ရွှေတိဂုံစေတီတော်၌ တနင်္ဂနွေရုံးပိတ်ရက်ဘုရားဖူးများဖြင့်စည်ကား
ရန်ကုန် ဩဂုတ် ၁၈
ရန်ကုန်မြို့ သိင်္ဂုတ္တရကုန်းတော်တွင် တည်ထားတော်မူသည့် လေးဆူဓာတ်ပုံ ရွှေတိဂုံစေတီတော်၌ အများပြည်သူ ရုံးပိတ်ရက်ဖြစ်သည့် ယနေ့(တနင်္ဂနွေနေ့)တွင် နံနက်အရုဏ်တက်ချိန်မှ ညနေပိုင်းအထိ ရပ်နီးရပ်ဝေးမှ ဘုရားဖူးပြည်သူများဖြင့် စည်ကားလျက်ရှိကြောင်း သိရသည်။
ရွှေတိဂုံစေတီတော်သို့ ဘုရားဖူးလာ ရောက်ကြသူများတွင် နိုင်ငံခြားသားဘုရားဖူးများလည်း ပါဝင်ကြောင်း၊ ယင်းနိုင်ငံခြားသားဘုရားဖူးများ အနက် အာရှ တိုက်နေထိုင်သူ ဗုဒ္ဓဘာသာဝင်နိုင်ငံများမှ အများဆုံးလာရောက်ကြကြောင်း သိရသည်။
“နိုင်ငံခြားသားဘုရားဖူးတွေလည်း လာကြပါတယ်။ မိုးတွင်းကတော့ အဝင်နည်းတယ်၊ ခရီးသွားရာသီဖြစ်တဲ့ နိုဝင်ဘာ၊ ဒီဇင်ဘာတို့၊ ဇန်နဝါရီလတွေဆို ဘုရားဖူးဝင်ရောက်မှုက သိသိသာသာလေး များပါတယ်။ ဘုရားဖူးကတော့ အာဆီယံနိုင်ငံတွေ၊ အာရှနိုင်ငံတွေကပိုများတယ်။
ဗုဒ္ဓဘာသာနိုင်ငံတွေပေါ့၊ ထိုင်းတို့၊ တရုတ်တို့၊ ဗီယက်နမ်တို့၊ ကမ္ဘောဒီးယားတို့၊ ဒုတိယ အများဆုံး လာတာကတော့ ဥရောပနိုင်ငံတွေကလာ ကြတာဖြစ်ပါတယ်”ဟုရွှေတိဂုံစေတီတော်မှ တာဝန်ရှိသူတစ်ဦးကပြောသည်။
ရွှေတိဂုံစေတီတော်သို့ ပြည်တွင်းပြည်ပ ဘုရားဖူးဝင်ရောက်မှုသည် အစိုးရရုံးပိတ်ရက်ဖြစ်သော စနေ၊ တနင်္ဂနွေနေ့များတွင် ရုံးဖွင့်ရက်များထက် ပိုမိုများပြားပြီး ဗုဒ္ဓဘာသာဝင်တို့၏ နေ့ထူးနေ့မြတ်ဖြစ်သော မြန်မာနှစ်ဆန်းတစ်ရက်နေ့၊ ကဆုန်လပြည့်နေ့၊ ဝါဆိုလပြည့်နေ့၊ သီတင်းကျွတ်လပြည့်နေ့၊ တန်ဆောင်မုန်းလပြည့်နေ့များတွင် ဘုရားဖူးဧည့်သည် ပိုမိုဝင်ရောက်ကြကြောင်းလည်း သိရသည်။
ရပ်နီးရပ်ဝေးမှဘုရားဖူးများ ပိုမိုအဆင်ပြေစေရန် ၂၀၂၂ ခုနှစ် မတ်လ ၂၆ ရက်မှ စတင်၍ နံနက် ၅ နာရီမှ ည ၈ နာရီအချိန်ထိ လည်းကောင်း၊ ဘုရားဖူးပြည်သူများ စိတ်အေးချမ်းသာ စွာဖူးမြော် ကြည်ညိုနိုင်ရန် ၂၀၂၄ ခုနှစ် ဇန်နဝါရီလ ၁ ရက်မှ စတင်၍ နံနက် ၅ နာရီမှ ည ၉ နာရီထိလည်းကောင်းတိုး မြှင့်ဖွင့်လှစ်ပေးခဲ့ပြီး ဇွန်လ ၂၁ ရက်မှစတင်၍ ဘုရားဖူးချိန်အား နံနက် ၄ နာရီမှ ည ၁၀ နာရီထိ တိုးမြှင့်ဖွင့် လှစ်ပေးခဲ့ကြောင်း သိရသည်။
၂၀၂၄ ခုနှစ်အတွင်း ရွှေတိဂုံစေတီတော်သို့ ဘုရားဖူးဝင်ရောက်မှု အနေဖြင့် ပြည်တွင်းပြည်ပ ဘုရားဖူးပြည်သူ ရဟန်းသံဃာတော်များနှင့် သာသနာနွယ်ဝင် သီလရှင်များ အပါအဝင် ဇန်နဝါရီလတွင် ၅၄၆၉၅၄ ဦး၊ ဖေဖော်ဝါရီလတွင် ၅၂၆၈၈၃ ဦး၊ မတ်လတွင် ၈၁၆၄၅၄ ဦး၊ ဧပြီလတွင် ၆၈၅၅၀၃ ဦး၊ မေလတွင် ၅၇၆၃၄၆ ဦး၊ ဇွန်လတွင် ၅၄၅၆၆၁ ဦးနှင့် ဇူလိုင်လတွင် ၄၄၀၉၁၇ ဦး လာရောက်ဖူးမြော်ကြည်ညိုခဲ့ကြ ကြောင်း ရွှေတိဂုံစေတီတော် ဘဏ္ဍာတော်ထိန်း ဂေါပကအဖွဲ့မှ သိရသည်။