ပန်ကာလေအန္တရာယ်အကြောင်းနှင့် ဘေးကင်းစေမည့်ပန်ကာအသုံးပြုနည်း

ပန်ကာလေအန္တရာယ်အကြောင်းနှင့် ဘေးကင်းစေမည့်ပန်ကာအသုံးပြုနည်း

မြန်မာနိုင်ငံ၌ နွေ၊ မိုး၊ ဆောင်း ရာသီဥတုသုံးမျိုးရှိသည့်အနက် နွေရာသီတွင် အပူချိန် ပိုမြင့်မားသော် လည်း ၂၀ ရာစုနောက်ပိုင်းမှစ၍ မည်သည့်ရာသီဥတုတွင်မဆို အပူချိန် သိသိသာသာ မြင့်တက်လာ လျက်ရှိသည်။

ယနေ့ခေတ်တွင် နည်းပညာများ ခေတ်မီတိုးတက်လာခြင်းနှင့်အတူ လူသားတို့၏ အသုံးအဆောင် ပစ္စည်းများမှာလည်း များပြားလာရာ အပူဒဏ်သက်သာစေရန် ယပ်တောင်၊ ပန်ကာ၊ Air Cooler၊ Aircon စသည်ဖြင့် ပြောင်းလဲသုံးစွဲလာကြသည်။ လေအေးပေးစက်များကို လူတန်းစေ့အသုံးမပြုနိုင် သေးသော် လည်း ပန်ကာကို တွင်ကျယ်စွာ အသုံးပြုလျက်ရှိသည်။ 

သို့သော် ပန်ကာလေခံခြင်းဖြင့်ရရှိ မည့်ဆိုးကျိုးများကို သတိမမူမိကြပေ။

ထို့ကြောင့် ပန်ကာလေအန္တရာယ်အကြောင်း သိကောင်းစရာများနှင့် ဘေးကင်းစေမည့် ပန်ကာသုံးစွဲ နည်းတို့ကို ဗဟုသုတရရှိစေရန် ဖော်ပြလိုက်ပါသည်။

ပန်ကာလေ၏ သဘောမှာ လေကို တိုက်ရိုက်မှုတ်ထုတ်ပေးသည်။ ယင်းပန်ကာ လေက  လူ့ခန္ဓာကိုယ်မှ ထွက်သော အခိုးကိုငုပ်စေပြီး  အရေပြားပေါ်ရှိ မွေးညင်းပေါက်များကို ပိတ်သွားစေသည်။ တစ်နည်း ဆိုရသော် ပန်ကာလေက လူသားတို့၏ ချွေးထွက်မည့် မွေးညင်းပေါက်များကို ကျုံ့စေသောသတ္တိရှိ၍   ဆိုးကျိုးဖြစ်စေနိုင်သည်။ ထို့ပြင် ဇီဝဖြစ်စဉ်အရ လူ့ခန္ဓာကိုယ်အတွက် လိုအပ်သောအပူချိန်ကို ဦးခေါင်းကရယူပေးသည်။ ထိုအချိန်မျိုးတွင်  ပန်ကာလေကြောင့်  ဦးခေါင်းမှ တဖြည်းဖြည်း အပူချိန် လျော့ကျလာသည်။ အိပ်မပျော်သေးမီ ခန္ဓာကိုယ်က သဘာဝအလျောက် အပူထုတ်ပေးနေသဖြင့် ပြဿနာမရှိသော်လည်း အိပ်ပျော်သွားသည့်အခါ ခန္ဓာကိုယ်က မဆိုသလောက်သာ အပူထုတ်ပေး လေ့ရှိသည်။ ထိုအခါ ပန်ကာလေကြောင့် ဦးခေါင်းတွင် အတိုင်းအဆမရှိ  အေးလာပြီးနောက်  ဦးခေါင်း အရေပြားကျုံ့လာသည်။ ခန္ဓာကိုယ်အတွင်းပိုင်းကမူ အခန်းအပူချိန်အတိုင်း ဆက်လက်ရှိနေသည်။ ထိုဖြစ်စဉ်က ဦးခေါင်းကို စီးဆင်းနေသော သွေးများကို အလွန်အမင်းညှစ်သလိုဖြစ်သွားကာ ပန်ကာ လေကြောင့် ခေါင်းအုံခြင်း ဖြစ်တတ်သည်။  

