နိုင်ငံ့ဝန်ထမ်းတက္ကသိုလ်(အောက်မြန်မာပြည်)တွင်  သင်တန်းသားများ၊ ဝန်ထမ်းများနှင့် မိသားစုဝင်များအား တေးသံရှင်များက စုပေါင်းဖျော်ဖြေ၊ တစ်ခဲနက်ကြည့်ရှု အားပေး

 

နိုင်ငံ့ဝန်ထမ်းတက္ကသိုလ်(အောက်မြန်မာပြည်)တွင်  သင်တန်းသားများ၊ ဝန်ထမ်းများနှင့် မိသားစုဝင်များအား တေးသံရှင်များက စုပေါင်းဖျော်ဖြေ၊ တစ်ခဲနက်ကြည့်ရှု အားပေး

 

ရန်ကုန်  မတ်  ၂

    ရန်ကုန်တိုင်းဒေသကြီး လှည်းကူးမြို့နယ် နိုင်ငံ့ဝန်ထမ်းတက္ကသိုလ်(အောက်မြန်မာ ပြည်)တွင် သင်တန်း တက်ရောက်နေကြသည့် သင်တန်းသူ၊ သင်တန်းသားများ၊ ဝန်ထမ်းများနှင့် မိသားစုဝင်များအား ပြန်ကြားရေးဝန်ကြီးဌာန မြန်မာ့အသံနှင့် ရုပ်မြင်သံကြားမှ မြန်မာ့ အသံတေးဂီတအဖွဲ့နှင့် အတူ တေးသံရှင်များ၊ မြဝတီရုပ်မြင်သံကြားမှ တေးသံရှင်များ၊ သာသနာရေးနှင့် ယဉ်ကျေးမှုဝန်ကြီးဌာန ရန်ကုန်ယဉ်ကျေးမှုတက္ကသိုလ်မှ ကျောင်းသား၊ ကျောင်းသူများနှင့် ရုပ်သေးပညာရှင်တို့က ယနေ့ညနေပိုင်းတွင်  ရတနာသင်္ဃခန်းမ၌ ဖျော်ဖြေရေး အစီအစဉ်များဖြင့် မြိုင်မြိုင် ဆိုင်ဆိုင်သီဆိုဖျော်ဖြေကြရာ တစ်ခဲနက် ကြည့်ရှုအားပေးကြသည်။

အဆိုပါဖျော်ဖြေပွဲတွင် ရန်ကုန်ယဉ်ကျေး မှုတက္ကသိုလ် အကအဖွဲ့မှ ပွဲဦးကဟန် ရွှေပန်းပန်၊ လှပဝေဆာအကပဒေသာ၊ ရုပ်သေး နှင့် လူ၊ ကကြိုးတူ၊ အင်းဝခေတ်ယိမ်းအက၊ သစ္စာတူပြိုင်ချစ်မဏ္ဍိုင် နှစ်ပါးသွား၊ ရုပ်သေးဇော်ပြိုင်အက၊ ကကြိုးစုံစွာပတ်မဆစ်တစ်ရာ၊ တိုင်းရင်းသား ယိမ်းအကတို့ဖြင့် အဖွင့်တေး သီချင်းများ၊ အကပဒေသာ၊ နှစ်ပါးသွားနှင့် ယိမ်းအကစုံလင်စွာ  သီဆိုကပြဖျော်ဖြေကြသည်။ တစ်ဆက်တည်းမှာပင် ဖောင်ကြီး နိုင်ငံ့ဝန်ထမ်းတက္ကသိုလ်မှ သင်တန်းသား၊ သင်တန်းသူများကလည်း  ကာရာအိုကေ သီချင်းများ သီဆိုယှဉ်ပြိုင်ကြပြီး  မြဝတီ ရုပ်မြင်သံကြားမှ တေးသံရှင်များက ပဲ့ကိုင်ရှင်၊  ညီလေး၊ ကိုယ့်အတွက် အိပ်မက်မင်းမက်လား၊ မန်းတောင်ရိပ်ခို(မြနန္ဒာ)သီချင်းတို့ဖြင့် မြူးကြွဝေဆာသော သီချင်းများဖြင့်  သီဆိုဖျော်ဖြေကြရာ ကြည့်ရှုအားပေးသူတို့၏ လက်ခုပ်သံများ ခန်းမအတွင်း   လွင့်ပျံ့ခဲ့သည်။

