လွိုင်ကော်မြို့ ဘီလူးချောင်းရေမြင့်တက်မှုကြောင့် ရေဘေးအန္တရာယ် စီမံခန့်ခွဲမှု လုပ်ငန်းများ ကြိုတင်ပြင်ဆင် ဆောင်ရွက်နိုင်ရေးနှင့် ရေဝင်ရောက်သည့် နေရာများသို့ ကွင်းဆင်းကြည့်ရှု

လွိုင်ကော်မြို့ ဘီလူးချောင်းရေမြင့်တက်မှုကြောင့် ရေဘေးအန္တရာယ် စီမံခန့်ခွဲမှု လုပ်ငန်းများ ကြိုတင်ပြင်ဆင် ဆောင်ရွက်နိုင်ရေးနှင့် ရေဝင်ရောက်သည့် နေရာများသို့ ကွင်းဆင်းကြည့်ရှု

လွိုင်ကော်  ဇူလိုင် ၂၈

ကယားပြည်နယ် သဘာဝဘေးအန္တရာယ် စီမံခန့်ခွဲမှုအဖွဲ့ဥက္ကဋ္ဌ ပြည်နယ်ဝန်ကြီးချုပ် ဦးဇော်မျိုးတင်နှင့် ပြည်နယ်အစိုးရအဖွဲ့ဝင်များသည် ဌာနဆိုင်ရာများ လိုက်ပါ၍ ယနေ့ နံနက်ပိုင်းတွင် ကယားပြည်နယ်အစိုးရအဖွဲ့ ရုံးဝင်းအတွင်း ဖွင့်လှစ်ထားသော ကယားပြည်နယ်  သဘာဝဘေးအန္တရာယ်ဆိုင်ရာ စီမံခန့်ခွဲမှုအဖွဲ့ရုံး၌ လွိုင်ကော်မြို့အတွင်း ဘီလူးချောင်းရေမြင့်တက်မှုကြောင့် ရေဘေးအန္တရာယ် ကျရောက်လာပါက  စီမံခန့်ခွဲမှုဆိုင်ရာလုပ်ငန်းများ   ကြိုတင်ပြင်ဆင် ဆောင်ရွက်နိုင်ရေးအတွက် ကော်မတီဝင်များ၊ ဌာနဆိုင်ရာအသီးသီးမှ တာဝန်ရှိသူများနှင့် တွေ့ဆုံခဲ့သည်။

ယင်းနောက်   ပြည်နယ်ဝန်ကြီးချုပ်နှင့် တာဝန်ရှိသူများသည် နှစ်ထပ်စျေးတံတား၊ ရှမ်းပိုင်းတံတား၊  ဒေါနိုးကူးတံတားတို့သို့ သွားရောက်၍ ဘီလူးချောင်းရေမြင့်တက်မှု အခြေအနေအား   ကြည့်ရှုစစ်ဆေးခဲ့ပြီး ၂၄ နာရီ   ရေကင်းစောင့်ကြည့်နိုင်ရေး၊ စိုးရိမ်ရေမှတ် ကျော်လွန်နိုင်သည့် အခြေအနေရှိပါက အမိန့်စောင့်ဆိုင်းရန်မလိုဘဲ အချိန်နှင့်တစ်ပြေးညီ ပြည်သူများသို့ ကြေညာချက် ထုတ်ပြန်အသိပေးရန်နှင့် ကူညီကယ်ဆယ်ရေးလုပ်ငန်းများ လျင်မြန်စွာ တုံ့ပြန်ဆောင်ရွက်သွားရန် မှာကြားခဲ့သည်။

ဆက်လက်၍ ပြည်နယ်ဝန်ကြီးချုပ်နှင့် တာဝန်ရှိသူများသည်  နမ့်ကွတ်ရပ်ကွက် ရေစီးကွေ့သို့ သွားရောက်၍ ဘီလူးချောင်း ရေမြင့်တက်လာပါက ရေနစ်မြုပ်မှုမရှိရန် ကာရံထားသည့် မြေထိန်းနံရံများကြံ့ခိုင်မှုရှိ၊မရှိ ကြည့်ရှုစစ်ဆေးခြင်းနှင့်     ပြည်နယ် မီးသတ်တပ်ဖွဲ့မှ   Life  Bouy ရေပြင်ကယ်ဆယ်ရေး ကိရိယာအသုံးပြု၍ သရုပ်ပြဆောင်ရွက်မှုအား    ကြည့်ရှုစစ်ဆေးခဲ့ပြီး လွိုင်ကော်မြို့အနိမ့်ပိုင်း နမ့်ကွတ်ရပ်ကွက်ရှိ နေအိမ်အချို့၌ ဘီလူးချောင်းရေ ဝင်ရောက်မှု အခြေအနေများကို  သွားရောက်ကြည့်ရှုခဲ့ကြကာ ပြည်သူများအား ရင်းရင်းနှီးနှီး တွေ့ဆုံ အားပေးစကား ပြောကြားခဲ့သည်။

ထို့နောက်    သီရိမင်္ဂလာ(ယာယီစျေး)သို့ သွားရောက်၍    ပြည်သူများ ပျော်ရွှင်အေးချမ်းစွာ ရောင်းဝယ်ဖောက်ကားနေမှုများကို ကြည့်ရှုအားပေးခဲ့ပြီး စျေးအင်္ဂါရပ်နှင့်အညီဖြစ်စေရေး၊ စျေးသန့်ရှင်း သပ်ရပ်မှုရှိစေရေးနှင့် ယာဉ်ရပ်နားစခန်းများ စနစ်တကျရှိစေရေး မှာကြားခဲ့သည်။ ဆက်လက်၍ သီရိမင်္ဂလာစျေးအသစ် တည်ဆောက်ရေး လုပ်ငန်းခွင်သို့ သွားရောက်ကြည့်ရှု စစ်ဆေးခဲ့ပြီး လုပ်ငန်းခွင်အန္တရာယ် ကင်းရှင်းမှုရှိစေရေး၊  အရည်အသွေးပြည့်မီစွာ သတ်မှတ်ကာလအမီပြီးစီးနိုင်ရေး    မှာကြားကာ အကြမ်းဖက်သောင်းကျန်းသူများကြောင့် ပျက်စီးခဲ့သော ပြည်နယ် စည်ပင်သာယာရေးအဖွဲ့ပိုင်   မော်တော်ယာဉ်သိုလှောင်ရုံသို့ သွားရောက်စစ်ဆေးကြည့်ရှုခဲ့ပြီး မော်တော်ယာဉ်သိုလှောင်ရုံအတွင်း  သန့်ရှင်း သပ်ရပ်မှုရှိစေရေး၊ ဆယ်တင်ပစ္စည်းများနှင့် ပျက်စီးဆုံးရှုံးမှုများအား လုပ်ထုံးလုပ်နည်းနှင့်အညီ ဆောင်ရွက်ရန် မှာကြားခဲ့သည်။

ယင်းနောက် ပြည်နယ်ဝန်ကြီးချုပ်နှင့် တာဝန်ရှိသူများသည်    နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်းသို့ သွားရောက်၍   ကျောင်းဝင်းအတွင်းရှိ စာသင်ဆောင်များ၊ ကျောင်းသား၊ကျောင်းသူအိပ်ဆောင်များ၊ စားရိပ်သာ ၊စာကြည့်တိုက်များ၊    ကျောင်းပြန်လည်ဖွင့်လှစ်နိုင်ရေး   ပြင်ဆင်ထားရှိမှုများကို လှည့်လည်ကြည့်ရှု စစ်ဆေးခဲ့ကြောင်း သိရသည်။