အများကောင်းကျိုးသယ်ပိုးခြင်း

အများကောင်းကျိုးသယ်ပိုးခြင်း

မြန်မာနိုင်ငံတွင် မူးယစ်ဆေးဝါးတားဆီးနှိမ်နင်းရေးကို  အမျိုးသားရေးတာဝန်တစ်ရပ်အဖြစ် နိုင်ငံတော် အစိုးရအဆက်ဆက်က သတ်မှတ်ဆောင်ရွက်လျက်ရှိသည်။ မူးယစ်ဆေးဝါးပပျောက်ရေးအတွက် တိုက်ဖျက်လျက်ရှိရာတွင် ကုလသမဂ္ဂ၊ အိမ်နီးချင်းနိုင်ငံများ၊ အာဆီယံနိုင်ငံများ၊ မဲခေါင်ဒေသတွင်းနိုင်ငံများ၊ ဘင်းမ်စတက်အဖွဲ့ဝင်နိုင်ငံများ၊ နိုင်ငံတကာမူးယစ်ဆေးဝါးထိန်းချုပ်ရေးဆိုင်ရာ အဖွဲ့အစည်းများ၊ UNODC၊ AFP၊ DEA၊ NNCC၊ ONCB စသည့်နိုင်ငံတကာအဖွဲ့အစည်းများနှင့်လည်း ပူးပေါင်းဆောင်ရွက်လျက်ရှိသည်။ မူးယစ်ဆေးဝါးသည် လူသားတို့၏ အသက်အိုးအိမ်များကို ဖျက်ဆီးနေသည့်အရာဖြစ်သည်။ မူးယစ်ဆေးဝါး ထုတ်လုပ်ရောင်းဝယ် သုံးစွဲမှုများရှိနေသမျှကာလပတ်လုံး လူမှုဒုက္ခများရှိနေမည် ဖြစ်သည်။

မြန်မာနိုင်ငံ၏ မူးယစ်ဆေးဝါးပြဿနာမှာ  ပထဝီဝင်အနေအထားအရလည်းကောင်း၊ နိုင်ငံအတွင်း လက်နက်ကိုင် အကြမ်းဖက်သောင်းကျန်းသူ အဖွဲ့အစည်းများ  တည်ရှိနေမှုအရ လည်းကောင်း ဖြေရှင်းရန်  ခက်ခဲနေဆဲအခြေအနေဖြစ်သည်။ တပ်မတော်၊ မြန်မာနိုင်ငံရဲတပ်ဖွဲ့နှင့် ဌာနဆိုင်ရာများအနေဖြင့်  မူးယစ်ဆေးဝါး တိုက်ဖျက်ရေးကို စစ်ဆင်ရေးကြီးများဆင်နွှဲပြီး တိုက်ဖျက်ခဲ့သည်။ အောင်မြင်မှု များများစွာ ရှိခဲ့သော်လည်း မူးယစ်ဆေးဝါးကင်းစင်ပပျောက်သွားသည်ဟူ၍ မရှိသေးပေ။

မြန်မာနိုင်ငံတွင် မူးယစ်ဆေးဝါးတားဆီးနှိမ်နင်းရေးကို ထိရောက်စွာ အကောင်အထည်ဖော်နိုင်ရန် ၂ဝ၁၃ ခုနှစ်မှ ၂ဝ၂၃ ခုနှစ်အထိ အထူးစစ်ဆင်ရေး ၃၉ ကြိမ်ဆောင်ရွက်ခဲ့သည်။ ယခုနှစ်တွင်လည်း အထူးစစ်ဆင်ရေး Operation 39/24(2024)  ကို တစ်နိုင်ငံလုံးအတိုင်းအတာဖြင့် အကောင်အထည်ဖော် ဆောင်ရွက်လျက်ရှိသည်။ မြန်မာနိုင်ငံအတွင်း ဖြစ်ပေါ်နေသည့် အကြမ်းဖက်လက်နက်ကိုင် ဆူပူသောင်းကျန်းသူများသည်  မူးယစ်ဆေးဝါးထုတ်လုပ်မှုနှင့် သယ်ဆောင်ရောင်းဝယ်မှုများ အပါအဝင် မူးယစ်ဆေးဝါးလုပ်ငန်းများတွင် ပါဝင်ပတ်သက်လျက်ရှိသည်။ ထိုသို့ရှိနေကြောင်းကို ဖမ်းဆီးရမိသည့် မူးယစ်ဆေးဝါးအမှုတွဲများက သက်သေခံလျက်ရှိသည်။