ဆက်လက်၍ မြန်မာ့အသံနှင့်ရုပ်မြင်သံကြားမှ တေးသံရှင်များက မြန်မာ့အသံတေး ဂီတအဖွဲ့နှင့် တွဲဖက်၍ “သီချင်းများပေါင်းစပ် တစ်ခန်းရပ်” တေးသရုပ်ဖော် အစီအစဉ်ဖြင့် စုပေါင်းသီဆို ဖျော်ဖြေကြပြီး နမ်းမှာလား၊ ပေါက်နေပြီ၊ ကော်ဖီခါးခါး၊ ကိုယ်ရံတော်၊ မာယာ၊ စပါကလင်အချစ်၊ ယုံပါ၊ ကိုကိုချစ်၊ ပေါင်ချိန်စက်၊ ဂျင်းပင်ပြာ၊ ကိုကြီး ကိုကြီး၊ ညမွှေးပန်း၊ လတ်တီး စသည့်နာမည်ကြီး ခေတ်ပေါ်တေးသီချင်းများဖြင့် မြူးကြွစွာ သီဆိုဖျော်ဖြေကြရာ နိုင်ငံ့ဝန်ထမ်းတက္ကသိုလ် မိသားစုဝင်များ၊ ဝန်ထမ်းများနှင့် သင်တန်းသား၊  သင်တန်းသူများ  အထူးနှစ်ခြိုက် အားပေးကြကာ  စိတ်လက်ပေါ့ပါးစွာ တစ်ခဲနက်ကြည့်ရှု အားပေးကြသည်။

ယင်းနောက် နိုင်ငံ့ဝန်ထမ်းတက္ကသိုလ် (အောက်မြန်မာပြည်)၏ ပါမောက္ခချုပ် ဦးဇော် ဇော်က မြန်မာ့အသံနှင့် ရုပ်မြင်သံကြားမှ ဖျော်ဖြေရေးအဖွဲ့များ၊  သာသနာရေးနှင့် ယဉ်ကျေးမှုဝန်ကြီးဌာန ရန်ကုန်ယဉ်ကျေးမှု တက္ကသိုလ်မှ ကျောင်းသား၊ ကျောင်းသူများ၊ မြဝတီရုပ်မြင်သံကြားမှ တေးသံရှင်များနှင့် မြန်မာနိုင်ငံ ဟာသပညာရှင်များ အစည်းအရုံး(ဗဟို)မှ နာယကနှင့် ဒုဥက္ကဋ္ဌတို့အား ဂုဏ်ပြု ဆုငွေများ ပေးအပ်ချီးမြှင့်ပြီး ကာရာအိုကေ သီချင်းဆိုပြိုင်ပွဲတွင်   ပထမ၊   ဒုတိယ၊ တတိယဆုများ ရရှိခဲ့ကြသည့် သင်တန်းသား၊ သင်တန်းသူများကို ပါမောက္ခချုပ်က ဆုများ ပေးအပ်ချီးမြှင့်သည်။ အဆိုပါဖျော်ဖြေရေး အစီအစဉ်တွင် မြန်မာနိုင်ငံ ဟာသပညာရှင်များ အစည်းအရုံး(ဗဟို)မှ ဦးငြိမ်းချမ်းနှင့် ဦးအုန်းသီးတို့က အစီအစဉ် တင်ဆက်သူများ အဖြစ် အားဖြည့်ပါဝင်ခဲ့ကြသည်။