အဆိုးရွားဆုံးအခြေအနေတွင် ဦးခေါင်းထဲသွေးမလျှောက်ခြင်း သို့မဟုတ် သွေးကြောပြတ်ခြင်းတို့ ဖြစ်စေနိုင်သည်။ ပန်ကာလေကို တစ်ညလုံးခံပြီးနောက် နံနက်အိပ်ရာထသည့်အခါ လည်ချောင်း နာ၍   အသားများ မလှုပ်ချင်လောက်အောင် နာလာတတ်သည်။ ပန်ကာလေကို အချိန်ကြာမြင့်စွာ တိုက်ရိုက် ထိတွေ့ခြင်းကြောင့် ရရှိနိုင်သော တခြားကျန်းမာရေး ဆိုးကျိုးများမှာ အသားအရေခြောက်ခြင်း၊ လက်ကပ်ခြင်း သို့မဟုတ် လက်အကွေး အဆန့်လေးလံခြင်း၊ နှာစေးခြင်း၊ ကျောအောင့်ခြင်း၊ အဆုတ် အအေးမိခြင်း၊ ခေါင်းကိုက်ခြင်း၊ ဇက်ခိုင်ခြင်း၊ ခြေထောက်လေးခြင်း၊ ခြေဖနောင့်နာခြင်း၊ ပါးရွဲ့ခြင်း သို့မဟုတ် လေဖြတ်ခြင်း၊ ဦးနှောက်သွေး ကြောပြတ်ခြင်း စသည်ဖြင့် ခံစားရတတ်သည်။ နေ့လယ်ပိုင်း တွင် မျက်နှာကြက် ပန်ကာအောက်တွင်ထိုင်၍   အလုပ်လုပ် လေ့ရှိသူများမှာ ဆံပင်ကျွတ်ပြီး ထိပ်ပြောင် လွယ်တတ်သည်။ ရေချိုးပြီးပြီးချင်း ပန်ကာလေခံလေ့ရှိသော အမျိုးသမီးများတွင် အပူငုပ်ကာ  အဖြူဆင်းခြင်း ဖြစ်ပေါ်စေသည်။

တချို့သူများသည် အင်္ကျီချွတ်၍ ပန်ကာလေဖြင့် အိပ်စက်ခြင်း၊ ရေစိုအဝတ်ခင်း၍ ပန်ကာလေဖြင့် အအေးခံခြင်း၊ သင်ဖြူးဖျာကိုရေစွတ်၍ ပန်ကာလေခံ အိပ်စက်ခြင်း၊ အရက်သောက်ပြီးနောက် ချွေးအလွန်ထွက်သောအချိန်တွင် ပန်ကာလေဖြင့် အိပ်စက်ခြင်း၊ အပြင်မှ ပြန်လာသည့်အချိန်၌ဖြစ်စေ၊  အားကစားပြုလုပ်ပြီး ချွေးမတိတ်သေးသည့်အချိန်၌ဖြစ်စေပန်ကာဖွင့်၍ ကြမ်းပြင်ပေါ် အိပ်စက်ခြင်း စသည်ဖြင့် ပန်ကာကို အလွန်အကျွံ လွဲမှားစွာ  အသုံးပြုကြသည့်အတွက် အန္တရာယ်ဖြစ်စေ နိုင်သည်။

မည်သို့ပင်ဆိုစေကာမူ ပူအိုက်စွတ်စို သောမိုးရာသီနှင့် ပူပြင်းခြောက်သွေ့သော နွေရာသီတွင် ပန်ကာ အသုံးပြုမှုများလာခြင်းကြောင့် အီလက်ထရွန်နစ်စျေးကွက်၌ ပန်ကာများ ရောင်းအား ကောင်းမွန် လျက်ရှိသည်။ လူတချို့က ကျန်းမာရေး အသိအမြင်ရှိသော်လည်း ချွေးမပြန်အောင် ပန်ကာ ဖွင့်အိပ် တတ်ကြရာ  ဘေးကင်းစေရန်    ပန်ကာအသုံးပြုနည်းတချို့ကို   အောက်ပါအတိုင်း   အကြံပြုလိုပါသည်။

