အမေရိကန်က ယူကရိန်းနိုင်ငံသို့ တိုက်လေယာဉ်များတွင် တပ်ဆင်အသုံးပြုသည့် ဒုံးကျည်များ ထောက်ပံ့ပေးမည်ဟုဆို
အမေရိကန်နိုင်ငံသည် ယူကရိန်းနိုင်ငံသို့ တိုက်လေယာဉ်များတွင် တပ်ဆင်အသုံးပြု သည့်ဒုံးကျည်များကို ထောက်ပံ့ပေးမည်ဖြစ်ကြောင်း အမည်မဖော်လိုသူ အမေရိကန် အရာရှိတစ်ဦး၏ ပြောကြားချက်ကို ကိုးကား၍ Wall Street ဂျာနယ်ကဖော်ပြသည်။
ယူကရိန်းသို့ပေးအပ်မည့် ဒုံးကျည်များတွင် F-16 တိုက်လေယာဉ်များ၌ တပ်ဆင်အသုံးပြုသည့် HARM? AMRAAM ၊ Sidewinder ဒုံးကျည်များနှင့် ပဲ့ထိန်းစနစ်များ ပါဝင်ကြောင်း ဂျာနယ်တွင် ဖော်ပြထားသည်။ အဆိုပါဒုံးကျည်အားလုံးကို လက်ရှိတွင် အမေရိကန်လက်နက်ကိုင် တပ်ဖွဲ့များ၌ အသုံးပြုလျက်ရှိသည်။
တစ်ချိန်တည်းမှာပင် ယူကရိန်းအစိုးရသည် လက်နက်ကိုင်ပဋိပက္ခအတွင်း ၎င်းတို့ ၏စစ်လေယာဉ်များမှာ တိုက်ခိုက် ဖျက်ဆီးခံရခြင်းကြောင့် F-16 တိုက်လေယာဉ်များအား လွှဲပြောင်းပေးအပ်ကြရန် NATO အဖွဲ့ဝင်နိုင်ငံများအား လပေါင်းများစွာကြာ တောင်းဆိုထားသည်။ ဒိန်းမတ်နှင့် နယ်သာလန်နိုင်ငံတို့သည် ပထမအသုတ် F-16 တိုက်လေယာဉ်များအား ယူကရိန်းသို့ မကြာမီကာလအတွင်း ပေးပို့ရန် စီစဉ်ထားသည်။ ထို့ပြင် ဘယ်လ်ဂျီယံနှင့် နော်ဝေနိုင်ငံတို့ကလည်း ယခုနှစ်ကုန်တွင် ယူကရိန်းသို့ F-16 တိုက်လေယာဉ်များ ပေးပို့မည်ဟု ကတိပြုထားကြောင်း သိရသည်။
HARM ဒုံးကျည်သည် ဝေဟင်မှ မြေပြင်ပစ် ဒုံးကျည်အမျိုးအစားဖြစ်ပြီး များသောအားဖြင့် ၎င်းဒုံးကျည်အား ရန်သူ၏ ရေဒါစနစ်များအား တိုက်ခိုက်ရာတွင် အသုံးပြုလေ့ရှိကြောင်း သိရသည်။