အကြမ်းဖက်အဖျက်သမားတို့ ချုပ်ငြိမ်းရေး

အကြမ်းဖက်အဖျက်သမားတို့ ချုပ်ငြိမ်းရေး 

အယ်ဒီတာ့အာဘော်                 

(၂၀၂၄ ခုနှစ်၊ သြဂုတ် ၅ ရက်)  

      မြန်မာ့တပ်မတော်သည် မြန်မာနိုင်ငံရှိ တိုင်းရင်းသား လူမျိုးစုများဖြင့် ဖွဲ့စည်းထားသော ပြည်ထောင်စု တပ်မတော်ဖြစ်သည်။ တပ်မတော်ပေါ်ပေါက်လာခဲ့သည့် အကြောင်းရင်းမှာလည်း မြန်မာနိုင်ငံ လွတ်လပ်ရေး ရရှိရေးအတွက် အဓိကဦးတည်ချက်ဖြင့် ဖွဲ့စည်းပေါ်ပေါက်လာခြင်းဖြစ်သည်။ တပ်မတော်သည် စတင်ဖွဲ့စည်းဖြစ်တည်လာသည်မှ ယနေ့တိုင်  ပြည်ထောင်စုမပြိုကွဲရေး၊  တိုင်းရင်းသားစည်းလုံး ညီညွတ်မှု မပြိုကွဲရေးနှင့် အချုပ်အခြာအာဏာ တည်တံ့ခိုင်မြဲရေးဟူသော ဒို့တာဝန်အရေး သုံးပါးကို ထိန်းသိမ်းကာကွယ်စောင့်ရှောက်လျက် ရှိသည်။ တပ်မတော်သားတိုင်းသည် ဒို့တာဝန်အရေး သုံးပါးကို အစဉ်ဦးထိပ်ထားလျက် ရှိသည်။

မြန်မာနိုင်ငံတွင် တိုင်းရင်းသားမျိုးနွယ်စုပေါင်း တစ်ရာကျော် နှစ်ပေါင်းများစွာကတည်းက အေးအတူပူအမျှ အတူတကွ နေထိုင်လာခဲ့ကြသည်မှာ ယနေ့တိုင်ဖြစ်သည်။ ထိုသို့စည်းလုံးညီညွတ်စွာ နေထိုင်လာခဲ့သည့် နိုင်ငံကို ကိုလိုနီလက်အောက်ခံအဖြစ် ကျရောက်ချိန်တွင် နယ်ချဲ့တို့က တိုင်းရင်းသား အချင်းချင်း စည်းလုံးညီညွတ်မှုပြိုကွဲအောင် လုပ်ဆောင်ခဲ့သည်။ သွေးခွဲအုပ်ချုပ်ခြင်း၊ တစ်ပြေးညီမဟုတ်သော ဥပဒေများပြဋ္ဌာန်းခြင်းဖြင့် တိုင်းရင်းသားစည်းလုံး ညီညွတ်မှု လျော့နည်းခဲ့သည်။ ထိုမှတစ်ဆင့် လက်နက်ကိုင်ပဋိပက္ခများ ရှိနေမှုကြောင့် မြန်မာနိုင်ငံသည် ဖွံ့ဖြိုးတိုးတက်မှု နှေးကွေးခဲ့ရသည်။

မြန်မာနိုင်ငံအတွင်း မှီတင်းနေထိုင်ကြသူ တိုင်းရင်းသားပြည်သူ အပေါင်းတို့သည် တရားမျှတခြင်း၊ လွတ်လပ်ခြင်းနှင့် ညီမျှခြင်းတည်းဟူသော လောကပါလတရားများ ထွန်းကားစေလျက် ငြိမ်းချမ်းသာယာဝပြောသော လူနေမှုဘဝကို လိုလားကြသည်။ အဆိုပါလူနေမှုဘဝသည် ထာဝရခိုင်မြဲနေသည့် လူနေမှုဘဝမျိုး ဖြစ်စေချင်သည်။ ထို့အတူ လူမျိုးရေးတန်းတူမှုဖြင့် စစ်မှန်သော မျိုးချစ်စိတ်ဓာတ်ဖြစ်သည့် ပြည်ထောင်စုစိတ်ဓာတ်ကို ခိုင်မြဲစွာမွေးမြူလျက် ထာဝစဉ်စည်းလုံးညီညွတ်စွာ အတူတကွလက်တွဲ နေထိုင်လိုကြသည်။  ထိုသို့ဖြစ်ပေါ်လာစေရန် အတွက် နိုင်ငံတော်ဖွဲ့စည်းပုံ အခြေခံဥပဒေတစ်ရပ်ကို ရေးဆွဲကာ ပြည်သူလူထု၏ တစ်ခဲနက်ထောက်ခံမှုဖြင့် ၂၀၀၈ ခုနှစ် မေလ ၂၉ ရက်တွင် အတည်ပြုပြဋ္ဌာန်းခဲ့သည်။

နိုင်ငံတော်ဖွဲ့စည်းပုံအခြေခံဥပဒေ(၂၀၀၈ ခုနှစ်)တွင် နိုင်ငံတော်အခြေခံမူများ အပါအဝင် အခန်းပေါင်း(၁၅)ခန်းဖြင့် ရေးဆွဲထားသည်။ ထိုဖွဲ့စည်းပုံအခြေခံ ဥပဒေအရ စစ်မှန်၍စည်းကမ်းပြည့်ဝသော ပါတီစုံဒီမိုကရေစီစနစ်ကို ကျင့်သုံးသည်။ ပါတီစုံဒီမိုကရေစီ အထွေထွေရွေးကောက်ပွဲကျင်းပကာ နိုင်ငံတော်ကို ဦးဆောင်ခွင့်ရခဲ့ကြသည်။