အကြမ်းဖက်သောင်းကျန်းသူ အဖွဲ့အစည်းအများစု၏ ဝင်ငွေရလမ်းကြောင်းများမှာ နိုင်ငံတော်၏ သယံဇာတများအား တရားမဝင် ထုတ်ယူရောင်းချခြင်း၊ မူးယစ်ဆေးဝါးလုပ်ငန်းများ လုပ်ဆောင်ခြင်းတို့ ဖြစ်သည်။

ထို့ပြင်အကြမ်းဖက်လက်နက်ကိုင် သောင်းကျန်းသူတို့သည် အတင်းအဓမ္မစုဆောင်းထားသော လူငယ်များကို မူးယစ်ဆေးဝါးဖြင့် ထိန်းချုပ်ထားပြီး ဒေသန္တရတိုက်ပွဲများတွင် အသေခံတိုက်ခိုက်ခိုင်းနေကြကြောင်း လူမှုကွန်ရက်များတွင် ကြားသိနေရသည်။ ပြည်တွင်း၌ လက်နက်ကိုင်သောင်းကျန်းမှုများ အရှိန်မြင့်လာချိန် မှစကာ မူးယစ်ဆေးဝါးများကို ပမာဏကြီးမားစွာ သယ်ဆောင်မှုများ ပိုမိုများပြားလာပြီး ဖမ်းဆီးရမိမှုများလည်း ပိုမိုများပြားလာသည်။ သြဂုတ်လအတွင်း ဘီလီယံနှင့်ချီတန်ဖိုးရှိသည့် မူးယစ်ဆေးဝါးများ ဖမ်းဆီးရမိမှုများကို နေ့စဉ်ထုတ်သတင်းစာများ၌ ဖော်ပြထားသည်။ သြဂုတ်လ ၃ ရက်နေ့ထုတ်သတင်းစာတွင် ဖျာပုံမြို့နယ်၌ မလေးရှား နိုင်ငံပင်လယ်ရေပြင်သို့ ပို့ဆောင်မည့် ငွေကျပ် ၆၉ ဘီလီယံတန်ဖိုးရှိအိုက်စ်(မက်သ်အဖက်တမင်း) ၂ ဒသမ ၃ တန်နှင့်အတူ မူးယစ်မှောင်ခိုဂိုဏ်းအဖွဲ့အား ဖမ်းဆီးရမိခြင်း၊ သြဂုတ်လ ၁၂ ရက်ထုတ်သတင်းစာတွင် စစ်ကိုင်းတိုင်းဒေသကြီး ကလေးမြို့နယ်၌ ငွေကျပ် ၂ ဒသမ ၁၉ ဘီလီယံတန်ဖိုးရှိ ဘိန်းဖြူ ၁၉  ဒသမ ၈ ကီလိုနှင့် စိတ်ကြွရူးသွပ်ဆေးပြားခြောက်သိန်း ဖမ်းဆီးရမိခဲ့ခြင်း၊ သြဂုတ်လ ၁၄ ရက်ထုတ်သတင်းစာတွင် စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့တွင် ငွေကျပ် ၁ ဒသမ ၄၃ ဘီလီယံတန်ဖိုးရှိ  စိတ်ကြွရူးသွပ်ဆေးပြား ၇ ဒသမ ၁၅ သိန်းဖမ်းဆီးရမိခြင်း၊ သြဂုတ်လ ၁၉ ရက်ထုတ်သတင်းစာတွင် စစ်ကိုင်းမြို့နယ်နှင့် ကလေးမြို့နယ်တို့၌ ငွေကျပ် ၄ ဒသမ ၂ ဘီလီယံကျော်တန်ဖိုးရှိ ထိန်းချုပ်ဓာတုပစ္စည်း ကဖင်း ၁၃ ဒသမ ၉၇၅ တန်၊ အမိုနီယမ်ကလိုရိုဒ် ၂ ဒသမ ၃ တန်ကျော်နှင့်ဓာတုပစ္စည်း PROPIOHENONE လီတာ ၁ဝ၂ဝ ကို  ဖမ်းဆီးရမိခြင်း၊ သြဂုတ်လ ၂၆ ရက်ထုတ်သတင်းစာတွင်  ကျိုင်းတုံမြို့နယ်၌ ငွေကျပ် ၄  ဒသမ ၁  ဘီလီယံကျော်တန်ဖိုးရှိ စိတ်ကြွရူးသွပ်ဆေးပြား ၁၂ ဒသမ ၅ သိန်းနှင့်ကက်တမင်း ၄၂၇ ကီလိုတို့ ဖမ်းဆီးရမိခြင်းများ ရှိခဲ့သည်။

