အစ္စရေးကို ကာကွယ်ရေးအတွက် အမေရိကန်က စစ်အင်အား အများအပြားဖြန့်ကြက်

အစ္စရေးကို ကာကွယ်ရေးအတွက် အမေရိကန်က စစ်အင်အား အများအပြားဖြန့်ကြက်

    အစ္စရေးနှင့်အီရန်တို့ကြား   လက်ရှိဖြစ်ပွားနေသော တင်းမာမှုများမြင့်တက်နေစဉ်တွင် အမေရိကန်က အစ္စရေးကို ကာကွယ်နိုင်ရေးအတွက် စစ်အင်အား အများအပြားကိုဖြန့်ကြက်ရန် အမေရိကန်ကာကွယ်ရေး ဝန်ကြီးဌာနက  သြဂုတ်လ ၂ ရက်တွင် ညွှန်ကြားလိုက်သည်။

အဆိုပါညွှန်ကြားချက်တွင် နောက်ထပ် ဖျက်သင်္ဘောများ၊ စစ်သင်္ဘောကြီးများနှင့် နောက်ထပ်တိုက်ခိုက်ရေး လေယာဉ်အုပ်တစ်အုပ်ကို အရှေ့အလယ်ပိုင်းသို့ ဖြန့်ကြက်ရန်ပါဝင်သည်။

ထို့ပြင်  USS Abraham Lincoln  လေယာဉ်တင်သင်္ဘော အနေဖြင့် လက်ရှိ အရှေ့အလယ်ပိုင်းတွင် တာဝန်ထမ်းဆောင်နေသော USS Theodore Rooseveltလေယာဉ်တင်သင်္ဘောကို ကူညီပေးနိုင်ရေး အတွက် ထွက်ခွာရန် ကာကွယ်ရေးဝန်ကြီးဌာနက ညွှန်ကြားထားသည်။

တစ်ချိန်တည်းမှာပင် မြေပြင်အခြေစိုက် အမြင့်ပျံဒုံးကျည်ကာကွယ်ရေး စနစ်ကိုလည်း ဖြန့်ကြက်သွားရန် စီစဉ်နေကြောင်း ဝန်ကြီးဌာန၏ ထုတ်ပြန်ချက်တွင်   ဖော်ပြထားသည်။

အီရန်နိုင်ငံ၌ ဟားမက်နိုင်ငံရေး ဗျူရိုခေါင်းဆောင် အစ္စမေးဟားနီယေး လုပ်ကြံသတ်ဖြတ်ခံရစဉ် ထိုလုပ်ကြံမှုကို အစ္စရေးက လုပ်ဆောင်ခြင်းဖြစ်သည်ဟု   အီရန်၊ ဟားမက်နှင့် ဟစ်ဇဘိုလာတို့က စွပ်စွဲထားသည်။

ထို့ပြင် အီရန်နိုင်ငံက ၎င်းတို့၏မြေပေါ်၌  ထိုကဲ့သို့ လုပ်ဆောင်သည့်အစ္စရေးကို လက်တုံ့ပြန်တိုက်ခိုက် သွားမည်ဟုကြေညာထားစဉ် အမေရိကန်နိုင်ငံက အစ္စရေးကိုကာကွယ်ရေးအတွက် ယခုကဲ့သို့ အစီအမံများ ဆောင်ရွက်လာခြင်းဖြစ်သည်။