မြန်မာနေရှင်နယ်လိဂ်ယူ-၂၀ ပြိုင်ပွဲတွင် သစ္စာအားမာန်ယူ-၂၀ အသင်းနှင့် ISPE ယူ-၂၀ အသင်းတို့ နိုင်ပွဲကိုယ်စီရရှိ
ရန်ကုန် ဩဂုတ် ၂၂
မြန်မာနိုင်ငံဘောလုံးအဖွဲ့ချုပ် မြန်မာနေရှင်နယ်လိဂ်ကော်မတီက ကြီးမှူးကျင်းပလျက်ရှိနေသည့် မြန်မာနေရှင်နယ်လိဂ် ယူ-၂၀ ပြိုင်ပွဲ ပွဲစဉ်(၁၂)ပွဲစဉ်များကို ယနေ့ညနေပိုင်းတွင် ရန်ကုန်မြို့၌ ကျင်းပခဲ့ရာ သစ္စာအားမာန်အသင်းနှင့် ISPE ယူ-၂၀ အသင်းတို့ နိုင်ပွဲကိုယ်စီ ရရှိခဲ့ကြကြောင်းသိရသည်။
မြန်မာနေရှင်နယ်လိဂ် ယူ-၂၀ ပြိုင်ပွဲ ပွဲစဉ်(၈)အဖြစ် ယနေ့ညနေ ၃ နာရီခွဲတွင် ရန်ကုန်မြို့ ပဒုမ္မာအားကစားကွင်း၌ ISPE ယူ-၂၀ အသင်းနှင့် ရတနာပုံအက်ဖ်စီယူ-၂၀ အသင်းတို့ကစားခဲ့ရာ ISPE ယူ-၂၀အသင်းက ၂ ဂိုး ၁ ဂိုးဖြင့်အနိုင်ရရှိခဲ့ပြီး ISPE ယူ-၂၀ အသင်းအတွက် သွင်းဂိုးများကို ပွဲချိန် ၂ မိနစ်တွင် စိုးမင်းထက်နှင့် ပွဲချိန် ၇၇ မိနစ်တွင် မာတီးနိုတို့က သွင်းယူပေးနိုင်ခဲ့ကာ ရတနာပုံအက်ဖ်စီယူ-၂၀ အသင်းအတွက် တစ်လုံးတည်းသောသွင်းဂိုးကို ပွဲချိန် ၃၁ မိနစ်တွင် ကောင်းခန့်ဇော်က သွင်းယူ ပေးနိုင်ခဲ့သည်။
ဆက်လက်ပြီး ညနေ ၃ နာရီခွဲတွင် စလင်းအားကစားကွင်း၌ သစ္စာအားမာန်ယူ-၂၀ အသင်းနှင့် မဟာယူနိုက်တက်ယူ-၂၀ အသင်းတို့ကစားခဲ့ရာ သစ္စာအားမာန်ယူ-၂၀ အသင်းက ၃ ဂိုး ဂိုးမရှိဖြင့် ဂိုးပြတ်အနိုင်ရရှိခဲ့ပြီး သစ္စာအားမာန်အသင်းအတွက် သွင်းဂိုးများကို ပွဲချိန် ၂၄ မိနစ်တွင် ထက်ဇေယျာမင်း၊ ပွဲချိန် ၈၁ မိနစ်တွင်ဇင်ဖြိုးပိုင်နှင့် ပွဲချိန် ၈၈ မိနစ်တွင် အိုကေချစ်တို့က သွင်းယူပေးနိုင်ခဲ့သည်။
အလားတူ ညနေ ၃ နာရီခွဲတွင် ဗဟန်းအားကစားကွင်း၌ မြ၀တီအက်ဖ်စီယူ-၂၀ အသင်းနှင့် ရခိုင်ယူနိုက်တက်ယူ-၂၀ အသင်းတို့ကစားခဲ့ရာ နှစ်သင်းလုံး ဂိုးသွင်းယူနိုင်ခြင်း မရှိခဲ့ဘဲ ဂိုးမရှိသရေရလဒ်ဖြင့် ပွဲပြီးဆုံးခဲ့သည်။
မြန်မာနေရှင်နယ်လိဂ် ယူ-၂၀ ပြိုင်ပွဲ ပွဲစဉ်(၁၂)ပွဲစဉ်များအဖြစ် ဩဂုတ်လ ၂၃ ရက်တွင် ရှမ်းယူနိုက်တက်ယူ-၂၀ အသင်းနှင့် Junior Lions အသင်း၊ ဧရာ၀တီယူနိုက်တက်ယူ-၂၀ အသင်းနှင့် ဒဂုံပေါ့ယူ-၂၀ အသင်းတို့ ဆက်လက် ကစားသွားမည်ဖြစ်ကြောင်း သိရသည်။
စည်သူအောင်