(၁၆)ကြိမ်မြောက် အာဆီယံကျန်းမာရေး ဝန်ကြီးများ အစည်းအဝေးနှင့် ဆက်စပ် အစည်းအဝေးများသို့ ပြည်ထောင်စုဝန်ကြီး ဒေါက်တာသက်ခိုင်ဝင်း ဦးဆောင်သော မြန်မာ ကိုယ်စားလှယ်အဖွဲ့ တက်ရောက်ဆွေးနွေး

 (၁၆)ကြိမ်မြောက် အာဆီယံကျန်းမာရေး ဝန်ကြီးများ အစည်းအဝေးနှင့် ဆက်စပ် အစည်းအဝေးများသို့ ပြည်ထောင်စုဝန်ကြီး ဒေါက်တာသက်ခိုင်ဝင်း ဦးဆောင်သော မြန်မာ ကိုယ်စားလှယ်အဖွဲ့ တက်ရောက်ဆွေးနွေး

နေပြည်တော်  ဩဂုတ်   ၉

    (၁၆)ကြိမ်မြောက် အာဆီယံ ကျန်းမာရေးဝန်ကြီးများ အစည်းအဝေးနှင့် ဆက်စပ်အစည်းအဝေးများကို ဩဂုတ်လ ၈ ရက်မှ ၁၀ ရက်အထိ လာအိုပြည်သူ့ဒီမိုကရက်တစ် သမ္မတနိုင်ငံ ဗီယင်ကျန်းမြို့ရှိ National Convention Center ၌ ကျင်းပရာ ကျန်းမာရေးဝန်ကြီးဌာန   ပြည်ထောင်စုဝန်ကြီး ဒေါက်တာသက်ခိုင်ဝင်း    ဦးဆောင်သော ကိုယ်စားလှယ်အဖွဲ့ တက်ရောက်ဆွေးနွေးသည်။

ပြည်ထောင်စုဝန်ကြီး  ဦးဆောင်သော ကိုယ်စားလှယ်အဖွဲ့သည် ဩဂုတ်လ ၈ ရက် နံနက်ပိုင်းတွင်  ကျင်းပသည့် အာဆီယံ ကျန်းမာရေးဝန်ကြီးများ၏   အာဆီယံကျန်းမာရေး ကဏ္ဍလုပ်ငန်းများ သုံးသပ်ခြင်းနှင့် ၂၀၂၅ အလွန် ကျန်းမာရေးကဏ္ဍ ဦးစားပေးအစီအစဉ်များ သတ်မှတ်နိုင်ရေး လုပ်ငန်းညှိနှိုင်းအစည်းအဝေးသို့ တက်ရောက်ပြီး အာဆီယံအဖွဲ့ကြီးအနေဖြင့် ပိုမိုကျန်းမာကောင်းမွန်သော၊ ပိုမိုတည်တံ့ခိုင်မြဲသော၊ အာဆီယံအသိုင်းအဝိုင်း ဖြစ်ပေါ်စေရေးအတွက်      ကျန်းမာသော လူနေမှုဘဝပုံစံ မြှင့်တင်ရေး၊ ကျန်းမာရေးစောင့်ရှောက်မှု စနစ်အားကောင်းအောင် ဆောင်ရွက်ရေး၊ အသစ်ဖြစ်ပေါ်လာမည့် ကူးစက်ရောဂါများနှင့် ပြန်လည်ခေါင်းထောင်လာမည့် ကူးစက်ရောဂါများကို စောင့်ကြည့်ခြင်းနှင့် ကာကွယ်ထိန်းချုပ်‌ရေး လုပ်ငန်းများ ပူးပေါင်းဆောင်ရွက်ရေး၊   အရည်အသွေးပြည့်ဝသော ကျန်းမာရေးစောင့်ရှောက်မှု လုပ်ငန်းများ လူတိုင်းလက်လှမ်းမီ ရရှိစေရေး (Universal Health Coverage)၊  သဘာဝဘေးဒဏ်ခံနိုင်ရည်ရှိသော ကျန်းမာရေးစနစ် အဆင့်မြှင့်တင်ရေး၊ ပြောင်းလဲတိုးတက်လာသည့် ဒစ်ဂျစ်တယ်နည်းပညာ အသုံးပြု၍ ကျန်းမာရေး စောင့်ရှောက်မှု လုပ်ငန်းများ အရည်အသွေးမြှင့်တင်နိုင်ရေး၊ လူနာများဘေးကင်း လုံခြုံရေးနှင့် အစားအသောက်ဘေးကင်း လုံခြုံစိတ်ချရမှု   တိုးမြှင့်ပူးပေါင်းဆောင်ရွက်ရေး၊ အားကောင်းခိုင်မာသော ကျန်းမာရေးစနစ် မြှင့်တင်ရေးအတွက် ကျန်းမာရေးကဏ္ဍ၊   ဘဏ္ဍာရေးကဏ္ဍနှင့် သဘာဝပတ်ဝန်းကျင် ထိန်းသိမ်းရေးကဏ္ဍများ   ပိုမိုပူးပေါင်းဆောင်ရွက်နိုင်ရေး စသည်တို့ကို  ဆွေးနွေး ပြောကြားခဲ့သည်။