• ပန်ကာကို အိပ်ရာဘေးတွင် ကပ်ဖွင့် ပြီးမအိပ်ပါနှင့်။ ပန်ကာကို ဦးခေါင်းပိုင်း တွင်ထား၍ မဖွင့်ပါနှင့်။  ပန်ကာလေနှင့် တိုက်ရိုက်မထိအောင်နေပါ။

• မိမိအိပ်စက်သောနေရာ၏ အပေါ်ဘက် ဝေးဝေးတွင်ထား၍ ဖွင့်သင့်သည်။

• ပန်ကာကို တစ်နေရာတည်းသို့ မျက်နှာမူ၍ မဖွင့်ပါနှင့်။ Rotate (ခေါ်) ဘယ်ညာ ပတ်ဝန်း ကျင်သို့ ပတ်ချာလည်နေသော ခလုတ်ကိုနှိပ်ထားသင့်သည်။

• မည်မျှပင်ပူအိုက်စေကာမူ ညအိပ်ခါနီးတွင် ပန်ကာခလုတ်ကို နံပါတ် (၁) သို့မဟုတ် အနိမ့်ဆုံး ကိုသာရွေးပါ။

•  နံနက်မိုးလင်းခါနီးတွင် အပူလျော့လေ့ရှိသည်။ ထို့ကြောင့် ပန်ကာကို timer ပေး၍အိပ်ပါ သို့မဟုတ် တစ်ရေးနိုးချိန်တွင် ပန်ကာကိုပိတ်ထားသင့်သည်။

• အသံထွက်သောပန်ကာကို မသုံးပါနှင့်။ လူ့ခန္ဓာကိုယ်က အိပ်စက်နေသော်လည်း တစ်ညလုံး ဆူညံသံထွက်နေသော ပန်ကာက နားစည်ကို တုန်ခါစေသည့်အပြင် နှစ်ခြိုက်စွာအိပ်စက်မှုကို အဟန့် အတားဖြစ်စေနိုင်သည်။

• ညအိပ်ချိန် ဟောက်တတ်သောသူများအတွက် ပန်ကာလေနှင့် လုံးဝမသင့်တော်ပေ။ ခံတွင်းနှင့် လေပြွန်ကို မြန်မြန် ခြောက်သွေ့စေပြီး မကြာခဏနိုးစေနိုင်သည်။

• ပန်ကာဖွင့်၍အိပ်လေ့ရှိသော ကလေးငယ်များ၏ကျန်းမာရေးသည် ၇၀ ရာခိုင်နှုန်းခန့် သိသိသာသာ ဆိုးရွားစေနိုင်ကြောင်း ကျန်းမာရေးသုတေသီများက သတိပေးထားသည်။

• ပန်ကာရွက်(ဒလက်)များတွင် ဖုန်မှုန့် များရှိပါက ဖြုတ်၍ ဆေးကြောပေးပါ။ သို့မဟုတ်ပါက နှာခေါင်းပေါက်နှင့် ဆက်သွယ်ထားသော ဦးခေါင်းခွံအတွင်း လေလမ်းကြောင်းကို ပိတ်စေနိုင်သည်။   ထို့ပြင် အဆုတ်ကို ထိခိုက်စေနိုင်သည်။

• မီးပလတ်ပေါက်နှင့် ၀ိုင်ယာကြိုးတို့ ကိုစစ်ဆေးပါ။ ပန်ကာကို အချိန်ကြာမြင့်စွာ ဖွင့်ထားခြင်းကလည်း မီးဘေးအန္တရာယ် ဖြစ်စေနိုင်ကြောင်း ပန်ကာအသုံးပြုနည်း အသွယ်သွယ်ကို ရေးသားတင်ပြလိုက်ရ ပါသည်။      ။    

 ပေါက်ပေါက်