မြန်မာနိုင်ငံ ဝိဇ္ဇာနှင့်သိပ္ပံပညာရှင်အဖွဲ့ ငွေရတုသဘင်အခမ်းအနားသို့ ပြည်ထောင်စု၀န်ကြီး ဒေါက်တာ ညွန့်ဖေ တက်ရောက်
ရန်ကုန် ဩဂုတ် ၂၃
မြန်မာနိုင်ငံဝိဇ္ဇာနှင့် သိပ္ပံပညာရှင် အဖွဲ့ငွေရတု သဘင်အခမ်းအနားကို ယနေ့နံနက် ၉ နာရီခွဲတွင် ရန်ကုန်တက္ကသိုလ် ဘွဲ့နှင်း သဘင်ခန်းမ၌ကျင်းပသည်။
ဦးစွာမြန်မာနိုင်ငံ ဝိဇ္ဇာနှင့်သိပ္ပံပညာရှင်အဖွဲ့ ငွေရတုအထိမ်းအမှတ် တေးသီချင်းဖြင့် သီဆိုဖျော်ဖြေ ကြသည်။
ယင်းနောက် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာညွန့်ဖေက မြန်မာနိုင်ငံ ဝိဇ္ဇာနှင့် သိပ္ပံပညာရှင်အဖွဲ့က ရည်မှန်းချက်များ၊ အဖွဲ့အစည်းများ၊ တာဝန်များကို ချမှတ်ပြီး လုပ်ငန်းများ ဆောင်ရွက်ခဲ့ကြောင်း၊ မြန်မာနိုင်ငံ ဝိဇ္ဇာနှင့်သိပ္ပံပညာရှင်အဖွဲ့ (၂၅)နှစ် ခရီးတွင် စာတမ်းရှင် ၄၄၅ ဦးကို ဆုများချီးမြှင့်နိုင်ခဲ့သည့်အတွက် ပညာရည်မြှင့်တင်ရေးအတွက် အထောက်အကူဖြစ်စေကြောင်း၊ သုတေသန ညီလာခံများမှ အရည်အသွေး ပြည့်မီသော စာတမ်းများကို သုတေသနဂျာနယ် နှစ်စဉ် ထုတ်ဝေခဲ့ရာ ယခုအချိန်ထိ ဘာသာရပ်ပေါင်းစုံ ဂျာနယ်အတွဲ ၁၉ တွဲကိုပုံနှိပ်ထုတ်ဝေ ထားပြီးဖြစ် သည်ကို တွေ့ရကြောင်း၊ ပညာပြန့်ပွားရေးအတွက် ပညာရှင် အမှုဆောင်အဖွဲ့ဝင်များက ရေးသား ထုတ်ဝေဖြန့်ချိခဲ့သည့် စာအုပ် ၂၆ အုပ်ရှိကြောင်း၊ ထပ်မံပြီး မြန်မာနိုင်ငံဝိဇ္ဇာနှင့်သိပ္ပံပညာရှင်အဖွဲ့ဆု (Myanmar Academy of Arts and Science Award) ကိုတင်သွင်းခဲ့သည့် ပါရဂူကျမ်းများထဲမှ ၂၀၀၇ ခုနှစ်နှင့် ၂၀၀၈ ခုနှစ်တို့တွင် စတင်ချီးမြှင့်နိုင်ခဲ့ကြောင်း၊ ဝိဇ္ဇာနှင့်သိပ္ပံပညာရှင်အဖွဲ့၏ (၂၅)နှစ်ခရီး အတွင်း ပညာရှင်အဖွဲ့ဆုရ ကျမ်းပေါင်း ၁၁၄ ကျမ်းရှိသည်ဟု သိရကြောင်း ပြောကြားသည်။
ထို့နောက် ရန်ကုန်နိုင်ငံခြားဘာသာတက္ကသိုလ်မှ ကျောင်းသား၊ ကျောင်းသူများက ရိုးရာအကအလှ များဖြင့် ဖျော်ဖြေကြသည်။
ယင်းနောက် မြန်မာနိုင်ငံဝိဇ္ဇာနှင့်သိပ္ပံပညာရှင်အဖွဲ့ဥက္ကဋ္ဌ ဒေါက်တာသက်လွင်က နှုတ်ခွန်းဆက်စကား ပြောကြားသည်။
ဆက်လက်၍ ဒေါက်တာတင်ညိုနှင့် ဒုတိယဥက္ကဋ္ဌ ဒေါက်တာမောင်ကျော်တို့က ပညာရှင်ကြီးများ၏ ဦးဆောင်မှုဖြင့် ပညာရည်မြင့်မားသော လူ့စွမ်းအားအရင်းအမြစ်ဘွဲ့ရ ပညာတတ်များအား လေ့ကျင့်ပျိုး ထောင်ပေးခဲ့ပုံကို ဗီဒီယိုမှတ်တမ်းများဖြင့် တင်ပြကြသည်။
ထို့နောက် မြန်မာနိုင်ငံဝိဇ္ဇာနှင့်သိပ္ပံပညာရှင် အမှုဆောင်အဖွဲ့ တွဲဖက်အတွင်းရေးမှူး များက ပညာရှင် ကြီးများအား ဂါရဝပြု ဂုဏ်ပြုငွေပေးအပ်ရာ ဝိဇ္ဇာဘာသာရပ်၊ သိပ္ပံဘာသာရပ်၊ အခြားဘာသာရပ်တို့မှ ပညာရှင်ကြီးများက ဝမ်းမြောက်ကြည်နူးဖွယ် စကားပြောကြားသည်။
ဆက်လက်၍ ပြည်ထောင်စုဝန်ကြီးနှင့် တာဝန်ရှိသူများသည် မရမ်းကုန်းမြို့နယ် အမှတ်(၄) အခြေခံ ပညာအထက်တန်းကျောင်း၊ အမှတ်(၃)အခြေခံပညာအထက်တန်းကျောင်း၊ အင်းစိန်မြို့နယ် အမှတ်(၁) အခြေခံပညာအထက်တန်းကျောင်းနှင့်အမှတ်(၂)အခြေခံပညာအထက်တန်းကျောင်းတို့သို့ရောက်ရှိကာ ကျောင်းသား၊ ကျောင်းသူများ အေးချမ်းစွာ ပညာသင်ကြားနေမှုများကို ကြည့်ရှုအားပေးပြီး ကျောင်း ဥပဓိရုပ်ကောင်းမွန်ရေး၊ ကျောင်းပရိဝုဏ်အတွင်း သန့်ရှင်းသာယာရေးဆောင်ရွက်ထားမှု အခြေအနေ များကို ကြည့်ရှုစစ်ဆေးကာ လိုအပ်သည်များကို ဖြည့်ဆည်း ဆောင်ရွက်ပေးခဲ့ကြောင်း သိရသည်။
(၅၀၀)