ဆက်လက်၍   ပြည်ထောင်စုဝန်ကြီးသည်  အာဆီယံအဖွဲ့ကြီးနှင့် ကမ္ဘာ့ကျန်းမာရေးအဖွဲ့ (WHO)တို့၏   ကျန်းမာ‌ရေး စောင့်ရှောက်မှုလုပ်ငန်းများ  ပိုမိုပူးပေါင်း ဆောင်ရွက်နိုင်ရေး လုပ်ငန်းညှိနှိုင်း အစည်းအဝေးသို့ တက်ရောက်ပြီး     ကိုဗစ်-၁၉ ရောဂါဖြစ်ပွားမှုသည်      ကျန်းမာရေး အရေးပေါ် အခြေအနေများတွင် မိမိတို့အဖွဲ့ဝင်နိုင်ငံများ အချင်းချင်းပူးပေါင်း ဆောင်ရွက်မှုသည် လည်းကောင်း၊   ဒေသတွင်း ပူးပေါင်းဆောင်ရွက်မှုသည် လည်းကောင်းအလွန်အရေးကြီးသည်ကို မီးမောင်းထိုးပြလျက် ရှိကြောင်း၊  အလားတူ  ကိုဗစ်-၁၉   ရောဂါကာကွယ်ဆေးထိုး လုပ်ငန်းများနှင့် ပုံမှန်ကာကွယ်ဆေးထိုး လုပ်ငန်းများတွင်လည်း နိုင်ငံတော်အစိုးရ၏ ပံ့ပိုးမှု၊ ဝန်ကြီးဌာန၏ ကြိုးပမ်းဆောင်ရွက်မှု၊   ပြည်သူလူထု၏ ပူးပေါင်းမှုဖြင့် ကာကွယ်ဆေးထိုးနှံ‌ရေး လုပ်ငန်းများ ဆောင်ရွက်ခဲ့ရာ ၂၀၂၁ ခုနှစ်မှ  ၂၀၂၂ ခုနှစ်အတွင်း ကာကွယ်ဆေး လုံးဝထိုးနှံနိုင်ခြင်း မရှိခဲ့သည့် ကလေးငယ်များကို  သုံးဆခန့် လျှော့ချနိုင်ခဲ့ကြောင်း၊ ကမ္ဘာ့ကျန်းမာရေးအဖွဲ့၏ ၂၀၂၂-၂၀၂၃ အစီရင်ခံစာတွင်လည်း မြန်မာနိုင်ငံ၏ ကာကွယ်ဆေးထိုး လုပ်ငန်းအောင်မြင်မှုများကို အသိအမှတ်ပြု မှတ်တမ်းတင် ထုတ်ပြန်ထားကြောင်း၊ ဆက်လက်၍ ပိုမိုပူးပေါင်းဆောင်ရွက် သွားမည်ဖြစ်ကြောင်း  ပြောကြားခဲ့သည်။

အဆိုပါ အစည်းအဝေးများသို့ အာဆီယံနိုင်ငံများမှ ကျန်းမာရေးဝန်ကြီးများ၊ ဒုတိယ ဝန်ကြီးများ၊ ကျန်းမာရေးဆိုင်ရာ အဆင့်မြင့်အရာရှိကြီးများ၊  ကမ္ဘာ့ကျန်းမာရေးအဖွဲ့ အရှေ့တောင်အာရှဒေသဆိုင်ရာ ညွှန်ကြားရေးမှူး၊ အနောက်ပစိဖိတ်ဒေသဆိုင်ရာ ညွှန်ကြားရေးမှူး၊ အာဆီယံအတွင်းရေးမှူးချုပ်ရုံးမှ ဒုတိယအထွေထွေ အတွင်းရေးမှူးချုပ်နှင့် တာဝန်ရှိပုဂ္ဂိုလ်များ၊ ကျန်းမာရေး ဝန်ကြီးဌာနမှ အဆင့်မြင့်အရာရှိကြီးများ တက်ရောက်ခဲ့ကြကြောင်း  သတင်းရရှိသည်။