ပညာမြင့်မှ နိုင်ငံ့ဂုဏ်တင့်မည်
အယ်ဒီတာ့အာဘော်
(၂၀၂၄ ခုနှစ်၊ သြဂုတ် ၃ ရက်)
၂၀၂၄-၂၀၂၅ ပညာသင်နှစ်တွင် အခြေခံကျောင်းများ ပြန်လည်ဖွင့်လှစ်ချိန်၌ ၇၀ ရာခိုင်နှုန်းခန့် ပြန်လည်ဖွင့်လှစ်နိုင်ခဲ့ပြီး ကျောင်းသား၊ ကျောင်းသူ ၉၂ ရာခိုင်နှုန်း ကျောင်းတက်ရောက်လျက်ရှိသည်။ နိုင်ငံတော် အစိုးရအနေဖြင့် ကျောင်းနေအရွယ် ကလေးတိုင်း ကျောင်းအပ်နှံရေး၊ အခမဲ့ပညာ သင်ကြားနိုင်ရေးကို အလေးထားဆောင်ရွက်ပေးလျက် ရှိသည်။ ဖွင့်လှစ်ထားသည့် ကျောင်းများ ဆက်လက်ဖွင့်လှစ် သင်ကြားနိုင်ရေးနှင့် စာသင်ကျောင်းများ တိုးချဲ့ဖွင့်လှစ်နိုင်ရေးကို အလေးထား ဆောင်ရွက်လျက်ရှိသည်။ သဘာဝဘေး အန္တရာယ်ကြောင့် ယာယီပိတ်ထားရသည့် ကျောင်းများ ပြန်လည် ဖွင့်လှစ်ချိန်တွင်လည်း အချိန်ပိုများ သင်ပေးပြီး ကလေးငယ်များအမှန်တကယ် စာတတ်မြောက်ရေး သင်ကြားပေးရမည်ဖြစ်သည်။
ကျောင်းသား၊ ကျောင်းသူများ ပညာပြည့်ဝ နှလုံးလှစေရန် ဆရာ၊ ဆရာမများကို လိုအပ်သည့်သင်တန်းများ တက်ရောက်ပြီးမှသာ ခန့်ထားခြင်းဖြစ်သည့်အတွက် ဆရာ၊ ဆရာမများဘက်က ကြိုးစားသင်ပေးနေသလို တပည့်များကလည်း ပညာတတ်မှ မိမိတို့ဘဝတိုးတက်မည် ဟူသောအသိဖြင့် ကြိုးစားသင်ယူကြရမည်ဖြစ်သည်။ “ယခုငယ်က၊ ကြိုးလုံ့လ၍၊ သုတပညာ၊ နေ့တိုင်းရှာလော့၊ ပညာမကြိုက်၊ ပျင်းရိမိုက်မူ၊ နောက်လိုက်ဝန်ထမ်း၊ အလုပ်ကြမ်းတွင်၊ တွေ့လေကျင်သည်” ဟူ၍ လောကနီတိပျို့တွင် ဆိုထားသည့်အတိုင်း ပညာသင်ချိန်တွင် ပညာကိုကောင်းစွာ မသင်ယူပါက အလုပ်ကြမ်း လုပ်ကိုင်ရမည်သာဖြစ်သည့်အတွက် ပညာကို အထူးလုံ့လဝီရိယ စိုက်ထုတ်ကြိုးစားကြရန်ဖြစ်သည်။
ဒေသအလိုက် တာဝန်ထမ်းဆောင်နေကြသည့် သင်ကြားရေးဆိုင်ရာ ဝန်ထမ်းများ၏ အခြေခံလိုအပ်ချက်များကိုလည်း သက်ဆိုင်ရာ တာဝန်ရှိသူများက တတ်နိုင်သမျှဖြည့်ဆည်း ဆောင်ရွက်ပေးလျက်ရှိသည်။ နိုင်ငံတော်အစိုးရ အနေဖြင့်လည်း ပညာရေးဝန်ထမ်းများအား ရသင့်ရထိုက်သည့် အခွင့်အရေးများကို ဖော်ဆောင်ပေးလျက်ရှိသည်။ ထို့ပြင် သင်ကြားရေးဆိုင်ရာ အဆောက်အအုံများကိုလည်း လိုအပ်ချက်နှင့်အညီ ဖြည့်ဆည်းဆောင်ရွက် ပေးလျက်ရှိသည်။ နိုင်ငံတိုင်းတွင်”ပညာရေးသည် အနာဂတ်နိုင်ငံတော် အတွက် ရင်းနှီးမြှုပ်နှံမှုဖြစ်သည်”ဟူသော အဆိုကိုလက်ခံထားကြသည်။ “ပညာမြင့်မှနိုင်ငံတင့်မည်” ဖြစ်၍ ဆရာ၊ ဆရာမများ အနေဖြင့် တပည့်ကောင်းများ ပေါ်ထွန်းရေးကို ကြိုးစားကြရမည်ဖြစ်သည်။
နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် ဇူလိုင်လ ၂၉ ရက်က ကျင်းပသည့် ပြည်ထောင်စုအစိုးရအဖွဲ့ အစည်းအဝေး အမှတ်စဉ်(၆/၂၀၂၄) တွင် အမှာစကားပြောကြားစဉ် “မိမိတို့နိုင်ငံသား အများစုသည် ဝင်ငွေအလယ်အလတ်တန်း ရှိသူများနှင့် ဝင်ငွေ နည်းကြသူများ ဖြစ်ကြကြောင်း၊ အစိုးရကျောင်းများ၌ ပညာသင်ကြားနေကြသူ အများအပြားရှိကြကြောင်း၊ ထို့ကြောင့် မိမိတို့အနေဖြင့် အခမဲ့ပညာရေးစနစ်ကို အကောင်အထည် ဖော်ဆောင်ပေးခြင်းဖြစ်ကြောင်း၊ သင်ကြားရေး တာဝန်ယူထားရသူများအနေဖြင့် အတန်းအောင်ရန် အဓိကမဟုတ်ဘဲ ပညာတတ်အောင် သင်ကြားပေးရန် လိုကြောင်း၊ ဆရာ၊ ဆရာမများကို ခန့်အပ်တာဝန်ပေးအပ်ရာတွင် လိုအပ်သည့် သင်တန်းများကို ပြီးမြောက်ပြီးမှသာ တာဝန်ပေးအပ်ခြင်း ဖြစ်ကြောင်း” ထည့်သွင်းပြောကြားခဲ့သည်။
နိုင်ငံတော်စီမံအုပ်ချုပ်ရေး ကောင်စီအနေဖြင့် တစ်နိုင်ငံလုံး အသိပညာ၊ အတတ်ပညာမြင့်မား တိုးတက်စေရေး၊ ကုန်ထုတ်လုပ်မှု အထောက်အကူပြုပညာရှင်များ ထွန်းကားလာစေရေးအတွက် လူတိုင်းလက်လှမ်းမီသည့် ဘက်စုံပညာရေးစနစ်ကို အကောင်အထည်ဖော် ဆောင်ရွက်လျက်ရှိသည်။ ထို့ပြင် နိုင်ငံ၏ဖွံ့ဖြိုး တိုးတက်ရေး လုပ်ငန်းစဉ်များ၌ လူငယ်များအနေဖြင့် အဓိကစွမ်းအားစုအဖြစ် ပါဝင်နိုင်ရေး ဗလငါးတန်နှင့် ပြည့်စုံသော လူငယ်များဖြစ်စေရန် လူငယ်ကဏ္ဍကိုမြှင့်တင် ဆောင်ရွက်ပေးလျက်ရှိသည်။ ဤသည်မှာ လူငယ်များ၏ ပညာရေးနှင့်ဘဝ တိုးတက်မြင့်မားရေးအတွက် အလေးထား ဆောင်ရွက်ခြင်းဖြစ်သည်။
မြန်မာနိုင်ငံပညာရေးတိုးတက် ကောင်းမွန်စေရေးအတွက် မြန်မာနိုင်ငံလုံးဆိုင်ရာ ပညာရေးညီလာခံများကို ကျင်းပပေးလျက်ရှိရာ ၂၀၂၃ ခုနှစ် မြန်မာနိုင်ငံလုံးဆိုင်ရာ ပညာရေးညီလာခံတွင် “အနာဂတ်ပညာရေး ပိုမိုတိုးတက်ကောင်းမွန်ရေး” ဦးတည်ချက် ချမှတ်ကျင်းပခဲ့ပြီး ယခု ၂၀၂၄ ခုနှစ် မြန်မာနိုင်ငံလုံးဆိုင်ရာ ပညာရေးညီလာခံတွင် “လူ့စွမ်းအားအရင်းအမြစ် ဖွံ့ဖြိုးတိုးတက်ရေး ပညာရေးကို ပိုမိုမြှင့်တင်ပေး” ဦးတည်ချက်များဖြင့် ကျင်းပပေးခဲ့ပြီးဖြစ်သည်။ တိုင်းချစ်ပြည်ချစ်စိတ်ရှိသည့် လူငယ်များ ပေါ်ထွန်းလာစေရန်၊ အရည်အသွေး ပြည့်ဝသည့်ပညာတတ်များ မွေးထုတ်ပေးရန်၊ ထုတ်လုပ်မှုကိုအားပေးသည့် သက်မွေးပညာများ ဖွံ့ဖြိုးတိုးတက်လာစေရန်၊ ဆရာ၊ ဆရာမများ၏ အရည်အသွေးကို စဉ်ဆက်မပြတ်မြှင့်တင်နိုင်ရန်၊ သုတေသနနှင့်တီထွင်ဆန်းသစ်မှုဖွံ့ဖြိုး တိုးတက်စေရန်၊ အရည်အသွေး အာမခံမှုရှိသည့် ပညာရေးစနစ် ပိုမိုအားကောင်းလာစေရန် ရည်ရွယ်ချက်(၆)ရပ်ဖြင့် မြန်မာနိုင်ငံလုံးဆိုင်ရာ ပညာရေးညီလာခံ(၂၀၂၄ ခုနှစ်)ကို ကျင်းပပေးခဲ့ပြီးဖြစ်သည်။
ရည်မှန်းလျာထားချက်များကို အောင်မြင်တိုးတက်မှု ရှိစေရေးအတွက် လက်တွေ့ဆောင်ရွက်ရာတွင် နိုင်ငံတော်အစိုးရသာမက ပြည်သူများ၊ ဆရာ၊ ဆရာမများ၊ ကျောင်းသား၊ ကျောင်းသူများကပါ ပညာ၏ တန်ဖိုး၊ အကျိုးကျေးဇူးကိုနားလည်ခံစားပြီး ၀ိုင်းဝန်းကြိုးပမ်းကြမှသာ အောင်မြင်တိုးတက်မှုများ ရရှိမည်ဖြစ်သည်။ အနှစ်ချုပ်ဆိုရသော် ပညာမြင့်မှ နိုင်ငံ့ဂုဏ်တင့်မည်ဖြစ်ပေရာ သက်ဆိုင်သူ အားလုံးက နိုင်ငံချစ်စိတ်ဖြင့် ကြိုးပမ်းဆောင်ရွက်ကြရန် ဖြစ်ပါကြောင်း ရေးသားလိုက်ရပေသည်။ ။