ပါတီစုံဒီမိုကရေစီစနစ်ဖြစ်သည့် အတွက် နိုင်ငံတော်အစိုးရက တရားဝင်အသိအမှတ်ပြု ခန့်အပ်ထားသော တပ်မတော်တစ်ရပ်မှလွဲ၍ အခြားသော လက်နက်ကိုင်အဖွဲ့များ ရှိရန်မလိုအပ်တော့ပေ။ အချို့တိုင်းရင်းသား လက်နက်ကိုင်များအနေဖြင့် နှစ်ပေါင်းကြာရှည်စွာ လက်နက်ကိုင်ဆောင် လာခြင်းဖြစ်၍ ၎င်းတို့ဂုဏ်သိက္ခာရှိစွာ လက်နက်ကိုင်ဆောင်မှု စွန့်လွှတ်နိုင်ရေးအတွက်  ပထမဦးဆုံး တစ်နိုင်ငံလုံး  ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို  စတင်အကောင်အထည် ဖော်ကြသည်။ အဆိုပါစာချုပ်မှာလည်း တိုင်းရင်းသားလက်နက်ကိုင် အဖွဲ့အစည်းများ အကြိမ်ကြိမ်ညှိနှိုင်းပြီးမှ   ပေါ်ပေါက်လာသော စာချုပ်ဖြစ်သည်။

ယခုအခါ NCA စာချုပ်တွင် ပါဝင်လက်မှတ်ရေးထိုးခြင်း မရှိသော လက်နက်ကိုင်အဖွဲ့များ၊ NCA တွင်ပါဝင်လက်မှတ် ထိုးထားသော်လည်း ဖောက်ဖျက်သည့် လက်နက်ကိုင်အဖွဲ့များမှာ ပြည်သူများ အေးချမ်းစွာ နေထိုင်သည့်မြို့ရွာများကို တိုက်ခိုက်ဖျက်ဆီးခြင်းများ လုပ်ဆောင်လျက်ရှိသည်။ နိုင်ငံတော်အစိုးရနှင့် တပ်မတော်၏ သဘောထားကောင်းမွန်မှုကို အခွင့်ကောင်းယူကာ တိုက်ပွဲများဖြစ်ပွားအောင် ဖော်ဆောင်နေခြင်းဖြစ်သည်။

အဆိုပါအကြမ်းဖက် လက်နက်ကိုင်များ၏ လုပ်ရပ်ကြောင့် ပြည်သူများ အတိဒုက္ခရောက်လျက်ရှိသည်။

အဆိုပါ အကြမ်းဖက်အဖျက်သမား လက်နက်ကိုင်အဖွဲ့များအား ပြည်ပနိုင်ငံအချို့က နည်းလမ်းမျိုးစုံဖြင့် ထောက်ပံ့ကူညီလျက် ရှိသည့်အပြင် ၎င်းတို့သြဇာခံမီဒီယာများကို အသုံးပြုကာ သတင်းအတု၊ သတင်းအမှားများကို ပြည်သူများ ထင်ယောင်ထင်မှားဖြစ်အောင် ထုတ်လွှင့်လျက်ရှိသည်။ ယင်းတို့အနေဖြင့် လေထဲတွင် တိုက်အိမ်ဆောက်ကာ မိုးလုံးပြည့်မုသာဝါဒ ထုတ်လွှင့်နေခြင်းဖြစ်ကြောင်း  ဒေသခံပြည်သူတို့ အနေဖြင့် နားလည်သဘောပေါက်လာကြပြီဖြစ်သည်။ တပ်မတော်၏ ဂုဏ်သိက္ခာကျဆင်းအောင် လုပ်ဆောင်ခြင်းဖြစ်သော်လည်း ဒေသခံပြည်သူတို့ အနေဖြင့် တပ်မတော်၏စေတနာအမှန်ကို နားလည်သိမြင်ကာ ၎င်းတို့ဘဝ လုံခြုံအေးချမ်းစွာနေနိုင်ရေးအတွက် တပ်မတော်ကို အပြည့်အဝ အားကိုးလျက်ရှိသည်။

ယခုအခါ  ပြည်သူလူထု၏တစ်ခဲနက် တောင်းဆိုချက်အရ  တပ်မတော်အနေဖြင့် တန်ပြန်တိုက်စစ်ဖွင့်ကာ အကြမ်းဖက်အဖျက်သမားများကို  ချေမှုန်းလျက်ရှိသည်။ အောင်ပွဲများလည်း ရရှိထားပြီးဖြစ်သည်။

မဟုတ်မမှန် ဝါဒမှိုင်းမိကာ တလွဲအတွေးအခေါ်များဖြင့် တောထဲသို့ရောက်သွားသည့် ကလေးများမှာလည်း အခြေအနေမှန်ကို သိရှိကာ ဥပဒေဘောင်အတွင်းသို့ နေ့စဉ်ဝင်ရောက် လာနေပြီဖြစ်သည်။ အနှစ်ချုပ်ဆိုရသော်  နိုင်ငံတော်အစိုးရ၊  တပ်မတော်နှင့်ပြည်သူတို့ လက်တွဲကာ  အကြမ်းဖက်အဖျက်သမားတို့ ချုပ်ငြိမ်းရေးကို ဆောင်ရွက်လျက်ရှိပါကြောင်း ရေးသားလိုက်ရပေသည်။   ။