ထိုင်းရှိလိုဏ်ခေါင်းပြိုကျမှု၌ ပိတ်မိနေသူများအနက် မြန်မာအလုပ်သမားကို အသက်ရှင်လျက်ပထမဆုံးရှာတွေ့
ထိုင်းနိုင်ငံအရှေ့မြောက်ပိုင်း အီဆန်ဒေသ နခွန်ရတ်ချာဆီမာမြို့ရှိ လိုဏ်ခေါင်း ပြိုကျမှု၌ ပိတ်မိနေသူများအနက် မြန်မာ အလုပ်သမားကို ဩဂုတ်လ ၂၈ ရက်တွင် အသက်ရှင်လျက်ဖြင့် ပထမဆုံးရှာတွေ့ကြောင်း သိရသည်။
တရုတ်-ထိုင်း နှစ်နိုင်ငံကြား မြန်နှုန်းမြင့်မီးရထားလမ်းဖောက်လုပ်ရာ၌ တစ်စိတ်တစ်ပိုင်းပါဝင်သည့် ထိုလိုဏ်ခေါင်းကို ဖောက်လုပ်နေစဉ် ဩဂုတ်လ ၂၅ ရက် နံနက် ၁ နာရီခန့်တွင်ဖြစ်ပွားသော မြေပြိုမှုတစ်ခုကြောင့် လိုဏ်ခေါင်းပြိုကျမှုဖြစ်ပွားရာ မြန်မာနိုင်ငံသားတစ်ဦးနှင့် တရုတ် နိုင်ငံသားနှစ်ဦးတို့ ပိတ်မိသွားသည်။
မြန်မာနိုင်ငံသားမှာ မြေသယ်ယာဉ်ကို မောင်းသူဖြစ်ပြီး တရုတ်နိုင်ငံသားနှစ်ဦး အနက်တစ်ဦးမှာ ကြီးကြပ်သူဖြစ်ပြီး ကျန်တစ်ဦးမှာ မြေတူးစက်မောင်းသူဖြစ်သည်။
ထို့နောက် ကယ်ဆယ်ရေးအဖွဲ့များက နေရာမတူသည့် ပိတ်မိနေသူသုံးဦးစလုံး၏ နေရာများကို ရှာဖွေမှုများ လုပ်ဆောင်ရာ မြန်မာအလုပ်သမားကို ပထမဆုံးရှာတွေ့ ခြင်း ဖြစ်သည်။
ကယ်ဆယ်ရေးအဖွဲ့များသည် မတော်တဆမှုဖြစ်ပွားစဉ်ကတည်းက လိုဏ်ခေါင်းအတွင်းသို့ အောက်ဆီဂျင်များ ပို့လွှတ်ခြင်း၊ မြေသားများ၊ အပျက်အစီးများကိုဖယ်ရှား ရှင်းလင်းခြင်းများလုပ်ဆောင်ကာ ပိတ်မိ နေသူများကို ရှာဖွေနေခဲ့ခြင်း ဖြစ်သည်။
ယခုအခါ ပိတ်မိနေသူများ အားလုံး၏ နေရာကိုတွေ့ရှိပြီ ဖြစ်သောကြောင့် ၎င်းတို့ကို ကယ်ဆယ်နိုင်ရေးအတွက် အစွမ်း ကုန်လုပ်ဆောင်သွားမည် ဖြစ်ကြောင်း တာဝန်ရှိသူများက ပြောထားသည်။
Ref: NT