သက်ကြီးရွယ်အိုများ နေ့ပိုင်းစောင့်ရှောက်ရေး ဂေဟာနှင့်  ICT Training Center များအား ပြည်ထောင်စုဝန်ကြီး ဒေါက်တာစိုးဝင်း ကြည့်ရှုစစ်ဆေးပြီး ဝန်ထမ်းများနှင့် တွေ့ဆုံ

 

သက်ကြီးရွယ်အိုများ နေ့ပိုင်းစောင့်ရှောက်ရေး ဂေဟာနှင့်  ICT Training Center များအား ပြည်ထောင်စုဝန်ကြီး ဒေါက်တာစိုးဝင်း ကြည့်ရှုစစ်ဆေးပြီး ဝန်ထမ်းများနှင့် တွေ့ဆုံ

 

နေပြည်တော်  မတ်  ၁

    လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ပြည်ထောင်စု ဝန်ကြီး ဒေါက်တာစိုးဝင်းသည် ညွှန်ကြားရေးမှူးချုပ်များ၊ တာဝန်ရှိသူများနှင့်အတူ ရန်ကုန်တိုင်းဒေသကြီး လူမှုဝန်ထမ်းဦးစီးဌာန လက်အောက်ရှိ သက်ကြီးရွယ်အိုများ နေ့ပိုင်းစောင့်ရှောက်ရေး ဂေဟာသို့ သွားရောက်ပြီး   ဂေဟာတွင် လူမှုရေးအရ အထီးကျန်နေသော၊ နာတာရှည်ဝေဒနာ ခံစားနေမှုမရှိသော  အသက် ၇၀ နှစ်နှင့် အထက်ဘိုးဘွားများအား နေ့ပိုင်းစောင့်ရှောက် ထားရှိမှုများကို ကြည့်ရှုစစ်ဆေးသည်။

ဦးစွာ ဂေဟာတာဝန်ခံက ဘိုးဘွားများအား တစ်ဦးချင်းစီနှင့် အုပ်စုအလိုက် နှစ်သိမ့်ဆွေးနွေးမှုများ ပြုလုပ်ပေးခြင်း၊ ကျန်းမာရေး စစ်ဆေးပေးခြင်း၊ ကိုယ်လက်လေ့ကျင့်ခန်းများ ပြုလုပ်စေခြင်း၊  ဘိုးဘွားများအား မိမိတို့ ဝါသနာပါရာ လုပ်ငန်းများ ဆောင်ရွက်စေခြင်း၊ ဘုရားဖူးနှင့် လေ့လာရေးခရီးများ စီစဉ်ဆောင်ရွက်ပေးခြင်း၊ မူလတန်းကြိုကျောင်းများမှ ကလေးများ၊  လူငယ်များ၊ အခြားဘိုးဘွားရိပ်သာများမှ ဘိုးဘွားများနှင့် တွေ့ဆုံပေးခြင်း စသည့် လုပ်ငန်းများ ဆောင်ရွက်ပေးနေမှု အခြေအနေများကို ရှင်းလင်းတင်ပြသည်။

ထို့နောက် ပြည်ထောင်စုဝန်ကြီးနှင့်အဖွဲ့သည် ဘုရားခန်း၊ အဘိုး၊ အဘွားအိပ်ဆောင်၊ စာကြည့်တိုက်၊ ပန်းချီခန်း၊ ကာရာအိုကေခန်း၊ ဆေးကုသခန်း၊ ဆံသခန်း၊ မီးဖိုဆောင်နှင့် ထမင်းစားဆောင်၊  သက်ကြီးရွယ်အိုများအတွက် ပြုစုစောင့်ရှောက်သူ (Care Giver) သင်တန်း ဖွင့်လှစ်သော သင်တန်းဆောင်များ ကြည့်ရှုပြီး ဘိုးဘွားများအား ရင်းရင်းနှီးနှီးတွေ့ဆုံ၍ အားပေးစကား ပြောကြားကြသည်။

ယင်းနောက် ပြည်ထောင်စုဝန်ကြီးနှင့် အဖွဲ့သည် ရန်ကုန်တိုင်း ဒေသကြီး  လူမှုဝန်ထမ်း ဦးစီးမှူးရုံး အစည်းအဝေးခန်းမ၌ ဦးစီးဌာနသုံးခုမှ ဝန်ထမ်းများနှင့် တွေ့ဆုံပြီး ပြည်ထောင်စုဝန်ကြီးက    နိုင်ငံတော်၏ ရှေ့လုပ်ငန်းစဉ်၊   ဦးတည်ချက်များနှင့်ပတ်သက်၍ ရှင်းလင်းပြောကြားကာ ဝန်ထမ်းများအနေဖြင့် မိမိတို့၏ လုပ်ငန်းတာဝန်များကို ဝန်ထမ်း စည်းမျဉ်းစည်းကမ်းများနှင့် အညီ စေတနာထား၍ ဆောင်ရွက်ရန် ပြောကြားသည်။

ဆက်လက်၍ ပြည်ထောင်စုဝန်ကြီးနှင့် အဖွဲ့သည် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန လက်အောက်ရှိ ဦးစီးဌာနသုံးခုမှ အရာထမ်း၊ အမှုထမ်းများနှင့် အတူ    နေ့လယ်စာကို အတူတကွ သုံးဆောင်ကြပြီး ရန်ကုန်တိုင်းဒေသကြီး လူမှုဝန်ထမ်း ဦးစီးမှူးက ရန်ကုန်တိုင်းဒေသကြီး အတွင်း    လူမှုဝန်ထမ်း လုပ်ငန်းရပ်များ ဆောင်ရွက်နေမှုကို ရှင်းလင်းတင်ပြရာ ပြည်ထောင်စုဝန်ကြီးက လိုအပ်ချက်များကို မှာကြားသည်။

ထို့နောက် ပြည်ထောင်စုဝန်ကြီးနှင့်အဖွဲ့သည် လူမှုဝန်ထမ်း ဦးစီးဌာနနှင့်  Nippon Foundation တို့ ပူးပေါင်းဆောင်ရွက်လျက် ရှိသော မသန်စွမ်းသူများအတွက်  ICT နည်းပညာဆိုင်ရာ အသက်မွေးဝမ်းကျောင်း သင်တန်းများ ပို့ချပေးလျက်ရှိသော သတင်းအချက်အလက် ဆက်သွယ်ရေး နည်းပညာသင်ကြား လေ့ကျင့်ရေးစင်တာ(Information Communication Technology (ICT) Training Center)သို့ရောက်ရှိပြီး စင်တာ၏ လုပ်ငန်းဆောင်ရွက်နေမှုများကို ကြည့်ရှုကာ    ပြည်ထောင်စုဝန်ကြီးက ရှေ့ဆောင်ရွက်ရမည့် လုပ်ငန်းများကို မှာကြား ခဲ့ကြောင်း သိရသည်။