားသည်။
ဆက်လက်၍ ဒုတိယဝန်ကြီး ဒေါက်တာအောင်ကြီးက နိုင်ငံတော်၏ အခြေခံစီးပွားရေးကဏ္ဍဖြစ်သော စိုက်ပျိုး၊ မွေးမြူထုတ်လုပ်ရေးအတွက် လိုအပ်လျက်ရှိသည့် စိုက်ပျိုး၊ မွေးမြူရေးအတတ်ပညာများ၊ ကျွမ်းကျင်သူ လူသားအရင်းအမြစ်များ၊ လေ့ကျင့်သင်ကြား မွေးထုတ်ပေးကြမည့် သင်ကြားရေး ဆရာ၊ ဆရာမများအနေဖြင့် သင်ရိုးမာတိကာပါ အကြောင်းအရာများသာမက လက်တွေ့သင်ကြားရေးနှင့် ပြင်ပလုပ်ငန်းခွင်ကျွမ်းကျင်မှု အတွက်ပါ စာတွေ့နှင့်လက်တွေ့ ချိတ်ဆက် လေ့ကျင့်ပေးရန်လိုကြောင်း၊ ကျောင်းသား ကျောင်းသူများ၏ ဘဝတက်လမ်းအတွက် အရေးပါသည့် ရှေ့ဆက်ရမည့်ပညာရေး လမ်းကြောင်းအခွင့်အလမ်းများကို တိကျစွာ အရည်အသွေးစစ်ဆေး အကဲဖြတ်ပေးနိုင်ရေးအတွက် လုပ်ထုံးလုပ်နည်းများကို ယခုသင်တန်း၌ သေချာစွာလေ့လာမှတ်သားသွားကြရန်လိုကြောင်း၊ ပြင်ပလုပ်ငန်းခွင် ဝင်ရောက်လုပ်ကိုင်ကြမည့်် ကျောင်းသား၊ ကျောင်းသူများ၏ လက်တွေ့ကျွမ်းကျင်မှု အရည်အသွေးပြည့်ဝနေမှသာ အသက်မွေး ဝမ်းကျောင်းအတွက် သာမက နိုင်ငံတော်၏ စိုက်ပျိုးမွေးမြူထုတ်လုပ်ရေးကဏ္ဍ ဖွံ့ဖြိုးတိုးတက်ရေးအတွက် အထောက်အကူပြု နိုင်မည်ဖြစ်ကြောင်း၊ နယ်ပယ်ပေါင်းစုံမှ ပါဝင်လာကြသည့် စိုက်ပျိုးရေး၊ မွေးမြူရေး သင်ကြားရေးဆရာ၊ ဆရာမများအနေဖြင့် မိမိတပည့် ကျောင်းသား၊ ကျောင်းသူများနှင့် သာမက လုပ်ဖော်ကိုင်ဖက်ဝန်ထမ်းများနှင့်ပါ အထက်အောက်ဆက်ဆံရေးကောင်းမွန်စွာ မိမိတို့ လုပ်ငန်းခွင်အောင်မြင်စေရေး ကြိုးပမ်းသွားကြရန် တိုက်တွန်းပါကြောင်း ပြောကြားသည်။
အဆိုပါသင်တန်းသို့ တိုင်းဒေသကြီး/ပြည်နယ်အသီးသီးမှ သင်တန်းသား၊ သင်တန်း သူ စုစုပေါင်း ၃၂၃ ဦး တက်ရောက်ကြပြီးဧပြီလ ၂၉ ရက်မှ မေလ ၂၁ ရက်အထိ သင်ကြားပို့ချသွားမည်ဖြစ်ကြောင်း၊ အခြေခံပညာ ကျောင်းသား၊ ကျောင်းသူများအနေဖြင့် အလယ်တန်းအဆင့် ွမေိန-၉ ပြီးမြောက် အောင်မြင်ပါက စက်မှု၊ စိုက်ပျိုး၊ မွေးမြူရေးနှင့် လုပ်ငန်းခွင်ဝင်ပညာရပ်များကို သင်ယူ လေ့ကျင့်ခွင့်ရရှိနိုင်ရေးအတွက် ၂၀၂၃-၂၀၂၄ ပညာသင်နှစ်တွင် အခြေခံပညာနှင့်စက်မှု၊ စိုက်ပျိုး၊ မွေးမြူရေးအထက်တန်းကျောင်း ၅၁ ကျောင်း ဖွင့်လှစ်ပေးခဲ့ရာ စိုက်ပျိုးရေး အထူးပြုဘာသာရပ် Grade-10 အောင်မြင်သူ ၁၀၂၂ ဦး မွေးထုတ်ပေးနိုင်ခဲ့ကြောင်း၊ ၂၀၂၄-၂၀၂၅ ပညာသင်နှစ်တွင် အခြေခံပညာအထက်တန်းကျောင်း ၃၄ ကျောင်း၌ Grade-10 စိုက်ပျိုးရေးအထူးပြုဘာသာရပ်သင်ကြားရေး တိုးချဲ့ဖွင့်လှစ်သွားမည်ဖြစ်၍ တစ်နိုင်ငံလုံး၌ Grade-10 စိုက်ပျိုးရေး အထူးပြုဘာသာရပ်သင်ကြားသည့် ကျောင်းပေါင်း ၈၅ ကျောင်းဖွင့်လှစ်နိုင်ခြင်းဖြစ်ကြောင်း၊ ယခင် ၅၁ ကျောင်းတွင် စိုက်ပျိုးရေး အထူးပြု Grade-11 ထပ်မံဖွင့်လှစ်သင်ကြားပေးနိုင်ရေးအတွက် ယခုသင်တန်းကို ဆောင်ရွက်ခြင်း ဖြစ်ကြောင်း သိရသည်။