မူးယစ်ဆေးဝါးဖမ်းဆီးရမိမှုများ နေ့စဉ်နေ့တိုင်း ရှိနေသော်လည်း အထက်ပါ ဖမ်းဆီးရမိမှုများမှာ ဘီလီယံနှင့် ချီတန်ဖိုးရှိသည့် ဖမ်းဆီးရမိမှုများကို ကောက်နုတ်ဖော်ပြခြင်းဖြစ်သည်။ ဤမျှများပြားလှသော မူးယစ်ဆေးဝါး များအား ဖမ်းဆီးရမိခြင်း မရှိခဲ့ပါက လူသားတို့၏ အသက်ပေါင်းများစွာ ဆုံးရှုံးသွားမည်ဖြစ်သည်။

ဖမ်းဆီးရမိလိုက်ခြင်းအားဖြင့် လူတို့၏အသက်ပေါင်းများစွာ၊ စည်းစိမ်ဥစ္စာပေါင်းများစွာ ဆုံးရှုံးမည့် အရေးမှကယ်တင်လိုက်ခြင်း ဖြစ်သည်။

မူးယစ်ဆေးဝါးမှုခင်းများသည် နိုင်ငံဖြတ်ကျော်မှုခင်းများ၊ လက်နက်မှောင်ခိုမှု၊ အကြမ်းဖက်မှု၊ ငွေကြေးခဝါချမှု၊ အဂတိလိုက်စားမှုများနှင့်ပါ ဆက်နွှယ်လျက်ရှိသည်။ တရားမဝင်ကုန်သွယ်မှုများ ဖမ်းဆီးရမိမှုများတွင်လည်း  မူးယစ်ဆေးဝါးနှင့်ဆက်စပ်ပစ္စည်းဖမ်းဆီးရမိမှုများရှိသည်။ မူးယစ်ဆေးဝါးဖမ်းဆီးရမိမှုများနှင့် ပတ်သက်၍  လုံခြုံရေးတပ်ဖွဲ့ဝင်များ ပါဝင်သောပူးပေါင်းအဖွဲ့၏ ဆောင်ရွက်ချက်များမှာအားရဖွယ်ကောင်းလှသည်။ မူးယစ်ဆေးဝါး တိုက်ဖျက်ရေး ဆိုသည်မှာလည်း အမျိုးသားရေး တာဝန်တစ်ခုဖြစ်ပြီး မူးယစ်ဆေးဝါးများနှင့် မူးယစ်ဆေးဝါးဂိုဏ်းများဖမ်းဆီး ရမိခြင်းများမှာ အများကောင်းကျိုးကို သယ်ပိုးခြင်း ဖြစ်ပါကြောင်း ဂုဏ်ပြုရေးသား လိုက်ရပေသည်။       ။